Фофанов Сергей Николаевич
Инбамлэн пыдэсыз ӧвӧл[править]
Чагыр инбаме лобон – уноез понна ноку быдэсмонтэм малпан. Пичи Пурга ёросысь Улын Кечол гуртысь Сергей Фофанов но та чагыр малпанэз дорозь уно аръёс мынӥз. Али со Як-42 самолётлэн командирез луэ, чагыр-чагыр инбаметӥ уно сюрс иськем сюресъёсты ортче. Воздушной флотлэн нуналыз азьын пилот усьтэ мылкыдъёссэ.
– Сергей Николаевич, мар тӥ понна инбам?
– Инбаметӥ лобиськод ке, со сярысь уд малпаськиськы, Музъем шоры синмаськыса учкиськод. Туж-туж чебер потэ со мыным: отын сыӵе чебересь гурезьёс, шуръёс...
Инбаме вуиськод ке, эшшо вылэгес тубем потэ. Азьвыл мон Ан-2 самолётэн гуртъёс, каргуртъёс вылтӥ лобасько вал. Но ялан вылэгес учкылӥ: отын эшшо бадӟымгес самолётъёс лобало ук, соос пӧртэм городъёс вадьсы вуыло. Кутски Ан-24-ен лобаны. Али музъем вылысь 9 сюрс метр кеме вуылӥсько ни, но табере эшшо вылэгес тубеме потэ, инбамлэн пыдэсыз ӧвӧл ук...
Огвакытэ Ижын калыккуспо рейсъёс усьтыны чаклазы. Соку мон эшшо вылӥетӥгес лобасал. Но кризисэн сэрен та уж куспетӥ луиз. Отпускын одӥг-кык арня уг ни лобаськы ке, ужелэсь мӧзмыны кутскисько. Вадим Захаровлэсь лётчикъёс сярысь кырӟанъёссэ кылзӥсько. Соку Настя кузпалы шуэ: папамы инлэсь мӧзмыны кутскиз...
– Лётчик луон сярысь пичиысен малпаськылӥды-а?
– Гуртын пиналъёслэн сыӵе веранзы вал: тодӥд ке, кыӵе синмысьтыд синлысэд усиз, лушкем малпанэд быдэсмоз. Ог 4-5 арес вал мыным, апае шуэ: Сергей, кыӵе тынад чагыр малпанэд, кин луэмед потэ – ас поннад малпа, мыным эн вера. Мон малпай. Табере, пе, вера: кыӵе синмысьтыд синлысэд усемын. Верай. Сузэре шумпотӥз: тодӥд, пе, табере вера ни, мар малпад. Лётчик луэме потэ, шуисько. Вот, малпанэд, пе, одно быдэсмоз...
Инме ӝутскон мылкыдзы вал атаелэн но, песятаелэн но. 1950-тӥ аръёсы атае Уйпал но Лымшор Кореяос вискын ожмаськонын вал. Со оже Совето Союз шара ӧз пыриськы. Вераллязы советникъёсмы сярысь гинэ, соос отын 125 кузя вылӥллям. Но отын вал асьме лётчикъёс но. Атае зенитно-ракетной дивизионын радиотелеграфист луыса служить карем. Дивизионзы авиацияя полкен одӥг базаын интыяськемын вылэм.
Кечол гуртэ вадьсытӥ ортче самолётъёслэн сюрессы. Атае яратылӥз инме учкыны. Вань веранъёсыз самолётъёс сярысь вал. Эшшо туж яратылӥз душесъёслэсь лобамзэс чакланы, учкылӥз, кызьы соос шыръёсты, векчи бурдоосты кутыло. Самолётъёсты яратон атаелы пыӵам песятай бордысь. Песятай Нырысетӥ дунне оже пыриськемын, аэропланъёслы синмаськемын вылэм.
