Ардашева Ольга Витальевна
Покчи дырыз пумтэм[править]
«Мынам Удмуртие» телеканалысь «Шудон корка» передача эфире нырысьсэ потэм дырысен туэ 15 ар тырме. Та дыр куспын со бадӟым проектозь будӥз ни: пиналъёс пӧлын гинэ ӧвӧл, нылпи садъёс куспын пӧртэм ужрадъёс ортчытъя. Россиын ортчись «Спасти и сохранить» конкурсын пусъемын «Нылпиослы тужгес усто передача» нимын, Евразийской телефорумысь дипломез вань. Кенешиськом «Шудон коркаез» кылдытӥсен, «Мынам Удмуртие» телерадиокомпаниысь журналистэн Ольга АРДАШЕВАЕН (ФАРХУТДИНОВАЕН).
– Тӥледлы удалтэм: покчиослы передача бордын ужаса, пичи дырды, котьмалы шумпотон вакытты азинтӥське кадь потэ, вылды. Но мукет ласянь учконо ке, котькуд нылпиен огкыл шедьтыны, сое маин ке тунсыкъяськытыны, видеокамера азьын вераськытыны капчи ик ӧвӧл. Эшшо ке удмурт кылын…
– Пиналъёсын ужаны туж кельше. Макем соос мусоесь, тунсыкоесь, паймытӥсесь! Соосын ужаса, зэм но, улыны кужым басьтӥськод. Малпасько, кыл вылын уд валэкты, кызьы нылпиен огкыл шедьтоно. Со ваньмыз кытысь ке сюлмысь-шӧдонъёсысь потэ, кызьы тазэ, созэ тэшкылиез маин ке тунсыкъяськытоно, солэсь покчи дуннезэ усьтоно. Удмурт кыл ласянь ке… Мон 2 ар ӵоже аслам нылыным декретын пуки, ужаны потӥ но, воксё пайми: азьвыл аръёсын ӵошатыса, удмурт кылын вераськись нылпиез шедьтыны эшшо но секытгес луэм. Чылк-чылк удмурт гуртъёсысь нылпи садъёсы жингыртӥськод но пумитад вазё: удмуртэн вераськись нылпиосмы группаын 2 кузя гинэ.
Куд-ог анай-атайёс воксё абдрато. Уло-выло удмурт гуртын, урамын бызьылӥсь пиналзылэсь юаськод, кӧня арес, соос пумитад «щемь» шуыса вазё. Маке эшшо юаськод – нош ик икыр-кукыр ӟуч кыл. Мумы-бубызы киыныз шонтэ: малы соослы удмурт кыл, ойдо ӟучсэ мед тодозы. Но соку дышеты ук тон сое ӟуч кылын рос-прос вераськыны! Озьы луыса кошке ни: удмурт кылэз но уг тодо, ӟученыз но шенгыль-пенгыль вераськемъясько. Кытысь-марысь анай-атайёслэн йыразы удмуртэз кулэтэм шуыса «нумыр» пыриз? Аслэсьтым анай-атайме малпасько: соос огпол но йырзэс ӧз тӥялэ, вылды, пиналзэс кыӵе кыллы дышетон сярысь – ми вераськиськом удмурт кылын, пиналъёсмы но вераськозы ми сямен. Асме учкисько: удмурт кыл пушкын будыса, ӟучсэ но тодытэк ӧй кыльы кадь, улонын асме шедьтыны но анай кылы ноку ӧз люкеты.
Озьы тӥни, «Шудон коркаез» эфирлы дасяку, «ворттылӥськом» одӥгъёсыз пиналъёс вылынгес. Тужгес но али, куке возьматӥськом одӥг мунёез, со вӧзы пуктӥськом одӥг пиналэз. Мыло-кыдо пырисько, кылсярысь, Ижысь 112 номеро нылпи садысь Даша Михайлова, Ангелина Иванова, К. Герд нылпи садысь Артём Сараматов. Соос туж чебер верасько анай кылын. Передачалы герой шедьтыны шугомисько ке, мар карод, таослы нош ик вазиськисько ни. Эшшо ке ваньзэ, дышетэмъя-бумагая уг, асьсэ кылынызы верало. Туж мусо кылӥське вераськемзы.
– Нош асьтэлэн пичи дырды кытын ортчиз?
