Ураськин Андрей Иванович

Ваньмыз тӥледлы, гажано нылкышноос

Туж аспӧртэмлыко ним бырйизы асьсэлы «Катанчи» театрын ужасьёс. Вить эшъёс-воргоронъёс пӧлысь татчы кылемын на кыкез – Александр Баймурзин но Андрей Ураськин. Туннэ тӥледыз тодматомы та театрлэн кивалтӥсеныз - Андрей Ивановичен.

- Тӥ котькыӵе ужрадэ мыло-кыдо пыриськиськоды. Школаын но чырмыт вал, дыр?

- Школаын дышетскыкум, мон артист но, спортсмен но вал. Яратылӥ куасэн бызьылыны, урамысь пиосын туп ӵыжаны, волейболэн но баскетболэн шудыны. Мугоры пичи ке но вал, кузь куко эшъёсме трослы азьпалтылӥ. Куасэн бызьылонын районлэсь данзэ но ӵемысь гинэ утьылоно луылӥз. Но со вакытэ ик монэн ӵош кырӟан вамышъяз. Озьы куд-ог арня нуналъёсы кык ужрад ортчылӥз. Школаысьтымы дышетӥсьёс мон понна вожмаськылӥзы но. Физкультураен дышетӥсьмылы куке шуиськем: вить иськемез кылыд ошиськыса бызьытозь, сцена вылын кырӟалод. Ачим уг тодӥськы ини озьы верамме, нош дышетӥсе али ке но серекъя на: артистэд ик тонэ кыскиз, лэся.

- Кырӟанъя кружоке ветлӥды-а?

- Ас поннам кырӟаса ветлылӥ. Нимысьтыз кырӟаны дышетӥсьмы гуртамы ӧй вал. Со понна мылысь-кыдысь пыриськи мунё театре. Мукет школаостӥ, сьӧрлось гуртъёстӥ спектакль возьматъяса ветлӥмы. Зэмос артист кадь асьмелы потылӥмы. Жаляса верано, сцена вылын кырӟам-вераме нокытчы но гожтӥськытэк кылемын. Пичи дырмес коть тодамы вайысалмы.

- Но пичи дыръяды тӥ лётчик луыны малпаськоды вылэм ук?

- Кыӵе пияшлэн инбаме лобемез уг поты меда?! Мынам но Гагарин кадь луэме потылӥз. Но сыӵе мылкыд ӝог тӧлӟиз.

- Школадэс йылпумъякуды тодӥськоды ни-а вал кин луондэс?

- Мынам йырам ялан одӥг малпан бергаз – артист луон. Дышетӥсьёс юристэ мыныны косылӥзы, артистлэн улонэныз, пе, кӧттэ уд тыры. Мӧйы муртъёс азьлань улонэз ӟечгес адӟылӥзы, дыр. Школаме йылпумъяса, Ижевске вуи. Экзаменъёс сётон вакытлы институтъёсы мынон сюресэз вить чиньыме кадь дышетыса вуттӥ. Одӥгаз институтэ мынӥсько, нош сюлэм мукетаз кыске. Ньыль институт пӧлысь медицинскояз гинэ пыдме ӧй лёга. Тодӥсько вал, ӟеч эмъясь мынэсьтым ноку но уз пӧрмы шуыса.

- Озьы ке но кытчы дышетскыны пыриды?

- Газетысь ялонэз адӟи, удмурт нылъёсты но пиосты, пе, Уфаысь театральной институтэ дышетскыны ыстыны дасясько. Актёр луон сярысь но малпанэ палэнтӥ ӧз бергалля. Быгатонлыкъёсме шӧдыса, вылды, комиссиын пукисьёс мыным, нырысетӥ экзамен сётыкум ик, Свердловскысь мунё театре мыныны дэмлазы вал. «Актёр театра и кино» золгес кылӥське кожай. Нырысетӥ курс бере Казаньысь консерваторие пырыны малпаськылӥ. Но… инмарен мар гожтэмын, солэсь уд ортчы шуо.

- Жыгыль-жыгыль пиос удмурт театре вуиды.