Семьяямы ми 5 кузя нылпиос. Мон пичиез. Вань агайёсы – погонэн, сузэре – эмъясь. Малпасько, мыным сюрес агайёсы но усьтӥзы. Куинетӥез братэ авиацияя техник вал.
– Озьыен, школаез йылпумъякуды, тӥ рос-прос тодӥды ни кытчы мынондэс.
– Школаын мон умой дышетски, комсомол огазеяськонмылэн секретарез вал, ВЛКСМ-лэн ёрос комитетэзлэн депутатэз, спортсмен. 10-тӥ классысен толалтэ ик лётной училищее документъёс бичаны, медосмотрез ортчыны кутски. Сверхзвуковой истребительной авиацие мынэме потэ вал. Пургалась эмъясьёсты ортчи – ваньмыз умой. Зол-зол дасяськисько ни экзаменъёслы. Но ортчоно на тазалыкез эскеронъя республиканской комиссиез. Тазэ но йылаз-пумаз потӥсько ни вал, кылиз окулист гинэ. Букваосты ваньзэ адӟи. Сётӥзы мукет таблица. Таяз – пӧртэм котрес пусъёс. Кытын кыӵеез – ваньзэ шонер верай, одӥг интыяз гинэ дыртэменым-а мар-а ӵемтӥ, собере тупатски. Но окулист эшшо вань пусъёсъя юалляськоно кариськиз. Та интые вуи но, нош сураськи. Соку эмъясь шуиз: мон тонэ истребительной авиацие уг лэзьы, огшоры лётной училищее мын.
Туж зол ӝожоми. Али малпасько ни: улон монэ озьы азьлапал ик дышетыны кутскиз. Угось лётчиклэн ужаз стрессъёс ӵем луо. Документъёсме Алма-Атаысь пограничникъёсты дасянъя училищее сётӥ. Отын экзаменъёс азьын милемыз быдэс толэзьлы бусыысь учебной центре куштӥзы, 6 часын султӥськом, бызьылӥськом – ваньмыз армиын кадь. Озьы тупаз: татысен пумиськи лётчикъёсты дасясь училищее монэн ӵош пырыны турттӥсь пиосын, соос вал Молдавиысь, Украинаысь, Казахстанысь, шор Россиысь. Огпол пуксим но малпаськом: ма, неужто асьмеос пинал дырысь чагыр малпанмес пограничной училищеен воштом? Ум, татчы ум пыре, экзаменъёсмес юри куашкатом, армие мыном. Вуиз нырысетӥ экзамен – математикаен. Вӧзам юромо пуксиз Дальний Востокысь пияш. Мон солы заданизэ лэсьтӥ, аслэсьтымзэ ӧй ик усья. Со «4» басьтӥз. Нош мон кошки армие. Озьы инметӥ лобан мылкыды сюлмысьтым ӧз поты, пограничной училище но со мылкыдэз вормыны ӧз быгаты.
Армиез адӟеме бере гинэ малпай: ожгар училищее уг мыны. Школаын тренер луыса ужаны кутски.
...Нош гуртмы вадьсытӥ самолётъёс ялан лобало. Вылӥе учкисько но, сюлэмы шымырске. Экзаменъёслы дасяськыны лушкем кутски, мынӥ Краснокутской лётной училищее, пыри. Макем бадӟым шумпотон вал!
Училищее пырыкум, мыным 21 арес вал ни. Отчы басьто 23 аресозь гинэ. Дышетски ӟеч, капчи ӧй вал ке но. Секытэз – казармаын улон. Армиысь бертыса, выльысь армие шеди кадь. Сиськыны – строен, урок лэсьтыны – строен. Туж зол дисциплина, астэ ялан юн кабъёсъя возёно.
– Умой-а со?
– Пинал дыръя секыт. Но бӧрысь валаськод: озьы тынэсьтыд чиданы быгатэмдэ эскеро. Авиациын трос чидано, дисциплина быдэс лулсэрад пыӵаса кыльыны кулэ.
