Ермаков Фома Кузьмич

Вань зурканъёслэсь парашют уг утьы

Ф. К. Ермаков

Тодмо удмурт литературоведлэн профессорлэн Фома Кузьмич Ермаковлэн нимыз дуннеысь мукет бадӟым тодосчиосын оградын сылэ. Удмурт литературалы, солэсь мукет пӧртэм калыкъёслэн литератураосынызы кусыпъёссэ эскерон, сэрттон-пертчонлы сӥзем 407 ужез 22 пӧртэм кылын печатламын, пыремын Бадӟым Советской но мукет 2 пӧртэм энциклопедие. Академиклэсь ужъёссэ дунъясьёс пӧлын быдэс дуннелы тодмо луэм муртъёс Дмитрий Лихачёв, Корней Чуковский, венгеръёс Давид Рафаэль Фокош-Фукс, Иштван Керам, Тибор Кланнилен, Петр Домокош академикъёс но уно-уно мукетъёсыз.

Фома Кузьмич Ермаков вордӥськемын туала Вавож ёросысь Итчи-Докъя (мукет нимыз Кионгурт) гуртын 1927-тӥ арын. Ужпум тазьы вылэм.

- Атайме Кузьма Ивановичез огпол быронлэсь утем туж тодмо мурт, Бернард Мункачи. Венгер тодосчи удмурт калыкез эскеронлы уно аръёссэ сӥзиз. Герман ож кутскем бере атайёсмес, Карпат гурезе выжтӥллям, татысь сюресэз утён вылысь. Но командирзы, немец, ваньзэсты вузам. Озьы быдэс частьсы, огпол но ыбытэк, тушмон ки улэ шедем. Соосты цемент поттон заводын ужатӥллям. Атае но мукет ньыль эшез пегӟӥллям. Но кыдёке вуиллямтэ. Бадӟым дог пуныос сутыса куинь эшсэс кесяллям. Атае писпу йылэ тубыны вутскем. Бӧрысь озьы ик бырысал ни, дыр, - маде Фома Кузьмич, - но тапала кемдэм Бернард Мункачи. Солдатъёслэсь удмурт луэмзэс тодыса, мозмытыны быгатэм, интыысь помещикъёс доры интыям. Кузёзы соосты ӟеч ужамзы понна, пе, гажа вал, аслаз кадь карем. Бертон сюрес вылазы удмуртъёсмылы быдэн куинь кило нянь, мукет сиён-юон сётыса келям.

Кузьма Иванович дор палъёсаз 1918-тӥ арын гинэ, пырак Граждан ож вылэ вуэм. Собере ик тифен черлам. 1923-тӥ арын гинэ пыд йылаз ӝутскем.

- Анаеным атае 1912-тӥ арын кузпалъяськемын. Но мон со бӧрсьы 15 ар ортчыса гинэ вордӥськемын. 1929-тӥ арын атае колхозэ пыриз. Ӝоген сое, сюлмысь тыршемзэ но ӟеч валан-тодонзэ санэ басьтыса, колхоз правленилы секретаре бырйизы. Огъя ваньбурез тус-тас карисьёсын, лушкаськисьёсын курдатэк нюръяськылӥз. Озьы уноеныз вожвыл луиз. Уродъяськисьёсыз, пӧлазы сельсоветлэн но колхозлэн тӧрооссы но, коркаед бадӟым шуыса, 1934-тӥ арын апреле атайме кулаке гожтӥзы но палэнэ келязы. Озьы юри лэсьтэмзы вуоно араз шараямын вал. Соосты шонертыса, Удмурт ЦИК нимысьтыз постановление кутӥз. Но та учырлэн бервылъёсыз кема шӧдӥськизы на, семьямы уно курытсэ веръяно луиз. Атаймы Горькийын но Можгалась «Дубитель» заводэз ӝутонын ужано луиз. Юртмес но, мукет ваньбурмес но талазы. Атаелэн агаез милемыз анаеным дораз улыны басьтӥз. Со аре мыным школае мыноно ни, но кулак пи шуыса уг басьто. Тау Илья Васильевич Ларионов дышетӥсьлы. Со вӧзын лыдӟиськыны но, гожъяськыны но вить аресысен дыши. Ларионов ик дурбасьтӥз: Сталин верамъя, нылпиос анай-атайзы понна кыл уг куто, шуиз. Сое кылзӥзы. Тодон-валанъёсме эскеремзы бере, директор Иван Васильевич Пьянов соку ик 3-тӥ классэ пуктыны медэ вал, но Илья Васильевич алӥз: арлыдогес пиос, пе, вожъяськыса ултӥялозы. Зэмен ик «кулак пи» кушем ним пырак, мукет гуртэ выжытозямы, бордам лякиськыса улӥз.

Нырысетӥ классысен ик пияш, нимын-тулын тодылӥз партилэсь секретарьёссэ, вань комиссаръёсты. Директор И. В. Пьянов соос сярысь мадьыны 7-тӥ классъёс доры ялан ӧтьылӥз пичи Фомаез.

