Невоструев Владимир Петрович
Владимир Невоструев: «Мон егит ӧвӧл ни. Мон егит ай…»[править]
Республикалэн нуналызлы сӥзьыса, «Удмурт дунне» газетлэн редакцияз ортчиз Кун Кенешлэн Тӧроеныз Владимир Невоструевен пумиськон. Владимир Петрович редакциямы азьвыл но вуылӥз, но парламентлэн спикерез луыса дорамы нырысьсэ вуиз. Часлэсь ятыр вераськонмы туж шуныт но пайдаё ортчиз.
Мар ужа депутат
- Владимир Петрович, Кун Кенешын берло толэзьёсы ӵем радъясько парламентаризмлы сӥзем урокъёс. Кызьы огшоры кылын валэктӥськоды дышетскисьлы, мар со парламент, кин со депутат? Макем ӟеч тодо нылпиос властьлэсь ёзъёссэ – структураоссэ.
- Зэм но, калыкмы ӵемысь уг тоды, мар ужа депутат. Валэктӥськом, депутатъёс коньдон уг люкыло, соос куто закон, соя луэ ни коньдонэз пӧртэм удысъёслы чакланы. Огшоры юанъёслы валэктонэз тодыны кулэ котькуд адями, соку сое Атыкай музъемзэ гажась муртэн лыдъяны луоз. Тани милям чакламмыя таӵе урок пайдаёгес радъяны, 10-тӥ классын дышетскисьёс бордысен кутскыса. Туэ ӵап бадӟым но пусйымон юбилейёс. 75 ар тырме асьме парламентлы, нош Россилэн Конституциезлы 20 ар луоз. Вуоно арын 20 арзэ пусъёз Удмуртилэн Конституциез но. Ӝож луэ, асьме историез уг тодо ке егитъёс. Тани али пыр-поч басьтӥськимы нырысетӥ курсъёсысь студентъёс борды. Дорамы вуылӥзы ни медициная но гурт удысъя академиосысь, техникая кун университетысь студентъёс. Малпасько, азьланьтомы та ужез, дорамы ӧтчаломы кыкетӥ курсын дышетскисьёсты но.
- Кун Кенешлэсь историзэ тодэ ваёно ке, азьвыл Вылӥ Кенешын трос депутатъёс удмуртъёс вылӥллям. Собере со лыдпус синӥз, собере нош ӝутскиз, озьы – вошъяськыса. Али куспады вань-а вераськонъёс, кивалтӥсе удмуртъёсты тросгес кысконо шуыса?
- Та пумысен кенешиськом, толэзьлы быдэ пумиськылӥсько «Удмурт Кенешлэн» президентэныз Игорь Семёновен, матысь вераськиськом «Дэменлэн» тӧроеныз, Кун Кенешысь депутатэн Андрей Ураськинэн, туж мыло-кыдо депутат Пётр Данилов. Ӟырдыт вераськонмы тупаз дышетон сярысь законэ воштонъёс пыртон пумысен. Тазэ ужпумез трос кузя пертчимы: Игорь Семёнов сяна, дышетонъя но наукая министрлэн воштӥсез Зоя Суворова, Кузебай Герд нимо гимназилэн директорез Анжелика Михеева, университетын ужасьёс но мукетъёсыз. Валаськомы, анай кылмес утьыны кулэ. Соин ӟеч малпан кылдӥз – 2-тӥ-4-тӥ классъёсын удмурт кылэз одно ик дышетоно. Ми «велосипед ум малпаське», чакламы мукет улосъёслэсь опытсэс, шуом, поръёсты ик. Дышетонэ воштонъёс пыртон пумысен ӵектон лыктӥз «Удмурт Кенешлэсь», ми сое эскером ноябре ортчоно сессиын. Озьы ик воштонъёс пыртыны луэ кун кылъёс сярысь законамы, со ведь догма ӧвӧл. Выль ӵектонъёс вань ке, малы соосты уд куты, мед луозы ӵектон сётӥсьёс гинэ. Законэ воштонъёс уг кылдо буш интыын, соосты улон ачиз куре, нош милемлы кыле на ваньзэ пыр-поч чакланы. Тани удмурт кылэз дышетон пумысен ик тодыны кулэ, кӧня кулэ дышетӥсьёс, тырмозы-а учебникъёс, тае чаклатэк, оп! шуыса азьлань уд вортты.
