Пислегин Николай Викторович
Герой выжы
Историяя, кылъя но литературая Удмурт институтын ужа егит удмурт тодосчи — история наукаосъя кандидат Николай Пислегин. Шаермылэсь историзэ эскере 18-тӥ даурысен 20-тӥ даур кутсконозь. Трос вераны тодэ ас выжыез сярысь: удмуртъёс пӧлын нырысетӥез Совето Союзысь Герой луиз солэн матысь ӵыжы-выжыез Виктор Пислегин.
1 минут гинэ
— Николай Викторович, сыӵе тодмо адями кызьы тӥледлы ӵыжы-выжы луэ?
— Виктор Кузьмич Пислегин — бабушелэн братэз, — маде Николай Пислегин. — Виктор Пислегин вордскиз 1920-тӥ арын 20-тӥ апреле туала Ува ёросысь Пуштовайын. Бубиз Кузьма Ионович герман оже мынэм но пленэ шедем. Отысен Луиза нимо поляк нылкышноен улыны кутскем. 1919-тӥ арын Кузьма Пислегин кышноеныз но вордскем пиеныз Пуштовае бертэм. Кышноез эшшо 1 пи вордэм но кулэм. Соин валче Кузьма бултыр ваем — бускель гуртысь Педосьяез. Кыкетӥ кышноез ныл вордэм — поляк кышнозэ тодаз возьыса, воргорон сое Лиза шуэм. Вот ӵапак Елизавета Кузьмовна — со мынам бабуше.
Бабуше тодаз вайылэ, кызьы огпол муминыз Вавож ёросын медъяськыса ужамзы бере доразы сиён-юонэн бертӥзы. Озьыен, куанер уло вал, дыр, эшшо ке Кузьма 1935-тӥ арын кулӥз, со бӧрсьы югыт дуннеысь кошкиз бадӟымез Володя пиез. Соин валче но, вылды, 15 аресъем Виктор нырысь Иже, собере Сталиногорске (али Новомосковск) ӵыжы-выжыосыз дӥне кошкиз. Бадӟымгес мед кожалозы но уже мед кутозы шуыса, Володя агаезлэсь документъёссэ сьӧраз басьтэм. Соос юрттӥллям, вылды, угось Ижын Виктор ужаз почтаын, нош Сталиногорскын — заготконтораын.
Ассэ 2 арлы бадӟым кариз бере, 17 аресъем Кузьмаез 1937-тӥ арын Горд армие басьтӥзы, танкистэ дышетӥзы. 1939-тӥ арын кутскиз финъёсын ожмаськон. 1940-тӥ арын 10-тӥ феврале Кузьма Пислегинлэн 62-тӥ танковой полкез Львовысь Ленинград пала вуиз. 3-тӥ мартэ Туппури-Саари шормуӵез басьтыны вырыкузы, башенной стрелоклэн Кузьма Пислегинлэн танкез ӝуаны кутскиз. 3 кузя танкистъёс тылпуэз вормыны быгатӥзы, но окружение шедизы. Тушмон кӧня ке пол танк вылэ омырскылӥз, но асьме боецъёс ӧз сётске, шоразы ыбылӥзы. Со куспын В. Пислегинлэн кияз пуля йӧтӥз. Пеймыт луэм бере экипаж танкысь потӥз но ожмаськыса асьмелэнъёс доры вуиз.
В. Пислегин, госпитальын эмъяськыкуз, тодӥз, солы но эшъёсызлы 1940-тӥ арын 21-тӥ мае Совето Союзысь Герой ним сётэмын шуыса. Бурмемез бере герой ужаз Ленинградысь военкоматын, пумен средней образование басьтӥз, бронетанковой войскоослэн академиязы куриськон гожтӥз вал но — война кутскиз. В. Пислегин Ленинград котырын 24-тӥ танковой дивизиысь танковой взводэн, разведчикъёслэн ротаенызы кивалтӥз. 1941-тӥ арын 24-тӥ июле Югостицы гурт дӥньын танкеныз валче ӝуаз. Солы 21 арес гинэ вал.
Кинлэн Виктор Пислегин сярысь тросгес тодэмез потэ, Википедиез мед лыдӟоз — отысь статьяез мон гожтӥ, вань на Г. Бетягинлэн «Наш земляк Виктор Пислегин» книгаез.
