Данилов Пётр Павлович
Вуюись ворпо…
Фольклоръя «Айкай» театрлэсь концертсэ огпол ке но учкемды вань ке, Насьтӥен эктӥсь мыло-кыдо артистэз тӥ одно тодӥськоды, луоз. Гын шляпаен ӵыжыт бамо воргорон – артист Пётр Данилов. Кырӟам-верам сяна, со та театрен кивалтэ, республикаысьтымы искусство удысысь дано ужась но республикамылэн кун премиезлэн лауреатэз луэ.
- Пётр Павлович, улытозям артистъёслы вожъяськисько… ӵукна кема кӧлэмзылы.
- (Серекъяса). Уг паймиськы, артистлэн улонэз тросэзлы выжыкыл кадь потэ.
Тодэ вал, макем мон ас вакытаз вожъяськылӥ артистъёслы. Учкисько кырӟамзэс-эктэмзэс, яркыт дӥсьёссэс – интыям пукеме уг лу, али ик бордазы султысал кадь, мар отын секытэз? Соку мон соослэн шуг-секытъёссы, уждунзы сярысь ӧй ик малпаськылы, малы ке номыр ӧз кышкатъя, пӧзись мылкыдме кисьтэм потылӥз.
Табере тодӥсько ни, артист ӵемысь ӵук 6 часкын но сюрес вылэ потоно луэ шуыса. Кӧлэ но со тӥляд малпамдылы пумит, трослы ӧжытгес. Репетиция, зэм, 10 часын кутске. Но артист одно кулэ солэсь азьло кык часлы вазьгес султыны.
- ?
- Огшоры адями ӵук султэмез бере пылаське, кофе юэ но сазьтӥське, нош артистлэн озьы уг луы, солэн куараез сайкамез бере кык час кӧлэ на. Нош сыӵе куараен нокыӵе репетиция уз пӧрмы.
- Ма, «айкайёс» сыӵе зол концертъёс возьмато но, малы артистъёсты репетициосын курадӟытӥськоды на?
- Асьмеос коркамес арнялы быдэ миськиськом, бен-а? Нош тузон ӵуказеяз ик пуксе – сое нош ӵушылытэк ӧвӧл. Озьы ик татын но.
Мон азьвыл аслым ачим туж оскись вылӥськем: адямиослы кырӟаме кельше ук, мар кулэ на? Но «Айкае» вуыса валай: сцена вылын лыдъя ветлэме чик уг луы вылэм. Профессиональной ансамбльын ваньмыз ворекъяны кулэ.
- Тӥляд артист луон мылкыдды быдэсмиз, но ӝегасагес кадь…
- Мон ӝегай профессиональной сцена вылэ вуонэн. Нимысьтыз артистлы мон дышетскемын ӧвӧл уго. Крезьгуръя образование но ӧвӧл. Но «Айкаёзь»» мон трос кырӟаса-вераса вуттӥ ни вал. Университетысь «Чипчирган» ансамбле 13 ар ветлӥ. Куд-огез паймо вал - дышетскондэ, пе, кемалась быдтӥд ни, нош мылкыдыд весь татчы кыске. Пироговоысь школаын ужаны кутскеме бере сизьым ар университетэ репетициосы ветлылӥ на. Лобыса кадь вуисько вал. Ансамбле ветлӥсь студентъёслы паймылӥ: кызьы-озьы, артэ улыса, репетициосы ӝегало яке воксё лыктыны вунэто.
Мон дышетскыкум ик йӧназ артист луон сярысь малпаськылӥ. Университетэз йылпумъякум, малпанэ ӧжыт гинэ ӧз быдэсмы. А. Мамонтов монэ «Италмасэ» кураса ректорлы гожтэт ыстӥз, но соку вакытъёс сыӵеесь вал ай: кивалтӥсьёс шуизы – тонэ культурая министерство ӧз дышеты, мынод школае. Тодӥсько на, ас тодэмзыя мукет интые кошкемъёсты суд пыр берыктыны выризы.
- Соин валче дышетон ужез синазькыль ӧд каре-а?
- Ӧ-ӧй. Мон туж яратӥсько суредаськонэз, киужен выронэз. Собере, пиналъёс-а янгыш, артистэ ӧз лэзе шуыса? Мон вань мылкыдме соослы сётыны ӧдъяй, нуналлы быдэ паймытъяны выри. Туж ӝог соосты ас палам берыктӥ, эшъяськи. Малы ке дышетӥсьёс но укыр ӝог гажаны ӧдъязы. Нош директор роноысь вуэм муртъёсты соку ик мынам урокам ыстэ вал – уг но ало-марало, урок шорын пыро но тӥни. Нимаз кабинет сётэмзы бере мыным эшшо одӥг бурд потӥз на. Отчы мон куиськон станок пуктӥ, киужъёсын вырыны, солы нылпиосты дышетыны кутски.
- Пиосмуртлы тупасьтэм киуж – таизлы худграф дышетӥз-а?