- Институтысь вуэммы бере солдат улонэз шӧмъямтэ пиосты армие басьтӥзы. Ар но ӝыныме Казахстанын ортчытӥ. Армиысь вуэммы бере та эшъёсыным выльысь пумиськимы театрысен. Ӧжытак ужаса, 1985-тӥ аръёсы, быдэс Россиын огыр-бугыр дыръёс вуизы. Пичи магазинъёс усьтӥськизы, нимаз ужбергатӥсьёс кылдӥзы, нош культура удысын номыр но уг воштӥськы. Озьы Уфаысь вуэм эшъёсыным ми но маке выльзэ малпано кариськимы. Нимысьтыз программа кылдытыса, концерт возьматӥмы. Со вакытэ ми: Геннадий Бекманов, Александр Баймурзин, Евгений Андреев но Леонид Баженов, одӥг киысь вить чиньы выллем вал. Одӥгез кытчы мынэ, мукетыз но отчы ик вамыштылӥз. Ог-огмылы котьку юрттылӥм, визь кенеш сётылӥм. Нош кылдытэм выль группамылы эшмы Лёня Баженов аспӧртэмлыко ним шедьтӥз – «Катанчи». Та кылэз ми малпаськомы вал занавес гинэ шуыса. Озьы вылымтэ. Кияса районысь Вуж Салья гуртысь пересьёс та кыллэсь пуштроссэ милемлы пыр-поч валэктӥзы. Со - вашкала кыл. Чебермам киужъёссэс, нылпи шобретъёссэс, куэм яке пужъятэм коверъёссэс но катанчи шуо, пе. Нуналъёс, толэзьёс ортчыса, та ним борды асьмеос но ӝог дышимы. Табере чебер потэ ини.

- Нырысетӥ концерттэс кытын возьматӥды?

- 1989-тӥ арын март толэзе вал со. Потамы Завьялово районысь Шаберды гуртэ. Гуртоослэн кичабемзы али ке но пель сьӧрамы на. Озьы театрын ужанъямы ик концертъёс сётканы кутскимы. Асьмелэсь кужыммес эскереммы бере, ар ортчыса, театрлэсь воксё люкиськоно кариськимы.

- Театрын сярысь тросгес «пӧсяно» луиз, дыр?

- Эшшо ке. Азьло ми сцена вылын шудӥськомы вал, нош мукетызлы йырмы чик но ӧз висьылы ни. Татын аслыд тросгес бугыръяськоно, пьесаос утчано, сцена вылын сое возьматыны быгатоно. Со сяна, залын пукисьёслэсь но йырзэс асьме пала берыктыны тыршоно на. Учкемъязы учкемзы мед потоз.

- Кызьы мыным тодмо, тӥ быдэсъяськоды на администраторлэсь но ужзэ. Кин-о со?

- Ужбергатон удысын вырисьёслы со тросэзлы тодмо. Концерт пуктэм сяна, мыным утчано луэ на коньдонэн юрттӥсьёсты но. Туала арын телефонэн вераськыса, колхоз кузёосын огкыл шедьтыны туж секыт. Юнме уг шуо, дыр, кионэз пыдъёсыз сюдо. Со выллемгес ик милям но. Концерт сётэмлэсь азьло председательёсын вераськисько. Куд-ог дыръя аслам сюлвоременым, оло, акыльтӥсько но соослы. Ма карод, уж сыӵе. Колхоз кузёосыз нимын-тулын гинэ ӧвӧл, туссыя но троссэ ӟеч тодмасько ини. Таиз ужелы луыса ик мынам уждунэ, эшъёсыным ӵошатыса, ӧжытак тросгес луэ.

- Гуртын улӥсьёс понна кӧня тыр концертты усе?

- Одӥг ласянь учконо ке, гуртын улӥсьёс понна концертъёсмес дунтэмгес карыны тыршиськомы. Валаськом, соос пичи уждун басьто, нош куд-ог интыосын сое но ӝегато на. Мукет ласянь эскероно ке, туала улон ялан дуноя. Коньдонтэк номыр но уд лэсьты. Луонлыкмы ке кылдысал, ваньзэ дунтэк гинэ возьматысалмы.