Мон али но тау карисько школаысь физкультурая дышетӥсьёсылы. Соос дышетӥзы азьлань мыныны. Милям Кечолын хоккей, футбол командаосмы золэсь вал, мон котьку но нападающий вал, куасэн бызьылӥ. Спорт туж юрттэ характерез юнматыны. Пилотэ дышетскыкум, ваньмыз со мыным юрттӥз.
– Нош самолёт штурвал сьӧры нырысьсэ пуксемдэс тодӥськоды на-а?
– Зэмос самолётэ кыкетӥ курсысен пуксиськод, нош нырысь инструктор вӧзын лобаськод, 14-17 час тырмытӥськод ке, ас поннад лобиськод. Вӧзад курсант интыяське. Табере тон сое дышетоно луиськод.
Ас кожад нырысьсэ лобӟемдэ номырин уд вошты: астэ ачид гажан, мукетъёс понна кыл кутон трослы будэ. Пуш тыре: тон ачид лобӟиськод!
– Озьы ке но, мынам тодэмея, тӥледлы лобаны кема ӧз кылды на...
– Кутскизы секыт 1990-тӥ аръёс. Дышетсконэ 3 ар интые 6 ар кыстӥськиз. Угось теорияя курсмес йылпумъяса, ми практикамес ортчыны, лобаны кулэ вал. Нош бензин ӧвӧл. Милемыз дорамы келяло. Кӧня ке толэзь ортчыса, нош ик ӧтё. Но лобан азьын теориез тодэ ваёно ук – толэзь ӵоже нош ик дышетскиськом, строен ветлӥськом... 10 час пала лобаса вуттӥськом – бензин нош ик быре. Нош ик доре келяло. Кӧня ке дыр ортче – ӧтё. Нош ик казарма, нарядъёс, кӧня ке пол инме ӝутскиськом – бензин быре, доре бертӥськом.
– Та сюресэз бырйиды шуыса, жалялляды но, оло?
– Пӧртэм малпанъёс вал. Ӵош дышетскем эшъёсы семья кылдыто, нылпиоссэс будэто, корка пукто, нош мон весь дышетскисько, весь казарма борды думылэмын. Уже нокытчы но огдырлы шуыса кутэмзы уг поты. Ма, куто ке но, уждунэз туж ӝегато вал. Лётчик нокинлы кулэ ӧвӧл.
Училищеез йылпумъяме бере но уж шедьтыны туж шугъяськи ай. Ижысь аэропортын водитель луыса тырши, возьмай, ку самолётэ инты бушалоз. Но интыос ӧй вал. Соку басьтӥ нимысьтыз справочник, Россиысь пӧртэм аэропортъёсы 100-лэсь трос гожтэт келяй. Вуиз 55 ответ. Али ке но со гожтэтъёсты утьыса возисько. Ваньмаз сямен ик вакчияк гожтэмын: «В пилотах не нуждаемся, извините...» Но со 55 пӧлысь кыказ гожтэмын на: «Не отчаивайтесь, идите до конца, ищите работу пилота». Со 2 гожтэт сюлэмме шунтыса возиз, оскон сётӥз: мон лобало на!
Эшъёсыным кусыпме ӧй ышты. Ог-огмылэсь юалляським, кытын мар вань. Одӥгез эше Нижневартовске ӧтиз. Отын Ан-2-ос лобало вал. Но удысэдъя 2 ар но 3 толэзь уд ни ужаськы ке, выльысь дышетсконо – теориез но, практикаез но тодэ ваёно. Шуизы: теориез, пе, аслад коньдонэныд дышетскид ке, лыкты, басьтом. Мон мынӥ Свердловскысь дышетонъя центре, АН-2 самолётэн лобаны выльысь дышетски. Нялтас вераса, пилот самолётэн 5 ар уг ни ке лоба, свидетельствоез воксё быре. Тон пилот ӧвӧл ни.
