Байметов Илья
Байметов Илья Михайлович (Ильтимир Минтимирович; 1952-тӥ арын 25-тӥ инвожое Башкирия, Калтасы ёрос, Чиндэр (М. Качак) гурт - 2014-тӥ арын 5-тӥ коньывуонэ, Ижкар) - удмурт прозаик но журналист, Удмурт Элькунысь сӥё-дано журналист, Россиысь огъя дышетон удысысь сӥё-дано ужась.
Улон сюресэз
Байметов Илья Михайлович (Ильтимир Минтимирович) вордӥськиз 1952-тӥ арын 25-тӥ инвожое Башкириысь Калтасы ёросысь Чиндэр (М. Качак) удмурт гуртын. [1] Тямыс нылпи пӧлысь ньыль луло кылемъёсыз пӧлын Ильтимир бадӟымез вал. Одӥг гинэ пизэ атаез, Минтимир сьӧрысьтыз ӧз кельтылы, котькыӵе ужлы вазь ик дышетӥз. Ачиз мушкась вал бере, пиез но та удысэз ӟеч валаса будӥз. [2]
Быдэ вуон вакытаз пияшлы тодмо луиз, кызьы дунне куашканы быгатэ. Нырысь анайзэс ватӥзы, бӧрысь атайзы но югыт дуннеен люкиськиз. Пиналъёс мурт нылкышно вӧзын быдэсмизы ни. Асьсэ понна кыльыса но, пудо вордыны тыршизы, скал но возизы, гужем колхозэ ужаны поталлязы. Начаргес ке но улӥзы, лушкаськыны, кураськыны тодазы ик ӧй вал. Атайзы вӧсясь вал бере, солэн индылонъёсыз быдэс улоназы пыӵаса кылизы. [2]
Пичи дыръяз ик Ильтимир дышетӥсь луон сярысь гинэ малпаськылӥз. Ма, 1950-тӥ аръёслэн пумазы гуртъёсын дышетӥсь туж гажано адями вал ук. Анаез-атаез но ялан дэмлаллязы: «Будӥд ке, пие, дышетӥсь лу!». Ог 5-6 арес дыръяз, ураметӥ укно ултӥ ортчись чебер нылаш шоры возьматыса, анаез пиезлы шуиз, школае, пе, мынӥд ке, тынад со дышетӥсед луоз. Дышетӥсезлы пияш синмаськиз. [3] Ачиз но Ильтимир дышетӥсьёс шоры вожъяськыса учкылӥз. Соин но Кугарчинысь шор ёзо школаысь дас классэз йылпумъямез бере Байметов шоры ёросысьтызы Шыльныр гуртысь пичиос атай нимыныз вазьылыны ӧдъязы. Ильтимир Минтимирович начальной классъёсты дышетыны ӧдъяз. Кык ар ӵоже пичи нылъёсты но пиосты валтӥз со бадӟым тодон-валан дуннее. Покчиосын ужакуз ик валаз, аслэсьтыз но тодон-валанзэ будэтоно шуыса. Но Галя сузэрез школазэ быдтытэк, гуртысьтыз ӧз кошкы, сузэръёссэ ӧз кушты. 1971-тӥ арын гинэ Ильтимир Удмурт кун пединститутэ дышетскыны пыриз. [4] «Визь песьтэрез» тырмыт вал бере, Кам сьӧрысь егит пи капчиен дышетскиз, сак йырсазезлы луыса, лекциосын кылэм-тодэмъёссэ ӧз вунэтылы ни. Нош со куспын ик макем секыт йӧтӥз солы кӧттырон, ассэ дӥсян сярысь сюлмаськон. Кык-куинь ужын тыршоно луылӥз. Сюлэмзэ буйгатылӥз литература, творчество кожын бергамез. «Советской Удмуртия» газетын ужась яратоно писателезлэн Роман Валишинлэн литературно-творческой кружоказ шумпотыса ветлӥз.
Ӝоген институтэз университет каризы. Татын журналистика специализациын дышетскыкуз, Ильтимир юн-юн валаз ни: азьпал улонэз журналистикаен герӟаськоз. [2] Улонэз эшшо но шундыё луиз, аслэсьтыз одӥг арлы азьлогес дышетскись нылашез адӟыса. Ньылетӥ курсын дышетскыкуз, егит семьяын пизы вордскиз. [2] 1976-тӥ арын, дышетсконзэ йылпумъяса, Ильтимир Байметов Дэбес ёросысь «Выль сюрес» газетлэн редакцияз корреспондент луыса ужаны кутскиз. Но егит ӧнерчиез армие басьтӥзы. [3] Службазэ ортчем солдатэз кытчы ужаны интыяськон сярысь малпан ӧз ик шугъяськыты. Илья Михайлович семьяез доры, Дэбесэ мынӥз, газетазы интыяськиз. Но ӝоген сое Дэбес РК ВЛКСМ-е кыкетӥ секретаре быръё ини. 1979-тӥ арлэн пумаз И. Байметов «Советской Удмуртия» газетлэн собкорез луэ.