«Кенешчиос» мыным иворто берло ужрадъёс сярысь, тани АФУН-э ветлэмзэс мадизы, быгатэмея тыршисько пыриськыны «Удмурт Кенешлэн» ужрадъёсаз, пӧртэм калык огазеяськонъёслэн ужрадъёсазы, удмурт депутатъёсты но курисько со ужрадъёсын асьсэды возьматыны.
- Россиысь Счётной палатаын кивалтӥсь воштӥськиз, вылез – Татьяна Голикова – вераз ни: бюджетэз янгыш лыдъяськоды, доход люкетэз мылкыдъя кылдытоно ӧвӧл, сое пыр-поч лыдъяно-чотано. Асьмелэн бюджетмы сыӵе рос-прос эскеронэз ортче-а? Яке Кун Кенешысь Бюджетъя, вытъёсъя но коньдон ужпумъёсъя ялан ужась комиссия гинэ эскере, Правительствоен но республикаысьтымы Коньдон ужпумъёсъя министерствоен валче кариськыса.
Вань-а нимысьтыз рос-прос эскерисьёс?
- Озьы – ӧвӧл. Но тыршиськомы чакланы, кытысь луоз ватсаса табыш поттыны. Та пумысен мон распоряжение гожтӥ, соя Кун Кенешын кылдытэмын нимысьтыз ужась группа. Отчы пыризы депутатъёс, Правительствоысь кивалтӥсьёс. Кивалтэ солэн уженыз мынам воштӥсе, Бюджетъя, вытъёсъя но коньдон ужпумъёсъя комиссилэн тӧроез Софья Широбокова. Та группа бюджетлэсь доход люкетсэ будэтон амалъёсты утчаны кулэ. 29-тӥ октябре ортчем сессиын кутӥмы патентной уж нуон сярысь закон. Соя бюджетамы 15 миллион манет доход лыктоз, малпасько. Соин чакласькомы на, кытысь эшшо ватсаса доходъёс луоз басьтыны, уго котькуд предприятие утча тыриськонъёссэ кулэстон амалъёс. Малпасько, та группалэн ужамез шӧдӥськоз, ватсаса коньдон вуиз ке.
- Иське, секвестр чутрак уз луы?
- Тазэ али шуг вераны. Нырысетӥ лыдӟемен 2013-тӥ арлы бюджет потӥз, но сое кыкетӥ лыдӟонын ортчытоно ай. Малы ке шуоно Правительство ӵектэ миллиард манетэз, пӧртэм статьяосысь басьтыса, уждун тыронэ келяны. Ми шуиськом, тӥ нырысь утчалэ, кыӵе коньдонэн луоз уждунзэс будэтыны бюджет удысын ужасьёслэсь.
Шыръян вылысь луэ, конечно, ваньзэ шымыртыны. Нош со вакытэ ик кызьы ужалозы Эшъяськон юрт, калык огазеяськонъёс? Нош мар луоз культураын? Кызьы шокалоз гурт удыс? Ужрадъёслы уксё ӧд чакла ке, та нокинэ уз шумпотты. Асьмелэн вань нимысьтыз программаосмы, нош бюджетысь уксёез уждун тыронлы гинэ висъяд ке, соку вань программаосты «бинялтоно» луоз. Со бордысен сётэмын бюджетлэсь доход люкетсэ будэтон амалъёсты утчанъя группалы сыӵе ужпум – кызьы та программаосты утьыны луоз.
