Пирдан сётон

Сюан шулдыр ортчем бере егит кузпалъёс асьсэос радъяны кутско азьпал улонзэс. Туала арын егитъёс тыршо яна потыны (асьсэ понна нимаз улыны). Со валамон. Котькуд адями ачиз дурыны кулэ аслэсьтыз шудзэ, озьы ик шуыны луоз выль кылдэм семьяос сярысь но. Вашкалаос сӥлы каро вал ӵош огазьын улонэз, нош туала улон асьмеды нимаз-нимаз висъетъёслы люкылэ. Азьло дыръя вордэм атайлэн юрт вӧзаз кышно басьтэм пиос чур гинэ кеносъёс пуктылӥзы. Вань ужзэс ӵошен, урче ужазы но улӥзы. Сыӵе семьяосын кузёяськиз тупаса улон, ог-огедлы юрттон, анай-атаез гажан но утён. Туала улонын шӧдӥське егитъёслэн анай-атайлэсь палэнскемзы. Соос малпало анай-атайтэк но будэтомы нылпиосмес. Егит муртлэн валанэз ичи на угось. Будӥсь нылпиос туэ уг шӧдо ни песяйзылэсь небыт вешась киоссэс, туж уг тырмо туала нылпиослы песянайлэн, песятайлэн верам выжыкылъёссы, нуны веттан гуръёссы. Соин уг будо меда асьме пӧлын из сюлэмо адямиос. Пичи дыръязы вешамтэ, чупамтэ нылпиосмы уг гынмо меда? Анай-атайёс, асьмеос отын янгыш ӧвӧл меда? Валэктыны турттӥськомы: асьмеос мукет вакытэ улӥськомы, туала адямилэн улон шоры учконэз но мукет. Кинэ меда буйгатыны турттӥськомы. Улон мукет палзэ но возьматэ. Учке ай, кыӵе воштӥськизы туала улонын дунъетъёс. Вашкала дырысен удмуртъёс данъяськизы зэмос ужась адямиосын. Со адямиез гажазы но солэсь верамзэ пелязы понӥзы. Туала улонын нырысетӥ интые потӥз коньдон. Коньдонэд вань ке, тон адями, нош ӧвӧл ке, тонэн уз но вераське, кылэм-адӟем но уз каре. Кыкетӥез бадӟым ужпум – со анай-атаез гажан но соос сярысь сюлмаськон.

Малы берло дыре та выллем юанъёс кылдо? Асьме нылпиослэн воштӥськизы анай-атайёсын кусыпъёссы. Аслэсьтыз пытьызэ кельтэ компьютеризация но. Валаськом, туала улонын сотэк азьлань вамыш уд лэсьты. Егитъёсмылэн йыразы малпан кылдэ: ми тӥлесьтыд индылэмдэс кылзытэк но ваньзэ асьмеос лэсьтыны быгатӥськомы. Анай-атайлэсь палэнскыса асьмеос зымиськомы туала улонлэн ужпумъёсаз. Мае адӟиськомы асьмеос, телевизор шоры учкыса но ураме потыса? Кинъёс луозы будӥсь нылпиосмы? Соос асьмеды сюдӥсь-вордӥсь луозы меда? Ваньмыз та юанъёс инмысь басьтэмын ӧвӧл. Кытын вань на аслэсьтыд калыкедлэсь традициоссэ гажан но утён, отын вань на азьланезлы оскон. Ойдолэ бен асьмеос но азьлантоме вераськонмес.

Кышно ваем беразы егитъёсты нимаз карыны ӧз дыртэ. Нырысь ик выль кенлэсь ужаны быгатэмзэ эскеризы, гурт калык пушкын ассэ воземзэ, сямъёссэ валаны тыршизы. Выль кенэз одно ик кызьы ке но эскеремзы потылӥз. Кылсярысь, мунчое пырыкузы выль кенэз янгышен кезьыт вуэн пылато но мукет. Валаны тыршизы, кин вуиз соослэн семьяязы. Ма кароно, кызьы но малы дышетоно сое, зэмос кузё кышно карон понна. Мукет калыкъёслэн сямен ик, удмуртъёслэн но, улон кышномурт бордын возиське. Соин ик выль кенлэсь ужзэ нырысь ик эскеро. Со понна ик удмурт йылолъёсын вань пирдан сётон. Улыны кутскись муртлэн аслаз пудо-животэз но мед луоз. Пудо-животэн эшъяськиз ке, сюлэмзэ ырак лэземез луоз. Со нош берло юрттоз выль кенлы вордскем нылпиезлы сюлэмзэ усьтыны. Тӥни озьы улонын ваньмыз герӟаськемын трос пумо векчи нюжаосын.

