Серебренникова Валентина Михайловна
«Италмасын» будӥзы, «Айкайын» кыдазы
Туннэ верано-возьматоно адямиосмес удмурт калык ӟеч тодэ. Но тодэ огласянь гинэ – чебер кырӟаны быгатэмзыя. Мадёно муртъёсме учкись котьку адӟе ворекъясь дӥсен, пальпотӥсь ымнырен, ӵыдытэк возьма-кылзэ сюлэмез бугыртӥсь гуръёссэс. Ӝыны улонзы соослэн ортче сцена вылын, калык син шорын, нош мар луэ катанчи сьӧрын – тодмо ӧвӧл.
«Айкай» театрысь валтӥсь артистъёслэсь Евгений Георгиевич но Валентина Михайловна Серебренниковъёслэсь улон-вылонзылэсь шӧг но кузьыт, мальдытӥсь но пурысялэс интыоссэ асьсэлэн лэземзыя возьматӥсько.
- Тӥ кемалась кизили луиды ни, нош газетмылэн та дано бамаз шедьылӥллямтэ на. Котькудӥз журналист малпаз, лэся, тӥ сярысь ваньмыз верамын ини шуыса. Собере, тазьы чакласа, куарады чалмиз кадь, шер кылоно радио пыр но.
Валентина: Ужаськом азьло сямен ик, сётъяськом концертъёс, нуналлы быдэ сямен репетициос ортчо. Ушъяськыны ум яратӥське, кассетаосын, дискъёсын ум выриське. Калык сотэк но милемыз тодэ. Кинлы ке пыриськыса, ым шораз учкыса улэммы ӧвӧл. Ӟичыяськыса улӥсьёсты пумитаса, пушкы ик бугырске. Асьмелы шонер вамышъяськом кадь потэ, ас малпанмес но меӵак вераськом.
- Сакыр ческыт, но вуын сылме. Шуг-а кизилилы огшоры калык пӧлын улыны?
- Умой палыз тросгес. Монэ туж ик уг тодмало, зэм, егитгес дыръям Анна Герман кожаса, паймыса мырк-мырк учкылӥсьёс шедьылӥзы ик. Нош Женяен шыпытак ветлыны уг луы, куддыр акылес но луэ.
Евгений (горе): Ма, нылъёсмы сцена вылын ваньзы ог тусъемесь ук, зол буяськыса пото, соин ик урамын уг тодмало ни.
- Оло, асьтэос но кудӥз кин сураськоды?
- Бырид, бырид, сыӵеез ӧй вал на. Нош залын пукисьёслы огкадесь йӧто.
Валентина: Милемлы «валтэмъёслы» тодманзы ӵемысь юрттэ. Тани кызьы ке Постолэ вуылӥм. Бертыкумы ортчись машинае пуксим. Ми водительлэн сьӧраз интыяським. Шӧдӥськом, машина кузёмы синучкон пыр весь ми пала учкылэ. Собере Женя шоры вазьытэк ӧз чида: «Тӥ Серебренников кадь ук. Тодӥськоды на-а асьмеос огпол огазьын вал, ми куноятӥм но ай». Со тодэ бере, ми но одно тодыны кулэ кожа, лэся. Шуиськод ни: «о-о, о-о, тодам вайисько кадь».
Евгений: Якшур-Бодьяла мынон палан сад-бакчамы вань. Вамышъясько огпол сюрес кузя, тыбырам котомка. Одӥгез водитель берласянь тодмаса ведь машиназэ вадьсам дугдытӥз. Матысь муртэзлы кадь вера но вера, нылыз, пе, эктӥсь, Пермьысь хореографияя училищеез йылпумъяса, Петербургысь балетын валтӥсь партиосын эктэ. Шумпотонэз но кинлы ке верано ук.
- Тӥ кыкнады ик кырӟасьёс, калыкез шулдыртӥсьёс. Умой-а со семьяын, одӥг ужен вырыны, весь ваче син луыны?
