Попова Наталья Митрофановна
Уженым пыласькисько[править]
Наталья Попова – медицина наукаосъя доктор, профессор, вылӥ категориен эмчи, Ижысь медициная академиысь эмсузэръёслы вылӥ тодон-валан сётонъя кафедраысь декан, Удмурт Республикаысь дано врач. Наталья Митрофановналэн вань улон сюресэз герӟаськемын медакадемиен. Егит дыръяз отын тодон-валан басьтӥз, отчы ик ужаны кылиз. Лаборантысен кутскыса, профессорозь будӥз, кафедраен кивалтӥсь луиз. 156 научной ужъёсыз. Мыло-кыдо пыриське академилэн общественной ужаз.
- Озьыен, тӥ мединститутэз пинал дырысеныды ини дореныды лыдъяськоды?
- Озьы. Мон пичиысен медицина борды бурмем адями. Малы ке шуоно мамаен тятяе Ижысь мединститутын дышетскемын. Ньылетӥ курсысен соос монэ вайиллям. Валамон, мединститутэ но трос пол сьӧразы пыртазы, луоз. Угось нылпи садъёс соку туж ик ӧз сюрылэ, уката но студентъёслы. Институтсэс йылпумъяса, мамаен тятяез Кизнер ёросысь Бемыж черкогуртэ келяллям. Со вакытэ отын, поликлиниказы сяна, туж бадӟым стационарзы но вылэм. Мамаме соку ик валтӥсь враче юнматӥллям. Со акушер-гинеколог луыса ужаз. Нош тятяе ординатураын дышетсконзэ азинтэм на. Милемлы Бемыжын улыны кема ӧз кылды – 1956-тӥ арын Якшур-Бӧдья ёросысь Тыло черкогуртэ келязы. Табереяз тятяме валтӥсь враче пуктӥзы. Со хирург вал. Нош мама аслэсьтыз ик ужзэ быдэсъяз.
- Кизнерын но, Якшур-Бӧдья котырын но улӥллямды, нош кыӵе школаез йылпумъяды?
- Ми озьы ик Якшур-Бӧдья палъёсы улыны кылимы. Сыӵе солы дышимы, отӥяз пырак вордӥськем интымы кадь потыны кутскиз. Школаез азвесь медален йылпумъяй. Дышетӥсьёсын мыным удалтӥз. Ӟуч литератураен визьнодасе Майя Сусекова милемыз дышетӥз Чеховлэсь, Толстойлэсь, Достоевскийлэсь но музон классикъёслэсь произведениоссэс валаны.
Классэнымы кивалтӥз Алексей Кокорин, история предметэз нуиз на. Алексей Гурьяновичен ми школа музей кылдытон бордын трос ужамы. Гурт кузя, коркась коркаетӥ ветлӥськом вал, вуж утюгъёсты, самоваръёсты, куиськон арбериосты утчаса. Шумпотымон: милям киосынымы лэсьтэм музеймы али ке но ужа. Озьы ик ми трос утчаськимы Быдӟым войнаын ожмаськем но отчы весяклы кылем солдатъёслэн улэм-вылэмзы сярысь. Тыло котырын Петроградысь горд матросъёс Колчакен но ожмаськиллям. Отын быремъёслы гурезь йылэ нимысьтыз синпелет но пуктэмын. Ми, школаын дышетскись нылпиос, синпелет котырез утялтыса возимы, отчы маке мында писпуос мерттӥмы. Табере соос бадӟымесь ни.
Школаысь вань дышетӥсьёсылы тау шуэме потэ, озьы ик анай-атаелы но. Ужез гажан но яратон анай-атай бордысь потэ. Ми пичи дыръямы мамамы вӧзын улонэз туж ик ӧм адӟылэ. Ялан сое операциосы, пинал вайыны ӧтчаллязы, со вакытэ телефонъёс ӧй вал ай, уен-нуналэн дорысь нуыса кошко вал. Нош маматэк корка сэрегъёс ик кезьытэсь потылӥзы. Тятямы но операциосысь ӧз ик бертылы. Мискиньёс кыӵе жадьыса доре бертылӥзы. Эмъян удысын ӟеч тыршемез понна тятяе пусъемын «Эмъян удысысь отличник» дано нимын, нош мамамы – Удмурт Республикаысь дано врач.
- Нош асьтэлы медицина удысын дышетскон капчиен сётӥськиз-а?
- Школаын но умой дышетски бере, институтын но со капчиен сётӥськиз. Нырысетӥ курсысен ик пӧртэм кружокъёсы ветлӥ, научной ужъёсын тунсыкъяськи. Институтэз йылпумъякум, монэ Ижысь Чугун сюрес вылын ужасьёслэн больницаязы хирурге келяло вал. Ректор Иван Мокеров аслаз кафедраяз валтӥсь лаборантэ кыльыны ӵектӥз. Озьы мон огъя социальной гигиеная но гурт калыклэсь тазалыксэ утён-чакланъя кафедраын ужаны кутски.
