Гаврилова-Решитько Милитина Васильевна
Малпам дунне но зэма вылэм
Милитина Васильевна Гаврилова-Решитько – Россиысь журналистъёслэн огазеяськонзылэн ёзчиез, Удмурт Республикаысь культура удысысь дано ужась, Ашальчи Оки нимо премилэн лауреатэз, Кастрен нимо премилэн лауреатэз.
Милитина Васильевна вордӥськиз Дэбес ёросысь Омелят (Роготнево) гуртын. Удмурт Лемысь сизьым классъем школа бере Дэбес педучилищеын дышетскиз, собере Удмурт пединститутысь история но кылэз тодонъя факультетэз йылпумъяз.
Милитина Васильевна быдэс улонзэ Удмурт радиоен герӟаз. Диктор но, корреспондент но вал. Кызь ар ӵоже литературая но драмая передачаослэн редакторзы луыса ужаз, «Арня ӵукна» радиожурналэз нуиз, «Школалы юрттэт» передача кылдытӥз.
Милитина Васильевналэн писательёс, кылбурчиос, артистъёс, суредасьёс, курезьгурчиос сярысь гожъямъёсыз газет-журналъёсын, «Ӵыдонтэм пумиськонъёс» книгаяз потазы. Нош «Кесэго-кесэго малпанъёс» сборникеныз со лыдӟисьёс азе кылбурчи луыса усьтӥськиз.
- Милитина Васильевна, тӥледлы Быдӟым тылож но со бере секыт аръёсты чиданы кылдӥз.
- Зэмзэ но аръёс секытэсь вал. Сизьым арескысен мӧйыосын артэ вань гурт но колхоз ужъёсты быдэсъяно луиз. Коньдонэз адӟыны ӧз кылдылы, трудоденен ужам. Ай гурт калыкез олокыӵе но налогъёсын пачкато на вал.
- Озьы но дышетскыны быгатӥды.
- Дэбес педучилище матын вал. Тросэз отын дышетскизы, бадӟым сузэре но. Солэсь адӟем кари. Дышетӥсьлэсь профессизэ сяна ум тодӥське вал. Соос гуртамы коньдоно, сӥлы адямиос вал, книгаоссы но трос. Дэбес педучилище бере тятяелэн дышетскыны Иже лэземез уг поты ни вал. Пырак шуиз: «Дышетскиськод, дышетскиськод, нош гуртын кин ужалоз, кин милемлы юрттоз». Тятяе угось куинь война пыртӥ потэмын, висись, лябӟемын ни вал. Мон ваменэс вылӥськем, вылды, ӧй кылзы, Иже кошки.
- Семьяды бадӟым-а вал?
- Куать кузя матысь ӵыжы-выжыос улӥмы. Соос ваньзы бадӟымесь ни вал, мон гинэ пичи. Ӝыт кӧлыны выдо ке, доразы валесазы черодэн ветлӥсько вал. Котькудӥз яратэ но, ляккыттэмъяськыкум куаретэ но вал. Син азям таӵе суред пуксе: семьямы котыр пуксе но кин гитараен, кин балалайкаен, кин мандолинаен шудо, удмурт но ӟуч кырӟанъёс кырӟало. Пель сьӧрам али но чузъясько «Султы, туганэ», «Кони вороные» кырӟан гуръёс. Нош балконын кӧлыкум, егитъёслэсь кыӵе но шулдыр кырӟамъёссэс уг кылӥськы вал.
- Война вакытэ мар самой шимесэз, вунонтэмез кылиз?