- Коньдон пумысен вераськон поттӥмы бере, ойдолэ огдырлы выжыкыл дуннее вуылом. Узыр луысалды ке, кытчы карысалды уксёдэс?

- Со коньдон ки улын луысал ке… Нырысь ик, улон сэрегме паськытатысал. Нош отӥяз ини огшоры адямиослэсь ӧй висъяськысал. Укыр трос коньдонэ луысал ке, удмурт калыклэсь сюлмаськонъёссэ сэрттыны-пертчыны юрттысал. Асьме шаере кунгож сьӧрысь куноос но ӵем гинэ вуыло. Соосты пумитаны нимысьтыз юртмы ӧвӧл. Ижевск городысь номыр но удмурт шӧмозэ уд пумита. Гуртоослэсь ужзэс но капчиятыны тыршысал.

- Озьыен удмурт культура, гурт улон тӥлесьтыд но сюлэмдэс висьытэ?

- Кызьы сотэк! Мон ачим но гуртысь потэмын - Кизнер районысь Вуж Бодья гуртысь. Ма, собере милям учкисьёсмы но гуртоосгес луо. Куд-ог районысь пичи гуртъёсы концертэн вуылӥськод ке, паймоно соослэн улэм-вылэмзылы. Тросаз гуртъёсын клубъёссы ворсаськон калэ вуэмын, кезьыт. Ваньзэ куашкатыны ноку но кема ӧвӧл, сое утьыны дышетсконо вылэм. Ма веранэз клубъёс сярысь, бадӟым колхозъёс но арысь аре куашкало кадь. Гуртъёсын улӥсьёслы кун ласянь но ӧжытгес саклык висъяське. Озьы ик сюлэм висе удмурт кыл понна но. Ижевскын улӥсь удмуртъёсмы ӟучомо, нош гуртоос керпото, лэся, город ульчаын удмурт сямен вераськыны.

- Кызьы малпаськоды, удмурт театрмы азьланяз уз пашмы-а?

- Котькыӵе секыт вакытъёс вал ни. Озьы ке но удмурт театр ужа, азьланяз но ужалоз на шуыса оскисько. Жаляса верано, мукет республикаосын ӵошатыса, асьмелэсь театрмы бездытгес адске. Нош артистъёсыз ласянь учконо ке, соос туж дӥсьтӥсесь но быгатӥсесь. Рос-прос режиссёр луысал на ке, оло, улонзы но умойгес пала берытскысал, учкисьёс но тросгес люкаськысалзы, дыр.

- Сцена вылын кырӟам сяна, мыло-кыдо пыриськиськоды удмурт огазеяськонъёслэн ужазы но.

- Пичи дырысеным ик мон пӧртэм ужрадъёсы пыриськылӥ. Пионер, комсомол огазеяськонъёс дыръя азьветлӥсьын вал. Городэ вуэме бере но таӵе сямме ӧй ышты. Нырысь ик мыло-кыдо пыриськи театрысь егитъёслэн улоназы. Комсомол огазеяськонлэн секретарез вал. Отӥяз райкомын, обкомлэн бюрояз ужай на. «Шунды» огазеяськон кылдыку, Татьяна Корниловаен огкылысь ужамы. Отӥяз ини «Удмурт кенеш» но. Нош «Дэмен»-лэн Правленияз быръем мурт луыса, 2000-тӥ арысен ужаны кутски. Кылем арын ӝыны ар пала Удмурт культурая «Дэмен» огазеяськонлэн кивалтӥсезлэн воштӥсез луыса ужай. Луонлык но тазалык вань дыръя дорын пукем уг поты.

- Ма, артистъёслэн сыӵе дыръёссы но луыло шат?

- Пӧртэм дыръёс луыло. Азьвыл аръёсы кузь командировкаосы поталлямы. Сюресъёс ӧвӧлэн, одӥг потэммы ик толэзь пала кыстӥськылӥз. Нош табере улон мукет пала берытскиз. Тужгес но кузь командировкамы 10–12 нунал кыстӥське, соку но висказ доре бертылыны ваньмиськомы.