Пирдан сётэ нырысь ик кирос агай яке кирос апай. Аслэсьтыз малпанзэ кирос агай яке кирос апай вераны кулэ семьяезлы. Вашкала дыръя та сэбед бер сӥзьыл яке толалтэ ортче вылэм. Милям гуртамы та сэбедэз Вуж выль арозьгес ортчытъяло. Отӥяз гон но вырӟе ини. Гон вырӟон дыръя сётъяськыны уг яра ини. Туж сюлмасько: пирдан сётон «ки бер медаз лу» шуыса. «Ки бер луон» – со пудо йылэмысь дугдэ ке озьы шуо. Соку шуо ини: «Кимы ведь ӧз тупа».

Пирданлы одно ик мумы пудо-живот сёто. Ми палан пирданлы ыжпигес сёто. Мылкыд карись сётыны быгатэ ӟазег но, ӵӧж но. Ыжлэн гонэз носки, пыдвыл керттыны мыноз, такаез вордскиз ке, сӥль карыны но луоз.

Сэбедлы умой дасяськыны кулэ. Вина пӧзьто. Нырысь ик корка пушез чылкытато: сэрегъёсысь чонари вотэсъёсты утялто, выж мисько, корка пушкы чебер пужъятэм ӵушконъёс ошыло, изён интыосты ваньзэ чебер тупатъяло.

Кышномуртлэн аслаз йыр висёнэз: маин тырмытоно ӝӧк вылэз, маин шумпоттоно куноосты. Таиз ини котькуд семьялэн аслаз. Кудаз семьяын пӧрало кыстыбей, кин ке яратэ тоторот пӧраны, нош кинлы ке туж кельше шаньги. Сюлмасько пӧсь сиён сярысь но. Со понна сӥлен шыд пӧзьто. Туала арын егитъёслы мылкыдзыя трос пӧртэм сиён-юон пуктыны луоно.

Пирданлы лыктӥсьёслэн асьсэлэн сюлмаськонзы: кинэ куное чортоно, ма дӥсяно. Али гинэ туклячи луэмъёс тыршо выль дэрем вурытыса мыныны, шулдыр кырӟанзэс дасяло.

Одӥг гуртысь ке туклячиосты, соос ӝыт пудозэс утялтыса вуттӥськыны тыршозы. Мукет гуртысь ке, вазьгес потыны тыршо. Ми палан пирданлы лыктӥсьёс сьӧразы бӧлякысь кинэ ке куно но сьӧразы вайыны кулэ. Собере кинлы ке но кузьым, нянь, бискыли пыжо на. Буш киын пирдан сётонэ уг ветло. Сюрес вылэ вӧсяськыса потто, шыд лым сиё, собере вӧен нянь веръяло но шуо: «Осто, Инмаре! Пирданлы мыныны дасяським. Ветлон но бертон сюресмы капчи но вольыт мед луоз, вӧй вылтӥ мыныса, вӧй вылтӥ мед бертом. Малпам ужмес быдэстыны юртты, Вылӥсь Инмаре! Бадӟым тау юрттэмед понна».

Пирданлы ивор сётэм бере, куддыръя ёрмон дыр но луэ. Соку эмеспиос пирдан вайыны гинэ берто. Озьы ик ӝӧквыл пукто, лыктэм муртъёсты куно каро. Вань сюлэмзэс поныса тыршо лыктэм куноослы асьсэлэсь мылкыдзэс сётыны. Татын кузёос но лыктэм куноос куспын кырӟан-веранъя конкурс азьланьтӥське.

Ми доры но лыктылӥллям

Ӟеч, дыр, гинэ куноос.

Мар ӟеч кылмес вералляса,

Али ке но пукомы.

Кырӟаны соку ик кутско лыктэм куноос.

Малы меда дунне вылэ

Яратса улон кылдэм?

Малы меда со яратон

Аслыд улын кылдымтэ?

Ыжпи сёто, кечпи сёто,

Яке курегпи сёто.

Коть ош медло, коть мес медло,

Аслыз тыр йӧлыз медло.

Вашкала дыръя, пирдан нуэм бере кӧня ке улыса, нош ик вуо вал. Сое ми палан пирдан понна «бекче юон» шуо. Туала арын та кык сэбедъёс огазеяса ортчо ини. Пирданлы лыктэмъёс сьӧразы «бекче» но ваё ини. Та «бекче юонэ» одно ик ӧтё бӧлякъёсты. Та сэбед выль туклячиосын умой-умой тодматсконлы укша. Туклячиос верало кинлэн но кинлэн ӵыжы-выжы луэмзэс, верало кытын но мар ужамзы сярысь. Озьы ик тодматско бӧлякъёсын. Та пумиськонъёс кин тросгес вина юоз ӵошатскон ӧвӧл, ог-огдэ мургес тодон но кырӟанъёсын, эктонъёсын узырмытэм сэбед. Тыршылӥзы туклячиоссылы сюлмысь потэм вань ӟеч кылзэс вераны, Вань сюлэм шунытсэс усьтыны. Та кырӟан-веран ик удмурт сэбедлэн шулдыр интыез луэ.

