Емельянов Николай Николаевич
Удмуртэз мед кылёз удмурт ик[править]
«Удмурт дунне» газетмы трослы бездытгес луысал, вылды, оскымон, вазиськись, котьмалы шаплы авторъёсмы ӧй луысалзы ке. Можга ёросысь Удмурт Пычас гуртысь Ни¬колай Емельянов - усто гожъяськись, сюлмо лыдӟиськись, котьма ласянь адӟем карымон. Кема аръёс ӵоже нылпиосты историяя, англи кылъя дышетӥз. Пусъемын Удмурт Элькунлэн, Дышетонъя но наукая министерстволэн, «Удмурт Кенеш», «Знание» огазеяськонъёслэн Данъян грамотаосынызы. Со ужысь ветеран.
Удмурт кылэз ӧс сьӧрын дышетӥз...
- Сюрес вылысь уг пыраськы, - шуэ Николай Николае¬вич. - Можгала сяна, Иже но туж ӵем вуылӥсько. Нылпиосме эскерисько, удмурт изданиослэн редакциосазы пыратэк, уг чидаськы. Сьӧрам котьку но газет-журналъёс. Лычсузьымон лыдӟиськисько. Туж паймисько: кыӵе удмурт нылпи сад луоз «Кизилитэк», кыӵе школа - «Ӟечбур!»-тэк но «Удмурт дуннетэк». Тросаз газет-журналъёсты уг басьто. Подшивкаос люкаса, кузьмалляме но вань.
Ачиз Николай Емелья¬нов удмурт кылэз дышетымтэ. Вордскемын со 1952-тӥ арын Можга ёросысь Атаспочинка гуртын. 1918-тӥ арын кылдытӥллям сое ӟучъёс. 1936-тӥ арын гуртысь кӧня ке коркаос ӝуаллям. Музъемез ӟеч, со интыосы удмурт но бигер семьяос вуиллям. Пӧлазы - Н. Емельяновлэн но выжыосыз.
- Семьяямы удмурт вераськылӥм, нош эшъёс пӧлын ӟуч луытэк ӧйлась, - азинтэ Нико¬лай Николаевич. - Гуртам покчи школа гинэ вал, отын уд¬мурт кылэз ӧз дышетэ. Бадӟым классъёсы ветлӥ артэ Пычас школае. Отын удмурт классъёс вал ке но, отчы монэ ӧз кутэ ни, куриськыны но соку визь ӧз тырмы на, дыр. Доре бертыны оген шимес потэ вал, соин ик мукет классъёсын дышетскись эшъёсме возьмалляй. Ӵемысь соослэн удмурт кылъя урокъёссы тупаллязы, нуиз соосты Елена Васильевна Павлова. Туж визьмо, синмаськымон дышетӥсь! Ӧс сьӧрын кылзӥськыса, быдэс урок сылӥсько вал - тунсыко ук! Озьы удмурт кылэз дышетӥ.
Вунонтэм пичи дыр
Коля, 8-тӥ классын дышетскыкуз но, анайзэ «апа» шуэ вал ай, анаез интыын вал ӵужмемеез. Будэмъяз визьмаськыны кутскиз: малы вордэм мемиезлы озьы вазиське? Ассэ кужмысь карыса, «меми» шуыны дышетскиз.
- Анаелэн нимыз туж чебер - Купанча, но ми палъ¬ёс сое Кипанча шуылӥзы. Таӵе чылкыт удмурт нимын нылкышноос али, оло, ӧвӧл но ни, - азинтэ Николай Ни-колаевич. - Шумпотӥсько, анае улэп. Монэ со бызьытэк вордӥз. Зэм, бӧрысь бызиз, эшшо 5 нылпи вайиз.
Но Коля анаезлэн семьяяз ӧз мыны, кылиз ӵужмеез борды. Та сярысь ноку жалямез ӧвӧл. Но ӝоже усьылӥз ик, огназ будэ шуыса. Соин школаын дышетскыкуз ик, аслыз вералляз ни: одно трос ныл¬пи будэто! Туж синмаськыса учкылӥз бускельзы Ерофей агай шоры но: лачмыт, ужась, трос нылпи будэтэ. Эшшо Колялэсь куасъёссэ, великсэ тупатъяны вуттӥське.