Евгений: Туж ик ӧвӧл ай. Куддыр керетэм потэ, нош калык азьын уг лу. Мон валэктӥсько, тазьы но тазьы лэсьтоно шуыса. Егитъёс кылзо шыпыт, нош Валя вазе пумит.
Валентина: Мон лэсьтоно ужез адӟисько ас сяменым, мае но сое тросгес тодӥсько но кадь. Со сярысь ик вераме потэ – юрттон вылысь. Ваземе Женялы уг кельшы. Мурт адями шоры ымыз уз усьтӥськы, вань лекез мон вылэ усе. Кивалтон уж туж секыт. (Евгений Георгиевич театрын чеберлыкъя люкетэныз кивалтэ.) Женя азьло мукет вал, лякыт, пальпотӥсь. Та уж сое золтӥз, чурытомытӥз. Cоин ик ӵош ужаны секыт луиз. Озьы ке но шутэтскыны лыктэм калык сцена вылысь чебер пӧрмытскем пальпотӥсь артистъёсты гинэ адӟыны кулэ.
- Вае табере лыдӟисьёсты тодматом, кин вордӥз-будэтӥз но удмурт калыклы кузьмаз та жингрес уӵыосты?
Валентина: Мон Алнаш ёросысь Сырьезь гуртысь. Анае, Екатерина Дмитриевна (Катьырок шуо вал) Удмурт Вишурысь вал. Соин люкиськем дырысен 17 ар ортчиз ни. Туж кырӟась вал. Выжыосмы муми ласянь но, тятяе ласянь но вуз каро, пе, вал. Бигеръёсын туж кушласькыса улӥллям. Бабушъёсмы ог-огзы доры куное ветлылӥллям. Анайёсмылэн вукозы вылэм, кык этажо корказы. Кулаке поттыса пыдйылчие кельтӥзы, корказэс школа каризы, пе. Пинал дыръяз анае туж чебер вылэм. 17 аресаз кураны лыктӥллям, корка ӵужись, пе, кулэ. Тузӥ воргоронэз адӟем но сюлмыз нёркак луэм. Но карт луонэз чылкак мукет вылэм, ай ӵыж-горд йырсиё – шуш потэм. Кинлы бызёнзэ тодыса, ӵыжаськыса, пе, бӧрдӥз.
Евгений: Мон Дэбес ёросысь Варни гуртын вордӥськи. Туж вашкала гурт, Чупчи кузя кузянак кыстӥське. Муми-буби кыкназы дышетӥсьёс вал.
Буби, Георгий Дмитриевич, райисполкомын секретарь луыса но ужаз, лэсьтӥськон удысын но кивалтӥз. 50-тӥ аръёсы партилэн ӧтемезъя бере кылись хозяйствое кыткиське но кык ар ӵоже сое пыд вылаз йыг-йыг султытэ. Со гуртэ вуэмме тодам вайисько на. Сюрес ӧвӧл, гуртэ пырыны выж но ӧй вал. Колхозын 1 машиназы но 2 шальтрам тракторзы гинэ вал. Папае ужаку, комбайн но машина басьтӥзы, та аръёсы ик улон юртъёсы радио пыртӥзы – сыӵе шудо нуналъёс вал! Со вакытэ радио пыр выль кырӟанъёсты дышетылӥзы. Син азяды пуктэ ай, мынам мумы-бубыосы валес вылын кыллё но радиоен ӵош выль гуръёсты нёжъяло, буби со куспын ик туж тыршыса кылъёссэ гожъя. Яратылӥзы соосты куное ӧтчаны, малы ке шуоно котьку выль кырӟанэн вуылӥзы.
- Озьыен, кыкнады крезьгур дуннее кӧкыысен ик выемын ни?
Валентина: Мон 6 аресысен ик сюанъёсы ветлылӥ, пыдме лёгыса ик кырӟалляй. Конечно, монэ лӧпкытъяллязы: алвылазы пукто, вешало, чупало, куноято. Кин луон сярысь мукет малпанъёсы ӧй вал ни. Школаын но кырӟай.