Тросэз профессоръёс тятяме ӟеч тодо вал. Ачим но дышетскон удысын асме ӟеч ласянь гинэ возьматӥ. Отӥяз ассистент луи. Собере аспирантурае пыри, Москваын дышетски. «Гуртын улӥсьёсты сӧсыр луонлэсь чаклан» диссертациме ути, медицина удысысь кандидат луи. Отӥяз докторской диссертацие бордын тырши. Со сӥземын вал быдэ вуымтэослэсь тазалыксэс утёнлы. Озьы тӥни профессорозь будӥ.
- Та вакытэ тӥ кивалтӥськоды эмсузэръёслы вылӥ тодон-валан сётон кафедраен. Кыӵе амалъёс кутӥськоды дышетонады?
- Та кафедра усьтӥськиз 1997-тӥ арын. Ми доры арлы быдэ бюджет чотын дышетскон вылысь пырыны быгатэ 20 адями. Эшшо сомындаез ик, дун тырыса, тодон-валан басьтэ. Эмсузэръёслы, ми дорын сямен ик, вылӥ тодон-валан сёто Россиысь 48 вузъёсын. Нырысь ик сыӵе луонлык кылдытэмын вал Санкт-Петербургын, собере Казаньын, Пермьын. Ужан амалъёсынызы тодматскон понна мон соос доры юромо олокӧня пол вуылӥ. Стажировкае Венгрие но потай. Милям студентъёсмы пӧлысь 5-ез кандидат диссертацизэс утизы ини, тросэз али гожто ай, пӧлазы вань пиос но. Мынам та вакытэ 7 аспирантэ. Дышетскыны мылкыд карисьёс трос.
- Чиньые тырыса лыдъяно ке, тӥ удмурт нылкышноос пӧлын эмъян удысын 4 кузя медицина наукаосъя доктор-профессоръёс луиськоды.
- Озьы. Жаляса верано, Александра Перевощикова улонысь кошкиз ни. Та дыре ми куинь кузя – Людмила Мякишева, Маргарита Ермакова но мон.
- Тӥ удыстэс ӟеч тодӥськоды, котькыӵе ужез тыро-пыдо быдэсъяськоды, общественной ужъёсы но ӝутскем мылкыдын басьтӥськиськоды-а?
- Сыӵе адями мон – котькытчы вутскеме, котьмае лэсьтэме потэ. Академиысь Быдӟым ожлы сӥзем музеен кивалтӥсько на. Со уж мынам сюлэмыя. Историысь чуръёсын но туспуктэмъёсын бугыръяськыса, кӧня выльзэ тодоно. Академиын тыршем тодосчиос, преподавательёс сярысь 12 статьяе гожтэмын ни. Соосты калыке вуттон понна трос утчаськоно луэ. Музейын пӧртэм адӟытонъёс возьматъяськом, пумиськонъёс ортчытъяськом. Печатласькисько пӧртэм журналъёсын, газетъёсын. Кылсярысь, «Полный анамнез» вестникын редколлегилэн ёзчиез луисько. Тазалыкез утёнлы сӥзем «Энциклопедия Удмуртии» книгае трос материалъёсы пыртэмын. Пыриськисько Россиын но кунгож сьӧрын ортчылӥсь пӧртэм калыккуспо конференциосы но семинаръёсы.
Ми одӥг курсын дышетскимы ректорен Николай Сергеевич Стрелковен. Егит дырысен ог-огмес тодӥськомы бере, ог-огмес туж умой валаськом, юрттыса ужаськом.
- Кузпалды кин луыса ужа?
- Кузпалы инженер. Но монэ ӟеч вала. Аспирантураын дышетскыкум но, нылпиос векчиесь дыръя но Володя мыным трос юрттӥз. Пиналъёсмы – ныл но пи. Кыкназы ик медицина удысэз бырйизы. Марина медицина наукаосъя кандидат ни. Терапевт. Алексей пимы, медакадемиез йылпумъяса, Юкаменск черкогуртын валтӥсь врач луыса ужаз. Та вакытэ Иже берытскиз, медакадемиын тырше, докторской диссертацизэ уте. Будэ Никита Сергеевич внуке. Со но анай-атаезлэсь сюрессэ быръёз, дыр. Али ик тӧдьы халатэн ужась агай-апайёсын тунсыкъяське ини.
- Ма, тӥ ваньды анай-атайдылэн сюрессы кузя вамыштӥллямды ук?
- Ваньзэ чотано ке, врачын тыршись династимы 350 арлэсь ятыр лыдъяське ини. Мамае ласянь но трос соос. Сузэр-вынъёсызлэн нылпиоссы, соослэн пиналъёссы но врачъёс луыса тыршо. Милямъёс но тани со удысэ кыстӥсько.
Источник:
За предоставление материала выражаем огромную благодарность редакции газеты "Удмурт дунне"
