Чибышева Флюра Ахметовна
Кин вӧсяськыны уг вала, йыбыртъяно луэ[править]
Таяз арнянуналэ, 30-тӥ июне, Пермь улосысь Кирга гуртын ортчоз 6-тӥез Элен Вӧсь. Элен Вӧсь – Кам сьӧрысь ӵыжы-выжыосмылэн тужгес бадӟымез, югытэз праздниксы. Кӧня ке аръёс талэсь азьло та чебер но мур пуштросо вашкала калык йылолэз Галиханов агай-вынъёслэн кичӧлтэмзыя улӟытӥзы Ижын улӥсь башкир удмуртъёс. Вераны кулэ, камсьӧръёслэн татын вань нимысьтыз огазеяськонзы, «Ӟаныкай» ансамбльзы, соос мыло-кыдо пырисько шаерамы ортчылӥсь калык праздникъёсы, ужрадъёсы. Камсьӧръёсты ас бордаз бинялтыса возе Флюра ЧИБЫШЕВА.
- Флюра Ахметовна, тӥ пиналысен Ижын улӥськоды ни. Но, дор палъёсады таманлы вуылыкуды, отысь кивалтӥсь, малпалод. Кылем толалтэ тани тӥ Алтау гуртын калыкен пумиськон ортчытӥды, калык туж сӥ-бур карыса пумитаз, котькуд верам кылдэс санэ басьтыса, кылзӥз.
- Ма, милям адямиос сыӵеесь, соос котькуд куноез ӟеч пумиталозы. Собере, мон, югдурез тодыса, вераськисько ук. Али ваньмылэн сюлэм висёнмы – гуртъёс тарлало (куашкало), соосты кызьы ке утьыны-возьыны кулэ, пиналъёс доразы мед кылёзы. Нылъёслэн адӟон сыӵе – палэнэ бызён, но соос интые кенъёс мед вуозы. Улон котькытын огвыллем, но мукет эльын (шаерын) мемей ымад сиён уз поны. Ми туж оскыса вӧсяськиськом, удмурт гуртъёс уз куашкалэ, ӟеч улозы, анай-атайзэс котькыӵе дауръёсы дунъялозы, нылпизэс, ас калыксэ-кылзэ яратыны дышетыса, будэтозы шуыса.
- Башкириын вашкала дырысен артэ уло удмуртъёс, бигеръёс, башкиръёс. Асьмелэн дышемын вераны: артэ улон адямиосты лякытгес каре, соос пичиысен ик, ог-огзылэсь кылзэс валаса, эшъяськыса будо. Со бордын гинэ-а ужпум?
- Со бордын гинэ ӧвӧл. Кожаськоды, милемды пичи дыръямы бигеръёс ӧз серекъяллялэ, ӧз тышкаллялэ? Яке арлыдоос ог-огзэс уг пышкыло, куспазы туж тупаса, ӟыгыръяськыса уло? Ас выжыед со аслад ни, котьма тон кар, бигер бускельдэ, удмурт иськавындэ сямен, нокызьы но уд яраты. Но гажаны косыны луэ! Тани ми школае бигер гуртэ ветлӥськом вал. Бигер пиналъёс «вотяки, вотяки» шуыса сьӧрамы бызё, сюй люкен лэзьяло вал. Луэ вал, дыр, ваньзэ сое чиданы, мыкырскыса ветлыны, нош ми ӵуказеяз со учыр сярысь классэн кивалтӥсьмылы вераськом но, соиз бигеръёслы визь тыре, эшшо оген-оген директор доры нуллэ. Озьы ик дугдӥзы ултӥямысь. Пусйыны кулэ, дышетӥсьмы но, директормы но асьсэос но бигеръёс вал, но соос мукетъёссэ ултӥяны ӧз сётылэ. Тӥни мар со – национальной политика!
- Тӥ асьтэос но ӝыныё бигер, шуо. Нош кызьы меда удмурт вирды вормиз? Анайды зол вал-а?