- Сютэм улон. Ваньзы уже кошко. Ми пичи сузэреным пичи чугунэ кельтэм картофкаез кӧмыныз ик лумбыт сиыса улӥськом. Корка кезьыт. Бер ӝыт мамамы жадьыса вуэ, ми котыраз биниськиськом… Озьы ке но пичи дырме ӟечен гинэ тодам ваисько. Зэмос кӧт сюмамез мон Иж пединститутын адӟи ини. Дорысь юрттыны ӧз быгатэ, бертыны кыдёкын. Стипендия вылын гинэ дышетски. Сием потыса йыры ӵемысь поромылӥз, йырсазьме но ыштылэме вань. Кирза сапеген, фуфайкаен ветлыса дышетски. Мон сянаез сыӵе начар дӥськутэз нуллӥсь ӧй вал. Малы ке шуоно факультетмы исторической вал бере, группаямы ӟучъёсгес дышетскизы. Куинетӥ курсысен уже пыроно кариськи. Удмурт радиое диктор кулэ луиз но, конкурс пыр потыса, монэ басьтӥзы. Журналист луон сярысь ноку но малпанэ ӧй вал. Но тӥни, сием потон, ёрмон улонме чутрак воштӥз.
- Уд жаляське-а, дышетӥсь ӧд луэ шуыса?
- Табере уг ни.
- Асьмелэн малы ке озьы луысагес кошке: удмурт воргорон дышетскемын, кытын ке кивалтӥсьын ужа ке, кузпалыз ӵемысь ӟучгес луэ. Нош тӥ кызьы сыӵе чылкыт, йыг-йыг, визьмо, кибашлы украин воргоронэз кырмиды?
- Украин ӧвӧл со – Кубаньысь казак. Таӵе кырӟан вань: «Мы жили по соседству, встречались просто так…» Милям но озьы ик луиз. Мурт дорын квартираын улыкум, Георгий но со коркан ик улӥз. Со кыӵе ке нылашен пумиськыны кошке вал, мон но пияшен пумиськыны мынӥсько. Улонни кузёмы 11 час бере гуртэ бертыны уг лэзьы ни вал, соин ик пумиськонысьтымы дыраз вуыны тыршылӥм. Одӥг пол озьы пумиськеммы сярысь вераськыса ӵош чай юиськом, кык пол, куинь пол… Собере акыльтӥз, лэся, мукетъёсыныз пумиськылыны, ог-огмылы синмаським. Георгий капчи мылкыдо, баянэн шудӥз, олокыӵе но ужрадъёсы пыриськылӥз.
- Казакъёс ведь туж кырӟасесь, шулдыръяськыны ярато.
- Георгий но кырӟаны, баянэн шудыны яратэ. Юондыръёсын, пӧртэм ӝытъёсын калыкез шулдыртыны быгатэ… Ноку но ӧй малпалля ӟучен улыны. Кылдэмез ни озьы, вылды. Со сярысь мынам серемес кылбуре но вань:
«Бон» палъёсты яратӥ вал,
«Бон» палъёс шуизы горд.
Горд ке горд вылэм, я, ӵок но,
Пиналъёс луозы льӧль.
«Бенъёсты» гажаны кутски вал,
«Бенъёс» но шуизы горд.
Тусыдъя ик ке сямыд но
Тэркытэк кылём, дыр, шол.
Кытчы пырод, ӟучлы бызёно луиз.
- Ноку но ӧй малпалля тӥ горд шуыса. Кӧня мон тӥледыз тодӥсько, шорады котьку синмаськыса учкылӥ. Али но сыӵе ик чебер потӥськоды. Дӥсяськыны но быгатӥськоды, котьку ӝикыт ветлӥськоды.
- Кышномурт котырзэ чакласа, октыса-калтыса улыны кулэ. Со понна ик со кышномурт – дуннеез чебертыны. Картэ но уг яраты суп-сап кышномуртъёсты. Нош пичи дыръям монэ Горд Миля шуыса исаллязы. Трос пиосын жугиськеме вань.
- Иське, жугиськыны но быгатӥськоды?