– Вордскемын но будэмын мон уйпалан – Кез ёросысь Сьӧдбамгуртын. Солэн котыраз гурезьёс, тулыс вуэмъя лымы шуна но гурезьлэн бамалаз сьӧд сюй потэ – соин гуртмес озьы нималлям. Со милям бадӟым ик ӧвӧл, 58 коркаен. Ярам, азинскись гурт хозяйствомы вань но, гуртмы возиське на. Гуртын бен кытын ортче покчи дыр? Урамын бызьылыса. Шудыны потӥськод но малпаса гинэ улӥськод – доре гинэ медам ӧте вал, ужаны косозы ук. Семьяямы ми 3 нылпиос, мон шоретӥез. Вань Жанна апае но Сергей выны. Нылпи садэ мон чик но ветлэмын ӧвӧл, будэмын бабу вӧзын. Со вӧзын туж тунсыко вал мыным. Мае но ӧз мадьылы. Калык веранъёс, чакланъёс, выжыкылъёс – соос вылын будӥ. Ижын улӥсь пиез доры куное вуылыкуз, монэ но сьӧраз кутылӥз. Мыным, пыдлось гуртын вордскем нылашлы, со зэмос праздник кадь луылӥз. Макем паймытэ вал бадӟым город!
Анае магазинын вуз карисьын тыршиз. Но солэн ужез мыным мӧзмыт потылӥз. Эх, малпасько, кыӵе удалтэм эшъёсылы – анайёссы фермае скал кыскыны ветло, кыӵе тунсыко! Соос сьӧры мон но калъяськылӥ. Школае мынэме бере сочинениям бадӟым букваосын гожтӥ: доярка луэме потэ. Визь пыремъя малпанэ, конешно, воштӥськиз. Синмаськыса учкылыны кутски дышетӥсьлэн ужез шоры.
Сюлмылы тужгес но матын луизы удмурт кылъя но литературая урокъёс. Дышетӥсьмы Нина Витальевна Лекомцева, тунсыкъяськемме шӧдыса, мыным фольклор кружоке пыриськыны ӵектӥз. Ветлӥмы коркась корка мӧйыос дортӥ, удмурт кырӟанъёсты, мадёсъёсты гожъяса-люкаса. Школаын ортчись ужрадъёсы одӥгаз но пыриськытэк ӧй кыльы, сцена вылысь воксё ӧй васькалля кадь. Кылбур-верос гожъян борды но басьтӥськи. «Пӧрамъёсы» печатласькизы «Ӟечбур!» (соку «Дась лу!») газетын. Газет бамысь печатлам ужме адӟыса, мылкыд макем зол бурдъяськылӥз! Аслыд ачид золгес оскыны кутскиськод, эшшо мар ке выльзэ, усьтымтэзэ тодэм потэ, конкурсъёсы, визьсынанъёсы пыриськыны мылкыд пуроме. Тае тодам возьыса ик, съёмкаосы пыдлось гуртъёсысь пиналъёс доры но вуылыны тыршисько. Асьсэды бадӟым экранысь адӟыса, мылкыдзы мед ӝутскоз, анай кылынызы данъяськонзы мед йылоз.
Школаын, меӵак вераса, 9-тӥ классозь дышетскыса, акыльтӥ. Шӧдӥсько вал: 10-тӥ-11-тӥ классъёсын дырме гинэ быдто. Мылкыд куриськиз ни кыӵе ке удыслы нимысьтыз дышетскыны, азьланезлы сюрес бырйыны. Мамае 9-тӥ класс бере кошкыны турттэмелы шуиз: мугорыд тютюпилэн кадь гинэ, кыдёке уг лэзьы. Классамы мон тужгес пичи мугороез вал. Кылзӥськытэк ӧйлась. Дэбес педучилище Кезлэсь кыдёкын ӧвӧл бере, отчы пыроно кариськи. Бырйи мон сое матын луэмезъя, дышетӥсьлэн ужез сярысь рос-прос малпаськытэк. Нош дышетскемея валаны кутски, макем кельше дышетӥсьлэн удысэз сярысь нуналмысь мургес тодыны, пиналъёсын огкыл шедьтыны дышетскыны. Сюлмы гань-гань луиз: улонэлы сюрес бырйыны янгышаськымтэ. Педучилищеын но тужгес яратоно предметэ луиз удмурт кыл но литература. Дышетӥсьмы Ирина Фёдоровна Тимирзянова урокъёссэ туж тунсыко радъялляз, пӧртэм ужрадъёсы пыриськыны мылкыдмес пуромытыса возиз. Уката но зол потӥз удмурт кылын вольыт, чебер вераськыны дышетскеме.