1982-1987-тӥ аръёсы «Новый путь» Дебёс ёрослэн газетлэн валтӥсь редакторез. Редактор луыса ужакуз ик Свердловскысь вылӥ партийной школаын дышетскиз. Собере СССР-ысь Журналистъёслэн VI съездзылэн ужаз пыриськон, УАССР-ысь Вылӥ Кенешлэн депутатэз луон но трос мукет ужам ужъёс. [1] Илья Михайлович элькунысьтымы кылъёс сярысь законлэсь нырысетӥ вариантсэ гожтӥсь вал. Со сизьым ар ӵоже «Удмурт кенеш» огазеяськонлэн Ижысь ёзэныз кивалтӥз, «Удмурт кенешлэн» кивалтӥсезлэн воштӥсез вал. [5] 1991-тӥ арысен И. Байметов «Вордскем кыл» журналлэн валтӥсь редакторез луэ. Улонысь кошкиз 5-тӥ октябре, 63 аресказ мыныкуз, кема висемез бере.
Гожъямъёсыз сярысь
Гожъяськыны Ильтимир школаын дышетскыкуз кутскиз. Куд-ог гожъямъёсыз «Советской Удмуртия» газетысь «Пичи куараос» бамын печатласькизы. [4] Нош кыӵе но пияш шумпотӥз, нырысетӥ кылбуръёссэ печатлам берегес ик, Т. Архиповлэсь но А. Клабуковлэсь синпельлы лэзем книгаоосэс басьтыса. Со бӧрсьы ик Ижысь пединститутэ пырон мылкыдыз уката но пуромиз. [3] Удмурт шаерын Ильтимир ним валантэмгес вылэм, шӧдске. Ялан сураса гожъяллязы. Соку тӥни эшез сое Илья ниманы дэмлаз. Одӥг пол доразы Удмуртиысь писательёс вуылӥзы. Гожъяськись пиналъёсты быдэс школа азьын ушъязы. Артысь гуртысь Роман Валишинлэсь нимзэ поттылӥзы. Соку ик ини Ильялэн но та писателен тодматскыны мылкыдыз кылдӥз. [2]
Пумен гожъяськисьлэн веросъёсыз печатласькизы ини «Кенеш», «Вордскем кыл», «Инвожо», «Кизили» журналъёсын, «Быльырам синкыли» нимо антологиын. 1998-тӥ арын «Сюлэмам тон гинэ» веросъёсын книгаез потӥз. [1] Син азьтӥ кадь ортчо солэн веросъёсысьтыз геройёсыз. Ӵемысь соослы "кызьы мон улӥсько " юанлы валэктон утчано луэ. Автор уг тыршы ваньзэ тэркы вылын кадь возьматыны, уг. Та веросъёсты лыдӟем бере, лыдӟись но аслыз ачиз "кызьы мон улӥсько" юанэз сётыны выре кадь. "Ышиз мынам зундэсэ" веросын Николай Степанович но, ас вырйылаз вуыса, егит дырыз сярысь малпаське, куректэ, вӧзтӥз ортчем шудзэ адӟымтэез понна ассэ курла. Марлы озьы луиз? Ас сярысь гинэ малпаськыса улэменыз оло? Ӧвӧл. Та дуннеын адями огназ уг улы. Соин артэ мукет адямиос, мукет калыкъёс вань на. Кызьы соослы вазёд, сыӵе ик куараез пумитад кылод, шуэ кадь Илья Байметов "Кен ваён " веросаз. Нош ваньмыз понна: умоез понна но, уката ик уродэз понна но — куке но одно ик кыл кутоно луод. Лэсътэм вамышъёсын ортчем сюрес зэмлэсь но зэм адске нылпиосмылэн синъёсазы. Азьвыл дышетӥсь Илья Байметов та малпанзэ паськыт но шимес возьматэ "Ӧй, ӧй вуза, нылы... " веросаз. Озьы ке но, улон возиське чылкыт но шуныт сюлэмо адямиос вылын. Соос вань дыръя кырсь кужымъёс ноку но асьсэды эркын уз возе. Сыӵе малпанэн улэ "Кынмем синкыли " верослэн героез дышетӥсь Корнев. Ӧз удалты солы койык анаез утьыны, нош со вань кужымзэ сётӥз койыкпиез эзельлэсь палэнтыны.
