Бобров Иосиф

Бобров Иосиф Петрович (1943-тӥ арын 6-тӥ инвожое, Алнаш ёрос, Сизьгурт — 2013-тӥ арын 4-тӥ шуркынмонэ, Алнаш ёрос, Удмурт Гондыр гурт) - удмурт кылбурчи, Удмурт Элькунысь гожъяськисьёслэн огазеяськонзылэн ёзчиез.

Улон сюресэз

Бобров Иосиф Петрович вордӥськиз 1943-тӥ арын 6-тӥ инвожое Алнаш ёросысь Сизьгуртын (Дятлево). Сизьгуртын вордскем пияшлэн пичи дырыз турлы гуртъёсын ортчиз. Анаез быдэс улонзэ сямен турлы интыосын я бухгалтер, я счетовод луыса ужаз. Соин ик сое ӵем гинэ одӥгысьтыз хозяйствоысь мукетаз ыстылӥзы. Ас тодэмезъя-валамезъя ёзви вырӟемъёсты тупатыны дышетскиз. Трос адямиосты со висён-курадӟонлэсь мозмытӥз. Война вакыт вордскыса но атайтэк будыса, пияш трос гинэ курытсэ но, кузьытсэ но ӟузиз. Но, котьма ке но, сюлэмыз ӧз сӥялскы, ӧз измы, «курыт» ӧз луы.

1960-тӥ арын Вуж Утчанысь шор ёзо школаез йылпумъям бераз, Ижкарысь тямыс классъем школаослы физикая но математикая дышетӥсьёсты дасян курсъёсын дышетскиз, собере Удмурт Гондыргуртысь тямыс классъем школаын. Кӧня ке ар ӵоже Алнашысь комсомоллэн райкомаз кыкетӥ секретарез вал. Иосиф Бобров нырысь пал улоназ математикаен дышетӥсьлэсь ужзэ бырйиз вал, трос аръёс ӵоже дышетӥз, университетысь кӧня ке курссэ но пырпотӥз ни вал, но пумен шӧдӥз: солэн сюлэмыз чотась ӧвӧл – кырӟась. Выльысь Удмурт кун университетэ пыриз. Ужан висказ кылтодонъя факультетын дышетскиз. Сое 1979-тӥ арын йылпумъяз. Дас тямыс ар Удмурт Гондыргуртысь школаен кивалтӥз.

Удмурт университетэз йылпумъям егитъёс

Иосиф Петрович дасо аръёслэсь трос пиналъёсын «Ошмес син» литературно-творческой кружок нуиз. Трос аръёс ӵоже та объединенилэн одӥгез кивалтӥсез но вал: егит гожъясьёсты дасян-будэтон бордын тыршиз, паймымон кылбур дуннее сюрес усьтӥз, кылбуран амалъёсын тодматылӥз. Котырес ӝӧк сьӧразы шаерысьтымы тодмо писательёсты но кылбурчиосты отьылӥз, пиналъёсты соослэн творчествоенызы но тодматӥз. Егит авторъёслэн кылбуръёсынызы альманах поттӥз. Иосиф Бобровлэсь кутскем ужзэ али егит дышетӥсьёс азьланьто, мӧйы дышетӥсьсылэсь индылэмзэ пелязы поно: дышетскисьёс пӧлын одӥг-кык ке но поэзие кыстӥськись адями сюриз ке, соосты одно синйылтоно. Нош татчы ветлӥсьёс ваньзы литераторъёс ӧз ке но луэ, соос литератураез мургес валалозы но яратозы.

Иосиф Петровичлэн чеберез яратон мылкыдыз музон арбериос пыр но потылӥз. Ас киыныз укноослы кильтро пужъятэм наличникъёс лэсьтылӥз. Суредаськыны но йӧндыриз. Дышетскисьёсыз пӧлын пуэз вӧлыса чебер арбериос лэсьтонъя кружок радъялляз, технология урокъёсын мастерскойын котькыӵе киужъёслы дышетӥз. Нылпиос али но туж шумпотыса верало солэсь фотокружок нуэмзэ, кылбур гожъяны дышетэмзэ но огшоры адямиен огшоры вераськон кыл шедьтэмзэ.

