Буранова Лариса Николаевна
Пеймытэз мон уг курла - сюсьтыл ӝуато
Правительстволэн юртэз шоры возьматыса, пичи Ларисалэн атаез серем пыр шуиз:
- Ну, нылы, учкы. Оло, тон но куке-соку татын ужалод ай.
Аръёс ортчыса та кылъёслэн зэмамзылы Коля агай ачиз но паймиз.
Табере Лариса Буранова Удмурт Республикаысь нациосын ужан политикая министрлэн воштӥсез. Уно аръёс ӵоже ужа ни Финн-угор калыкъёслэн калыккуспо ассоциациязы (АФУН). Та сюресэз ик вуттӥз сое Югославие, Болгарие, Турцие, Румыние, Великобритание, Америкае, Эстоние, Венгрие, Финляндие.
- Лариса Николаевна, улонлы инъет, пе, сётӥське пичи дыръя ик. Тӥ туж шаян пинал вал, дыр…
- Музъем вылын вань сыӵе инты – отын улэ мынам пичи дыры. Дортӥз ортчыкум но, мон туж шер отчы пырасько. Малы ке сюлэм пирсэктэ, берен пичи дыре вуылыны луонтэмзэ шӧдыса, вылды.
Пичи дыры улэ Алнаш ёросысь Кучыран гуртын. Со мынам атаелэн вордӥськем гуртэз. Ачим мон вордӥськемын но улэмын ни Ижевскын. Анае – Завьял ёросысь.
Кучыран гуртэ шергес бертылӥськом вал. Оло, соин но тужгес но паймымон тодэ ваёнъёсы та гуртэн герӟаськемын. Мыным, городын вордӥськем нылашлы, отын ваньмыз тунсыко потылӥз: аспӧртэм дӥсен песянае, удмурт кылын вераськись эшъёсы, бугроос вылэ тубыса кырӟанъёс нёжъяммы. Отын ик монэ сирлэсь сыскиськон лэсьтыны дышетӥзы.
- Гуртэ бертылэмды ик юрттӥз, дыр, городын будэм нылашлы удмурт кылэз сыӵе ӟеч тодыны?
- Нырысь мон удмурт сямен уг валаськы вал. Нош Кучыранын улӥсь агайёсы ӟуч сямен ӧз валалэ. Мон котьку соослэн анайзылы, Галя апайлы, вазиськылӥ: кызьы та кылэз верано, кызьы созэ. Ну ульча кузя бызисько, удмурт сямен кесяськисько ни. Собере валай: мар ке но кароно, кызьы ке агайёсыным вераськоно. Анай-атайме кури удмурт сямен дышетыны. Ар ӵоже курадӟи. Вуи гуртэ – нош агайёсы чылк-чылк ӟуч кылын верасько ни…
- Тӥляд атайды республикаямы тодмо адями вал, шуо.
- Егит дыръяз атае быдэс гуртын нырысетӥ казакпи вылэм, нылъёслэсь йырзэс поромытӥсь. Армие кошкон азяз вань Алнаш ёросэтӥ кино возьматъяса ветлӥз. Со бордысь ик, дыр, быдэс семьямылэн вашкала фильмъёсты сыӵе яратэмез. Мон улонэз но, адями кусыпъёсты но кино пыр валаны дыши, дыр. Атае быдэс улонзэ ужаз «Нефтемаш» заводын, вылӥ квалификациен слесарь луыса. Солэн аслаз пусэз но вал. Куинь пол бырйылӥзы Вылӥ Кенеше депутатэ. Али но тодӥсько на, кызьы быръёнъёсы атаймы понна куара сётыны ветлӥмы. Вылӥ Кенешын со промышленностья комиссиын ужаз. Атаелэн зарни киосыз: куас но, скрипка но ачиз лэсьтылӥз. Туж ӟеч тодмоос вал Флор Васильевен.
Одӥг пол атае монэ садикысь басьтӥз. Солы Правительствое пырано на вал. Нош отчы пичи пиналъёсын ӧз лэзьялэ. Атае монэ вахтае кельтӥз, возьма, пе, татын. Кӧня ке улыса васькиз но серем пыр шуиз:
- Ну, нылы, учкы, оло, тон но куке-соку татын ужалод ай.
Та кылъёс азьлань сюресме шӧдэм кадь луизы.