Евгений: Нош мон нырысь суредась луыны малпасько вал. (Паймыса учкылӥсько пинал дыръяз лэсьтэм ужъёссэ: кудӥз гожмамын карандашен, кудӥз буёлэн. Возьыт ӧз луысал куд-огзэ бадӟым адӟытонэ но поттыны - Г. Ю.) Школаысен ик йыре кылбур чуръёс но лыкто вал. Но мон «пӧраськылӥ» ӟуч кылыны.
- Нош кытысен-о ог-огеныды пумиськиды?
Валентина: Ижын, крезьгуръя училищеын ӵош дышетским. Женя одӥг курслы азьпалан вал. Дышетскемез бере сое удмурт театре келяны малпало вал, соку отын крезьгуро спектакльёс но пуктылӥзы. Отын но со быгатысал. Куриськимы «Италмасэ». Кызьы ке Женяен ӵош «Мон тодам ваисько» кырӟанэз быдэстыса утчам. Мамонтов кылӥз но дэмлаз сцена вылэ поттыны. Озьы дуэт кылдӥз. Та учыр ик милемыз матэгес герӟаз. «Италмасын» Женя валтӥсь кырӟась луиз.
- Тӥ понна артист луон – со шуд-а, дан-а, курадӟон-а?
Евгений: Пичиен-пичиен ваньмыз вань. Пичиысен малпан быдэсмиз бере – со шуд. Тонэ ярато, возьмало, пумитало, мукет шаеръёсын удмурт калыклэсь нимзэ веран, солэсь лулпушсэ, чеберлыксэ возьматон – со дан. Курадӟытэк но уг луы. Туж трос ужано луэ.
Валентина: Артист луон – со Инмарен сётэмын. Озьы луыны кулэ. Курадӟыса сцена вылын ке кырӟаськод – быдэс улонэд курадӟон. Сцена вылысен учкисьлы, кылзӥсьлы трос кужымдэ сётӥськод, нош залысь тонэ шумпотон тулкым мед пылатоз, соку жадем но веська.
- Ӵем-а зымылӥськоды со шудо тулкыме?
Евгений: Алнаш, Можга, Пурга палъёсын калык милемыз туж шуныт пумита. Сыӵе дыръя артистлы но ужаны каньыл, кытысь ке ватсаса кужым потэ. Нош уйпал ёросъёсын, басьтом Дэбес палъёсыз ик, калык ас пушказгес ватскемын, мылкыдзэ уг ӧръя, пальккаськемезлэсь кышкаса сямен чакласа возе. Отысь учкисез бугыртыны трос кужым кулэ.
- «Италмасын» но тӥ адскымон адямиос вал. Кыӵе муген люкиськиды?
Валентина: «Италмас» ми понна зол школа вал. Отын ми будӥм, яратонмы вордскиз. 20 арзэ та дано коллективлы сётӥм. Соин ик люкиськон секытэн сётскиз. Вакытэз но сыӵе вал – выльдӥськон кутскиз. Милям но маке выльзэ утчаммы потӥз. Малпамы вал «Италмасын» ик нимысьтыз пичигес коллектив кылдытыны. Но А. В. Мамонтов талы пумит луысал. Озьы «Италмаслэсь» люкиськыса фольклоръя «Айкай» ансамбль кылдытӥм. Валаськом, Анатолий Васильевич понна со зол шуккет луиз. Кошкизы ук кужмоосыз, кужымзэс шӧдӥсьёс – 17 кузя!
Секыт югдуре кельтӥм милемыз будэтэм коллективез. Возьыт вал, дун вуэ сялӟем кадь йӧтӥз. Кытӥяз жалян дыръёс но вал. Ма, бен, вожзэ медаз возьы ни ми вылэ Анатолий Васильевич. Табере со выль адямиосты будэтӥз, бурдъяз ни. «Италмас» азьло кадь ик кужмо, дано коллектив.