- Милям выжымы пересь песянай (прабабушка) бордысен суралскемын ни: нырысь сое бигеръёс кенлы басьтӥллям. Со картсэ удмуртомытэм. Собере песянае, анае но бигер картлы бызиллям. Верало, бигеръёс, пе, со вакытэ трос удмурт нылъёсты басьтылӥллям, ужась луэмысьтызы, кылзэс мултэс верамтэысьтызы, яратӥзы, дыр. Атай бигер выжыысь ке но, удмуртъёсты туж гажалляз. Анай туж лачмыт, вӧсяськись, визьмо вал. Сям мынам – атайлэсь. Ой, шаплы вал со. Кладовщикын но, фермаен кивалтӥсьын но ужамын. Но кыӵе ке вамыш лэсьтон азьын одно анаен кенешылӥз. Тодӥсько на, кыӵе ке должность ӵектыкузы, ваче кенешизы. Анай меӵак «эн мын» ӧз кары, «йырыд висись луоз ук», шуиз. Атай кылзӥськиз, ӧз мыны. Семьяямы ми ялан удмурт кылын вераськылӥм. Но бигерзэ ваньмы ӟеч тодӥськом. Будӥм вить кузя. Одӥгез вынмы ӧвӧл ни. Мукетыз Ижын улэ, огез сузэрмы – Тюменьын, бадӟым апаймы – атыкай юртын. Мемей интые кылиз, со доры бертаськом. Туж жаль потэ со мыным – пӧлысьтымы одӥгназ дышетскытэк кылиз. Озьы вал ук азьвыл – анай-атай бырйылӥзы, кин гуртэ юрттӥсе кылёз, кин дышетскыны кошкоз. Инмарлэн «Омин!» шуон кыл вадьсаз сюриз, дыр, мар карод. Но ми сое ум куштӥське, пинал дырысен быгатэмея весь юрттыны тыршисько. Одӥг секыт ужез но: бакча мерттонэз, турын калтонэз – со вылэ гинэ ум куштӥське, дэмен бертыса лэсьтӥськом, пиналъёссэ но, асьмелэсьёссэ сямен ик, утялтӥм, дышетыны юрттӥм.
- Ма, камсьӧр удмуртъёс ӵыжы-выжылы гинэ ӧвӧл, вань бускельёссылы но юрттыны дась, шуо, дорады, пе, тодмоез но, тодмотэмез но пырыны, кӧлыны быгатоз…
- Мар меда солы паймонэз, милям ваньмыз озьы. Пинал дыръям мыным юрттӥзы, табере – мон. Бен, шуом, гуртысьтымы кинлэн ке пиналыз Иже институтэ экзамен сётыны лыктэ, нош пыронтӥез ӧвӧл. Соос кытысь ке адресме но, телефонме но шедьто. Мон анай-атайзэс но уг тодӥськы ни, егит калык будэ ук, но дорам пыртӥсько – дор палысьтым ук! Сюдо но, кӧлто но, институтэ но келяло, баллэз ке ӧз тырмы, ректор дорозь но вуо. Нош туганъёс (ӵыжы-выжыос) сярысь веранэз ик ӧвӧл – соосты аслад пиналъёсыдлэсь висъяны уг яра. Карманазы чик копейкатэк но лыктӥзы ке, сюд, дӥся, дышеты. Озьы кулэ.
- Картты, нылпиосты уг паймо-а?
- Карт кемалась дышемын ни. Пиналъёс огпол-кык пол куаретӥзы ик вал: мар, пе, тон ваньмызлы юрттӥськод, милемлы – уд. Мон чутрак шуи: тӥледлы Инмар юрттэ. Нош кин вӧсяськыны уг вала, адямилы вазиськоно луэ.
Ма, чылкак юрттытэк ӧз будэ, тодэ ваёно ке. Нылылэн улонын интыез понна ожмаськоно но луи. Ӧйтӧд, малы мон ӧй кельшы дышетӥсезлы, собраниосын шаплы кариськемысь-а, шай-а – нылме обидьыны кутскиз. Школаысь нуналлы быдэ бӧрдыса вуэ: нош ик «куинь» яке воксё «кык», пе. Мон ялан паймисько ма, кызьы-озьы, доре ужзэ шонер лэсьтӥськом кадь, маиз мыдлань? Кема чидай. Собере амал шедьтӥ: нылылы шуисько, тон эшъёсыдлэсь тетрадьёссэс одӥг уйлы курылы ай. Оляе вайиз, мон учки но абдрай: ужзы огкадь лэсьтэмын, янгышсы но огвыллем, но мынамезлэн – «куинь», мукет нылашлэн – «ньыль». Вакытэз вуиз. Дышетӥсь монэ дораз ӧте: озьы-озьы, пе, нылды лицейын дышетскыны уг вормы. «Мынамез гинэ-а?» – «О-о». Соку поттӥ «ватосме», валэктэ, шуисько, кызьы тӥ дунъет пуктылӥськоды, сотэк мон министерствоысь, судысь юаллясько. Со куалектӥз, вераз директор, пе, тӥлесьтыд нылдэс улляны косэ. Уз пӧрмы, шуисько. Татын дышетскоз! Секыт вал. Но бадӟым классъёсын ваньмыз воштӥськиз малы ке но, 10-тӥ классэ бырйыкузы, ӟеч дышетскисьёссы ӧз ортче, мынамез конкурсэз потӥз. Университетысь юрфаке но бюджет интые ас визьмыныз пыриз. Бен, луэ вал капчи амал шедьтыны – нылэз мукет школае выжтӥд но, ужез быриз. Но мон лыдъясько, ултӥямлы сётскыны уг яра, нюръяськоно, сямез пичиысен кыдатоно.