Анае ужаз библиотекаын. Калык пӧлы потаны туж ик уг яраты, но котькинлы котьку юрттыны дась. Мон сое куддыръя Тереза анай шуисько – ваньмыз понна сыӵе сюлмаське.
Анае туж ческыт пӧраське. Дорамы лыктэм адямиез сюдон – со тужгес бадӟым ужен лыдъяське. Анайме туж ярато эшъёсы. Куддыръя доре бертӥськод – квартира тыр эшъёсы пуко, сиё-юо. Чабкиськисько: оло, мон татын кулэ но ӧвӧл ни? Нош соос серекъяло: ма, ми тон доры ӧвӧл, анаед доры.
Анаелы музъемозь йыбырттӥсько. Со ке ӧй луысал, мон та ужме но ӧй вормысал, дыр.
- Дышетскыны пыриды университетысь историяя факультетэ. Малы одно отчы?
- Азьланяз дышетскон сюресэ трослы герӟаськемын киноен. «Весна на заречной улице» но «Сельская учительница» яратоно фильмъёсылы луыса ик мынам туж потӥз дышетӥсь луэме.
Университетын милемыз дышетӥз Владимир Владыкин. Солы синмаськытэк кыльыны уг луы. Владимир Емельяновичлы луыса мон асме рос-прос удмуртэн шӧдӥ ни. Со тросэзлы дышетӥз.
Витетӥ курсысен практикае гуртэ потоно вал. Мон бырйи Алнаш ёросэз. Отысь роное вуи но шуисько: ыстэлэ монэ самой пыдлось пичи гуртэ. Соос серекъязы но Варзи-Ятчие келязы… Отысен практика дыр ӵожелы одӥг висъето квартира сётӥзы. Усьтӥм со патерез но учкиськом: шораз ик бадӟым лымы люк. Соку школалэн директорез Ольга Михайловна монэ дораз улыны басьтӥз. Кык нунал ӵоже квартираысь лымыез поттамы, укнооссэ туйылӥм. Кутскиз практикае, сётӥзы 10-тӥ классэз. Сыӵе зол эшъяськимы. Дышетӥсьлэн ужез туж яраз, практикаелэсь ортчемзэ валаса но ӧй вуы. Малпай: быдэс улонме дышетӥсь луо. Мынӥ роное, отчы ик кельтыны курисько. Нош соос: вождэс эн вае, но Варзи-Ятчиын интыос ӧвӧл ни, мукет гуртэ мынэ. Коть али ик, шуисько. Озьы вуи Асановое.
- Сюресты вашкала фильмъёсысь егит дышетӥсьёслэн кадь вал-а?
- Озьыгес. Ноку уг вунэты Асановое нырысьсэ вуэмме. Куазь зоре. Машинамы бусы шоры нӧдӥз. Бӧрсямы уазик гонӟыртэ вал. Вань котыръёсме отчы сэрпалляно луиз. Озьы анай-атае монэ пумозяз келяны но ӧз быгатэ. Уазикен вуи Асановое. Вань сюлэмме, мылкыдме поныса ужай отысь школаын. Отын ик бызи но, Конюховаысь Буранова луи. Вордӥськиз Дима пие.
- Городэ кошконо кариськиды. Малы?
- Одӥг вакытэ шӧдыны кутски: визьмы «пурысьтаны» ӧдъя кадь. Котькуд нунал огвыллем. Одӥг интыын пукыны ӧй чида ни, азьлань мынэме, эшшо тросгес тодэме потӥз. Пумиськи Владимир Владыкинэн. Со шуэ: «Э-э, шузие тон мынам, шузие…» Пыри аспирантурае. Отын дышетскыкум, ужай 56 номеро школаын, директорлэн воштӥсез луыса.
1994-тӥ ар пумын монэ Владимир Владыкин дораз ӧтиз но шуэ:
- Нациосын ужанъя комитет кылдэ, интыдэс воштоно луоды.