- Худграфын мон живописен выри. Уг ушъяськиськы, но дышетӥсьёсылэн мыным бадӟым осконзы вал - ӟеч пӧрмылӥзы пейзажъёсы, натюрмортъёсы. Диплом уже но вордскем палысьтым (Татарстанысь Балтач ёрос) пейзаж вал. Нош куиськон, пужы пуктон – соиз пичи дырысь-а, мар-а. Цыпьялан улэ вал Демьян Иванович Соловьёв – со ас кожаз, чик дышетскытэк туж чебер суредаськылӥз, пужы пуктылӥз. Туж синмаськыса учкылӥ, вожъяськи. Анай сыӵе мылкыдме валаз. Милемды, куинь нылпиез, песяен гинэ будэтӥз ке но (атаймы мыным 6 арес дыръя кулӥз), коньдонзэ буёллы но, бӧзлы но ӧз жаля. Толъёссэ мон ӝытбыт выж вылын тӧдьы бӧзэ пужы суредалляй. Ӧй ик тодылы, Демьян Иванович трафаретэн ужа шуыса, мон сямен ик котькудзэ карандашен суреда, собере буя кожалляй.
Огласянь шонер вераськоды – пиос сыӵегес ужен уггес выро малы ке. Кӧня со понна монэ эшъёсы исаллязы, песятайёслы пужы пуктыса, пе, коньдон поттӥськод.
- Дэбес педучилищеез худграфез понна бырйиды-а?
- Озьы. Ой, кыӵе нырысь мӧзмылӥ. Анайлы нуналлы быдэ гожтэт ысъясько вал. Огвакыт берен куриськыны кутски, ӧз лэзьы - кошкид ке, чида, пе.
Пумен-пумен дыши. Драмкружоке ветлыны, суредаськыны кутски но, мӧзмонэ каллен лэзиз. Педучилищеез горд дипломен йылпумъяй. Соку ик Иже кошки. Университетысь худграфе пырон понна живописья но графикая суред гинэ куризы. Кыксэ ик «витьлы» сётӥ. Бертыса анайлы верасько но, уг оскы. Синъёсыз тыризы, но мултэс ӧз ушъя.
- Эшшо сомында дышетсконэз малпаса, ёрмонлэсь ӧд кышкалэ-а?
- Пичи но ӧй. Мон ёрмыса ноку но ӧй улы, бадӟыматэм стипендия басьтылӥ. Собере, педучилищеын дышетскыкум ик ужаны йӧндыри ни. Тодӥсько на, леспромхозлы кыӵе ке пул суредай, со понна 7 манет (!) коньдон сётӥзы.
Университетэ пыреме бере огаз школае лаборантэ интыяськи. Берлогес филармониын художник-оформитель луи. Со вакытэ ик деканатын секретарь-машинист луыса ужай. Таизлы ужлы педучилищеын тэк пукон дыръёсы дышетски вал. Ӧй но малпалля, куке яралоз шуыса.
Деканатысь бумагаосты печатлам сяна, мон тодмоосылэсь диплом ужъёссэс но печатланы вутскылӥ на. Со сяна, факультетысь студентъёслэн профкоменызы кивалтӥ на. Таиз понна коньдон ӧз тыре бен, но профилакторие путёвкаен дунъяллязы. Мон вир люканъя планэз (азьвыл донор уж котькытын зол пуктэмын вал) ӟеч быдэсъяме понна факультетлы ватсаса путёвка сётъязы. Студентъёс шумпотылӥзы ке но, серекъяса монэ «вир юись» шуылӥзы ик.
- Али озьы котькытчы вутскыны быгатысалды на-а?
- Вырисько кадь. Вормонтэмзэ вылам уг басьтӥськы ке но. Нош басьтӥськисько ке, ужме ӟеч быдэстыны вырисько. Зэм, кема кӧлыны уг кылды ни. Репетиция, телевидение гожтӥськон, реклама сётон, худсовет, школаын кружок… Туннэ тани базаре кышет басьтыны ветлӥ (выль номерлы кулэ), вуриськисен пумиськоно, Сосновкае потоно… ӵуказе нылпи садын ужасьёс семинаразы ӧтизы. Ма, артистъёс ваньмыз уез-нуналэз тодытэк ужало. «Айкай», кылсярысь, октябре 24 концерт сётӥз.
- «Айкае» вуыса, тӥ асьтэлы коллективез ӝог синмаськытӥллям – кытӥ-мар кивалтӥсь луиды. Нош кызьы отчы вуиды вал?
- Кивалтон сярысь малпаса ӧй. «Айкай» 1990-тӥ арын кылдӥз. Мон отчы шедён сярысь весь малпаськыса улӥ. Лушкем малпанъёсме отысь артистлы Геннадий Кузнецовлы усьтӥ (ми соин одӥг палась). Ветлӥсько куриськыса, уг басьто. Артистъёсмы, пе, тырмыт. Собере тӥни куиськыны кутски но, ӝуткам айшетме возьматыны нуи. Ваньмыз котыртӥзы, бергато-учко. Вуза, пе, басьтом. Мон шуисько, кузьмало, ансамбляды ке басьтӥды. Басьтӥзы. Озьы тӥни 1994-тӥ арысен татын ужасько ни. Кутэмзы бере верантэм шумпотӥ. Ужелы вань сюлэмме, мылкыдме сётылӥ. Буш ӧй лыкты – мынам аслам малпанъёсы, кырӟанъёсы вал. Ансамбле выль шӧм пыӵатыны выри, сопал удмуртъёслэсь кырӟанъёссэс-веранъёссэс пыртӥ. Пумен-пумен дыши, артистъёс монэ валазы, дунъяны ӧдъязы. Гужем лыктӥ, сӥзьылаз художник-постановщике пуктӥзы ни. Ноку но вуриськылэме ӧй вал, табере магазинъёстӥ нылкышноос пӧлтӥ басма утчаса ветлоно луиз. Вуз карисьёс нырысь паймыса учкылӥзы, табере ваньмыз тодмало ни.