Ма, аслэсьтыз атайзэ но пияш тодытэк ӧз улы - воргорон арганэн шудэ вал, туж-туж шаплы вераськиз. Выжы кыске ик, иське - Коля но пӧртэм ӧз луы. Малпанъёссэ шалтыр вералоз-куштоз. Арганлэсь но уг палэнтӥськы, умой-умой шудыны озьы ик ӧй дышы шуэ ке но.
Но кин тодэ, оло, зэмос гармонистлы пӧрмысал, одӥг учыр ӧй луысал ке. Школае но уг ветлы вал на, дӥсьёс бордысь бирдыосты вандылыны дышиз. Ӵужапайёсыз одӥг пол халатсэс дӥсяло - бирдыяськыны уг быгато, мукетъят нош ик дӥсьсы ярантэм... Лекъяськизы: ма карыны ёрмиськод ке, аргандэ вандылы ай!
Коля озьы ик кожаз: гур сьӧрысь сэреге шыпытак гинэ кариськиз но соку гинэ кузь¬мам арганзэс нянь шоремез кадь вандылӥз. Бӧрысь кӧня жаляз: выльзэ арган кузьмась озьы ик ӧз луы ни.
Историлы синмаськытӥзы... гордъёс но тӧдьыос
Котьмаин тунсыкъяськонэз Колялэн пичиысен ик шӧдӥськыны кутскиз. 3-тӥ классэ ветлыкуз, 1961-тӥ арысен, спичка коробкаос вылысь наклейкаосты бичаны кутскиз - малы люкамзэ эшъёсыз валаса ик ӧз вуттэ кадь. Юрттӥськыны юрттӥськизы ик - кин кытысь шедьтэ соосты вайылӥзы. Бадӟым классъёсы вуэмез бере ни Емельянов люканы кутскиз конверт маркаосты. Соос вылэ пуктылэмын вал тодмо писательёслэн, тодосчиослэн туспуктэмъёссы. Талы луыса соослэсь нимтулъёссэс, туссэс-буйзэс умой тодыны ӧдъяз. Ачиз школаын ужакуз ни, наклейкаосын, маркаосын альбомъёссэ нылпиослы возьматъя вал - мыло-кыдо учкылӥзы.
5-тӥ классысен Коля туж тунсыкъяськыны кутскиз исто¬риен. Тае со герӟа дышетӥсеныз но ӵужмемееныз. Одӥгез гордъёсты ушъялляз, мукетыз тӧдьыос пала дурбасьтылӥз. Пияшлы со валантэм потылӥз.
- Ӵужмемее Биялась вал, гуртамы сое Бия кен яке Биюк гинэ шуылӥзы, - тодаз вае Николай Емельянов. - Туж сабырлы, йӧн-йӧн кышномурт, тышкаськоз ке тышкаськоз, ушъялоз ке ушъялоз. Со тодаз вайылоз вал, кызьы гордъёс Бия гуртэз сутыса кельтӥзы. Та понна ик соосты адӟемпотостэм карылӥз.
Но историяя дышетӥсьсэ но, Николай Михайлович Кукушкинэз, Николай Емелья¬нов туж шунытэн гинэ тодаз вае. Бӧрысь, пе, со Можгалась одӥгаз школаын директор луиз.
- Мон, пичи классъёсын дышетскыкум, туж востэм вал, кыл-куараме ӧй поттылы, - азинтэ Николай Нико¬лаевич. - Бадӟым классъё¬сы вуи но, чылкак воштӥзы кадь. Ымы ӧз пытсаськылы ни. Историяя дышетӥсьмы борды юанъёсын тэбинисько вал. Нош со котьку но лад-лад валэктылӥз. Урокез нуыса уг вутты ни ке, шуылӥз: Коля, урокъёс бере кыль, соку вераськом.