- Школаын 7-тӥ классозь ик «витьёслы» гинэ дышетски. Нырысетӥ классэз быдтыкумы, «Песня о Роланде» книга кузьмазы. Со мыным туж дуно луиз, киысьтым ик ӧз усьылы. Кӧня ке дыр ортчыса, мон сое быдэскынзэ кылысь кылэ, чик учкытэк вераны тодӥсько ни вал.

Школа библиотекаысьтымы номыр лыдӟымтэез ӧз кыльы ни кадь. Собере дышетӥсьёсы асьсэ книгаоссэс сётъяллязы ни.

Со вакытэ ик ӟуч кылбурчиосъя но удмурт калык кырӟанъёсъя пияш кылбур но гожъяны выриз. Огзэ ужзэ «Пионерская правда» газетэ ыстӥзы. Но отысь гожтэт вуиз: муртлэсь ужзэ, пе, асэстэмед. Пияшлы дурбасьтыса, газетэ вазиськоно луиз Илья Васильевич Ларионов.

Ӟеч дышетскем сяна, чупрес пичи пи пыриськылӥз вань ужрадъёсы - куатетӥ классысен школаысь дышетскисьёслэн комитетсылы тӧрое бырйизы.

Секыт ке но вал куамынэтӥ аръёс, пичи дырысь трос чебер вакытъёс Фома Кузьмичлэн али но син азяз уло. Уноез соос гурт вӧзысьтызы Итчи но Вало шуръёсын герӟаськемын.

- Самолётъёсын но парашютъёсын тунсыкъяськон туж юн вал. Со «висён» милемлы но паласькиз. Парашютэн тэтчан сярысь «вӧтаса» улӥм. Огпол визь лыктӥз: зонтъёслэсь сое лэсьтыны малпамы. Дас кыксэ огазе керттылӥмы. Парашютэнымы школа липет йылысь тэтчимы. Мон, мугоры векчи вал бере, каньылак лэзьки. Эше секытгес вылэм: муз вылэ шуккиськиз, ӧжытак вӧсь луиз.

Фома Кузьмич анайтэк вазьысен кылиз. Уно шуг-секытъёс кышномуртлэсь тазалыксэ чигтӥзы. Ньыльдонэтӥ арын секыт висьыны усиз но кулӥз. Пал кылем атаез Гурезь-Пудгала кышно вылэ пыриз.

- Сюранае Пелагея Морозова умой кышномурт вал, - тодаз вае Фома Кузьмич. – Монэ но, ас пиналзэ сямен ик, чик висъятэк утялтӥз.

Дасэтӥ классэ мынӥсьёс 150 манет – 5 ыж дун – тыроно луо вал, нош техникумын дышетскисьёслы стипендия сёто, нуналаз кык пол дунтэк сюдо.

- Татын но «витьёслы» дышетски. Дас вить аресысен профсоюз комитетэ тӧрое бырйизы. Дышетсконмес йылпумъяммы бере, вань эшъёсме военной ветеринарияя академие келязы. Монэ, мугорын но, арлыдын пичи шуыса (155 см ӝуждалае, 44 кило секталае), гуртэз ӝутыны кельтӥзы. Кӧты юн ӝож луыса, артиллерияя училищее пырыны медӥсько вал. Тазалыке ляб шуыса, ӧз кутэ. Озьы 44-тӥ арысен ас палъёсам дышетскемея пудо эмъясьын ужаны ӧдъяй, Кионгурт но Малькан кусып пудо эмъянэн кивалтӥ. Вӧзам кӧня ке мурт юрттӥсьёс вал, ветфельдшеръёс.

Но литература удыс егит муртлэсь сюлэмзэ пумен юнгес бордаз кыске.

Вить ар ортчыса, казакпи Удмурт пединститлэн, удмурт кылъя но литературая люкетаз пыре. Татын со понна улон нош ик пӧзьыны ӧдъя: мур тодон-валан басьтон сярысь нуналмысь сюлмаськон (ватсам стипендиен вань аръёссэ дышетскиз), общественной улонэ пыриськон (студентъёслэн профкомазы тӧро луиз).