Мынам соку сыӵе йыры кур луиз. Монтэк мыным кышно ваем кадь. Школаез мон туж яратӥсько вал, али но. Меӵак верасько: школаын соку уждун тырмыт сётысалзы ке, нош семьяямы мон огнам ужась адями, ноку но ӧй кошкысал. 90-тӥ аръёсты тодады вае ай – уждун уг тыро, котыр бугыръясько. Секыт вакытъёс. Мон туж кема малпаськи, эшъёсыным кенеши. Нациосын ужанъя комитет мон понна воксё кышкытлыклэсь утиськонъя кун комитет кадь кылӥськылӥз. Осто, малпасько, мар маке со? Кыӵе ужен мон отын выро? Но Владимир Владыкин аслэсьтыз карыны быгатӥз ик.
Вераським школалэн директореныз, ӝыны арзэ мон кык интыын ужай. Нациосын ужанъя комитетэн соку кивалтӥз Светлана Смирнова.
- Мар бордын ужалоз та комитет тӥ понна гинэ ӧвӧл, мукетъёсыз понна но чылкак валантэм вал, дыр…
- Нырысь-валысь коллективамы но тросэз ӧз валалэ. Правительствоын таӵе ёз ноку ӧй вал ук. Но пумен-пумен ваньмыз радъяськиз. Светлана Константиновналэн ӟырдыт мылкыдыз, выль сямен ужаны быгатэмез бордысь туж трос потӥз. Нырысь вакытэ туж трос бызьылоно вал пӧртэм бумагаосын. Одӥг нуналэ Сергей Флорович Васильевен Правительстволэн юртэтӥз бызьылӥськом. Соку со министр ӧй вал ай. Я, ваньзэ лэсьтӥм кадь. Учкисько но, солэн тыбыраз пиджакез чылкак котмемын – сыӵе пӧсям.
Бадӟым тау шуэме потэ Славнов Василий Андреевичлы. Со Вылӥ Кенешын но ужамын ни вал. Милемыз, ӵуж тютюпиосты, дышетӥз документъёс гожъяны. Нырысь вакытъёсы туж кышкасько вал кыӵе ке бадӟым «агай» доры бумагаен пыраны. Славнов монэ сьӧраз басьтэ, кабинетэ донге, ачиз ӧс сьӧрын возьмаса сылэ. Мон вераськоно луисько ни, документъёсты валэктӥсько. Тӥни озьы ик милемыз дышетӥзы. Собере Светлана Смирноваен ӵош дышетскыны пырим Кун службая академие. Отын вань национально-федеративной кусыпъёсъя кафедра. Соин кивалтэ Рамазан Абдулатипов.
- Али Правительствоын воштӥськонъёс ортчизы. Нациосын ужан политикая министерствоез быдтэмзылэсь ӧд кышкаллялэ-а?
- Вал кышкан мукетыз ласянь. Сомында лэсьтэмын ини – ваньзэ сое ыштыны туж жаль. Культурая министерство борды карысалзы ке – уноез эскерон-чакланъёсмы, методикаос ышыны быгатысалзы. Нациосын ужан политика – со эктон, кырӟан ӧвӧл. Со политикаен герӟаськем ужпумъёс. Инмарлы тау, Президент Александр Волков тае вала. Со ачиз ик ас вакытаз кылдытӥз вал Нациосын ужанъя комитетэз, собере сое министерство кариз. Али но ас кылъёсыз вылын сылэ. Таӵе министерство асьмелы туж кулэ. Ачим сярысь ке, уж интыме ыштыны мон пичи но уг кышкаськы. Аръёс ӵоже та удысъя сомында тодон-валан люкай ни, ваньзэ сое уже пыӵатыны амал шедёз.
- Кыӵе валтӥсь ужпум сылэ Нациосын ужан политикая министерство азьын?
- Пӧртэм выжы калыкъёслэсь кулэяськонъёссэс утьыку, министерствоослэсь но ведомствоослэсь ужзэс радъян. Пӧртэм огазеяськонъёс вискын ми герӟась выллем луиськом.
- Калыкез берло лыдъям-гожъям возьматӥз: удмуртъёслэн лыдзы трослы кулэсмиз. Та ужпум тӥледыз уг сюлмаськыты шат?