Колялэн юанъёсыз кылдылӥзы, радио кылзыса но. Борддорысь вераськись тэркы борды со бурмемын вал. Совето Союзлэн гимнэз ӵукна 6 часын шудыны кутске, пияш тэтчыса ик султэ ни. Быдэс пушкыз тырылӥз, странаенымы данъяськыса. Собере бӧрсьысь бӧрсе кылзылӥз иворъёсты - таин сэрен ӵемысь сиськыса но ӧз вуттылы ни. Нош телевизорлы нырысь туж паймиз вал. Ялан малпаськылӥз: кызьы адямиос езъёс кузя васько но со быдӟа гинэ экранэ тэро?
Профессор, оло, луысал...
8-тӥ классэз йылпумъямез бере ӵужапайёсыз Колялы Ижысь индустриальной тех¬никуме мыныны ӵектӥзы. Экзаменъёс сётыса, пияш отын ог кык арня улӥз. Соос пыр ӧз ортчы - сокем шумпотӥз! Лобыса кадь бертӥз дор палъёсаз - туж мӧзмиз! Соку ик валаз ни: городын улыны уз быгаты. Нош кыӵе, пе, мынэсьтым заводысь станок сьӧрын сылӥсь пӧрмысал?
10-тӥ класс бере Николайлэн кияз историез ӟеч тодэмез сярысь грамота вал ини. Школалэн директорез Иван Елиза¬рович Краснопёров индылӥз: дышетскондэ азинты Ижысь пединститутын. Озьы Нико¬лай историяя но англи кылъя факультетын студент луиз.
- Ми, куинь ар дышетскыса, вуттӥм на, собере историкъёсты но кунгожсьӧр кылъёсъя дышетӥсьёсты нимаз дасяны кутскизы ни, - тодаз вае Нико¬лай Николаевич. - Дышетскыны капчи ӧй вал, уката но 3-тӥ курсозь. Угось одӥгъёсыз шуо: тӥ вуоно историкъёс - истори¬ез туж ӟеч тодыны кулэ, англи кылъя дышетӥсьёс асьсэлэсь верало. Мон, гуртысь потэм пияш, куддыр тодэмзэ но вераны уг пӧрмытӥськы...
Но дышетскон вискын но Николай дыр шедьтылӥз Уд¬мурт театре ветлыны. Эшъёсыз экзаменлы дасясько, со спектакле дыртэ, йырзэ шутэтскытэ. Со понна экзаменысь «4»-ен яке «5»-ен берта. Эшъёсыз талы паймылӥзы. Дышетӥсьёс но Емельянов студентлэсь быгатонлыкъёссэ, тыршемзэ адӟытэк ӧз улэ. Дышетсконзэ йылпумъямез бере сое туж куро вал научной коммунизмъя кафедрае ик кыльыны. Татчыозь, оло, профессорозь но будысал ни. Но Николай та вие но ӧз быгаты гуртлэсь мӧзмонзэ вормыны. Мынӥз Можга ёросысь ик Нынек школае ужаны.
- Гуртэ вуэме ӝокыт куазен юзмыт вуз зымем кадь потӥз, сокем сюлмы буйгаз, - Нынеке нырысьсэ лыктэмзэ тодаз вае Николай Николаевич.
Коммунизмлы оскиз!
Нынекын егит дышетӥсез улыны интыязы мӧйы нылкышно доры: Анна Николаев¬на Ашальчи Окилэн ӵыжы-выжыез вылэм, трос вералляз со нырысетӥ удмурт нылкышно кылбурчи сярысь. Нош туэ Николай Николаевич солэн шайгу вылаз юромо ветлӥз... простить карыны курыса.
- Мон историяя дышетӥсь, коммунизмлы оскисько, кутски Инмарлы пумит вераськыны, - тодаз вае Николай Емельянов. - Радио пыр но малпанъёсме шара верай. Озьы выремелы Анна Николаевналэн кӧтыз ӝож луиз, лек вазиз: мар меда уродэз Инмарлы осконын?