- Семьяяды ваньмыныз асьтэос кивалтӥськоды, дыр.
- Ма, мынам картэ вань ук. Со Пичи Пурга ёросысь Баграш-Бигралась. Пинал дыръям синмаськи чылкыт, кибашлы луэмезлы. Миша туж чебер вал, художникын ужаз. Али но киосыз зарни. Монэ туж гажа кадь йӧтэ, соин мон, кивалтон сямы вань ке но, кенешытэк тусьты-пуньы но уг басьты, ваньмы ӵош вераськиськом: картэ, нылы-пие, кенэ-эмеспие. Озьы лякыт ук, нырысь огезлы юрттӥськом, собере мукетызлы. Нылылэн семьяез тани та нуналъёсы выль корка потӥз, ваньмы ӵош лэсьтӥським. Но семья куспазы маке валамтэос кылдо ке, соку шуисько ни: тазэ асьтэос ӟузьылэ… Котьку дурбасьтӥсько кенэлы но эмеспиелы, пиналъёсы сое тодо. Нылы но кенэ аэропортын ужало. Пие но эмеспие – ужбергатӥсьёс. Юри малпам кадь тупаз.
- Вань-а тӥ понна вормонтэм ужъёс?
- Ма, мон улэп ук, кызьы уз луы. Улонам туж зол янгышаме-шуккиськеме вань. Синазькыль 1990-тӥ аръёсы вал со. Кин-мар дауртӥз, кызьы быгатӥз, озьы улӥз. Кин кекамон ёрмылӥз, кин байкиз. Мон соку больницаын валтӥсь медсестра луыса ужасько вал. Уже туж кельшылӥз, кивалтӥсьёсын тупалляй, но улон югдур кӧтыя ӧй вал. Нош мынам кужым пӧзе, маке но кароно. Соку ваньмыз вуз карыны кутскизы. Мон, ужысьтым кошкытэк ик, вуз карыны малпай. Одӥг выходнойёс ӵоже, Турцие солань-талань ветлыса, вутскисько вал. Но удалтон мон бордысь шуак берытскиз. Адямиослы мултэс оскиськеменым, озьы луиз. Огкылын вераса, туж бадӟым изъян адӟи. Анай доры бертӥ. Нош со шуэ: мар куректӥськод, йырыд быгылес, ужед вань. Инмар мынэсьтым кылъёсме кылэм, дыр, вӧсяськи, пе, вал, со ужлэсь нылме палэнты, уксё висён бордаз медаз няняськы. Шуо ук, анайлэн кылыз кужмо. Озьы ик луиз. Но ваньзэ сое Инмар нылпиосылы дуреныз берыктоз ай.
Мон мукетыз пумысен жалясько: институтэ ӧй мыны.
- Берло дыре удмуртъёс уг возьдасько ни асьсэды язычник шуыны, но та палан солэн зэмос шӧмыз уг шӧдӥськы, буддистъёс сярысь ӵемгес кылӥськом ни…
- Инмар, Вылысь кужым – одӥг. Вӧсяськон кылдэ малпаськыса, оскыса вераськод ке, ваньмыз иназ мынэ. Язычествоез уг яра мукет религиослы пумит пуктыны, национальностьёслы люкыны. Со огазеяськыны мед юрттоз. Асьмелэн осконмы вашкала дыръёсы ай кылдэмын, вань религиос со бордысен кутскемын. Мон огзэ но религиез сыӵе-таӵе уг кариськы, ваньмыз соос адямиез визь-нодо, ӟеч карон, чылкытатон вылысь малпамын. Огзэ гинэ тодӥсько: макем тон дунъяд ас вӧсьтэ, сокем со тыныд шыкырзэ (дэлетсэ) ыстоз. Туж шумпотӥсько, нылпиосмы но вашкалы йылолъёсмес утё, вӧсяськонлэсь уг палэнско.