- Сюлмаськытэ. Мукет калыкъёслэн но лыдзы кулэсмиз. Соос понна но сюлэм вӧсь. Малы озьы луэ? Мынэ глобализация. Та кылэз мон туж уг яратӥськы ке но, со шӧдӥське нуналлы быдэ. Ялан тросгес адямиос асьсэды асьсэос туала улонлэн, культуралэн нылпиосыныз лыдъяло, асьсэды нокыӵе калыкен уг герӟало. Ӵемысь со Интернетын «улӥсь» егитъёс. Асьме эскеронъёсамы ми та ужпумез валаны тыршиськом, югдурысь потон сюресъёс утчаськом. Али министерствомы бадӟымгес саклык висъя егитъёсын ужанлы. Этносэн герӟаськем, озьыен, вуж, вашкала – та малпанъёслэсь куштӥськыны юртто «Вашкала музъемлэн выль кырӟанэз» выллем фестивальёс. Егитъёс валало: калык выжы – со паймымон дунне.
Та ласянь мыным ӟучъёс жаль пото. Шуом, удмуртъёс асьсэ выжызэс ӟеч шӧдо, ӟучомиськом шуиськом ке но, пӧламы асьсэды чылк-чылк удмуртэн шӧдӥсьёс вань. Соос ас калыкенызы туж тунсыкъясько. Ма, потэ ай ульчае но нырысь пумитам удмуртлэсь ик куре вераны удмурт калык сиёнэз, тодаз вайыны кырӟанэз, дӥсез. Мон малпасько, котькудӥз сямен удмурт адями маке мадёз. Ӟучъёслэн чылкак мукет югдурзы. Калык сиёнзэс но пельнянь шуозы. Соин ик, малпасько, калыклэн лыдыз бордысь гинэ ваньмыз уг поты. Ӧжыт лыдъем калык но туж бадӟым ужъёс лэсьтыны быгатэ. Но асьмелы валано: вашкалаез борды гинэ берытскыны тыршон – сандыкъёс, перепечъёс, эктонъёс – югдурез уз тупатэ. Ваньзэ тае выль тубатэ, вылӥ технологиос доры ӝутоно. Дасяно программаос. Соослы луыса егитъёс туала улонэз усьтыны мед быгатозы. Но медаз ышы калыкен герӟетсы. Кужмысь удмурт кылъя урокъёсты пыртон – со али удмурт кыллы пумит шудэ. Кылэз ноку но кулэ уз каре, улонын со зэмзэ но кулэ ӧз луы ке.
Мар монэ сюлмаськытэ на? Туала удмурт адямиез «туалагес» карон. Со удмурт кылын мед вераськоз Интернетын но, ныр улзэ адӟыса гинэ медаз улы.
- Нош вань-а ни выль национальной технологиос?
- Вань. Соос удмурт егитъёс вылын но эскеремын ни. Адями пушласянь удмурт луыса ик кыле, но ас кужымезлы юн оске, асваланэз будэ, вераське кунсьӧр кылъёсын, туала техникаен ужа. Ассэ ас интыяз шӧдэ пичи Медведево гуртаз но, Финляндилэн шоркараз но.
Жаляса верано, та технологиос ужало Ижевскын гинэ. Та ласянь туж адӟем карымон Гуманитарной лицей. Ёросъёслэн мылкыдзы луиз ке, технологиос отчы но вуозы. Озьы ужало ни Балезиноын.
Ваньмыз потэ адями бордысь. Егит мурт тыршиз, утчаськиз ке, бадӟым мылкыдын азьлань мынӥз ке, сое нокин дугдытыны уз быгаты. Улонмы уг удалты ке, кинэ ке янгыш карыны выриськом. Та пумысен анекдот верам потэ. Инмар доры одӥг адямилэн кылчинэз вуэм но шуэ: кылзы али, Инмар, та пиосмуртлэн сыӵе потэ лотереяен вормемез, туж курисько, юртты солы. Инмар шуэм: ма отын сюлмаськонэз ик ӧвӧл, лотерея билет огпол ке но мед басьтоз.
Али ӵемысь кылоно луэ: мон удмурт, соин ик тӥ мыным сое, тае лэсьтыны, сётыны кулэ. Сыӵе вераськонъёсты туж уг яратӥськы. Нокин но, нокинлы но та улонлы номыр сётыны кулэ ӧвӧл. Анай-атайёс пиналъёссэс будэтыны кулэ, пиналъёс анай-атайёссэс утьыны. Уг вераськы ни законъёс сярысь. Нош мукетызъя тон улондэ лэсьтод сыӵеен, кыӵеен адӟемед потоз. Кызьы шуо, пеймытэз курласа улытозь, сюсьтыл ӝуатод.