- Тӥ трос потамын гастрольёсы. Кытчы-кытчы вуылӥды, тодады возиськоды на-а?
Евгений: Дуннеез трос котыръям. «Италмасэ» вуэме бере ик Москвае нырысьсэ вуылӥ, али кадь ик тодам лыктэ. Поезд Москва пала вуэ ни, мон укно борды лякиськи. Тани, пе, Останкино башня адӟиськоз ни (ми уйпал сюрестӥ отчы мынӥм), таиз, пе, Москваез кульчоясь сюрес. Вуимы но со дыре самой бадӟымаз «Россия» гостиницае интыязы. Отын ик Кремль. Синъёсы соку пичи пияшлэн кадь таба быдӟаесь вал, дыр, сюлэмы пачылмемын. Уйин огнам Кремлез котыртӥ, Горький ульчаетӥ вамышъясько но, медам йыромы шуыса, Кремль башняосысь ӝуась рубин кизилиосты чакласько – копак выжыкылэ сюрем кадь потӥ.
1972-тӥ арын шунды ӝужан пала потӥм, поезд быдэс арня нуиз. Собыдӟа дунне, кӧня асьмелэн музъеммы, вераны луонтэм чебересь интыос. Куинь толэзь ӵоже та палан концертъёс возьматъям, Владивостокысен кутскыса бертон сюресмы кузя интыяськем ваньмаз сямен городъёсы дугдылӥм, пырак вагонъёсын ик кӧламы. Благовещенск, Хабаровск, Белогорск, Чита, Биробиджан, ма, тазьы картаез учкиськод ке, ӧвӧл кадь город, кудаз ми ӧй вал. Трос пол вуылӥм Прибалтикае. Отын шалтыр удмурт сямен вераськиськом вал. Шауляй городын универмагазы тазьы ас сяменымы бӧтьыртонъямы тодмотэм кышномурт ми шоры «умоесь-а» шуыса вазе. Тӥ, пе, удмуртъёс кадь. Мон татын улӥсько, ачим Дэбесысь. Гастрольёсын вуылӥм Италие, Чехословакие, Финляндие, Германие, Швецие, Венгрие, Швейцарие, Монголие, Уйпал Кореяе, Японие но мукет интыосы – ваньзэ вераса но уд быдты.
- Сомында ветлонъяды пӧртэм тумошо учыръёс но кылдылӥзы, луоз. Оло, тодады мае ке ваёды?
Валентина: Сьӧрлон ӟучезлэсь золгес удмурт номеръёсты пумиталлязы. Асьме киын вурем костюмъёсты бергатъяса ик учкыло вал. Венгриын уйпал удмуртъёслэн дэремысьтызы пужыосты синйылтыса, мадьяръёс воксё чабкиськизы: чылкак милям кадь ук, пе. Ӵыжы-выжыос луиськом шуыса адӟиське, пе. Венгрилэн президентэз Арпад Гёнц концертмес синвуаськыса ик учкиз.
Швецие потон азям мон гуртоосылэсь азвесен люкам 4 уксё тӥрлыксэс кутылӥ. Сюлэмшугъяськыса сётӥзы, расписка но гожтыса кельтӥ. Москваысен таможня пыр потыку талазы ведь – ӧз лэзе потыны. Самолётысен синвуосы чур! вияло. Ӧйтӧд, кинлэн визьмыз тырмиз борт радио пыр ивортыны, корт манетъёс люканы курыса. Верам кылъёс сюлмазы пыӵазы, лэся. Быдэс мешок бичазы. Солэсь Швециын уксё тӥрлык лэсьтӥзы ни. Весь куректыса отын ветлӥ, сюрозы на-а гуртысь лэзем дуно арбериосы? Москвае вуим но кивалтӥсьмы азям уксё тӥрлыкъёсын шальтыртэ ни. Шумпотэменым синвуосы васько, ӟыгыръясько, чупасько сое.