Педучилищеын кыдаса, визь люкаса, 1998-тӥ арын шонтоно кариськи Иже. Малпай Удмурт кун университетысь журналистикая факультетэ пырыны. Конкурс туж бадӟым вал, со пыр ӧй ортчы. Кутӥ но документъёсме удмурт филологияя факультетлэн заочной люкетаз сётӥ, пыри. Нош ачим ужаны интыяськи Ижысь одӥгаз нылпи садэ воспитателе. Отын валай: педучилищеын милемыз дасязы ке покчи классъёсты дышетыны, Ижын со программая дышетыны кутско ни вылэм нылпи садысен. Тодон-валанэ туж интыяз луиз. Университетын 5 ар дышетскытозям, нылпи садын тырши, ачим коньдон поттӥ. Тэшкылиослы тунсыко мед луоз шуыса, пӧртэм ужрадъёс малпалляй.
– Журналистикая факультетэ ӧд шеде ке но, улон сюресты та удысэн ик герӟаськиз. Кызьы шедиды «Мынам Удмуртие» телерадиокомпание? Кызьы кисьмаз «Шудон корка»?
– Телевизор учкыкум, экранлэн улӥяз «бызись чур» ортчиз: «Мынам Удмуртие» телерадиокомпания, пе, ужаны кутысал удмурт кылын вераськись журналистэз. Мон асме эскероно кариськи. Лыктӥ, лыдӟыны куризы удмурт кылын иворъёсты, маке сярысь гожтыны косӥзы, монэн ваче син кенешизы. Малпасько, конкурслэн 2-тӥ тураз уг шедьы ни. Экран вылэ шедён понна угось чебер тус но, вольыт дикция но кулэ. Нош мынам не соиз, не таиз. Жингыртэмзэс кема вити, ӧз жингыртэ. Малпасько, уз басьтэ ке но, сюлэмме буйгатон вылысь жингырто ай, нош ӵуказеяз отпуске гуртэ ширто. Трубкалэн сопал пумаз мыным вазё: тӥледыз кемалась утчаськомы ни. Мобильной телефонъёс соку ӧй вал на угось, нылпи садын ужасько вал бере, солэсь номерзэ янгышен пусйыса кельтӥськем. Тупаны но кулэ: жингыртӥськем конкурслэн берло нуналаз, ӵуказеяз мон интые мукетсэ ӧтьысалзы ни. Адямилы мар кылдэмын, солэсь уд пегӟы, малпасько.
Одӥг толэзь ӵоже иворъёс бордын ужаны дышетӥзы. Собере сюжетъёс лэсьяны пӧртэм интыосы потаны кутскимы. Татын но тужгес тунсыко потылӥз нылпиосын, гурт адямиосын герӟаськемъёссэ дасяны. Со вакытэ ик, ӟуч кылын мынӥсь «Ребятам о зверятах» передачаез удмурт кылэ берыктыса, «Пиналъёс но пӧйшуръёс» нимын возьматон борды басьтӥськи. Озьы сюжет бӧрсьы сюжет, ар куспын йырам кисьмаз «Шудон корка» проект.
Нациосын ужан политикая министерство юрттэмъя огвакытэ передачамы нуналлы быдэ сямен мынӥз. Вот соку мон покчиослэн дуннеязы воксё выйи. Нуналлы быдэ выль тема, пиналъёсты утчано, отчы-татчы съёмкаосы потано. Но удысэд кельше ке, ваньмыз капчи потэ. Та вакытэ передачамес возьматӥськом арняяз огпол. Ваньмон дыры тросгес луэ ни, конешно. Но тэк уг пукиськы, иворъёс дасясько. Политикаез возьматыны уг кельшы, яратӥсько культураен герӟаськемъёссэ.
Цифровой вещание вылэ выжем бере унояз гуртъёсын телеканалмес учкыны уг быгато. «Шудон корка» но, валамон, таин валче учкисьёссэ ыштӥз. Но мукет ласянь, кутыны луэ мукет луонлыкез – котькуд передачамес ку мылыд потэ учкыны луэ Интернетысь. Малпасько, анай кыл понна «висись» анай-атай котьку но луонлык шедьтоз пиналэзлы удмурт кылын передачаез возьматыны.