Аспӧртэмлыко люкетэз та сэбедлэн луэ на «бекче юон». Лыктэмъёс (кинлы пирдан сётӥзы) сьӧразы бекче ваё. Ӵӧж яке ӟазег понна ваё ӝыны черык вина, нош ыжпи яке кунян понна – черык вина. Та винаез юыны ӧтё бӧлякъёсты. Лыктэм беразы куноос ӝӧк вылэ колды нянь, пӧраськем но векчи копейкаосыз колды нянь вылэ поно. Черык нырйылэ вашкала дыръя кикур пасьта басма, яке лента, яке кӧэм айшет кал, нош туала арын – кышет яке ӵушкон поно. Лыктэм куноос ваем черыксэс сектаны кузё кышнолы сёто. Со аслаз мылкыдэзъя со черыкез сётэ бӧлякысь муртлы. Черык нырысь кузьымез аслыз басьтэ, собере нырысь чарказэ веръяны сётэ черыкез ваем кузёлы. Соос веръям бере чаркаез сёто пирдан сётӥсьёслы. Собере гинэ - шунды бергамъя вань лыктэм калыклы. Вашкала дыръя бекчеез веръяло гинэ вылэм, нош туала арын винаез трос юиськомы. «Эсэпсэ тодыса юоно винаез. Вина адямиез погыртэ», – шуо калыкын. Возьытэ усёно ӧвӧл. Таӵе сэбедъёсын адямиез чаклазы. Кинлэн кыӵе сямыз, кинлэн кытын пиртэш интыез. Жугиськыны яратӥсь муртъёсты таӵе сэбедъёсы уг басьто. Тыршизы басьтыны арганэн шудӥсьёсты, шулдыр кырӟасьёсты но капчи но мылкыдо эктӥсьёсты. Туклячиос соосты ӟеч кылын гинэ мед тодазы ваёзы.

Кырӟам-верам бере, кузёос лушкемак ӧтьылӥзы эмеспизэс яке киросной нылзэс но коргидэ пирдан пыртыны потто. Пирданэз коргидысь пыртыкузы таӵе кылъёс верало вал: «Кылемез но пудомы мед йылоз, пирдан сётэмез но гид тыр, луд тыр мед луоз!»

Корка пыртэм пирданэз мумыкор сьӧры потто. Та пирда нэз табере ас киязы куто пирданлы лыктэмъёс. Пирдан шоры учкыса пӧртэм ушъян кылъёс верало: «Пыдъёсаз но носкиез вань. Сьӧд-сьӧд чилясь ыжгонэз». Собере пирданэз выль ку зёос сюдыны кулэ. Ӵӧжлы но ӟазеглы йыды яке чабей пырты са сётоно, нош ыжлы но кунянлы нянь сюдо. Пирданзы одно ик выж вылэ пытьызэ кельтыны кулэ. Ыж сылэм интыяз кот яке векчи сьӧд кӧжыос кельтэ.

Лыктэм куноос бертыны дасясько. Туклячи соосты нош ик ӝӧк сьӧры пуктэ но, вань сюлэмзэ поныса, кырӟаса вера:

Кема возьмам, кема возьмам,

Сьӧд сутэрлэсь кисьмамзэ.

Кема возьмам, кема возьмам,

Тӥ туганлэсь лыктэмдэс.

Кылзэ али, ой, эшъёсы,

Арган куара мар вера:

«Нэноку но, нэноку но,

Ум люкиське», – со шуэ.

Тӥ уд лыктэ ми доры но,

Ми ум мынэ тӥ доры.

Ку бон адӟом, ку тодмалом

Одӥгмес но одӥгмы.

Ум люкиське, ум люкиське,

Ноку но ум люкиське.

Яратоно туганмылэсь

Ноку но ум люкиське.

Ыжпилэсь пыдъёссэ гозыен керттыло, собере салазкие пуктыса нуо. Кузё кышно куноосызлы салам тыре на. Ваньзы «бекче юонэ» лыктэм калык ураме пото но келясько.

Нош пирданэн бертӥсьёс пырак асьсэ корка уг пыро на. Соос одно ик пирданзэс асьсэ рядысь улынгес улӥсь корка пыртало на. Со коркан озьы ик пирданзэс сюдо, кузёоссэс лэзем винаен сектало. Кошкыкузы тау каро но табере доразы нырысь ик корка пырто. Пирданзэс сюдо, тодманы косо. Коркась ваньзы нылпиос но семьяос пирданэз нянен сюдо, вешало.

Кузёос пирданзэс коргидэ потто. Коргидэз усьтыкузы шуо:

– Гид кузё, сьӧд ыжпи пыртӥськомы, яраты но уть сое!

Собере ужзэс быдэстыса корка пыро. Озьы йылпумъяське гуртамы ортчись «пирдан сётон» сэбед .