- Быръёнъёс азьын трос радъяськизы Калык бюджет сярысь кенешонъёс. Адямиослэсь мылкыдзэс юаллязы, ми но асьмелэсь ӵектонъёсмес вераллямы вал. Со программа Кун Кенеше вуиз-а? Бюджетэз кылдытонын шӧдӥське-а интыез?
- Конечно, калыклэн малпанъёсыз лыдэ басьтэмын. Тани 23-тӥ октябре ортчытӥмы районъёсын селектор пыр кенешон, отчы пыриськизы ёрос йыръёс, депутатъёс. Соосын эскеримы вуоно бюджетэз. Верамы, мар чаклаське 2014-тӥ арлы, юамы соослэсь но мылкыдъёссэс.
Чакласькомы, 19-тӥ ноябре бюджет нырысетӥ лыдӟонъёсты ортчоз шуыса, нош декабре кутомы.
Ваче син вераськон – пайдаёгес
- Ӵапак ар ортчиз 5-тӥзэ ӧтчам Кун Кенешез быръем дырысен, кыӵе йылпумъянъёс лэсьтысалды?
- Ар куспын депутатъёс туж умой тыршизы, тросэз интыосазы пумиськыло бырйисьёсынызы. Кутэмын 65 закон, ортчытэмын 7 сессия, Президиумлэн 24 кенешъёсыз. Тани Президиумлэсь выездной кенешсэ Ижын ортчытон дыръя вуылӥмы городысь вань приёмнойёсы, отысь чакламы статистикаез, кыӵе юанъёсын лыкто адямиос, кызьы со ужпумъёс быдэсъясько. Озьы ик депутатъёс отчёт лэсьтозы, кызьы соос ужазы, али вань сыӵе выльдӥськон – многофункциональной центръёс (МФЦ), эскеромы, кызьы со ужа, марзэ воштоно. Комиссиос толэзьлы быдэ ортчытыны тыршо асьсэлэсь заседаниоссэс. Эшшо толэзяз 2 пол асьме аппаратнойёсамы ӧтиськомы министерствоосты отчётъёсын, соос лэсьтэм ужъёссылы йылпумъян сёто. Тани тазалыкез утёнъя министрлэн воштӥсез «Земский доктор» программалэн быдэсъяськемез сярысь вераськиз, ӵектонъёссэ мадиз, ми собере валче кутӥськомы решение, мар кароно. Вераським, нимысьтыз воштон пыртоно шуыса, соя гуртэ ужаны лыктӥсь егит врачъёс тросгес мед луозы. Соослы сётыны чакламын вал 20 миллион, нош табере луоз 40 миллион, юрттэт 80 адямилы вуоз.
- Кызьы верады, сяме пыриз ни интыосы потаса кенеш ортчытъян. Кыӵе солэн пайдаез, кызьы дасяськиськоды со ужлы?
- Асьмеос но туннэ быгатӥськом вал Кун Кенешын пумиськыны. Но мон вуи дорады, татын тросгес калыкен пумиськыны, юанъёстылы валэктыны быгатӥсько. Котькудӥзлэн вань аслаз юанэз, озьы ик Президиумлэн кенешоназ но. Депутатъёс пото, кивалтӥсьлы одӥг юан тунсыко ке, ужась мурт мукетыз сярысь юалляське. Уката ик гуртэ потӥськод ке, депутатъёс адӟо, озьы вылэм таиз, озьы луиз таиз. Шумпотӥсько, депутатъёс югдурез ас синмынызы адӟо ке, кутэм решенизы рос-прос малпаськемын, ас пыртӥзы поттэмын луэ ке.
- 100 интые 90 депутат кылиз но, уж вылын со шӧдӥське-а?
- Кызьы сотэк? Нагрузка будӥз, округъёс паськытазы. Бырйисьёс тросгес луизы, табере соослэн юанъёссы но йылӥзы.
- Нош депутатъёс пӧлысь кӧняез, сюлэмзэ сётыса, ужа?
- Ваньмыз ик депутатъёс сюлмысь тыршо, мон чакламъя ньӧмыз понна ветлӥсез ӧвӧл кадь.