Свердловскын дышетскон вискын отысь ик аэропортын уж шедиз. Ан-2-ен лобаны кутски тайгаетӥ, нюлэсъёс пушкы ватскем пичи гуртъёстӥ. Мар со тайга? Сюресъёс ӧвӧл, одӥг посёлокысь мукетаз вуон понна шур кузя кӧня ке сутка мыноно. Нош самолёт тонэ 30 минутскын вуттоз. Нырысь вакытаз ачим паймисько вал: мар мон татын карисько? Малы мон татын? Но пумен дыши. Отын калык сыӵе дунъялляз лётчикъёсты! Улытозям сыӵе яратэмез, гажамез нокытысь адӟеме ӧвӧл ни. Посёлоке вуиськом гинэ, дорамы лось, кабан, ӵӧж сӥль ваё, мешокъёсын кузьмало.
Самолётэн мыныку, музъем вылысь операторъёсын связь пыр вераськиськод. Со операторъёс но отын туж тунсыкоесь, капчи мылкыдоесь вал. Эй, салам, кесясько трубкае, кытчы мынӥськод? Сыӵе-сыӵе посёлоке-а? Вай мыным отысь вить колды нянь но ящик сур...
– Берло дыре ӵемысь кылоно самолётъёс пазьгиськем сярысь. Шуге-леке шедьылэмды вань-а?
– Пӧртэм учыръёс вал. Лётчик луыса ужаны кутскеме бере нырысетӥ нуналаз ик ӧз удалты. Соку ми тайгаез чакланы потӥськом вал, кытын ке тылпу уг пуромы-а шуыса. Сыӵе патруль лоба музъем вылысен 800-900 метр кемын. Самолётмы вылӥе ӝутскиз, писпу йылъёс улӥе кылизы гинэ – кабинаямы ӵын потыны кутскиз. Вӧзам пукись эше шорам учке, мон – со шоры, со – нош ик шорам, мон – со шоры... Ӵын весь золгес но золгес бугырске кытысь ке кабина улысь. Самолётэз берыктон, вань приборъёсты кысылон но самолётэз пуктон – ваньзэ ӝог лэсьтӥмы, зэм, мыным со туж кема потӥз. Самолёт укыр ӝог ӝуа ук. Милям проводка кенжем. Бӧрысь шуизы: тӥледлы удалтӥз ай…
Тӥни озьы, нырысь лобакум ик, кыӵе ке кужымъёс мынэсьтым визьме, секыт учырысь потыны быгатэмме эскеризы кадь. Лётчиклы туж трос тодоно. Но ми Совето Союзын лэсьтэм самолётъёсын лобаськом. Соослэн 3-5 полэс резервзы, ӟеч гарантизы. Самолётэз лобон азяз но, пуксемез бере но авиатехникъёс пыр-поч учко.
– Тӥледлы нуллоно луэ бадӟым кивалтӥсьёсты но. Вань-а пӧртэмлыкез?
– Куддыръя шуо: бадӟым адямиез нуиськод, сакгес лу. Кызьы сакгес? Ми котьку сакесь! Адямиосты ум люкиське: огшоры ужась-а со, кивалтӥсь-а. Тыршиськом: калыкез нуыку, нокыӵе шуг-секытъёс медаз кылдэ.
Штурвал сьӧры пуксиськод ке, ачид сярысь уд малпаськиськы ни. Самолётын – 120 адями, эшшо 6 адями – экипаж. Ваньмыз тон бордысь потэ – зэм, вань на пилот, вань бортмеханик, но берпуметӥ кылыз – командирлэн.
Ижысь аэропортэ мон 2005-тӥ арын вуи, АН-26-ын ужаны кутски. Огпол бадӟым кивалтӥсьёсты Ульяновскысь ваёно вал. Самолёт ӝутскыку ик, двигатель ужамысь дугдӥз. Ярам, ми берен пуксьыны быгатӥм.