1980-тӥ арын Москваын ортчем Олимпиадаын ужам. Туж матысен учким олимп тыл ваемзэс. Паймыса быриськиз уно люкаськем калыклы. Ульчаын гинэ ӧвӧл, липетъёс йылын но сылӥзы.
Брежневез ватыку но Москвае укшам. Ульчаос пытсамын, гостиницае мынэммы уг луы. Вить час ӵоже вокзалын пуким.
1985-тӥ арын Москваын ик Дуннеысь егитъёслэн фестивальзы ортчиз. Толэзь но ӝыны отын концертъёс сётъям. Зол отын соку улӥськиз – коммунизме вуэм кадь потӥз – котьмар вал. Иже вуим но, лавкаосын ӝажыос бушесь, спичка-майтал гинэ но ӧвӧл.
Тани тумошоез но тодэ лыктӥз. Хорватиысь бертыкумы, бигер шаере вуон азямы М. Ворончихинэз юаны кутскизы. Огез йырзэ бергатэ, мукетыз автобусын утчаське – ӧвӧл Михаилмы автобусын. Берло дугдылэммы дырысен ӝыны час-мар мынӥськом ни. Адӟиськом, иномарка милемыз кельтэ, куара сётэ. Отысь Ворончихин шок-пуль вуэ: «Мар-о, мон тӥледлы сыӵе уродзэ лэсьтӥ – кельтӥды?» Дугдылон интыын чорыгъёсын вуз каро вал. Отчы жальмам, лэся.
Нош Удмуртиетӥ гастрольёсы ветлыку, пичи нылпиосмес ми сьӧрамыгес нуллӥськом. Одӥг пол Киясовоысь Сальяе потӥм. Куазь зол-зол зорыны кутскиз. 15 нылпиез райцентрысь школа интернатэ кельтӥм. Соосты чакланы кык егит артистъёсмы кылизы. Концерт бере, сюрес небӟемен, вырӟеммы ӧз луы, жингыртэммы, езъёс чигемен, уг луы. Клубын ик кӧлоно луиз: кин ӝӧк вылын, кин газет вӧлдыса выж вылын. Куазь зоремен ӵуказеяз но кошкеммы ӧз луы. Куризы на Ермолаевоын концерт сётыны. Сюлэм интыяз ӧвӧл ни. Ярам, ваньмыз умой ортчиз. Нылпиосмес сюдӥллям, утялтӥллям. Тӥни озьы, ӝыны улонмы чиганъёслэн кадь ортче.
- Евгений Георгиевич сярысь кылылэммы вань, оломарлы но киыз мынэ, фантазиез узыр шуыса…
- Ма, кортӵог шуккыны мылкыд вань. Толалтэ но сад-бакчаям ветлӥсько. Музъеммы но кыкетӥ басьтэмын.
Валентина: Женя котьмае лэсьтыны пӧрмытэ. Ӧвӧлтэмлэсь но кампет кылдытоз. Со быгатэ кышномурт ужез но лэсьтыны – усто вуриське. Аслыз брюки но вуре, азьвылгес шуба но вандылӥз, вуриз. Дэбесысь ательее ыж ку нуллӥз, учкизы отын но уз, пе, тырмы. Женя ваменскиз: кызьы, пе, уз тырмы, кутӥз но ачиз вуриз. Со шубаен Геннадий Кузнецов «Паймод эке» кырӟанъя чорыгасез возьматъяз ай.
- Нош мар верасалды тӥ, Евгений Георгиевич, кузпалды сярысь?
- Со мынам – мотор, созэ-тазэ косэ лэсьтыны. Мон соин кенешисько, кызьы-мар лэсьтыны.
Валентина: Кенеше но ачиз сямен ик лэсьтэ.
Евгений: Яратэ кышное пӧраськыны, узы-боры бичаны, губияны.