- Огаз сессиын вераськон вал депутатъёслэн фондзы сярысь. Кӧня уксё чакласькоз но, кытчы со коньдонэз кутыны быгатоз депутат?
- Али сыӵе фонд кылдытэмын ӧвӧл на. Комиссия ужа со бордын, чакласькомы, кыӵе закон яке постановление кутоно та пумысен, тодыны тыршиськом, кыӵе уж малпамын яке нуиське мукет интыосын. Вылаз ик, чаклано, та ӟеч малпан коррупция пала медаз кожы. Уго депутатлы 1 миллион манет сётӥзы ке, сое со ӟепаз медаз поны. Со уксёез калыклы пайдаен мед кутоз.
- Тӥ Тӧро луэмды бере мае чутрак воштӥды, мае вужзэ кельтӥды но мае выльзэ пыртӥды Кун Кенешлэн нуналмысь ужаз?
- Мон верай ни, мар бордын ужаськом: кенешъёс, аппаратнойёс, со сяна, матысьгес ужаськомы парламентамы пырымтэ партиосын. Тросгес ужаны турттӥськом районъёсын, муниципал кылдытэтъёсын. Куинь толэзьлы огпол гурт поселениысь депутатъёс сессие люкаськыны кулэ, но вань сыӵе интыос, кытын со куронъёс уг быдэсъясько. Кинъёс люкаськыны но уг пӧрмыто, та бордын ужа Кун Кенешысь аппарат, дышетэ, кызьы та ужез радъяно, пумиськонъёс ортчытэ.
Кин колхоз пыр ортчиз, со ваньмыныз ужаны быгатоз
- Нош тӥ асьтэос кинлэсь ке дышетскиськоды на-а? Яке нокинлэсь адӟем карыны кулэ ӧвӧл ни.
- Мар асьмелы вераз Владимир Ленин? Дышетсконо, дышетсконо но дышетсконо. Милям Россиын вань Закон кылдытӥсь ёзъёслэн кенешсы. Отын пумиськылӥськомы улосъёсысь парламентъёслэн тӧроосынызы, кенешиськомы, кинлэн мар вылез вань, мар бордын ужало. Мон егит спикер ай. Оло, троссэ уг тодӥськы, озьыен, дышетскисько соослэсь мар бордын ужаны, малы дышетскыны.
- Тӥляд туж синмаськымон карьерады – механикысен кутскыса, спикерозь будӥды…
- Мылысь-кыдысь ужаськод ке, ваньмыз пӧрме.
- Тӥледлы тодымтэ яке мылкыддылы тупасьтэм юан сёто ке, кызьы сыӵе учырысь потӥськоды?
- Кенешисько тодӥсь муртъёсын. Нош сыӵе юан шуак вуэ ке, солы но валэктон сётытэк уг кельтӥськы. Мон егит ӧвӧл ни ук, ортчемын ёрос администрациын ужанэз. Отчы вуи колхоз тӧроысь, нош кин ортчемын тазэ ужез, со ваньзэ тодэ. Тани колхоз тӧро тодэ гуртысьтыз вордскемъёсты но, кулэмъёсты но. Котькыӵе учырлы со дась. Юкаменск ёрос администрациын 1998-тӥ-2003-тӥ аръёсы ужан туж бадӟым опыт сётӥз. Соку дефолт вал, зарплата ӧз тыриськы, туж секыт вакытъёс вал. Соин котькыӵе югдурлы мон дась.
- Нош семьяосты яке ӵыжы-выжыосты тӥледыз маке удысъя визьманы выро-а?
- Уж сярысь гуртын вераськыны уг яра. Гуртын быдэсъяно дорысь ужпумъёсты но сюлмаськонъёсты.
- Тӥ котырады Кун Кенешын сыӵе йӧно кышномуртъёс ужало, визьмоесь, чебересь, соосын кивалтыны секыт, дыр?