Иосиф Петрович тэк пукыны уг вала. Шутэтскыны потэмын ке но, нуналлы быдэ школа пала вамышъя. Отын уго сое покчиос витё. Соос тунсыкъясько гуртлэн но ёрослэн, нюкъёслэн но возьёслэн историенызы. Покчиос котыраз люкасько но шып карисько: Иосиф Петрович серемес чуръёссэ но выжыкылъёссэ лыдӟоз. Со куаразэ но артистлэн кадь тупатыны быгатэ: кытӥ серектоз, кытӥ кышкатоз – ӟичылы я кионлы пӧрмытскоз. Та школаын ик трос аръёс ӵоже ужаз Иосиф Бобровлэн кузпалыз – Любовь Петровна. Собере – пиез но кенэз вӧзазы султӥзы. Нош Надя нылыз журналистика удысэз бырйиз, семьяеныз Нижневартовскын улэ. Кема висемез бере улонысь кошкиз 2013-тӥ арын шуркынмонлэн кутсконаз.

Гожъямъёсыз сярысь

Иосиф Петровичлэсь пичи дырысеныз кылбурет дуннее кыстӥськемзэ дырыз дыръя адӟиз но дунъяз тодмо удмурт писатель Михаил Петров. Солэн кылъёсыз бурдъязы пичи пияшез. Туннэ Иосиф Бобров тодмо кылбурчи, инкуазьлы, вордскем шаерлы мур яратонэн пыӵам кылбуръёс гожъя. Литературае Иосиф Бобров пумен но кален пыриз. Уноез егит гожъясьёс сямен ик, со вордскем палъёссэ, ас инкуазьзэ данъясь «диферамбъёс» бордысен кутскиз. Нырысетӥ кылбурзэ 1959-тӥ арын «Алнаш колхозник» газетын печатлаз. Со бӧрсьы кылбуръёсыз «Советской Удмуртия», «Дась лу!» но ёросъёсысь газетъёсын, «Молот», «Урал», «Инвожо», «Кизили» журналъёсын печатласькизы. 1977-тӥ арын дасэз кылбуръёсыз егитъёслэн «Пыд улын музъем» огъя бичетазы потӥзы. 1990-тӥ арын Анатолий Петровен но Николай Никифоровен ӵош «Выжыос-сяськаос» книга поттӥзы, И. Бобровлэн люкетэзлэн нимыз – «Гужеме выже тулыс». Нош 1983-тӥ арын «Пыштурын» кылбуръёсын нырысетӥ нимаз бичетэз лыдӟисьёс кие вуиз. Собере поэзиез яратӥсьёсты «Ӵук тӧл» (1993) но «Тулыс мылкыд» (2003) бичетъёсыз шумпоттӥзы. И. Бобровлэн «Пыштурын» бичетэзлы шуныт кылъёссэ верам тужгес но матысь эшез – Владимир Романов. «Мыным ӟеч тодмо, кызьы, кытын вордскиз соиз яке таиз кылбур, кызьы поэт шедьтӥз чебер ӵошатон, выль жингрес чур, адӟиз паймымон суредэз…», – шуэ Владимир Васильевич Иосиф Бобровлэн поэзиез сярысь.

Мукетыз тодмо кылбурчи, Михаил Федотов «Ӵук тӧл» бичетэз сярысь гожтэ: «Со котькуд чурзэ сюлэм тылыныз улӟытыны быгатэ, лыдӟисезлы жингрес удмурт кылын вазиськыны тырше, ас шаерзэ зэмос яратэмез сярысь вера. Шаерез шоры со учке пичи гуртэз, возьёс но нюлэсьёс пыр. Солы оскиськод, та поэт паллян уг кырӟа вылэм шуыса. Эшелэсь гожъямъёссэ мон кемалась дырысен яратӥсько. Синмаськисько солэн чылкыт сюлэмо луэмезлы но чеберез борды ялан кыстӥськемезлы. Соинтэк-а меда вордӥськысалзы тани таӵе чуръёс» :

Константин Емельянов гожъяськисен

Сяськаен льӧмпу шонтӥз ке,

Вордӥськем шаер ӧтёз.