Дунне ӟоскыт. Улон ӵемысь одӥг кудые вуттэ ог-огзэсты адӟонтэм карись муртъёсты, ку соосты огазея одӥг уж. Таяз учыре — армия. Ватэм кырсь ужъёс но куке-соку югыт дуннее пото. Самой соку ик тушмонэдлы сётэм мылем нянь юдэс но мултэс уг луы. Со угось возьытэз сайкатэ. Нош кужмо адями соин ик кужмо луэ, артысь лябъёсызлы юрттэ ке. Соку солэн лул сиосыз, ваёбыжъёс сямен, инме ыбисько. Соос шоры учкыса, мукетъёсызлэн но лулъёссы небӟо кадь. Тыбыр сьӧразы адсконтэм бурдъёсты но шӧдо. Сыӵе суредэз адӟиськом "Мылем юдэс" веросысь.
Улон... Улонысь сиос но нюжаос пужъято Илья Байметовлэн прозаезлэсь паськыт ӝӧккышетсэ. Трос веръяноез отын. Нош шораз — ас пӧсям вуэн поттэм ӟег нянь колды. Со бордын, Шунды котырысь планетаос сямен, вань улон-вылон ёзъёсты возьматӥсь тодон-валан арбериос но, сям-йылолъёс но бергало. Соин ик авторлэн веросъёсызлэн но шӧмыз, мон сямен, куаӵ-куаӵ куртчем ӟег няньлэн кадь: голькыт но, курыт но ӧвӧл — самой иназ луись.
Писатель уг уиськы литератураын вӧлмись модаос сьӧры. Яратон но, пиосмурт-кышномурт кусыпъёс сярысь но кепырасагес гожтэ. Нош кыӵе зарнивуасько солэн со чуръёсыз ик! Покчи пыжын кадь лэйкало яратӥсь сюлэмъёс. Илья Байметов ачиз но со геройёсыз пӧлын улэ кадь. Пыдулаз пукон пуктыса, вылӥысен учкыны уг выры со геройёсыз шоры. Уг. Со валаны тырше, кытӥяз оло юрттыны но. Со бордын ик авторлэн оскытӥсь кужымез но, мон шуысал. Угось улон ваньзэ ачиз радъя, интыяз пуктылэ. Кылыз Илья Байметовлэн эркын, зыл-зыл гылӟе. Кытӥ-отӥяз мултэс шонергес но кадь потэ. Нош со — нырысь учкем бере гинэ. Геройёслэсь вераськемзэс мон асьме пӧлысь, лыдӟисьёс пӧлысь но кылӥсько кадь.
Илья Байметовлы сюжетъёссэ чиньыысь сюпсьыса поттоно уг луылы. Солэн гожъян манерыз сыӵе — синъёстэ паськытгес усьты артысь адямиослэн улонзы шоры но со адӟемдэ ик радъя произведенилы сюжетлы. Со бордын ик оло дуныз но солэн гожъямъёсызлэн. [6]
Премиосыз
Удмурт Элькунысь сӥё-дано журналист
Россиысь огъя дышетон удысысь сӥё-дано ужась
Библиография
Книгаосыз
Сюлэмам тон гинэ : веросъёс. – Ижевск : Ижев. респ. тип., 1998. – 116 с.
Статьяосыз
Ваёбыжъёс // Покчи эше : 1–2-тӥ классъёсын ватсаса лыдӟон книга / М. Лаврентьева, Е. Дмитриева, В. Ившин. – Ижевск, 2006. – С. 57–59 ; Азвесь кышетэн толэзь : веросъёс : семьяын лыдӟон книга. – Ижевск, 2007. – С. 9.
Выль чечы : верос // Кизили. – 2012. – № 5/6. – С. 6–7.
Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.
Уже кутэм литература
- ↑ 1,0 1,1 1,2 Уваров А. Илья Байметов (1952) // Писатели и литературоведы Удмуртии : биобиблиогр. справ. / Сост. А. Н. Уваров. – Ижевск, 2006. – С. 135.
- ↑ 2,0 2,1 2,2 2,3 2,4 Айманова А., Ермолина А., Москвина О. Ассэ ачиз будэтӥсь адями юн сямо луэ // Ӟечбур! – 2012. – 21 июня. - С. 2–3.
- ↑ 3,0 3,1 3,2 Максимова О. Оскон сётэ кужым // Удмурт кизилиос : очерки, зарисовки, интервью (2001-2007). – Ижевск, 2007. – С. 98–99.
- ↑ 4,0 4,1 Ӝыны дауръем сюрес // Вордскем кыл. – 2002. – № 5-6. – С. 93.
- ↑ Миннигараева Е. Зарни вакытмы вуоз ай! // Удмурт дунне. – 2012. – 5 июня. – С. 6.
- ↑ Ар-Серги, В. Я, жильырты, Чиндэр ошмес! // Сюлэмам тон гинэ / Илья Байметов. – Ижевск, 1998. – С. 5–8.