Совето Союзысь Герой луэмез бере Виктор Кузьмич Пуштовае кӧня ке пол бертылэм на. Самолётэн вуылэ, пе, вал. Лиза сестразэ но сюрмумызэ сьӧраз Ленинградэ нуыны малпа вылэм. Гуртоос семьязэ Герой выжы шуыны кутскиллям. Кылсярысь, бабушме Герой Лиза нимало вылэм. Но Пуштовайын малы ке нокин ноку тодаз ӧз вайылы, В. Пислегин сярысь документальной фильм но лэсьтыса кельтэмын вал шуыса. Со сярысь мон шӧдтэк шорысь тодӥ.
Удмуртиысь Архивъёсын ужась комитет огпол научно-практической конференция ортчытӥз. Отчы ӧтиллям Татарстанысь Архивъёсъя валтӥсь управленилэсь кивалтӥсьсэ Д. Ибрагимовез. Со вераз: 1939-тӥ арын «Союзкинохроникалэн» Татарстанысь отделениез «Межреспубликанский киножурнал» лэсьяны кутскиз шуыса. Со возьматъяз Татарстан, Мари но Удмурт автономной республикаосысь улонэз. Мукет материалъёс пӧлын Д. Ибрагимов возьматӥз 1940-тӥ арын пуштовайёслэсь В. Пислегинэз пумитамзэс. «Встреча с героем» фильм 1 минут гинэ кыстӥське. Но сое учкыса, доре вуэм, выжыосыныд пумиськем кадь луоно. Озьы со кинохроникая гуртоосы сярысь «Герой Советского Союза Виктор Пислегин, его деревня и родные» зарисовка гожтӥ.
Дышетӥсь ӧз луы
— Ку тӥ валады, выжыяды нимо-дано адями вань шуыса?
— Вераны уг быгатӥськы, кыӵе арескам. Сое мон тодӥсько вал кадь котьку — нырысетӥзэ шокчеме дырысен. Виктор Пислегин — удмуртъёс пӧлын нырысетӥез Совето Союзысь Герой. Нош Удмуртиын улэмъёсты оглом басьтоно ке, озьы шуыны уг луы. Угось В. Пислегинэн одӥг аре, одӥг нуналэ Совето Союзысь Герой луиз туала Каракулино ёросысь Ижболдино гуртын вордскем Павел Кирьянов.
— Тӥ пичи дырысеныды пуштовай омырен шокамын, дыр, — удмурт сямен вераськиськоды.
— Янгышаськоды. Пуштовайын мон улэмын ик ӧвӧл. Атае, Ижысь гурт удысъя академиын агрономлы дышетскыкуз, синмаськем Балезино ёросысь Котомка гуртысь зоотехнике дышетскись ныллы. Дышетсконзэс быдтытэк, нылпи ваёно кариськиллям. Озьы мон вордски Ижын. Муми, академической отпуск басьтыса, гуртаз бертэм монэным ӵош. Нош буби дышетсконзэ азьланьтэм. Ог 2 ортчыса, егит агроном дор палъёсаз агрономын ужаны кутскем. Лыктэ, пе, со Котомка гуртэ семьязэ сьӧраз нуыны, нош пизэ солы уг сёто: внукмес милемлы вордыны кельтэ — кызьы табере ми сотэк… Но буби воргорон сямзэ возьматэм. Озьы мон Ува ёросысь Кыйлудэ вуи. Та гуртэз дореным лыдъясько. Лиза бабуше бордын будӥ. Со монэным удмурт кылын гинэ вераськылӥз.
— Гурт удысын ужась адямиос историкез кызьы будэтӥллям?
— Буби Ленин нимо хозяйствоын агроном вал. Нош муми зоотехниклы дышетсконзэ азьланьтӥз, монэ сьӧраз институтэ нуллылэ вылэм. Ачим, пе, экзамен сётӥсько, тонэ эшъёсыным коридоре кельтӥсько. Ӧс, пе, усьтӥське но, тынад пичи сьӧд йырыд аудиторие мычиське: мама, мынам юэме потэ… Отӥяз 2 сестраосы вордскизы на.
Мыным котьку гуманитарной предметъёс яраллязы. Кыйлуд шор ёзо школаез йылпумъяй но бубиным Иже лыктӥмы, кудаз меда вузэ документъёсме сётоно шуыса. Пырамы гурт удысъя институтэ, Удмурт кун университетэ — сояз но, таяз но умой. Но ӧз яра город. Со луиз мынам шыпыт городэ шедеме — Глазовысь педагогической институтлэн исторической факультетаз пыри. Историен ӵош дышетӥ урок сётон методикаез, нылпи психологиез. Дышетӥсь луыса институтысь потӥ ке но, школае мыныны мылкыды ӧй вал. Институтам шуизы, кафедрае туж кельтысалмы, но буш интымы ӧвӧл.
