Тэльмурт пи сярысь мадь

Одӥг Тэльмуртлэн куинь пиез вылэм. Кыкез пиосыз айызылэсь кылзӥськыса улӥллям, нош покчиез пиез чик уг кылзы вылэм. Тонэ мынам дышетэме луоно ӧвӧл шуыса, аиз сое калыке куштэм.

«Тон пӧсез но, кезьытэз но мед адӟод, сотэк тон дышоно маке ӧвӧл», — шуэм. Ыстэм сое одӥг гуртэ: «Мын, гуртын кык пересь муртъёс ваче уло, пиналъёссы ӧвӧл, ужамзы уг лу ни. Со пересьёсыз кулытозязы сюд!».

Мынэм ини со пиез гуртэ. Вуэм отчы но со пересь муртъёс доры пырем. «Ляльчи кулэ-а?» — шуыса юа, пе. Пересь, пе шуэ: «Кулэ вылэм но, уксёмы милям ӧвӧл, мае сётомы?».

— Мыным уксё кулэ ӧвӧл, — шуэ Тэльмурт пи.

— Уксё кулэ ӧвӧл ке, улод ке ул, — шуэм солы пересь.

Озьы Тэльмурт пи ляльчи луэм.

Та пересьёслэн корказы но, музон гидзы-куазы но сисьмем ини вылэм. Со ляльчизы кутскем ини тэль ворттыны. Нош валзы пересьёслэн туж начар, кулоно кадь вылэм ини. Со ляльчилэн начар валэн тэль ворттэмезлы калыкъёс паймозы вылэм. Со куинь-ньыль корен ворттэм, гурезьёстӥ ачиз тубтоз вылэм. Озьы ворттыса, корка тырмытэм. Выльзэ лэсьтэм. Собере сое адямиос но вемеязы чортылыны кутскиллям. Ваньмыз доры, пе, мынэ вал, кин ӧте. Озьы ньыль ар улэм ини со пересьёс дорын. Пересьёс кыксы ик кулӥллям. Ватэм со соосыз, огназ кылем.

Огпол сое, ужамезлы синмаськыса, нош ик корка кор поттоназы ӧтиллям. Со мынэм но начар валэныз нош ик ваньмызлэсь трос кор ворттэм. Вемее ӧтем мурт ужасьёссэ туж утялтэм но со ляльчиез тужгес сектам. Та ляльчи юа ини кузёезлэсь но, калыкъёслэсь но:

— Мон табере капчияй ини, шудыса кошкемме учкемды потэ-а?

Калыкъёс, пе, шуо:

— Ойдо шуд, шуд! Малы уд учкы сыӵе ужась адямилэсь шудэмзэ огпол?

Та ляльчи шумпотыса шуэ, пе, ини:

— Учке табере мынэсьтым шудыса кошкемме.

Кошкыкуз со адямиослэсь юртсэс-ерзэс одӥгтэм мыддорин берыкъяны но пазяны кутскем. Бӧрсяз гидкуа коръёс зор сямен пазяськыса кылиллям. Аслэсьтыз лэсьтэм корказэ гинэ кельтэм на. Ачиз пыр дугдылытэк аиз доры кошкем. Калыкъёс паймыса чабкиськыса кылиллям. Собере соос, юрт лэсьтытозязы, коркаяз нянь пыжыса улӥллям.