- Пединститутын удмурт хор ужаз – 50-лэсь уно адями ветлылӥз. Соин кивалтӥз тодмо композитор Михаил Васильевич Коробов. Туж усто кырӟаллязы. Сюлмаськыса-бызьылыса, профком пыр соослы сцена вылэ потымон чебер дӥсь но басьтыны быгатӥмы. Республикаысь конкурсын хормы нырысетӥ инты басьтӥз. Союзысь смотре, Москвае ыстӥзы. Монэ та ужез быгатыса радъяме понна Крыме шутэтскыны келязы. Мон профкомен кивалтыку ик, институтмылы духовой оркестр кылдытыны 21 крезь тӥрлык басьтӥм. Фома Кузьмич тодаз вае, пединститутын дышетскон аръёсазы, пе, 20-тӥ-30-тӥ аръёсысь писательёс сярысь номыр ӧз поттылэ, бӧрысьгес гожъяны кутскемъёсыныз гинэ тодматылӥзы. Кӧня ке ар ортчыса, со вунэтэм нимъёсты калыке берыктон борды Фома Кузьмичлы аслыз кутсконо луиз. Пединститут бере, Варзи-Ятчи школаын но Удмурт издательствоын ужаса, Удмурт научно-исследовательской институтэ лыктӥз. Татысен кутскиз литературоведлэн тыро, кузь сюресэз. 1958-тӥ арын Фома Кузьмич Писательёслэн союзазы кутэмын вал. Эшшо кык ар ортчыса, наукаосъя кандидат луэ. Михаил Петровлэн творчествоезъя гожтэм монографиезлы Москваын вылӥ дунъет сётӥзы. Бӧрысь вал Г. С. Медведевлэсь, Т. А. Архиповлэсь, Куӟебай Гердлэсь, С. А. Самсоновлэсь улон сюрессэс но творчествозэс эскеронлы сӥзем ужъёс, нош озьы ик «Путь удмуртской прозы» (1975), «Творческие связи удмуртской литературы» (1981), «Удмуртская поэма» (1987), «Реализм в дореволюционной удмуртской литературе» (1997) книгаос. УдНИИ-ын ужан вакытаз Фома Кузьмичлы шуд усиз Ленинградысь Е. Салтыков Щедрин нимо библиотекаысь шедьтыны М. Г. Худяковлэсь ӟуч кылэ берыктэм удмурт эпоссэ. (Бӧрысь сое Д. А. Яшин печатланы дасяз). Нош Куӟебай Гердлэсь нимзэ калыке поттон понна уно дыр ӵоже нюръяськоно луиз на. Та пумысь интыысь кивалтӥсьёсын огъя кыл шедьтыны быгатытэк, 1976-тӥ арын партилэн ЦК-яз гожтэтэн вазиськиз.

- Гердэз тушмонасьёс, партилы пумит мынӥськод карыса, монэ соку КПСС-ысь куштӥзы, ужысьтым уллязы. Тазьы дауртэмзэс Москваын янгышен лыдъязы но партбилетме берыктытӥзы. Но уродъяськисьёсы ас уж удысам берытскон сюрес кема гинэ пытсаса возизы: УдНИИ-е но, Удмурт университетэ но ӧз лэзьылэ. Сизьым ар ӵоже Писательёслэн союзазы утялскисьлэсь ичигес коньдонэн ужаса улӥ. 1984-тӥ арын гинэ, ӟеч муртъёс юрттэмъя, Дышетӥсьёслэсь тодон-валанзэс будэтонъя институтэ интыяськи. Ӟуч кылэз но литератураез национальной школаосын дышетонъя ужпумъёсты эскеронъя кафедраын валтӥсь дышетӥсь луи. Та ужпумъёсты ӟечгес сэрттон-пертчон вылысь «Ӟуч но удмурт литератураослэн кусыпъёссы» пособие гожтӥ, лекциос дасяй. Соин ӵош ик азинтӥ нимаз писательёсмылэсь улонзэс но творчествозэс эскеронлы сӥзем ужъёсме. Озьы Гердъя книгаосы 80-тӥ аръёслэн пумазы потыны быгатӥзы.

Фома Кузьмич Ермаков кузь но узыр улон сюресэз ортчемын. Озьы ик вань сюрессэ секыт нуналъёсы но соин артэ вамышъяз яратоно кузпалыз.

- Кузпалы Лия Романовна медицина наукаосъя кандидат. 71 аресозяз ужаз неврологияя клиникаын. Солэн атаез Роман Михайлович Поторочин, Малмыж уездын нырысьсэ Казаньысь инородческой семинариез йылпумъям адями, Жуйковен ӵош «Грамматика для русских», «33 урока для русских» учебникез дасян бордын ужамын. Лена нылы Казаньысь консерваториез йылпумъяз но Ижысь крезьгуръя училищеын дышетэ. Вера Удмурт кун университетысь физмат люкетэз пырпотӥз, лыдъясь-чотась техника удысъя. Дышетсконзэс кыксы но зарни медален йылпумъязы. Соос нимаз семьяосынызы уло, ас нылъёссы бадӟымесь ни.

- Адямилэн шудэз уж бордысь потэ. Со сюлмызъя медло. Мыным шуд понна нюръяськоно луиз. Но мон вормыны быгатӥ шуг-секытъёсты. Асме шудо шуыны быгатӥсько.

Источник:

Ермаков Ф. К. Вань зурканъёслэсь парашют уг утьы / Ф. К. Ермаков ; записал В. Возняков // Удмурт дунне. - 2001. - 17 авг. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"