– Кытысь кылдӥзы «Шудон коркалэн» валтӥсь геройёсыз – Моко но Чульымчи? 15 ар куспын соосын ужаса, пиналъёслы гинэ ӧвӧл, оло, асьтэлы но соос луло потыны кутскизы ни?
– Соосты кин кызьы шуэ. Одӥгъёсыз обезьян шуо, мукетъёсыз – бака: ымзы, пе, бадӟым. Пичи дыръям гуртамы «Боко но Моко» спектакленыз вуылӥз Удмурт театрысь артист Александр Баймурзин. Ми, гурт пиналъёс, сое, макем тунсыко потыса, кылзӥськимы! Озьы, проектэлы геройёсты утчакум-бырйыкум, Бокоез но Мокоез тодам вайи. Соос удмурт калык веранъёсын уло ук, мӧйыос али ке но покчиосты соосын кышкатэм каро. Нош Моко вӧзы ачим кылдытӥ Чульымчи нылашез – визьмо, пичи ке но, шӧртчи, котькытчы вутскись.
Куддыр йырме тӥясько передачалы выль шӧм пыртон сярысь. Та мунёосты куштыны ӵектӥсьёс но вань. Но улэп адямиос-ымныръёс соосты уз воштэ кадь потэ. Тэшкылилэсь тунсыксэ кыско ай мунёос. Тае синйылтӥ Эмилия нылы вылысь но. Мунёос шоры синзэ вошъятэк учке, нош экранэ улэп адямиос пото ке, саклыкез ыше. Малпаськоно ке, «Спокойной ночи, малыши!» передачаез уно дасо аръёс ӵоже возьмато ини, отын но мунёос ук, покчиос соосты туж ярато. Нокин но передачаез выльдон, мукет карон сярысь уг малпаськы. Оскисько, «Шудон коркамы» но экран вылын возиськоз ай, Моко но Чульымчи нокытчы уз пегӟе.
15 ар ӵоже та мунёос, зэмзэ но, лулоесь но аслам нылпиосы кадь потыны кутскизы ни. Соосты быдэстӥз Мунё театрысь костюм вурись Елена Данилова. Али кадь ик тодӥсько на: Еленалы кыл вылын суредаса кельтӥ, кыӵеен мон адӟисько та мунёосты. Тани вуиз соосын пумиськон нунал. Мон соосты нырысьсэ адӟи но воксё абдрай: кыӵеен мон соосты малпанъёсам суредай вал, соос сыӵеесь ик кисьтэм-басьтэм пӧрмиллям! Геройёсылы эшшо зол синмаськи. Мокоен но Чульымчиен быгатыса шудо Мунё театрысь артистъёс Татьяна Масьярова но Антонина Пушина. Мукет куараосын та геройёсты син шоры пуктыны ик секыт ни.
Фин-угор дуннеын ортчись ужрадъёсы вуылыку, уноез паймо «Шудон корка» передачамылы. Милям таӵеез ӧвӧл, шуо.
– «Шудон корка» экран вылын мынэм сяна, со улсын радъяны пӧрмытӥськоды пӧртэм ужрадъёсты. Кӧня ке минутъем гинэ передачады 15 ар куспын бадӟым проектозь будӥз.
– Озьы. Кыӵе ке малпанэдлэсь улонэ пайдаен пыӵамзэ адӟиськод ке, ужаны мылкыд ӝутске. Эшшо но тунсыкозэ, вунонтэмзэ радъям потэ. Тани туэ тулыс элькунысьтымы нылпи садъёс куспын ялӥмы «Эктӥськом» вожвылъяськон. Учконо кариським, бадӟымъёслэн кырӟамзы улсын кызьы меда эктозы тэшкылиос. Отчы пыриськизы 17 детсадъёс – Ижысь но, пӧртэм ёросъёсысь но. Солы йылпумъянъёс лэсьтыса, Удмурт театрын гала-концерт радъямы. Адӟе вал, макем сэзь экто нылпиос! Возьдаськыны сокем уг валало на, макем мусо экто! Куд-ог пиналъёс, валамон, «Шудон корка» передачалы герой луизы. Вожвылъяськон ортчиз но, соиз я таиз ёросысь жингырто, ми, пе, тодытэк кылимы таӵе ужрад сярысь, туж пыриськысалмы, пе. Эшшо огпол радъяны куро. Чакласько «Эктӥськом» вожвылъяськонэз азьланяз но ортчытъяны. Нылпи садъёсын угось удмурт кыллы саклык тыро-пыдо уг висъяло ни, таӵе ужрадъёс, оло, юрттозы соосты анай кыллы матэгес карыны. Со сяна, таӵе ужрадъёс гуртъёсысь пиналъёс понна зэмос праздник кадь луо. Соос городэз адӟо, Удмурт яке Мунё театръёсы, Эшъяськон юртэ вуыло.
