Федотова Анна Васильевна
Сяська пӧлын но сяська вань
Пумиськон сярысь кылпум поттэмелы Анна Федотова туж ик ӧз бурдъяськы. Вань ик, дыр, пе, соос - удмурт «кизилиос», но мынам пушкы «кизили» кыллы, газет баме сюронлы пумитъяське. Калык дунъям бӧрсьы аслад но данъяськонэд луоз ни, пе. Удмурт калык пӧлысь «кизилиосты» «копаса», «кизилиё» кылбурчиен Михаил Федотовен ӵош улыса, «Удмуртия» кун телерадиокомпаниысь «Лулысь-сюлмысь» передачаез дасясь журналист Анна Федотова ачиз но амалтэк «кизилияськиз» ни, малпасько. Лыдӟисьёсмылэн соин одно тодматскемзы потоз. Аннаен лулысь-сюлмысь вераськонмы ӧръяськиз пинал дыр тодэ ваёнъёс бордысен.
- Туннэ мон аслэсьтым улонме радъяны быгатӥ ке, ваньмыз со мама бордысь потэмын кадь. Валентина Петровна Сунцова мынам аслам вордэм анае ӧвӧл ке но, сюранай шуыны нокызьы уг быгатӥськы сое. Мамамы кулэм бере со ми доры коркамес югдытыса пыриз. Семьяямы ми вить нылпи вал, мон самой пичиез. Мамамы кулыку, мыным дас арес вал. Луимы куать кузя, таизлэн мамамылэн тямысэтӥ классын дышетскись Вера нылыз сьӧраз лыктӥз. Бадӟымезлы сестраелы дас укмыс арес вал соку, кыкез ик братъёсы армиын служить каризы. Бордамы вал на сизьыметӥ классын дышетскись сестрае.
Папае Василий Фёдорович туж кужмо, адӟем карымон воргорон. Быдэс войнаез потыса, Берлинысь рейхстаг вылэ фамилизэ гожтэм – Ефимов. Гуртысьтымы одӥг адями гинэ Берлинозь вуэм бере, ожмаськонэ вань пыриськемъёслэн нимынызы гожтӥськем ни, луоз.
- Университетын дышетскыкумы, Мишаез синтэм-пельтэм яратэмед ваньмызлэн ик син шоразы йӧтэ кадь вал.
- Дышетскыны пыреме бере улӥсько вал квартираын. Миша малы ке но автобус остановкаозь келяса ветлылӥз. Эше шуэ: «Тыныд синмаськемын ук, адӟы ни сое». Нош мон уг ик адӟиськы кадь, урамысь утчасько нырысетӥ яратонэ тусо воргоронэз (Мишаен соос туж пӧртэмесь вал, нош туннэ Миша тусозэ утчасько ни). Нырысетӥ курс бере, фольклоръя экспедициысен, чыры-пыры синмаськон ӝужаз, собере пумен мургес но мургес. Ачим но ӧй валалля яратонэлэсь пурӟемзэ. Одӥг но ӝыны ар служить карон интые, со армиын одӥг ар вал, операцие сюрыса, вазьгес лэзизы. Одӥгаз гожтэтаз ивортэм вылэм, ар куспын ог 160 гожтэт ысто, пе. Берло юри лыдӟыса потӥ но, 220 пала гожтэтэз вуэм. Аслэсьтыз малпанъёссэ, мӧзмемзэ, яратэмзэ вера вал. Йошкар-Олае вуылыкуз, радиое вераськыны ӧтиллям. Быдэс Марий Эл тыр шуэм: мынам кышное, пе, дунне вылысь самой чебер удмурт нылкышно. Та сярысь эшъёсыз веразы ини.
- Нылпиостылы кылбуран мылкыд ӧз пыӵа-а?
- 10-тӥ-11-тӥ классын дышетскыкуз, Иванэ эссе выллем кылбуръёс гожъя вал. Ваннае пыре но кылбурен потэ. Мишаез ыштон мон понна туж вӧсь на вал, соин, лэся, вань пушкы бугыръяськиз кылбурамезлы. Малпасько, творческой адямилэн ваньмыз уг пӧрмы ке, солы секыт улыны. Аслыз ӧй ке но вералля со мылкыдме, пиелы выжиз но, дыр, пуш малпанэ. Ӧй но ушъя, ӧй но лӧпкытъя. Историез туж яратэ вал, дышетскиз 44 номеро гуманитарной лицейын. Азьло наука удысэн вырыны мур-мур мылкыдыз вал ке, али быдэсак выемын электронной музыкае. Вань дырзэ солы быдтэ, электронной крезьгуръен дискъёсыз но потэмын. Ленае чебересь выжыкылъёс гожъя, ачиз ик компьютерен печатла. «Радуга сказок» нимын аслаз лэсьтэм книгаез но вань ни. Кылбуръёс шергес гожъя. Али перепись дыръя пиналъёсы, папазы сямен ик, асьсэды бесермян гожтӥллям, ачим дорын ӧй вал. Историк бере, пиелэн мылкыдыз вань ас выжызэ мургес эскерыны, калыкен кусып возьыны.