- Кулэ ке, быгатӥсько. Гуртысьтымы Удмурт Лем школае мыныку, Улысь Пыхты ӟуч гурт пыртӥ потоно вал. Гурт пумтӥ пичильтык шур бызе. Тулыс отын вуэз тыраз луылӥз, выжез сюбег гинэ. Улысь Пыхтыысь ӟуч пиос со выж вылэ султо но милемыз потыны уг лэзё ни. Ми вуэтӥ коласькыса потоно луиськомы. Кутмы котме, пыдмы кынме. Одӥг пол, кык пол озьы каризы но, мынам чиданэ быриз – пуштӥ. Выж вылэ потӥ но отын сылӥсь ӟуч пиосты вуэ донгай. Со тырысь милемлы люкетӥсь ӧз луы ни. Горд муртэ лушкем ӟырдыт шуо. Мон но чидасько, чидасько но, собере зол пуштӥсько.
Гордэлы луыса ик асме весь ултӥын вози. Но сюлмам пичиысен кыӵе ке ӟечезлы, умоезлы оскон улӥз. Озьы мон кык дуннеын улӥ. Одӥгез – мумы-бубы, сузэръёс, колхоз но гурт уж, исаськись эшъёс. Мукетыз – лыдӟем книгаосысьтым туж кельышлы дунне, отысь чебер геройёс. Малпалляй, куке но мон но озьы улыны быгато. Одӥгаз – мон горд, шорам нокин но уз учкы, монэ уз яратэ, мон но яратыны кулэ ӧвӧл. Мукетаз – книгаын кадь мусо, мон но озьы яратыны быгато, монэ но туж зол яратозы.
- Нылпиосты удмурт кылэз уг тодо, дыр?
- Нылы но, пие но ӟеч уг тодо ке но, соосты удмурт кылын вузаны уд быгаты. Пароходэн Дунай шур кузя ветлыкуз, пие эшъёсыныз удмурт сямен «Лымы тӧдьы» калык кырӟанэз кырӟам. Пие шуэ, пӧламы, пе, удмуртъёс но вал, но соос огзы но удмурт кылын ӧз кырӟалэ, керпотӥзы.
- Милитина Васильевна, тӥ удмурт интеллигенцилэн шорсюлмаз бергады шуи ке, уг янгыша, дыр. Кӧня тодмо адямиосын пумиськылӥды, соосты калыклы верады-возьматӥды. Асьтэос но уд паймиське-а?
- Куддыр паймисько. Ачид тодӥськод ук, кин ке сярысь гожтӥськод ке, солэн улонэныз улыны кутскиськод. Котькуд геройме яратыса гожтӥ.
- Гуртысь огшоры ужась сярысь-а, тодмо адями сярысь-а гожтыны секытгес?
- Одӥгез но капчи ӧвӧл. Нош тодмо адямиос сярысь секытгес ик, дыр. Соосты угось калык тодэ ини, паймытӥсьсэ, тунсыкозэ возьматыны быгатоно.
- «Ӵыдонтэм пумиськонъёс» книгады школаысь удмурт кылъя но литературая дышетӥсьёслэн ӝӧк выл книгазы луиз. Аръёс ортчо, геройёс будо. Сыӵегес ик книга поттыны уд малпаське ни-а?
- Та книгае дышетӥсьёслэн куремзыя ик поттэмын вал. Али «Удмуртия» издательствоын со выллемгес ик рукописе кылле. Азьвылзэ поттыны коньдон ӧз куре вал, табере ачид шедьты, шуо. Кытысь-о мынам, пенсионерлэн, коньдонэ луоз. Нош кураськыны уг быгатӥськы. «Ӵыдонтэм пумиськон» книгаям мон искусство, культура удысын ужасьёс сярысь гожтӥ ке вал, таяз наука удысысьёсыз но йылтэмын на.
- Тӥлесьтыд кылбуръёстэс но удмуртлык понна сюлмаськемдэс Ашальчи Оки нимо премиен дунъязы. Нош мар понна Кастренлэсь премизэ сётӥзы?
- Удмурт культура удысысь ужасьёсты возьматэме понна.