Нылкышно вӧсяськись вал. Егит дышетӥсь валаны кутскиз: та нылкышно дорын солы улыны умой ӧвӧл ни. Нош егит специалистлы нимысьтыз квар¬тира ӧвӧл. Озьы Нынекын 2 ар ужаса, со кошконо кариськиз. Кыкетӥ араз ик школалы ди¬ректоре но пуктӥзы ни вал, улон ¬инты висъялом шуыны но кутскизы - номыр ӧз дугдыты ни. Николай Емельянов семьяеныз ӵош вуиз Бадӟым Кибьяла.
- Татын 3 интые вуыса вуттӥ, - тодаз вае со аръёссэ. - Нырысь школаын вал, собере «Совет» колхозлэн профкоменыз кивалтӥ, бӧрысь - клубен. Асме буйгатыны вырылӥ: кытчы партия косэ, отчы ик мынӥсько. Но интыме вошъямысьтым, се¬рем туж ик уг поты вал.
Озьы ке но Николай Еме¬льянов быгатонлыкъёссэ котькытын возьматыса вуттӥз. Профорг дыръяз Иже дышетскыны ветлӥз. Отын профкомъёсын кивалтӥсьёс пӧлын устоез луиз. Ужаз со йырыныз-пыдыныз выйиз. Али вала ни: куддыръя мултэссэ, оло, куасалтылӥз но.
- Адями больничное потэ ке, сое одно эскероно вал, - шуэ со. - Кин тодэ: оло, колхоз ужлэсь палэнтӥське, нош дораз ужа. Ю-нянь кутсан вакытэ лумбытэн бусыосты котыръяй: кызьы меда ужало? Али но, бусы ужъёс кутско ке, озьы ик юалляськеме потыны кутске: кызьы меда уборказы ортче?..
Н. Емельянов Кибья клу¬бен кивалтыны кутскиз но хорез улӟытӥз. Гуртысь 10 воргоронъёсты но, эсьма, отчы кыскыны быгатӥз. Нош нылкышноос асьсэос, пе, лыктӥзы ни. Озьы, клубын ужаса но, бу¬сыосты, фермаосты котыръямысь ӧз дугды - агитбригадаен концерт возьматъязы.
Кин тодэ: таиз ужез Нико¬лай Николаевичез, оло, пыраклы бордаз бинялтысал ни. Угось кырӟаны-вераны со туж быгатэ. Гуртоосыз пӧлын али но юасьёсыз вань: малы тон артистэ ӧд мыны?
Но улон Николай Емельяновез нош ик интызэ воштытӥз. Кибья клубын ужакуз, огез бӧрсьы мукетыз нылпиоссы вордӥськизы. Соосты учкись кулэ. Мемеез дораз, Уд-мурт Пычасэ, улыны ӧтиз.
Котькуд урокын - шаерен данъяськон
Удмурт Пычасысь школаын Николай Николаевич соку ик одӥгез адӟем карымон дышетӥсь луиз - та понна со тау каре Россиысь дано дышетӥсьлы Ким Семёнович Поярковлы. Школалэн соку директорез оскиз Николай Емельяновлы, бурдъяз сое. Озьы Николай Николаевич 23 ар пала ужаз нылпиосын. Исто¬рияя, англи кылъя урокъёсты нуиз, директорлэсь ужзэ но быдэсъяз, завуч но вал. Вордскем палъёссэ, удмурт калыкез, анай кылзэ дунъямез, яратэмез котькуд уроказ шӧдӥськиз. Тунсыко экскурсиос радъялляз - пӧртэм гуртъёсы, пӧртэм тодмо интыосы вуылӥз нылпиосын ӵош. Пиналъёсты эшъяськытӥз элькунамы печатласькись газет-журналъёсын. Нуллӥз, эсьма, соосты Можга радиое но - анай-атайёс, нылпиоссылэсь куараоссэс эфирысь кылыса, кема тау каризы Нико¬лай Николаевичлы.
- Огпол малпаськонэ уси: малы история урокъёсты уд¬мурт кылын нуыны уг луы? - тодаз вае дышетӥсь. - Эскероно кариськи. Озьы В. Ванюшевлэн «Дорвыжы» эпосэзъя урок дасяй. Сое возьматӥ дышетӥсьёс азьын но. Васи¬лий Михайлович кытысь ке тодэм ни - Национальной библиотекаын ортчем «Дорвыжылы» презентацие ӧтчаз.