Туж потэ, «Покчи кылчи» программа но мед азинскысал. Нациосын ужан политикая министерство юрттэт висъяз вал, эфире ар куспын потӥз 30 выпуск. Та передача пыр удмурт пиналъёс гинэ ӧвӧл, ӟуч, бигер нылпиос но удмурт кылэз дышетӥзы. Огвакытэ туж кельшылӥз пиналъёслэн кырӟанъёссылы клипъёс лэсьтыны. Уксё тырмымтэен уретоно луиз. Кылем арын басьтӥськимы вал «Пичи шоу» проектмы борды. Пиналъёс кин кыӵе шоу возьматъязы – кин кылбур лыдӟиз, кин кырӟаз. Интернет пыр куара сётон радъямы. Зэмос вожвылъяськон кадь луиз та проект. Но та вакытэ ум ужаське ни со бордын. Мар карод, ӟеч проектъёс трос, коньдон ваньмызлы уг шедьы.
– Ваньмон дырдэс но тӥ пиналъёс пӧлын ортчытӥськоды. Дорады 4 аресъем Эмилия нылды – котьмаин тунсыкъяськись, юанъёсын ёртӥсь вакытэз. Покчиослэсь воксё уд акыльтӥське шат?
– Кык кылэз тодӥсь нылпиослы «Нуныкай» центрын театральной кружок нуисько. Тэшкылиосын пӧртэм адӟытонъёс, пичи сценкаос дасяськомы. Кыӵе ке ролез шудэмзэс учкыса, мусо потэмзылэсь кытчы кариськыны ик уд валаськы. Пиналъёс пӧлын мылкыд котьку капчи, нокыӵе жадемез уд валаськы. Со сяна, тыршисько Эшъяськон юртын, татын но кусып возисько элькунысьтымы нылпи садъёсын. Гожтӥ вал калык праздникъёслы сӥзем проектме. Соос пыр пиналъёсты тодматӥськомы Удмуртиын улӥсь пӧртэм калыкъёсын. Нылпиослы туж кельше та проект, косонэз-куронэз ӧвӧл, мыло-кыдо пырисько.
Эмилия нылылы али 4 арес. «Шудон коркалы» темаос малпаны со туж юрттэ. Кыӵе ке юанъёс сётэ ке, малпасько, иське, та тема пиналлы тунсыко, передачаез но солы сӥзёно. Ваньзы паймо нылылы таӵе ним сётэмелы. Но мон сое уйвӧтам кылӥ, адӟи баблес йырсиё нылашез. Ныл яке пи вордскоз шуыса, уг но тодскы вал али…
Пиналъёслэсь акыльтон? Соослэсь акыльтыны луэ шат?! Кыӵе мусоесь ук соос, кӧт ик шурдэ. Одӥг пол но жаляме ӧвӧл, улон сюресэ нылпиосын пырак пӧлэстӥськыса мынэ шуыса.
Кузпалэным тодматским 10 ар талэсь азьло, выжыезъя со бигер. Монэ нырысьсэ адӟемез бере ик малпай, пе: та нылаш мынам кузпалы луоз. Мон гуртын вордскемын бере, туж яратӥсько юрт, бакча котыр берганы. Улӥськомы Ижлэсь кыдёкын ик ӧвӧл Дэри ёросысь Изгуртын. Семьяе вӧзам, пиналъёс котырам, бакчае ки улам – мар кулэ на шудо луон понна.
Источник:
Ардашева О. В. Покчи дырыз пумтэм / О. В. Ардашева ; записала Е. Никитина // Удмурт дунне. - 2018. - 9 авг. - С. 10, 15. - (Тӧр шорын).
За предоставление материала выражаем огромную благодарность редакции газеты "Удмурт дунне"
