Сӥзьыл кисьтон

Удмуртъёс вашкала дырысен ик оскыса улӥзы: инбамын уло Инмаръёс, музъем вылын – пӧртэм калыкъёс. Нош вань на сопал дунне. Сальяос али но оско сопал дуннелы: отын адямиос озьы ик уло, пӧртэм ужъёсты быдэсъяло, шулдыръясько, сюан но ортчыто.

Кулэм муртъёсты буре ӧд вайы ке, соос кысканы кутско, пе. Нырысь кыскало пудо-животэз (быре ӟазег, ӵӧж, ыжпиос, кунян, скал). Пудо-живот бӧрсьы басьтӥсько юртъер котыре но отын улӥсьёс борды. Кылэмды вань, дыр, йыг-йыг таза будӥсь адями син куспын куасьмыны кутске. Соку туноос озьы ик шуо: ма тӥ кулэм анай-атайёстэм вунэтӥллямды ук.

Семьяен улон умой мед радъяськоз шуыса, ми палан улӥсь калык котьку но арлы кык пол кисьтон ортчытэ. Озьыен, кисьтон – со кулэм муртъёсты буре ваён, нош ӟуч сямен «поминки», шуо.

Кисьтонэз ортчыто быдэс бӧлякен. Сӥзьыл кисьтонлэн нимаз нуналэз ӧвӧл, сое котькудӥз бӧляк ваньмемезъя радъя. Сӥзьыл кисьтонэз одно ик ортчытоно Пукро нуналлэсь азьло, со бере уг яра ни, шуо. ӵош люкаськыса кенешо, нунал быръё.

Вераны кулэ таӵе тодметсэ но. Кисьтон ортчытӥське шур кошкемъя, гуртлэн пумаз сылӥсь корка бордысен, собере, шур кошкемъя ик, уллань васько.

Кисьтонэз тодыса но, ми палан одно ик ивор сётыса ветло:

– Ужды бырем бере ми тӥледыз кисьтонэ возьмаськом.

Кисьтонэз огшоры уг ортчыто: нырысь ик гидкуазез, юрт котырез, корка пушез чылкытато, сузяло, мисько. ӵукна ик така вандо, вӧсясько. Кышноос гур котырын табань, перепеч, шаньга, пӧртэм пумо пирожкиос пӧрало: льӧмен, шуэн, кубистаен, кешырен. Ӝӧк вылэ пукто пӧртэм салатъёс. Одно ик сӥль пуктыны кулэ, сӥлен лым, зыретэн табань. Вунэтыны уг яра сурез, сюкасез, аслэсьтыд пӧзьтэм винадэ.

Пӧраськемез пуртэн уг вандыло. Лыктэм мурт яке семьяысь сиськисьёс сое ваньзэ чигтыса гинэ басьтозы но сиёзы. Пӧраськемзы но сиськемзы бере бӧлякъёс вамышто шай вылэ. Отчы буш киын мыныны уг яра, одно ик басьтыны кулэ пӧраськемез, пичигес посудаен вина. Вераны кулэ, аракы пӧзьтэмын луыны кулэ нимаз кисьтонлы шуыса.

Нырысь ик кожо алигес улонысь кошкем муртлэн гу вылаз. Отчы дугдыса куясько.

– Замбет Колягай, тани сӥзьыл кисьтон ортчытӥськом, тазьы ик ӵош, огазьын тупаса, ог-огдылы юрттыса улэ, ӵош сиськелэ, милемлы тазалыко, шудо-буро улыны юрттэлэ, будӥсь нылпиосмес, пудо-животмес ӟеч будэтыны юрттэлэ. Туннэ ваньдэс куное ӧтиськом. Ваньды бертэлэ.

Таӵе кылъёс вераса, ваем нянез, пӧраськемез сьӧрлань куяло, пичияк гинэ ымазы но поно. ӧд ке веръя, иназ уз мыны, шуо. Шай вылтӥ вань матысь тодмоосты ортчыса, ивор сётыса, гуртэ бертыны пото.

Вашкала дыръя кисьтонэ пересьёсгес ветло вал. Пиосмуртъёсыз одно ик ӝӧк сьӧры пукто, нош нылкышноос кышнопала интыясько. Кисьтонысь нокин но, ноку но кудӟыса уг берт вал.

Мукет сэбедъёсын арганэн юмшало ке, кисьтонын эктыны гинэ уг яра. Котькуд коркан тодазы ваё улонысь кошкем адямиосты, соослэсь ӟеч лэсьтэм ужъёссэс, кырӟало со адямиослэсь яратоно кырӟанъёссэс.

Кисьтонын мӧзмыт уг луы. Лыктӥсь муртъёс капкаетӥ пырыку, нылпиос сильсьӧразы ву но кисьтало. Солы нокин но уг уродъяськы, озьы кулэ, шуо. Ӝӧк сьӧрын пукыкузы, ымныразы зыретэн табань но лякылӥзы. Чаркаысь винаез вуэн но вошто. Озьы гор-гор сепекъяса, шулдыр ортчылӥз вашкала дыръя сӥзьыл кисьтон.

Котькуд коркан кулэм муртъёслэсь яратоно сиёнъёссэс пуктылӥзы:

– Аляш Олексанлэсь яратоно шуняньзэ веръялэ ай. Ачим пӧрай. Котьма ке но ӟеч мед улозы ини сопал дуннеязы. Тани, Олексан, иназ мед мыноз.

Котькуд бӧлякын вань тужгес но маскара адямиос. Соос одно ик вералозы улонысь тумошо учыръёс сярысь. Пересьёс кӧтсэс посыса серекъяло вал. Соин но, дыр, пиналъёс туж яратылӥзы кисьтонэ ветлыны, отысь соос трос паймымонзэ кылылӥзы. Котькуд сэбедлэн сямен ик, сӥзьыл кисьтонлэн но аслаз радэз вань. Кисьтонэ лыктэм муртэ нырысь ик ӝӧк сьӧры пуктозы. Одно ик веръяно сӥлез, пӧраськемъёсты, ӟеч кыл вераны вунэтоно ӧвӧл. Ӝӧк сьӧрысь потыку, тау кароно. Собере кутске куяськон, келиськон .