- Тӥ зэмзэ но трос кужымдэс, быгатонлыктэс сётӥськоды асьме культурамес калыклы возьматонлы. Очеркъёсыныды гинэ ӧвӧл, трос калык азьын тодмо писательёслэсь ӝытъёссэс но туж быгатыса нуиськоды. Палэнысен учкыса, сыӵе лякыт, капчи вераськиськоды кадь адӟиське. Нош одӥг кылбурады шуиськоды:
Ой, удмурт сюлэм –
Дырекъясь ӝыжы:
Куалекъя, кышка –
Бен сыӵе сямы.
Ӝутӥсько йырме –
Мыкырске ни со,
Чыртыме зӥбе.
Чыртые шӧдтэк'
Пельпуме вые,
'Лякиське кӧты сюрлые.
Мон тӥни озьы
Трос калык азьын
Бадӟымак залын
Нуисько концерт.
- Кытчы бон пырод, пегӟод возьдаськонлэсь, со асэныд ӵош вордӥськемын бере. Но уж борды басьтӥськид ке, адямиез умой возьматыны тыршоно ини.
- Пенсие потыса но, гань-гань шутэтскыны уд валаське.
- Мон олокыӵе но ужрадъёсы пыриськылыны дышемын. Национальной библиотекалэн «Удмурт шаер» клубаз ветлӥ, удмурт но ӟуч нылкышно кенешъёслэн ёзъёсазы, «Удмурт кенешлэн» Октябрь ёросысьтыз ёзаз лыдъяськисько.
- 1999-тӥ арын кылбуръёсын книгады потӥз. Милемлы со шӧдтэк шорысь луиз.
- 6-тӥ классысен ик кылбур гожъясько вал ни. Школае сизьым иськеме гуртысьтымы ми куинь Миляос ветлӥмы. Одӥг пол школаысь бертыкумы, соослы кылбурме лыдӟоно кожай. Соку одӥгез Миля сюрес урдсысь ньӧр тӥялтӥз но монэ тыбырам таӵе кылъёсын шлачкетӥз: «Тӥ кадьёс кылбур гожъялозы, нош ми кадьёслы соосты дышетоно луоз». Мон оски, туж урод уж лэсьтӥсько шуыса, кылбуръёсме калыке ӧй поттылы ни.
- Иське, кылбур книгаяд азьвыл гожъямъёсыд ӧз пыре ни?
- Ӧз. Соос дневникам гинэ кылемын, калык син азе поттыны уг малпаськы ни.
- Быдэс улондэс Удмурт радиолы сӥзиды. Отын ужамды уйвӧтъёсады но лыктэ, вылды?
- Ӵемысь лыктэ. Куддыръя уже бере кылисько кадь, куддыръя микрофон азе пуксисько но, лыдӟон бумагаосы ӧвӧл. Яке «Арня ӵукнаез» лэсьтоно луэ но, маке люкетэ.
- Радио кылзӥсьёс но мӧзмо, вылды, тӥляд небыт, вешась куарадылэсь.
- Верасьёс луыло, куддыръя гожтэт но гожто.
- Ваньмон дыръяды мар карыны яратӥськоды?
- Керттӥськыны, вуриськыны. Киужъёсме кузьманы яратӥсько.
Адямилэн лул-пуш дуннеез тужгес но кылбуръёсын усьтӥське. Соин ик Милитина Васильевналэсь берло гожтэм кӧня ке чуръёссэ сётэме потэ.
Ибырвесь но узвесь
Ой, дыртӥ…
Дыртоннам ӵемтылӥ.
Базаре но пырны вунэтӥ.
Пырысал ке отчы, мон
Басьтысал, дыр, отысь ибырвесь.
Утьысал со монэ эзельлэсь.
Оло нош сётысал со шудбур,
Ватсасал на оло шумпотон,
Азьланяз улонлы но оскон.
