Крестьянинов Александр Максимович
Гудыри куара уг чалмы[править]
Александр Максимович Крестьянинов – Грак ёросысь потэм огез дано, гажано адями, ожысь но ужысь ветеран. Егитгес дыръяз со уно лэсьтӥз ас ёросазы калыкез дышетонэз азинтон понна. Ижысь автозаводэз ӝутон-азинтон вакытэ кадръёсъя отделлэсь ужзэ радъяз, заводысь адямиосты ас чиньыоссэ кадь тодэ вал. Калыкен быгатыса ужамез пусъемын трос вылӥ данъян грамотаосын. Майор Александр Крестьянинов 12 но ӝыны арзэ сӥзиз армилы. Дальний Востокын 1-тӥ Краснознамённой армиын пулемёт взводлэн командирез, артиллерия дивизионысь взводлэн командирез вал. Маньчжуриын Квантун армиез пазьгонэ пыриськемез пусъемын «За боевые заслуги», «За победу над Германией» медальёсын, ож бере – Жуков маршаллэн медаленыз но трос мукетъёсыныз.
Война бере Крестьянинов Германиын Главной Командованилэн Резерваз элита луись частьёсын службазэ нуэ, гвардейской зенитно-артиллерийской полкын взводлэн командирез но батареялэн командирезлэн политчастья воштӥсез луэ. Эшшо Ленинградын ПВО-лэн войскоосаз служить каре на.
Крестьяниновъёс – зэмос воргоронъёс-ожгарчиос. Александр адӟем кариз эксэй армие ветлэм атаезлэсь, Максимлэсь. Ачиз но кышкасьтэм, сэзь пи будэтӥз: Алексей – танкист-гвардеец, командир, майор.
Гожтонэлы пумит луонзэ шӧдыса, Александр Максимовичлы дано гурто пиоссылэсь нимтулъёссэс поттылӥ. Шуисько: Михаил Арсентьевич Крестьянинов, Вылӥ Эграысь хозяйстволэн тӧроез, озьы ик Виктор Иванович Городсков, медицина наукая доктор, тӥледын тодматскыны дэмлазы. Адямилэн мылкыдыз соку ик улӟиз, кылыз пумен сэраз. Кыкетӥ пумиськонамы секыт пельыз но капчияз кадь, ог-огмес кылзэммы луиз. Валай: 90 аресъем воргорон пушкын юн кужым золтӥськемын. Верамезлэсь таӵе сузьет пӧрмытыны тырши.
Крестьян выжыысь
Пичи дыръям, ужаны кутскыкум, колхозъёс но ӧй вал ай. Но крестьянъёс огазеяськонлэсь пайдазэ валазы: жнейка, молотилка, сортировка но мукетсэ огъя кужымен басьязы.
Короленко нимо колхозмы кылдэм бере нырысетӥ автомашинаос вуизы, гуртын улон умой радъяськиз вал ини. Быдӟым ож кутскон азьын трудоденьлы быдэ 12 килоен ю-нянь сётъязы – война дыръя но со кӧтэз кышъяны тырмиз ай.
7-тӥ класс бере колхозын ужасько ни вал: завхозын тыршись атайме секыт висён куасалтӥз. Со шуиз: «Пие, мон берпум арзэ улӥсько, аслыд сюрес быръёно. Яке дышетскод, яке заводын ужалод». Со вал 1937-тӥ арын. Мон бырйи Елабугаысь гурт удысъя рабфакез. Сюрес вылэ келякуз, анае бӧрдӥз, вӧйын нянь сьӧрам сётӥз… Алабгоын завод нергеос вал, дышетсконо ке ӧвӧл, отын ужасал. Но мон рабфаке сюри ик: 90 адями пӧлын огнам удмурт. Огаз группаын 45 мурт бигеръёс но башкиръёс вал, мукетаз – ӟучъёс, мон таос пӧлы кариськи. Изложениме куинь умойёсыз пӧлысь шуыса висъязы – «неказисто» кылын дунъяллям ке но (та кылэз мон соку ӧй вала на). Огъя вераса, дышетскон тубатэ таӵе луиз: вить арзэ – Гракысь ШКМ, кык арзэ – Вылӥ Эгра семилетка (татын но школа усьтӥськиз). Можга педучилищее пыри вал – висеменым ӝыны ар гинэ дышетскыны кылдӥз. Ярам, Алабгоысь рабфакез йылпумъяй. Но гурт улонысь монэ ишкалтӥз армия, война. Мыным мукет сюрес дасямын вылэм.
Кужмо ыбылӥськон
Армиез мон туж вылэ пуктӥсько. Со мыным вордскем доре кадь луиз. Улытозям солэсь дышетски, вань ӟечсэ, умойзэ аслым пыӵатӥ, нош ачим пыр – мукетъёсызлы но. Соин, дыр, ушъян кылъёс кылоно луылӥ. Армиысен:
- 6-тӥ батареялэн командирезлэн политчастья воштӥсез Крестьянинов инструктажзэ уж вылын быдэсъя – дышетске солэсь.