Лётчик медаз жадьы шуыса, солы толэзяз троссэ 90 час лобаны яра. Толэзьлы 2 пол сюлэмзэ пыр-поч эскеро, арлы быдэ – диспансеризация, 3 арлы одӥг пол – эшшо пыр-почгес медкомиссия.
– Вордӥськем гуртты вадьсытӥ кыӵе мылкыдын лобаськоды?
– Шумпотыса. Вордӥськем интыме уж дорын ваньзы тодо. Кечол ӵыжы-выжыосы но тодо ку лобӟемме. Соос отын самолётъёсъя часъёссэс тупатъяло. От, шуо, самолётмы лобе, иське, сомында дыр ини.
– Кузпалды – тодмо удмурт писательлэн, драматурглэн Анатолий Григорьевлэн нылыз. Кызьы ог-огдэс шедьтӥды?
– Кечолын сюанын тодматским. Со эшез доры лыктэмын вал. Нырысь ог-огенымы огшоры вераським гинэ, собере пумен эшъяським, бӧрысь семья кылдытӥм. Настя дышетӥсь.
Зэмзэ вераса, Свердловскысь бертэме мынам уг поты вал, отын лобаны туж кельшылӥз. Но пие вордӥськем бере туж но туж солэсь мӧзмыны кутски. Поездэ пуксьыса уг вуттӥськы на, чидантэм мӧзмисько ни. Соин Иже бертоно кариськи. Табере пичи нылы но вань ини.
Зэм, семьяме али но шер адӟисько. Як-42 самолётэн лобасько Москвае, Санкт-Петербурге, Нижневартовске, уйпал городъёсы. Куддыръя – Владивостоке, Петропавловск-Камчатские. Тужгес трос ужмы гужем. Сочиын, Анапаын, Симферопольын базировкамы. Отысен 8-10 пӧртэм городъёсы лобаськом на: Казань, Нижнекамск, Челябинск... Озьы арняосын-арняосын дорам уг луиськы.
– Со понна шуныт шаеръёсын шутэтскиськоды, вылды?
– Мон гуртын шутэтскыны яратӥсько, шыпытэз утчасько. Нюлэскы ветлӥсько. Городлэсь жадисько. Нош возь вылын, нюлэскын асэныд вераськыны, аслэсьтыд пуш куарадэ кылзыны луэ.
– Мар вера пуш куарады?
– Йыбырттэ ваньмызлы, кин юрттӥз мыным малпанме быдэстыны. Лобан – со 3 поколенимылэн чагыр малпанэз вал. Мынам анае но, атае но улэпесь ӧвӧл ни. Но тодам кылиз нырысьсэ лётчик формаен бертэме. Тятяе бордысьтым ӧз ик кошкылы – со мынэсьтым зол шумпотэмын вал.
Тодэ лыктэ пичи дырысьтым одӥг учыр. Гуртмы дорысь кыдёкын ик ӧвӧл, гурезь вылын, куинь этажо вышка вал. Ми эшъёсыным со вылэ тубоно кариським. Нырысетӥ этажаз куиньнамы ик тубим. Нош отын тӧло, кышкыт. Одӥгез эшмы кышказ, отчы кылиз, нош ми эшшо вылӥегес тубоно кариським. Эшшо но зол тӧлаське ни. Кыкетӥез но эше кышкатскиз – кыкетӥ этажын дугдӥз. Мон асме киям кутӥ, вылӥысь тубат борды кырмиськи но уллань учкисько: кышкыт, пыдесъёсы куалекъяло. Нош тӧл сокем зол шула, сэрпалтыса лэзёз кадь. Ачим аслым шуисько: мон озьы но тубо!
Туби! Мылкыды сыӵе куанэмын вал: мон быгатӥ! Быгатӥ! Улонын но озьы ик: кышкан вань котьку, но аслыд осконэд солэсь кужмогес луыны кулэ.
Источник:
За предоставление материала выражаем огромную благодарность редакции газеты "Удмурт дунне"