Россилэн, Удмуртилэн историзыя, шаертодонъя, англи кылъя усьтэм урокъёс Нико¬лай Николаевич одӥг пол гинэ ӧз ортчытъя. Со дышетӥсьёс пӧлын радъяськылӥсь конкурсъёсы пыриськиз, отын но соку ик адӟиськиз шаплы, аспӧртэмлыко, калык пӧлын луыны яратэмез.
Школаысь кошкыкуз, тросэз паймизы кадь. Но Николай Николаевич шуиз: ас мылкыд каремея. Нокинлы со ӧз вера висемзэ. Огпол, школаын урок нуыкуз, мугорызлэсь бур палзэ пери шуккем кадь луиз. Кык арня курадӟыса ветлӥз - нокинлы ӧз вера.
Но школаысь кошкыса но, Николай Емельянов дышетонлэсь ӧз палэнтӥськы. «Зна¬ние» огазеяськонын ужаз - калык пӧлы лекциосын потаз.
Котьку калык пӧлын
Николай Емельяновлэн котьку бордаз яратоно семьяез. Валентина кузпалзэ со шӧдтэк шорысь пумитаз. Нылаш эшез сьӧры Нынеке лыктэм вылэм. Егит дышетӥсь солы соку ик синмаськиз.
- Мон тау шуисько кузпалылы, трос нылпи вордон сярысь малпанме быдэстыны юрттӥз шуыса, - вера Нико¬лай Николаевич.
Нош кыӵе данъяське со кузпалызлэн сиён пӧраны быгатэменыз - чиньыдэ нюлод, пе. Соинтэк-а со колхоз столовойын ужаз, гуртоос сиёнзэ доразы но басьтон вылысь бидонэн вуылӥзы. Эшшо, пе, Вален¬тина Андреевнаез мыло-кыдо керттӥське, корка, азбар тыр сяська будэтэ, кырӟаны яратэ...
5 пиналъёссы - 3 нылзы но 2 пизы - табере быдэ вуэмын. Нунокъёссы но 5 кузя ни. Шоретӥез нылзылы атаезлэсь кырӟаны-вераны мылкыдыз паласькем, шӧдске. Табере атайзэ азьпалтӥз - пӧртэм инструментъёсын шудэ, Можгалась культура юртын нылпиослы крезьгуръя кружок нуэ. Ма, кылемъёсыз но пи¬налъёссы котьмалы устоесь - анай-атайзэс вормонъёсынызы шумпотто. Куинез уло Можгалан, кыкез - Ижын. Тӥни озьы, Николай Нико¬лаевичлы, соосты эскерыны дасяськыкуз, калыке потыны но муг луэ. Уг чида дораз пукыны. Кузпалыныз ӵош ветло «Ӝыт тылъёс» ансам¬бле. Пӧйшурась мон ӧвӧл, чорыгась но ӧвӧл, шуэ ачиз сярысь. Губияны ветлэ ик. Нош дораз кыле ке, соку ик гожъяськыны пуксе. Куддыр лушкемен но выре - кузпалызлы уг кельшы кадь потэ. Одӥг полаз «Удмурт дуннее» ста¬тья гожтоз, кыкетӥяз - Можга ёрос газетэ яке «Ӟечбур!»-е. Та вискын, эсьма, книга но поттыса, вуттӥз ни - «Дуно, дано нимъёс уно». Сӥземын шаерысьтымы но Можга городысь, ёросысь тодмо кырӟасьёслы, крезьгур, кылбур гожъясьёслы.
Эшшо Николай Еме¬льянов гожъяса кельтэ тодэ ваёнъёссэ, малпанъёссэ, сӥзёнъёссэ. Ассэ шудоен лыдъя. Шуэ: ӟучъёс ӟуч мед луозы, нош удмуртъёс уд¬мурт мед кылёзы.
Источник:
За предоставление материала выражаем огромную благодарность редакции газеты "Удмурт дунне"