Элен Вӧсьмы тупа тапал Герберлы, но Элен Вӧсьын валтӥсь интыын луэ вӧсяськон. Инкуазен огкылысь улӥсь удмуртъёс та нуналэ асьсэлэн Инмарзылы курбон сёто, вӧсясько, ӝук сиё, собере гинэ шулдыръясько. Тау карыны кулэ Галиханов агай-вынъёслы – соослэн кичӧлтэменызы, улӟытӥм тани Элен Вӧсез. Со 1960-тӥ-1970-тӥ аръёсысен уг ортчылы ни вылэм, кылемын на вал гурт вӧсьёс гинэ. Туэ куатетӥзэ люкаськиськом ни. Та рад – Пермь улосысь Кирга гуртын. Миым Башкириысь Алтау гуртын вал. Камсьӧр удмуртъёслэн та тужгес бадӟым, югыт праздниксы. Отчы мукет городъёсысь-улосъёсысь но семьяен-семьяен вуо, уйпалась но, лымшорысь но, шуэм сямен. Кык сюрс пала адями люкаське. Вӧсь йылол пичиысен сяме пыӵатэмын – отчы ӧд ке пыриськы, сюлэм шуг луэ, сьӧлык басьтӥськод кадь, кыӵе ке кышкан кылдэ. Отчы ваньмыз мыныны тыршо: пичиез но, пересез но, копак ветлыны быгатӥсьтэмъёс гинэ доразы кылё, но соослы вӧсям ӝук одно доразы ваё. Ветлӥськод но, сюлэм буйга, ӟечезлы оскон юнма. Соин ик семьяосылы но шуисько: потэ-а, уг-а, ваньмиськоды-а, уд-а – мыноно!
Шумпотӥсько, йылолмылы дурбасьто Нациосын ужан политикая министерствоын. Нимысьтыз тау кареме потэ Николай Николаевич Мусалимовлы – тани туэ но со сюлмаськиз автобус висъяны.
- Башкириысь потэм сӥё-дано удмуртъёс Ижын лачак, нош кивалтӥсе бырйиллям огшоры медсестраез. Кивалтонлы дырзэс-а жаляло, яке тӥлесьтыд туж бадӟым быгатонлыктэс-а адӟизы?
- Соиз но, таиз но вань, дыр. Но тужгес бадӟым мугез, ачим малпамъя, мукетыз бордын. Общественной огазеяськонъёсты, мар ватонэз, политикае но кыскало. Адямиос сыӵе дыръя кык тыл вискы сюро, нош мыным со кышкыт ӧвӧл – мар монэн, огшоры эмсузэрен, карозы? Одӥгысьтыз больницаысь уллялозы, мукетаз мыно, ми кадьёслы котькытын кулэясько. Творческой адямиослы та ласянь трослы секытгес, соослэн быгатонлыксы узыр, но сюрессы сюбег.
- Таӵе кылыкеныды тушмонъёсты трос, дыр.
- Мар понна? Мон керетӥсь адями ӧвӧл, верай ке, интыяз гинэ верало. Зэм, кӧтвеськантэмъёссэ кыдёке «келяны» но быгато. Юромо урод нокинлы номыр уг лэсьтӥськы. Янгышен пӧрме ке, Инмар мед тупатоз. Азьвыл, тодмоосы маке меӵак синмам верало ке, туж йыры кур луэ вал. Бӧрысь валай: дунъяны кулэ, со тыныд тушмон луысал ке, синмад ӧй верасал, лушкем ужасал. Гажасько пӧяськисьтэм, чеберъяськисьтэм, зол сямо адямиосты. Туж яра «Удмурт Кенешен» кивалтӥсь Игорь Николаевич Семёнов. Куддыр сыӵе лек, чурыт вераське, но озьы но гажасько. Шораз учкыса, мылкыд лычсузе, котьма кар. Сыӵе удмурт воргоронъёс тросгес мед луысалзы.
Источник:
За предоставление материала выражаем огромную благодарность редакции газеты "Удмурт дунне"