Заводын ужаку:
- Автозаводлэн кадръёсъя отделаз мынэ но дышетске Александр Максимовичлэсь.
Армие монэ басьтӥзы 1940-тӥ арын. Дальний Востоке сюри, одӥг гинэ нимысьтыз кылдытэм артиллерийской полке. 1941-тӥ арын дышетски полковой школаын отделенилы командире. Ож кутскиз но, монэ куать толэзьлы ыстӥзы Ворошилов городэ (Уссурийске), младшой лейтенантъёсыз дасясь курсъёсы. Озьы 1941-тӥ арын декабрьысен мон луи 1-тӥ Краснознамённой армиын 23-тӥ отдельной пулемёт взводлэн командирез, нош 1943-тӥ арын июньысен 1945-тӥ арын июнёзь – 195-тӥ отдельной артиллерийской дивизионысь взводлэн командирез.
Япониен война кутскыку, мон ПВО-лэн Забайкальско-Амурской армияз вал ни, 1197-тӥ отдельной зенитно-артиллерийской дивизионысь взводлэн командирез луи. 37 миллиметръем зенит пушкаосын ыбылӥським. Цицикар (Маньчжурия) палась ожъёсы пыриським. Артподготовка бӧрсьы пехота мынэ, собере ини ми вырӟиськом. Япон самолётъёсыз ӧм ик адӟылэ кадь, ыбылӥм музъем вылысь объектъёсыз гинэ. Куд-ог япон воинъёс пленэ шедьылӥзы ик, нош полкысьтымы ог куинь муртэ гинэ ыштӥм.
Мукет дивизионэ сюрыса, секретной частьын делопроизводствоен но кивалтӥ. Гуртэ бертӥ 1946-тӥ арын августэ лейтенант званиен. Оло, ӧй но кылдысал бертыны, артиллерие ӧй ке шедьысал. Оло, пӧсь ожын бырысал… 1942-тӥ арын, Сталинград понна ожъёс ӟырдэктыку, шуизы ук: кин партие пыроз, ваньдэс Сталинградэ ыстом. Соку ик дивизионысьтымы 45 мурт мылкыд кариз. Но милемлы Сталинлэн пумит веранэз вуиз: рапортъя ваньмыз кошкизы ке, порядок уз луы, пе. Бен, мыным удалтӥз: улэп кыли. Но пельы секыт луиз. Ыбылӥськод – быдэс арня онгромем кадь ветлӥськод. Озьы – куать арзэ, собере – Германиын…
Ас гуртам, ас ёросам
Армиысь бертыкум, Пермьысен васьки эшелонысь. Собере Кам кузя – дор палам, Менделеевске, отӥяз гуртозям – пыдын. Учкисько – вырйылын племяннике пастуха. Кошкыкум солы ньыль арес гинэ вал ай.
Бертӥ – коркан шал-шал, сиёнзы но, дӥсьсы но йӧназ ӧвӧл. Вуж изьыез кесяй, кыксылы ик – Лёвоньлы но, Ильялы но – вури. Мукет дӥсьёс но сазнай. Пристане кельтэм сухой паёкме но, дӥсьёсме но, валэн мыныса, вайимы. Мыным уго уно карточка сётӥзы вал. Пермьысь продпунктын соин басьяськи. Сакыр интые ӝынызэ кампетэн кури. Пиналъёслы. Яшка агае Смоленск дорын ожын быриз. Куинь нылпизэ будэтыны юрттоно вал. Соин ик, мӧйыослы ӝыт ужась школа ачим кылдытӥ ке но, та удысысь (роноын инспекторысь) кошки, уждунэз пичи шуыса. Заочно пыри дышетӥсьёсты дасясь институтэ, Алабгое. Ӝыны ар Мари-Возжайын, собере Вылӥ Эгра гуртамы арифметикалы дышетӥ. Диплом басьтыса, бертӥсько но – тон милям ӧвӧл ни, пе. Партилэн райкомаз пропагандистэ выжтӥлям. Таяз но ар ужаса вуттӥ-а – обкомысь комиссия лыктыса, школаосыз эскерим. Мыным Новогорскойысь семилеткаез сётӥзы. Урокез пыр-поч эскереме кельшем, тодӥсь-валась, шуизы. Тӥ, пе, ронолы кивалтӥсе тупалоды. Соку ик обкоме нуизы, та должносте юнматӥзы. Юнме ӧз, малпасько. Куашкам школаосыз соку выльдоно вал.
Ожлэн пумыз ӧвӧл?
1949-тӥ арлэн пумыз. Военком ӧте: зенитчикъёсыз нош ик армие пе, келялом. Удмуртиысь 6 муртэ Свердловске нуизы. Урал военной округысь 32 кузя люкаськиллям. Ваньмыз – фронтовикъёс, кудӥз сӧсырмылэмын. Пумит луо: ми, пе, тырмыт ожмаським ни. Табереяз нуизы округысь войскоосын кивалтӥсь Жуков маршал доры. Таос, пе, пумитъясько, война быриз ни шуыса. «Кызьы быриз? – пайме Жуков. – Тӥ ваньды военнообязаннойёс». Озьы милемыз нуизы Германие. Куинь аре отын ортчиз, Главной Командованилэн Резерваз, 2-тӥ гвардейской зенитно-артиллерийской дивизилэн 304-тӥ полказ взводлэн командирез но батареялэн командирезлэн политчастья воштӥсез вал.