Ой, дыртӥ…
Бызёнъям ӵемтылӥ.
Мон туннэ –
Пештырскем ӟольгыри.
Ибырвесь вӧзы
Кугӟалоз, дыр, узвесь.
Пырыез солэн сюлэмам
Улэ весь.
Солэсь нокудмы но ӧвӧл утемын.
Улэ но улэ ожмаськон дырысен.
Буйганы ке кутске мугоры но лулы,
Кинлэн ке лек кылыз нош но нош
Портонэн, ожонэн соосты вырӟытэ.
Сьӧлыко ик, дыр, мон, сьӧлыко.
Ой, дыртӥ…
Малпаннам ӵемтылӥ.
Ӧй, ӧй кожа туннэ базаре,
Ӧй, ӧй басьты отысь ибырвесь.
Медам шумпот узвесь:
Мон туннэ –
Пештырскем ӟольгыри.
Жалян
Ой, кытчы бен дыртӥд тон, гужем?
Чик уг пот вал тонэ лэзем.
Дыраз ушъяны но ӧй вуы тонэ,
Данъяны но ӧз тырмы дыры.
Ой, кытчы-о кошкид тон, гужем?
Чик уг пот вал тонэ лэзем.
Кыдыръя, кыдыръя векчи зор,
Котмытэ йырсиез, ымнырез, сюресэз.
Нап буслэсь, салкымлэсь шымырске мугор,
Ӝутыны нокызьы но уг лу мылкыдэз.
Ой, кытчы кариськид тон, гужем?
Чик уг пот вал тонэн люкиськем.
Ой, кытчы дыртӥськод тон, улон?
Малпатэк воштӥськод толлозэ туннэен.
Кожаськод: ай, вуод на, вуод,
Ваньзэ, ваньзэ лэсьтод, быдэстод.
Ой, кытчы дыртӥськод тон, улон?
Чик уг поты, уг поты тонэ ыштэме.
Мынтӥд
Гурттэс мон ӧй адӟы,
Бер ӝыт вал. Тонтэк
Кузь потӥз ульчаысь ульчае
Сюресэ.
Нюко но гопо сюресэз ортчыкум,
Малпай на, малы пересьёс
Та интыез бырйиллям гуртсылы?
Жадизы, дыр, инты утчаса.
Пичи шур но жильыртӥз, дыр,
Гочатыса.
Вӧзысь нюлэскысь нош
Лушкем учкылӥз, дыр,
Лудкеч.
Оло нош кемалась дыръёсы
Тон вал со?
Киыныд, синмыныд ӧтьыса
Адӟиськид.
Гурттэс мон ӧй адӟы.
Пеймыт вал.
Тон но ышид кытчы ке,
Нош монэ
Нуиз машина пеймытэ.
Сӥзьыл
Арлы быдэ зарни сӥзьыл вуэ дорам.
Вера кӧня ни аресэ.
Вера созэ гинэ, ма вал.
Нош мар луоз? Ма кузьмалоз улон?
Уг тоды, уг сое зарни сӥзьыл.
Шырыт кузьма емышъёссэ.
Шуэ кадь: шумпоты туннэ,
Сокем эн малпа азьланьзэ.
Инмар – кузё. Со малпаськоз,
Кӧня, мае, кинлы сётоз.
Озьы, дыр. Бен. Зэмзэ.
Ужад, малпад ке тон ачид,
Соку зарни сӥзьыл котьку
Вуоз дорад дыраз, каньыл.
Вуттоз узыр емыш, ваньбур но шуд.
Шуоз: «Я, шумпотты туннэ!»
Источник:
Гаврилова-Решитько М. В. Малпам дунне но зэма вылэм / М. В. Гаврилова-Решитько ; записала Г. Романова // Удмурт дунне. - 2003. - 12 сент. - С. 6, 11. - (Удмурт кизилиос).
За предоставление материала выражаем огромную благодарность редакции газеты
"Удмурт дунне"