- Быръёнъёс азьын ӵемысь «национальной карта» шуонэн шудыны кутско. Тӥ сое адӟытэк уд кылиське.
- Нациосын ужан политикая министерство таӵе ужъёслы пумит луэ.
Кызьы озьы, вань удмурт калык султоз но шуоз: ми дурбасьтӥськом Иванов понна. Вань бигеръёс султозы но шуозы: дурбасьтӥськом Петров понна. Серем ук со. Ваньмы асьмеос нимаз адямиос, личностьёс. Одӥг выжыысь луиськом ке но, улон но политика шоры учконмы пӧртэм. Национально-культурной огазеяськонъёслэн кивалтӥсьёссы но, кыӵе ке кандидатлы дурбасьтыкузы, быдэс калыклэн нимыныз вераськыны уг быгато. Та ласянь синмаськисько визьмо удмурт егитъёслы. Соос валало: кыӵе партие пыриськод, кин вылэ ужаськод таяз быръёнъёсы – со нырысь интыын ӧвӧл. Удмурт движениын мед луозы пӧртэм удысъёсысь пӧртэм сямен малпаськись адямиос. Но котькудзэ кытын ке пушказ мед шунтоз одӥг малпанэз: калыкедлы урод эн кар.
Ньыль ар талэсь азьло вань удмурт калык огинэ каремын вал шуо ке, мон уг оскиськы. Этнос пилемын вал ӧжытсэ кык люкетлы. Нош мугез луиз «пож ву киськан», «Асьмелэнъёсты жуго» кесяськон. Калыкез сьӧд супыльтонъёсын уд огазея. Котькыӵе шузи мурт трос калык пӧлын кеськоз «Асьмелэнъёсты жуго!», но адямиослэн инкуазен сётэм инстинктсы ужаны ӧдъя, соос утиськыны тыршо.
- Нош кызьы учкиськоды пӧртэм выжыысь пиналъёсты нимаз дышетонлы?
- Меӵак верасько: пумит. Пытсам, котыртэм культура дуннее шедем пиналъёс асьсэ пушказы гинэ «пӧзьыны» быгато. Улон но сое возьматэ. Нош верано ке Ижевскысь Гуманитарной лицей сярысь, отын пӧртэм выжыысь пиналъёс дышетско. «Тон – удмурт, тон – ӟуч» чиньыенызы уг возьмато. Котькудӥз, нырысь ик, адями. Лицейлэн котькуд бадӟым ужрадэз кутске удмурт фольклоръя «Зорай» ансамбль бордысен. Отын кырӟась нылъёс – лицейлэн кизилиосыз. Соос данъясько асьсэлэн удмурт луэменызы, со сяна, ӟеч тодо на мукет кылъёсты но.
- Лариса Николаевна, мар бордын матысь дыре ужаны малпаськоды?
- Туж потэ пыриськеме Уэльслэн (Великобритания) ассамблееныз дасям проектэ. Со герӟаськемын валий кылэз утёнэн. Оло, соослэсь опытсэс удмурт кыл вылэ выжтыны луысал. Университетысь историяя факультетлэн испанецъёсын ӵош дасям проектазы пыриськисько. Ялан ужасько на диссертацие бордын. Йылпумъяны дыры уг тырмы. Чагыр малпанэ – Удмуртиын визьмо удмурт егитъёсты вылӥ технологиослы дышетонъя центр кылдытыны.
- Вордӥськем нуналады кыӵе кузьым витиськоды?
- Бадӟым кузьымъёс уг возьмаськы. Быдэс Россиысь, кунгож сьӧрысь эшъёсыд жингыръяло, ӟечкылало ке, мар солэсь ӟечез вань на? Тодӥсько: монэ уг вунэто.
Вераме потэ на: шудо мурт со сыӵе адями, кудӥз тодэ, котькуд минутэ та бадӟым дуннеын со сярысь кин ке малпаське, сюлмаське. Сое шӧдон - со шуд но, яратон но, дыр.
Источник:
Буранова Л. Н. Пеймытэз мон уг курла - сюсьтыл ӝуато / Л. Н. Буранова ; записала Е. Миннигараева // Удмурт дунне. - 2004. - 9 апр. - С. 6, 11. - (Удмурт кизилиос).
За предоставление материала выражаем огромную благодарность редакции газеты "Удмурт дунне"