- Эшшо огпол верасько, кин колхозэз ортчиз, со ваньмыныз ужаны быгатоз. Воштӥсьёсы котькудӥз асьсэлэсь удыссэс тодо. Светлана Петровна Кривилёва профессионал луэ медицинаын, бюджетъя юанъёсты оскиськом Софья Эльфатовна Широбоковалы. Котькуд ӵук мон соосын пумиськисько, котькудӥз аслэсьтыз ужзэ лэсьтэ. Задание сётӥсько ке, одно ик эскерыны кулэ, та уж мынэ-а, уг-а. Мынам вань 3 юрттӥсьёсы, соос та ужъёслэсь быдэсмемзэс чаклало.
Гурт удыс – син шорын, саклык ичигес уз луы
- Бюджет удысын тыршисьёслэсь уждунзэс вуоно арын кӧня процентлы будэтозы?
- Туэ 1-тӥ октябрьысен 5,5 процентлы будэтӥзы. Вуоно арын бюджет удысын ужасьёслы чакламын уждунзэс огпол йылэтыны. Но бюджет – со вошъяськись маке, котькудаз сямен сессиын отчы ватсанъёс пыртӥськомы.
- Нош гурт удыслы уксё кызьы висъяськоз?
- Али 1,5 миллиард манет басьтӥмы Россия Федерациысь, ар пумозь эшшо 2 миллиард манет вуоз, чакламын элькунысь 1,1 миллиард манет тыр юрттэт. Чакласькомы, та лыдпус 1,5 миллиард манетозь будоз ай шуыса. Вуоно арлы, малпасько, гуртлы ичигес ум сётэ, малы ке шуоно ортчись ар нош ик секыт югдур кылдытӥз. Берло 3 ар ини гурт удысын ужасьёс ыштонъёс адӟо, 2010-тӥ арысен кутскыса. Татын одно ик чакланы тыршоно куазез. Оло, таӵе учыр 10 ар кыстӥськоз. Кунлы 10 ар ӵоже весь юрттыны cекыт луоз. Соин тросгес кутоно выль технологиосты. Тани кукуруза кизисьёслы туэ удалтӥз – та аре со умой будӥз. Кукурузаез тысьлы изыны луэ, кин азьлогес кизиз, со октыса но дыраз вуиз – гектарысьтыз 60-80 центнер басьтыны быгатӥзы куд-ог хозяйствоосын. Нош йыды но сезьы 10 центнер басьтӥмы. Та бордын азьланяз но ужаны кулэ.
- Тӥ гурт удыслэсь сюлмаськонъёссэ котьку тодӥськоды. Ужады министрын но, собере Правительствоын та удыс понна кыл кутӥды, бӧрысь Кун Кенешысь комиссиен кивалтӥды. Кызьы чакласькоды, республикаысьтымы буш музъемъёсты кызьы кутыны луэ?
- Татын хозяйствоосты кужмысь карыны уг луы. Но нырысь ик кулэ ӟеч музъемъёсты ужатыны. Кылсярысь, Пичи Пурга ёросысь «Первый Майлэн» 900 гектар музъемез вал, али 6 сюрс гектар гыро-кизё ни. Сыӵе ик амалэн музъемъёсты ужаны кутэ Вавож ёросысь «Колос». Юкаменск ёросэз верано ке, лыктӥз Еговкин ужбергатӥсь, со 2 сюрс гектарез утялтэ ни. Куштӥськем музъемъёсты озьы ик басьтӥз лэсьтӥськон удысысь организация, табере 6 сюрс гектар муосты гыро-кизё ни. Малпасько, котькуд музъемлы кулэ йӧно кивалтӥсь-хозяйственник, золъёсызлы но юрттӥськоно. Со дыре ик егитъёсты та уже кысконо. Тани вань егит фермеръёслы программа, соя егит калык мынэ ужаны гуртэ. Соослы 1 миллион манет юрттэт сётӥське. Кин тодэ, оло, пӧлысьтызы кыӵе ке кивалтӥсьёс будозы. Ведь нокин но кивалтӥсь луыса уг вордскы, кивалтӥсез кулэ будэтыны пичи дырысеныз.