Одӥг эш ке но вань на ке,

Улонэ ӟечсэ витёз.

Иосиф Бобров кылбуръёсаз пичи дыр аръёсызлы ӵем вазиськылэ. Отын солэн сюлэмыз буйга, вылтырыз капчи омырен шокче.

Выльысь берыктысал пичи дырме,

Пичи дырме выльысь берыктысал.

Дун лысвуо сяська возьёс вылтӥ

Али но гольык пыд бызьылысал.

Быдэс сборник та выллем чуръёсын тырмемын. Умой со. Иське, кылбурчилэн мылкыдыз ялан кырӟа, поръя, синпӧртмась выжыкылзэ кылзыны ӧтe. Озьы ик медло азьланяз но!

Иосиф Бобров аслэсьтыз книгазэ куинь люкетъёслы сазна; кылбуръёс, Ашальчи Окилы сӥзем сонетъёсын тугоко но пор кылысь берыктэмъёс. Пор кылысь шуисько ке, солы паймоно ӧвӧл. Иосиф Петрович пор нылпиосын артэ будэмын но дышетскемын, пинал дырысеныз соослэсь кылзэс ӟеч тодэ. 2008-тӥ арын Алнашын «Сизьгурт чуръёс, Сизьгурт гуръёс» нимо книга потӥз. Татын куинезлэн сизьгуртъёслэн лулчеберет удысын кылдытэм ужъёссы огазеямын. Книгае пыртэмын Иосиф Бобров поэтлэн кылбуръёсызъя крезьгурчиосын Пантелей Кузнецовен но Сергей Кирилловен кылдытэм кырӟанъёс. Иосиф Бобровлэн тросэз кылбуръёсыз кырӟан луизы. Куд-огезлы со ачиз ик крезьгурчи но луиз, нош мукетъёсызлы крезьгуръёс гожтӥзы самодеятельной композиторъёс.

Иосиф Бобровлэн лирической героез ӟырдыт яратэ вордскем шаерзэ, ас гуртсэ, музъем ужась калыкез. Тросэз кылбуръёсыз инкуазьлы сӥземын, арлэн вакытъёсызлы. Иосиф Бобровлэн поэзиез – «шыпыт» но «вольыт». Со кельше, дыр, гуртысь огшоры удмурт воргоронъёслэн ӝытазе коръёс вылын куспазы улон-вылон сярысь дыртытэк, лад-лад вераськыса пукемзылы. Кылбуръёсыз пӧлын бен чылкак мукет манерен гожтэмъёсыз но пумиськыло. Но соос, сяська тугокоысь турлы сяськаос музэн, та тугокоез узырмыто гинэ:

Ужъёсмы уно,

ужъёсмы пумтэм.

Лыктӥсез нунал

мед луоз ӟечгес.

Уз, уз лу милям

кылъёсмы тырттэм:

Вормомы котькуд

удысэз.

И. Бобровлэн кылбуретаз синъёсты кымесэ ик тубымон паймытӥсез но сюлэмез шымыртӥсез номыр но ӧвӧл кадь. Но со пичи но уг вера, солэн кылбуръёсыз тырттэмесь шуыса. Ӧвӧл, соос пушкын – ачиз улон: куддыр огшоры пурысь гинэ, куддыр бугрес но трос буёло, куддыр шумпоттӥсь, куддыр мур кайгырытӥсь…

Премиосыз

Удмуртиысь Писательёслэн огазеяськонзылэн Данъян грамотаез, 2008

Библиография

Книгаосыз

Выжыос-сяськаос : кылбуръёс. – Ижевск : Удмуртия, 1990. – 128 с.

Пыштурын : кылбуръёс. – Ижевск : Удмуртия, 1983. – 40 с.