Наукаен выро шуыса, Иже лыктӥ, Историяя, кылъя но литературая Удмурт институтэ куриськи. История наукаосъя доктор Маргарита Гришкина соку аспирантъёсты люка вал. Аспирантурае куриськисьёс тырмыт ини, шуиз. Ма карод на? Школае мынытэк ӧйлась. Ёросысьтым Вишур школаын буйгатэмъяськизы: ог 2 ар историез, географиез нуод но, директоре пуктозы. Но 1-тӥ сентябре школае мыныны ӧз кылды. Солэсь азьвыл институтысь жингыртӥзы, аспирантурае пырыны инты бушаз шуыса. Мон усьтыр-табыр сюрес вылэ потӥ.
Тодӥськоды, аспирантурае пырон понна экзамен сётоно. Со учырез мон ноку уг вунэты, угось улонам нырысьсэ историен… «3» басьтӥ: историысь сыӵе вакыт шедиз, кудзэ мон уггес тодӥськы вылэм. Кивалтӥсе Маргарита Гришкина азьын керпотоно медаз луы шуыса, аспирантураын дышетскыны туртски (турттӥ). История наукаосъя кадидат луон диссертацие нимаськиз «Власть и крестьянство Удмуртии в конце 18 — первой половине 19 века».
Собере ужай Гуманитарной но инженерной технологиосъя камской институтын, кафедраен кивалтӥ. Но 2009-тӥ арын Маргарита Гришкина монэ дораз ӧтиз но дэмлаз Историяя, кылъя но литературая институтэ кариськыны, ачим, пе, татысь кошкисько, тӥ интыям кылёды. Озьы ми история наукаосъя кандидатэн Владимир Чураковен лыдъяськиськомы Маргарита Гришкиналэсь ужзэ азьланьтӥсьёсын. Милем, конечно, Маргарита Владимировна дорозь кыдёкын ай — со быдӟым историк.
Ма со история?
— Научной ужъёстэс детективез сямен лыдӟоно: я адямиез виё, я скал лушкало, корка тыл поно…
— Йӧнала историк, мукетъёслэсь гожъямъёссэс, эскеронъёссэс ӟеч тодэм сяна, ачиз архивъёсын пукыны, первоисточникъёсын тодматскыны но йылпумъянъёс лэсьтыны быгатыны кулэ. Нош архивъёсы трос кылемын вашкала вакытысь судебно-следственной ужъёсын герӟаськем документъёс. Соос огъя улонэз возьмато: кызьы адями мукет адямиен, властен кусып возе вал. Кылсярысь, «Община в обыденной жизни крестьян Удмуртии» статьяям вераны вырисько, вань кусыпъёсты бускель (община) радъялляз шуыса. Государстволы со туж пайдаё вал: порядокез возьыны ичигес кужым бырылӥз, коньдон шыръяськылӥз. Соин валче но вань калыкъёслэн бускелен улонзы.
Кылсярысь, 1796-тӥ арын Глазовской уездысь Поломской гуртысь 20 аресъем ӟуч крестьянин Лука Вертячих но Кайской уездысь Зюзинской гуртысь 19 аресъем Ермолай Пупырев — «из вотяков новокрещен» — 3 вал лушкаллям. Соосты крестьянъёс кырмиллям, асьсэос следствие ортчытӥллям но земской судэ (али сямен полицие) нуиллям. Суд егит пиосты сюлоен жугыны но гуртъёсазы берыктыны косэм. Община курысал ке, йыруж лэсьтэмъёсты Сибире но келяны, рекрутэ но ыстыны быгатысалзы.
В. Чураковен ӵош гожтэм «Этнокультурное взаимодействие татар и удмуртов в 19 веке — начале 20 века» статьяын верамын, бигеръёсын ӵош улыса, удмуртъёс мусульманствое гуртъёсын-гуртъёсын пырылӥзы шуыса — соосты кужмысь карись ӧй вал, ас мылкыдзыя та осконэз пыӵатылӥзы. Удмурт кенакъёс бигер вуз карисьёслэсь басма, кышет ӵемгес басьяллям, таос удмурт сямен верасько шуыса, бигеръёс оскымон адямиос пото вылэм, лэся.
Со вакытэ ик кеӵевыл вуон учыръёс но луылӥзы. 1860-тӥ арын Сарапул утэмысь (вашкала вакытэ удмуртъёс уездэз озьы шуо вылэм) Большенорьинской но Бурановской волостьёсысь но Елабужской утэмысь Ильинской волостьысь кӧня ке гуртъёсысь 700 адямиос Агрызэс котыртӥллям но 13 бигеръёсты жугиллям-а мар-а — самосуд кариллям, пудо лушкаса уло шуыса. Суд пуктэмъя кӧня ке бигеръёсты ссылкае келяллям. Агрызъёслэсь лушкаськемзэс Сарапулысь земской исправник тазьы валэктэм: музъемзы улыны уг тырмы. Нош малы музъемзы ичи вал? Бигеръёс чылкыт улӥзы бере, пинал трос вордылӥзы — калыксы ӝог йылӥз.