Валентина: Таизъя мон нюлэс пастух. Радикулит кутэ ке, ньыльпыдъяськыса но нюлэсозь гызмыльто, тэль вань висёнме бурмытэ.
Евгений: Губияны кошкиз ке, со котьку тыро бертоз. Кызьы шедьтэ губи, магнитэз-а, оло, вань. Валя умой тодэ йылолъёсты, вордскем палысьтыз кырӟанъёсты, сюлмаське театрмылэсь репертуарзэ узырмытыны.
- Тӥляд трос тодмоосты, котькудӥзлэн потэ, дыр, куное ӧтемез. Концертъёс бере но утялтӥсьёс сюро, луоз.
Валентина: Зэм, куноятэмзы потэ. Таӵе дыръя йырдэ ыштоно ӧвӧл. Та муген троссэ усто артистъёсмес ыштӥм ини, тужгес но оркестрын шудӥсьёсмес. Ярам, али быгатӥсь егитъёс вуизы, юнматскизы, семьяос кылдытӥзы. Соос вылэ бадӟым осконмы. Кивалтӥсьмы Пётр Данилов но бызьылэ-сюлмаське. Техникая университетысь общежитиын егит артистъёсмылы интыос висъязы. Со понна взаимозачёт шуон амалэн ми та университетын дунтэк концертъёс сётъяськом.
Тодмоос дорын кунояськыны берло вакытэ мылкыд лапказ ини, ӧтисьёс вань но, мӧйымиськом, лэся. Нош вырӟиськом ке, Женя сьӧраз арганзэ кутэ. Крезьгур мытон, соку ми вылэ усе. Сюанъёсы, мукет шулдыръяськонъёсы ӧтчало, но озьы ветлыны луонлыкъёсмы ӧжыт, воштӥсьёсмы ӧвӧл.
- Куное вуыса, кыӵегес кырӟанъёсты мытӥськоды ӝӧк сьӧрын?
Валентина: Пинал компаниосы ум ветлӥське. Соослы дискотека нерге кельшегес. Нош кырӟаны тыршиськом тодмогес крезьгуръёсты: «Шудо аръёс», «Нырысь яратон», «Мон утчай сяська пӧлысь» но мукет.
- Арлыдды сярысь поттылӥды. Бадӟым-а семьяды? Котырады внукъёсты но бергало ни, дыр.
Валентина: Кык пимы. Бадӟымез, Руслан, нимаз улэ. Покчиез, Юра, 10-тӥ классын дышетске, туж яратэ компьютерез.
- Тросэз артистъёс ӝожтӥсько пичи уждунды.
Валентина: Узыр артистъёс пӧламы ӧвӧл, ӧй но вал. Ваньбур люкан сярысь кызьы ке ӧм но малпаськылэ. Солы пумит ӧвӧл, но вань кужыммес, быгатонлыкмес ӧръяны вырим калыклэсь сюлэмзэ, мылкыдзэ небӟытон-лӧпкытон уже.
- Валентина Михайловна, верамдыя маке ӝожалэс мылкыд пырыос шӧдӥськизы. Оло, улонды малпамъя ӧз радъяськы?
- Ваньмыз умой, уже сюлэмъям, картэ оскымон. Но маке но монэ пачкатэ. Кыӵе ке но ӧръяськытэк кылем кужыме маза уг сёты. Верам потоно кылъёсы кылизы на кадь.
- Бер ӧвӧл на. Кизилиос уно пол воректо, шуо.
Источник:
Серебренников, Евгений Георгиевич. "Италмасын" будӥзы, "Айкайын" кыдазы : беседа с ведущими артистами театра фольклор. песни "Айкай" / Е. Г. Серебренников, В. М. Серебренникова ; записал Г. Юсаев // Удмурт дунне. - 2005. - 11 февр. - (Удмурт кизилиос).
За предоставление материала выражаем огромную благодарность редакции газеты "Удмурт дунне"