Сизьгурт чуръёс, сизьгурт гуръёс : кырӟанъёс / Иосиф Бобров, Пантелей Кузнецов, Сергей Кириллов. – Алнаши : Алнашский колхозник, 2008. – 91 с.

Ӵук тӧл : кылбуръёс, сонетъёсын тугоко, берыктэмъёс. – Ижевск : Удмуртия, 1993. – 71 с.

Статьяосыз

Алнаше : кылбур // Анлаш. Троицкое. Алнаши : страницы истории = дауръёсысь чуръёс . – Ижевск, 2011. – С. 75.

Ашкынэм ; Толшор ; "Капчи бурдо тӧдьы бубылиос..." : кылбуръёс // Кизили. – 2005. – № 1. – С. 3.

"Беризь сяськая садын..." : кылбур // Удмурт дунне. – 2012. – 11 июля. – С. 4. – (ИнГОЖ) (Маин воштод асьме пал гужемез!).

Вормо ; Ма со ток? : кылбуръёс // Кизили. – 2008. – № 2. – С. 8.

Выжыкыл : кылбур // Зарни дэремен шунды : семьяын лыдӟон книга. – Ижевск, 2006. – С. 23.

Выль ар : кылбур // Кизили. – 2009. – №11/12. – С. 2 обл.

Гужеме выжись тулыс : кылбуръёс // Алнаш куара. – 2007. – 29 июня.

Гуртлэн адӟонэз : кылбур // На переломе эпох : Союзу писателей Удмуртии 70 лет, 1934–2004 : ст., стихотворения, прозаич. произведения, док. – Ижевск, 2006. – С. 213.

Ӝӧк сьӧрын : Выль арен ӟечкылан-кылбур // Удмурт дунне. – 2006. – 29 дек. – С. 14. – ("Вералом верано кылъёсмес" конкурсэ).

Ӟазег ; Дыртэ тулыс ; "Кизили питырскиз тэль йылтӥ..." : кылбуръёс // Кизили. – 2006. – № 4. – С. 10.

Ӟеч луэ ; Егит ик кылё ; Узыгырлы : кылбуръёс // Удмурт дунне. – 2006. – 14 июня. – С. 7.

Крезьгурен тырмо кылъёс : кылбуръёс // Кенеш. – 2011. – № 8. – С. 3–5. – Пуштросэз: Малы? ; Лулъёс ; Ӧпкелён ; Эктон ; Ма каром?

Кузёяське йӧно гужем : кылбуръёс // Кенеш. – 2008. – № 7. – С. 3–9.

Кырӟан ӧрын веттаськисько... : кылбуръёс // Кенеш. – 2009. – № 11/12. – С. 3–6.

Лымыя : кылбур // Удмурт дунне. – 2010. – 8 дек. – С. 8.

Мадиськонъёс : кылбурен гожтэмын // Кизили. – 2005. – № 10. – С. 11.

Мар шуоно? : кылбур // Кизили. – 2008. – № 11/12. – С. 2.

"Мынекъясь синъёстэ..." ; Витисько : кылбуръёс // Алнаш куара. – 2008. – 14 марта.

"Нырулонъяз чалме нюлэс..." : кылбур // Инвожо. – 2011. – № 9/10 : Ижевск межкультурный город. – С. 39. – (Специальный выпуск газеты "Известия Удмуртской Республики" и журнала "Инвожо").

Осконэн гинэ выльме улон : кылбуръёс // Кенеш. – 2013. – № 5-6. – С. 3-5 : фот. – Пуштросэз : Одӥгнам ; Шат луэ тазьы? ; Мед юнматод выжыосме! ; Мӧзмон ; Кизили ; Тулыс мылкыд ; Вуюись ; Пилемъёс ; Аслаз шулдырез

"Отын но, татын палэзь кисьмамын..." : кылбур // Алнаш куара. – 2007. – 24 авг.

Пӧсьтолэзь : кылбур // Кизили. – 2007. – № 7. – С. 2.