- Огвакытэ артистъёс ӝожтӥськылӥзы концертэз басьтӥсь ӧвӧлысь, тӥ шуиськоды – шокчыны маза ӧвӧл.
- Соиз но, таиз но шонер, дыр. Гурт калык урод улэ ке, ми но куректӥськом: уксёзы ӧвӧл бере, концерт-а учкемзы потоз? Но ми тэк ум пукиське. Соин ваньзэ азьло ик чаклано луэ. Кылсярысь (матысь толэзьёсты вератэк), вуоно гужем Венгрие потон сярысь туннэ ик сюлмаськиськом ни, вань ни милям ӧтёнмы 2008-тӥ арлы но. Нидерландыын бадӟым фестиваль ортчытыны чаклало.
- Кызьы инвисъёстэс паськытатӥськоды?
- Кунгож сьӧрын эшъёсы, тодмоосы вань, Удмуртие вуылыкузы тодматскылэмын.
Собере, али улонэз туж каньыл кариз Интернет – отчы асьме сярысь ивор, видеосуредъёс пыртӥськом, али Рома пие «Айкайя» нимысьтыз сайт лэсьтыны выре.
Амал сюре. Зэм, собере коньдон утчаса зол бызьылоно луэ. Куддыръя пӧрме. Туэ гужем Хорватие потаны быгатӥм.
- 2002-тӥ арын тӥ ансамбльлы калык костюмъёс дасямды понна Удмурт Республикалэсь кун премизэ басьтӥды. Но малы ке со сярысь кылпум поттоно ке, вераськонлэсь палэнскиськоды.
- Уг палэнскиськы, но ялан со сярысь вераськыны умой уг поты – ушъяськем кадь луыса кошке. Нош кыӵезэ-марзэ адямиос артистъёсмы вылысь адӟо.
Шаерамы трос куиськисьёс, костюм вурисьёс. Пӧлазы туж трос устоосыз. Маин висъяськизы мынамъёсыз? Пуштросэнызы, дыр. Кин ке чебер, яркыт карон сярысь сюлмаське ке, мон тырши костюмам удмуртлэсь лулпушсэ, философизэ пыртыны. Со понна трос дышетсконо луиз. Туж юрттӥзы научно-исследовательской институтын ужасьёс К. Куликов, этнограф Т. Владыкина, музейын ужась С. Лебедева.
- Шуо, тӥ та уже кузпалдэс но кыскиллямды.
- Одно ик. Ирина университетэ пырытозяз ик фабрикаын анаез вӧзын куиськисьын ужамын, соин ик со мынам нырысетӥ юрттӥсе.
- Шуо, республикалэсь палэнэ ветлыкуды, тӥ, пе, Геннадий Кузнецовен, Арск дортӥ ортчыкуды, котьку сопал гуръёсты кырӟаськоды.
- Одно ик. Огпол но кӧлыса кылеммы ӧвӧл, коть уйшоре, коть ӵукна медло. Арск вордскем гуртэлэсь 50 иськемын ке но, дор палы шӧдӥське, вылтыры ик оломар луэ. Поездэн мыныку, тамбуре потыса, арганэн ик шудӥськом, кырӟан сямен пуш тыре: отын мӧзмон, дордэ яратон но солэсь палэнын луон, отысь удмуртъёсын данъяськон…
- Малпандэс котьку кырӟанэн кисьтӥськоды-а?
- Озьы-а, мар-а. Пичи дыръямы песяй кырӟакуз весь бӧрдылӥз. Жаль потэмысьтыз кырӟаны ум лэзиське вал. Али мон сое валасько.
Ӵуказе тани туж шуг нунал: 16 ар талэсь азьвыл семьяямы адӟон вуиз. Нуназе министерствоын кенеш. Ӝыт сюанэ мыноно. Куинь учыр - куинь мылкыд. Котькудӥзлэн аслаз гурез. Улон мылкыдэз уг юа.
- Тӥ ворпо вуюись выллем – сизьым быгатонлыкен адями. Асьтэды асьтэос кинэн золгес шӧдӥськоды?
- Та улонын кулэ луись адямиен.
Источник:
Данилов П. П. Вуюись ворпо... / П. П. Данилов ; записала З. Рябинина // Удмурт дунне. - 2004. - 26 нояб. - С. 6, 11. - (Удмурт кизилиос).
За предоставление материала выражаем огромную благодарность редакции газеты "Удмурт дунне"