- Коллективады пиос гинэ кырӟало-верало вал, нош берло дыре суралтӥськиды. Юри-а, учкисьёс куремъя-а?

- Бен, нырысь пиос коже гинэ ужамы. Выль малпам программаямы кышномуртлэсь рользэ быдэсъясьёс кулэ но ӧй вал. Та вакытэ «Катанчимес» шулдыртэ Анна Плотникова. Ас вакытаз со пӧртэм коллективъёсын ужамын. Шудыны но, кырӟаны но усточи. Учкисьёслы но туж кельше. Бен, туннэ нуналлы эшшо одӥг нылкышно кырӟасез уже кутысалмы на. Аня вӧзын со бездыт гинэ медам адскы вылэм.

- Концерт возьматоно луылэ, дыр, тыпак ӟуч гуртъёсын но. Секыт ӧвӧл-а соосын кусып тупатыны?

- Пӧртэм дыръёс луыло. Сцена вылэ потӥськод, ӟечбуръяськиськод но учкисьёслэн соку ик ӟуч кырӟан кылэмзы потэ. Озьы ке но асьмелэсь учкисьёсмес ӟучъёслы яке удмуртъёслы ми ум люкиське. Удмуртсэ кырӟаськомы ке, куинь кылын пуштроссэ мадиськомы. Кырӟан-веран сямен, учкисьёсын огкыл шедьтыны отӥяз капчи луэ ини.

- Кыӵе сямо адямиосыз тужгес но гажаськоды?

- Нырысь ик умой сямооссэ, нош тужгес но уг яратӥськы вожъяськисьёсты. Малы ке соос удмуртъёс пӧлын ӵемгес пумиськыло. Асьсэлэн но маке ужзы уз пӧрмы, мукетъёслы но йыркуръяськозы.

- Ужды сярысь ялан вераськиськомы, ойдолэ семьяеныды но тодматскоме?

- Мынэсьтым кузпалме университетын дышетскисьёс ваньмыз сямен тодо, дыр. Надежда Ивановна дышетэ Кылъя кафедраын туала удмурт кыллы. Со сяна, Удмурт Республикаысь Дышетон удысысь национальной ужпумъёсъя институтэн кивалтэ. Настя нылмы 7-тӥ классын дышетске. Мугорын анаезлэсь ӝужыт ни. «Витьёслы» гинэ дышетске, эктонъя «Спектр» нылпи ансамбле ветлэ, пианиноен шудэ, пичиысен ик англи кыл дышетэ. Нош кемалась ик ӧвӧл, кылбур лыдӟисьёслэн конкурсазы вормисе потӥз. Ваньмон дыръяз ачиз ик кылбураны но веросъёс гожъяны йӧндыре. Азинсконъёсыз но вань. Ми понна со бадӟым шумпотон.

- Нылды городын будэ, удмурт сямен вераське-а?

- Кызьы сотэк? Куспамы ми котьку удмурт сямен вераськиськомы. Нылмы но пичиысен ик кык кылын вераськыны дышиз. Удмурт нылпи садэ но, школае но ӧз ветлы. Эшъёсыз азьын но удмурт луэмзэ уг ваты.

- Ваньмон дырдэс кытын ортчытысалды?

- Пӧйшураны, нюлэскытӥ куасэн яке огшоры пыдын калгыны, чылкыт омырен шоканы, быдэс семьяен губияны ветлыны яратӥсько. Оген кырӟаса ветлӥськод но нокинлы уд люкетӥськы. Сюлэм буйга шур дурын пукыса но, витиськод чорыглэсь зӥгатэмзэ, нош ачид олома но со куспын малпаськыса вуттӥськод. Чылкак книга лыдӟем кадь, ортчемзэ но вуонозэ син азяд пуктӥськод.

Источник:

Ураськин А. Ваньмыз тӥледлы, гажано нылкышноос / А. Ураськин ; записала В. Емельянова // Удмурт дунне. - 2003. - 28 февр.

За предоставление материала выражаем огромную благодарность редакции газеты "Удмурт дунне"