Пӧя, иське... ; Шумпотон ; "Кемалы егит ик кыльыны..." ; "Мынэсьтым малпанъёсме тон..." ; "Лык али дорам...". "Тон сяна но..." : кылбуръёс // Алнаш куара. – 2008. – 7 марта.

Солдат синъёс : кылбур // Алнаш куара. – 2005. – 6 мая.

Солдатские глаза : стихотворение // Алнашский колхозник. – 2005. – 15 апр.

Тулыс : кылбур // Кизили. – 2007. – № 3. – С. 12.

"Ха-ха-ха, хи-хи-хи, хо-хо-хо..." ; "Турлы-турлы кылъёсыз..." ; "Гули-гули, дыдые..." : кылбуръёс // Кизили. – 2008. – № 8. – С. 8.

Чебер ук, чебер тон, вордскем шаере! : кылбур // Кизили. – 2011. – № 8. – С. 3.

Чебере мынам : кылбур / иллюстрациез Марина Гузаевалэн // Кизили. – 2012. – № 9. – С. 2.

Шур шорысь шормуӵын : кылбуръёс / иллюстрациез Вячеслав Михайловлэн // Кизили. – 2013. – № 5/6. – С. 12-13 : ил. – Содерж.: Буйга ; Возьмаськон ; Гужем ; Дыр ; Тӥялтӥд ке ; Чуиктэ чипчирган ; Ӵошатскон ; Шуналоз

Шушыос // Кизили. – 2012. – № 1. – С. 2.

Эркынак шокаса пужалске инкуазьмы : кылбуръёс // Удмурт дунне. – 2007. – 31 июля. – С. 6–7. – Пуштросэз: Малы? ; Ӝоже ӧвӧл ; Ортчем гужем ; Уйвӧт ; Лулъёс ; Ӧпкелён ; Алнашелэн уӵыосыз.

Яратонэд ышиз ке... : кылбуръёс // Кенеш. – 2012. – № 9. – С. 3-5. – Пуштросэз: Улонмес яратом ; Мӧзмон ; Чида тон ; Лулылэн шунытэз ; "Мынам шаере..." ; Льӧмпу сяськаяськон дыръя ; "Серем пырыостэ..."

Кырӟанъёсыз

Венчиков А. Кызьпу-сузэръёсы : "Веськрес кызьпуослэн нош..." // Ашальчи. – 2007. – № 1. – С. 39.

Волкова Л. Кӧня возьмай : "Яратӥсько шуид, синмаськиськем..." // Кенеш. – 2011. – № 5/6. – С. 85.

Кириллов С. Алнаше : "Ӵын зыныд но тынад аспӧртэм..." // Кенеш. – 2010. – № 2. – С. 105–106.

Крестьянинов В. Лык дорам : "Лык али дорам..." // Кенеш. – 2011. – № 3. – С. 108.

Крестьянинов В. Тулыс лыктэ : "Дыртӥд ке но, кошкид ке но..." // Удмурт дунне. – 2011. – 27 апр. – С. 6. – (Шудэлэ тӥ, серектэ).

Кузнецов П. Берен берыктысал... : кылбур-кырӟан // Ашальчи. – 2009. – № 1. – С. 26, № 3. – С. 21.

Кузнецов П. Губи зор : "Яратэ губи шуныт зорез..." // Удмурт дунне. – 2011. – 21 июня. – С. 6. – (Шудэлэ тӥ, серектэ).

Кузнецов П. Доре : "Воринъяса пиштэ толэзь..." // Удмурт дунне. – 2011. – 23 марта. – С. 6. – (Шудэлэ тӥ, серектэ).

Кузнецов П. Ӟеч мылкыд : "Яратонтэк луэ шат улыны..." // Удмурт дунне. – 2012. – 7 февр. – С. 8.

Кузнецов П. Инвожо кадь... : "Инвожо кадь, италмас кадь..." // Вакыт (Игра). – 2005. – 21 янв.