- Ачид но тани дышетӥсь луымтэ, творчество удыс бордаз кыскем.
- Мон дышетскыку, трактористлэсь, агрономлэсь, врачлэсь, дышетӥсьлэсь ужзэ гинэ тодӥськомы вал. Куинь ар дышетӥсьын ужаса валай, со мынам ӧвӧл. Урокъёс нуысал, но дышетӥсьлэн мукет но ужез вань ук: анай-атайёсын кусып возёно, воспитательной уж нуоно.
- Астэ шедьтӥд шуыса али вераны быгатӥськод ни-а?
- Шуак со кылэз вераны кышкасько. Ужме яратӥсько, котьку ик туж шумпотыса мынӥсько. Но мон асме, оло, мукет ужын но эскерысал. Малы меда, университетын дышетскыкумы, аслыд тупась уж быръёнъя пӧртэм тестъёс, психологияя службаос ой вал. Малы озьы шуисько? Кыӵе ке уж борды гинэ ӧй басьтӥськысал, пӧрмытысал кадь потэ. Ӝӧк ке лэсьтоно луысал, лэсьтысал. Утюгъёсты но мон тупатыны быгатӥсько, паять карон радэз гинэ уг валаськы. Адӟытысалзы ке бен, сое но лэсьтысал. Мыным вань ужез малы ке но туж ӝог быдэстыны кулэ, кема кыстӥськисез акыльтэ. Ужтэмгес ветлыкум, асме куаретӥсько, малы ай номыре уг лэсьтӥськы шуыса. Собере асме ачим ик буйгатӥсько: ну мар каром, арня ӵоже быдэстоно ужъёсты кык нунал куспын лэсьтӥсько бере?
- Берыктӥськом ужан дорад.
- Милям асьмелэн командамы вань, котькыӵе удысын сямен ик. «Лулысь-сюлмысь» передачаез ми ньыль кузя лэсьтӥськом: Николай Эскандеров режиссёрмы, Татьяна Степанова солэн юрттӥсез, нош Валера Сидоров но мон – передачаз дасясьёс-нуисьёс. Инмар милемлы ог-огмес сётэм бере, ми ваньмы огкылысь улӥськом, ог-огмылы юрттӥськом, дурбасьтӥськом. Тросэз лэсьтэмын ӧвӧл, туж троссэ малпанъёсты улонэ пыӵатыны уг луы. Али гинэ кужым шедьтӥ кадь асме возьматыны, быгатонлыкъёс но арысь аре будо. Соин валче арлыдъёс но ортчо, котькуд кисыриед малпаськытэ ни. Тани Москваысь ведущийёслэн мынэсьтым ӧжыт ӧвӧл арессы, но соос кыӵе чебер адӟисько, арлыдзы сярысь нокин малпась ӧвӧл.
- Передачаосад туж аспӧртэмлыко геройёс, куноос пырисько. Кытысь соосты шедьтӥськод?
- Сыӵе ужпум ас азяд пуктӥськод ке. соос шедё. Шуом, радиоын со сярысь верамын ни яке газетын гожъямын – уг ай ӧтьы шуисько, мукет адямиез утчало. Яке дыр мед ортчоз. Кытчы ке куное гинэ но мынӥськод ке, синъёс, йыр-визь ужаны кутско. О, таиз сярысь сюжет лэсьтыны луоз! О, тазэ куное ӧтёно! Куддыр аслэсьтым ачим но жадисько со мылкыдылэсь, но ӵемысь со шумпотон вае.
- Экранэ потон, уката ик меӵак эфире, трос быгатонлыкез кулэ каре, уката ик вераськон ласянь. Кылэз волятон бордын ужатэк уг луы, дыр?
- Нокин но солы уг дышеты аслад янгышъёсыд пыр потыса гинэ валаськод. Экранэ нырысь потыкум моганъёс но вал. Адями одӥг пол янгышамдэ адӟиз ке, кыкетӥ-куинетӥ передачаяд котькызьы умой вераськы, солэн кытчыяз ке но кылиз ини со, сюлмыз шуг луыса кылзоз. Но туннэ югдур воштӥськемын ни. Мон тодӥсько мар бордын ужаны, соиз яке таиз темая кыӵе кылъёс, фразаос пумиськозы. Уж дорам кызь минут ӵоже пыдын лыктонэ вань. Со - мынам дуннее. Кӧня меда ӝог веранъёс, пӧртэм фразаос кыл улам бергатэмын?
Источник:
Федотова А. В. Сяська пӧлын но сяська вань / А. В. Федотова ; записал Л. Малых // Удмурт дунне. - 2003. - 18 апреля. - (Удмурт кизилиос).
За предоставление материала выражаем огромную благодарность редакции газеты "Удмурт дунне"