Законлы пумит кариськоно ке, пӧртэм выжы калыкъёс туж тупаллязы. 1811-тӥ-1814-тӥ аръёсы Сарапул но Елабуга палъёсын Абдулла Сапаров но Файзулла Мунасыпов атаманъёс кылдӥллям, соослы лушкаськыны юрттӥллям бигеръёс, удмуртъёс, поръёс. 1822-тӥ-1825-тӥ аръёсы та палъёсын но Пермь губерниын пытьызэ кельтӥз черке пырымтэ удмурт Камит Усманов, солы йыружъёссэ лэсьтыны юртто вылэм бигер агай-вынъёс Вахит но Мухит Курбанаевъёс.
— Игнатий Гаврилов «Камит Усманов» трагедияз та адямиез калык пала дурбасьтӥсез сямен возьматӥз — удмурт Робин Гудлы пӧрмытӥз.
— Соин ик эшшо огпол верасько: кызьы вераз калык, ма кылиз фольклоре — со выжыкыл. Документэн юнматэмын ӧвӧл ке — историк понна сыӵе учыр ӧй вал.
— «История народа принадлежит царю» гожтэм Николай Карамзин 18-тӥ даурлэн пумаз. Котькуд кивалтон система историез ас палаз берыктыны выре…
— Со нимаське идеология. Мыным кельше, кызьы асьмелэн коммунизм лэсьтон вакытэ идеология пуктэмын вал. Западын али но со кужмо. Нош асьмелэн пыд йылаз султыны выре гинэ ай, пӧртэм шонаськон-воштӥськонъёс пыр потыса.
Тодӥськоды на-а, 1990-тӥ аръёсы удмуртъёс, асьсэды гажаны курыса, Шор площаде потӥзы но, соосты «удмурт националистъёс» шуыны кутскизы. Удмуртъёслэн ӝутскемзылэн выжыосыз кошко эксэй вакытъёсы — ӟуч национализме. Куке 19-тӥ даурын «вотяк» кыл ултӥянлы пӧрмиз.
Йырамы пыӵатӥзы малпан, асьмеос лябесь шуыса. Вот, пе, ӟучъёс лыкто но удмуртъёсты гуртэн-гуртэн пеймыт нюлэсъёсы улляло. Документъёс ке воксё мукет сямен верало. Удмуртъёс гурт котырысьтызы музъемъёсты гырыса-кизьыса начармыто но палэнэгес кошко, кӧня ке починка кылдыто, выль музъем сайко, коркаос пукто. Нош соослэн улэм бервылазы ини лыкто музъемлы ёрмись ӟучъёс. Озьы удмурт гурт луэ ӟуч. Но нокин нокинэ уг улля.
— Нош Пислегинъёс выжыоссы борды возисько-а?
— Озьы шуыны луэ бабушмы Елизавета Кузьмовна сярысь. Со огез нылыз дӥньын Ижын улэ ке но, гужемлы быдэ Пуштовае бертылэ. Отын солэн коркаез сылэ. Интыысь кивалтӥсьёс куро юртсэ музейлы сётыны, со Виктор Пислегинлэн шуыса. Со сярысь «Удмурт дунне» газет но гожъяз. Бабуше сое лыдӟысал ке — ӝоже усьысал. Угось со корка Виктор Кузьмичлэн ӧвӧл — Елизавета Кузьмовналэн. Аслаз Виктор Пислегинлэн юртэз ӧвӧл ни.
Бабушелэн 3 пиналъёсыз, 7 внукъёсыз, 6 правнукъёсыз, пӧлысьтызы кыкез — мынам пиналъёсы. Кыйлудын, Ижын сяна, Крымын улӥсьёсыз но вань. История озьы кариз: войнаен валче Совето Союзысь Геройлэн Виктор Пислегинлэн аслаз нылпиосыз ӧз кыле бере, али милесьтым матысьгес бӧлякъёсыз солэн ӧвӧл ни.
Источник:
Пислегин Н. В. Герой выжы / Николай Пислегин ; вераськиз Ольга Вахитова // Удмурт дунне. - 2019. - 5 августа. - С. 10, 15 : фот. - (Тӧр шорын)
За предоставление материала выражаем огромную благодарность редакции газеты "Удмурт дунне"