- Удмуртиез пыртӥзы музъем ужанэз секытэн радъяно луись улосъёс пӧлы. Тӥ сямен, мар ваёз со асьме шаермылы?
- Федерация Кенешын та ужпумъя ужаз сенатормы Александр Васильевич Соловьёв. Россиын гурт удысъя министр воштӥське ке, соку ик ужан ӧр мукет луэ. Соин улосъёслы асьсэлы малпаськоно, кыӵе удыслы саклык висъяно: йӧл кысконлы яке нянь будэтонлы. Удмуртиын 2000-тӥ арысен саклык висъяськомы йӧл кысконлы. Соин табере йӧл поттӥсь усто 10 улосъёс пӧлы пыриськом. Воронеже, Россиын гурт удысэз азинтонъя ужрадэ, кинэ ӧтчазы? Удмуртиез. Кинлы кыл сётӥзы вераськыны? Асьме Президентмылы Александр Волковлы. Татарстанлэн йырыз Рустам Минниханов ӧз танӥськы: ми, пе, кӧня ке янгышамы, нош Удмуртия ужа йӧн-йӧн, отчы-татчы пазяськытэк. Пӧяськытэк вераны луэ, асьме дорын сиён-юонлы тужгес ичи дунъёс – Россиысь улосъёс пӧлын 70-тӥ-75-тӥ интыын возиськиськом, уката шумпотымон, асьме калыкмы ӟеч продукция сие шуыса.
- Кыӵе луэ пуштросэз тӥ понна Республикалэн нуналызлэн? Асьтэос но 4-тӥ ноябре вордскемын ук. Нош огшоры калыкмы дунъя меда республикамылэсь азинсконъёссэ?
- Асьмеос шумпотыны но данъяськыны кулэ, нимаз республикамы вань шуыса. Соин валче трос привилегиос чакламын, статусмы трослы вылӥынгес, улосъёсын ӵошатыса. Асьмелэн вань кун символикамы: гербмы, флагмы, гимнмы.
Шаерын улон ӟеч-а, урод-а, сое возьматэ нылпиослэн вордсконзы. Асьмеос быдэс Приволжск округез азьпалтӥськом та вормонэнымы. Зэм, вань миграция, кин ке кошке, мукетыз лыктэ. Гуртъёсын улӥсьёс выжо райцентре, районысь городэ лыкто, карын улӥсьёс шоркар шоры учко. Но ӵошатоно ке Мордовиен, отысь тросгес калык кошке, республикаязы улӥсез 1 миллионлэсь ичи кылемын ни. Таӵе югдур медаз луы шуыса, калыклы уж интыос кылдытон пумысен сюлмаськоно. Луиз ке зол промышленность, вуизы ке заказъёс, адямиос но кошкон сярысь уз малпаське. Тани «Аксион-холдинг» мотозавод» 2 поллы йылэтэ производствоезлэсь быдӟалазэ. Отчы ужаны куто выль адямиосты. Буш улӥсь юртъёсазы выль удысъёсты мыто. Шумпоттэ автозаводмылэн ӝутскемез. Вуоно арысен вуз поттонзы 2 поллы йылоз. Воткаысь машина поттонъя заводын 22 миллиард манет тыр продукция лэсьтозы, заказъёссы трос – кылсярысь, соос лэсьто Япониысь электростанциослы кулэ луись амортизаторъёс. Тросэз предприятиос туннэ султо пыд вылазы, талы шумпотоно.
- 4-тӥ ноябрь – тӥ понна кык полэс праздник. Та нуналэ пусйиськоды вордскемдэс. ӟечкыласа сӥзиськом тӥледлы котьку таџе ик сабырлы, йӧно, визьмо луыны, элькунмес вормонъёсы валтыны.
- Тау.
Источник:
За предоставление материала выражаем огромную благодарность редакции газеты "Удмурт дунне"