Кузнецов П. Лык дорам : "Лык али дорам..." // Удмурт дунне. – 2007. – 24 окт. – С. 6. – (Шудэлэ тӥ, серектэ).

Кузнецов П. Лымыя : "Лымыя, лымыя, лымыя..." // Удмурт дунне. – 2011. – 27 дек. – С. 6. – (Шудэлэ тӥ, серектэ).

Кузнецов П. Мыным шуд ваёд-а? : "Эх, инвожо, инвожо, монэ возьмаськод-а?.." // Удмурт дунне. – 2011. – 21 июня. – С. 6. – (Шудэлэ тӥ, серектэ).

Кузнецов П. Оло нош вормом : "Кемалы егит ик кыльыны..." // Удмурт дунне. – 2007. – 18 июля. – С. 7.

Кузнецов П. Пӧя, иське... : "Шат монэ пӧяны малпаськод..." // Удмурт дунне. – 2007. – 18 июля. – С. 7.

Кузнецов П. Та дунне вылэ лыктӥ мон : кылбур-кырӟан / крезьгурез кык – Пантелей Кузнецовлэн, Римма Шкляевалэн // Кенеш. – 2008. – № 5/6. – С. 59.

Кузнецов П. Юртты, арганэ : "Арганэлы верало ай инӧслэсь усьтӥськемзэ..." // Удмурт дунне. – 2006. – 29 авг. – С. 6.

Плотникова А. Эн ни яраты монэ : "Эн ни, эн яраты монэ..." // Ашальчи. – 2006. – № 6. – С. 32. – (Кырӟа Анна Плотникова).

Плотникова А. Выльысь берыктысал : "Выльысь берыктысал пичи дырме..." // Кенеш. – 2008. – № 5/6. – С. 62–63 ; Кенеш. – 2011. – № 5/6. – С. 59.

Постников Н. Выль арен! : "Вужмиз, вужмиз дырмы..." // Кенеш. – 2010. – № 1. – С. 99–101 ; Малпасько тонэ : кырӟанъёс = А мне бы увидеть тебя : песни / Николай Постников. – Ижевск, 2010. – С. 75–76.

Постников Н. Кытӥ калгисьгод? : "Яратӥсько, – шуид, – синмаськиськем..." // Малпасько тонэ : кырӟанъёс = А мне бы увидеть тебя : песни / Николай Постников. – Ижевск, 2010. – С. 77.

Постников Н. Эн усьты : "Ӧстэ тон эн усьты..." // Малпасько тонэ : кырӟанъёс = А мне бы увидеть тебя : песни / Николай Постников. – Ижевск, 2010. – С. 73.

Постников Н. Эх, инвожо... : "Эх, инвожо, инвожо..." // Малпасько тонэ : кырӟанъёс = А мне бы увидеть тебя : песни / Николай Постников. – Ижевск, 2010. – С. 72.

Постников Н. Юртты, арганэ! : "Арганэлы верало ай..." // Малпасько тонэ : кырӟанъёс = А мне бы увидеть тебя : песни / Николай Постников. – Ижевск, 2010. – С. 74.

Санникова А. Юртты, арганэ : "Арганэлы верало ай инӧслэсь усьтӥськемзэ..." // Удмурт дунне. – 2006. – 15 нояб. – С. 8 ; Инвис (Шаркан). – 2007. – 12 янв.

Шкляева Р. Музъемлы вазиськон : "Яратско тонэ, музъеме..." // Кенеш. – 2007. – № 9. – С. 111 ; Ашальчи. – 2011. – № 1. – С. 39.

Шкляева Р. Та дунне вылэ лыктӥ мон... : кылбур-кырӟан // Ашальчи. – 2006. – № 5. – С. 36. ; Кенеш. - 2008. - N 5/6. - С. 59.

Шкляева Р. Яратӥ : кылбур-кырӟан // Кенеш. – 2005. – № 9. – С. 20 ; Кенеш. – 2008. – № 5/6. – С. 68 ; Ашальчи. – 2008. – № 6. – С. 27 ; Ашальчи. – 2011. – № 1. – С. 40.

Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.