Куинь но ӝыны арме, 1956-тӥ арын гужемозь, Ленинградын ортчытӥ, ПВО-лэн войскоосаз. 25-тӥ зенитной артдивизилэн 261-тӥ полказ батареялэн командирезлэн политчастья воштӥсез луи. Татын но адӟем карымонэсь занятиос ортчытъяны тырши. Одӥг полаз Ладога ты дуре полигонэ сю легковой машинаен мынӥм. Отын ыбылӥським. Милемыз эскериз артиллерилэн валтӥсь маршалэз Воронов. Кыӵе орудилэн расчётэз умойгес ыбылӥськиз, соослы отпуск сётӥз, мукетъёссэ кузьымен но маин пусйиз. Мон ӟечен гинэ тодам вайисько командиръёсме. Дивизимылэн командирез Козлов генерал туж умой адями вал. Батареямылэн командирез Прохоров но. Ачим но сыӵе-таӵе гинэ ке луысал, лыктысал-а со мон доры Ижевске?
Руфа, Руфина
Свердловск улосысь Асбест городын двоюродной братэ улэ вал. 1956-тӥ арын августэ отчы кошкыса, школа-интернатын воспитатель луи, парторг каризы на. Арлэсь кемагес гинэ татын ӝегай. Улон интые ӧвӧл бере, марме отын ыштӥ? Кышнояськыны ӧй дырты.
Иже бертыса, 48-тӥ школае машиноведениен дышетӥсе интыяськи. Та вакытэ ик вуоно кузпалме пумитай, кышнояськи. Пимы вордскиз но, сое утьыса, ӝыны ар пуконо луи.
Руфаен куноысен тодматски. Со монэ концертъёстӥ нуллӥз, дунтэк пыртылӥз. Тодӥ: куараез туж усто вылэм. Сцена вылысен – пӧртэм ӝытъёсын, партконференциосын – огназ кырӟалляз. Телевизорын сое уно пол возьматъязы. 1957-тӥ арын Свердловскын зональной конкурсын 3-тӥ инты басьтэмез сярысь дипломез вань. Сое Воронеж хоре ӧтё вал. Монэн йырин, мон пумит луэмен, ӧз мыны. Руфаен ӵош Алёша но Юра пиосмес будэтӥм. Кышное дас ареслы мынэсьтым пиналгес вал. 2002-тӥ арын, 72 аресаз, мон сое ыштӥ, улонысь кошкиз.
Кышно ӧтемъя, партия куремъя
Ми кыкмы но зол герӟаським «Ижмаш» заводэн. Руфина Трофимовна ужаз экономистын, 25-тӥ цехысь плановой отделлэн начальникез луиз. Со ӧтемъя, мон 1960-тӥ арын заводэ ужаны пыри, контролёр луи. Собере – ужын кышкытлыклэсь утиськон техникая инженер но со дыре ик цехысь парторганизацилэн секретарез. Озьы 5-6 аре ортчиз но, Ижын автозавод кылдэмен, 1968-тӥ арысен улонэ воштӥськиз…
Ыстон-косон
Автозаводын ужай, пенсие потытозям, старшой инженер чотын, нош зэмзэ ке, кадръёсъя кивалтӥсь вал, 310-тӥ отделлэсь ужзэ нуи. Юрттӥсьёсы – куать нылъёс. Уже кутонъя но келянъя вань документация милям киосмы пыртӥ ортчиз. Огъя лыдъяса, 89 сюрс адями луэм (зэм, соос пӧлысь куд-огез кык-куинь пол но пыразы заводэ).
Соку, 1960-тӥ аръёслэн пумазы, машзаводын ог 50 сюрс адями тыршиз, нош автозаводын – 11 сюрс мурт. Сомында муртлы улон инты но, мукетыз но кулэ вал. Ӝожтӥськонэз ӧвӧл – гуртысь лыктэмъёс, куинь-ньыль ар ужаса, выль квартирае пырылӥзы ни. Директормы Иван Фёдорович Белобородов озьы ик шуиз: автозаводэз лэсьтон йылпумъяське, ӝоггес пуктылоно улон юртъёс. Партие пыремъёс пӧлысь 80 муртэ висъязы та уже. Кадръёсъя отделысь монэ ыстӥзы эскерись-чакласе. Зол ужазы рабочийёс, инженеръёс, конструкторъёс. Машиностроитель посёлок дорын но лесозаводын олокӧня 5 этажъем коркаос ӝутскизы. Автозавод палан но – 8 этажъем ньыль общежитиез гинэ ке верано… Белобородов кужмо кивалтӥсь вал, зол йырсазё. Ваньзэ ачиз синйылтыса возиз. Выль цехъёс усьтӥсько: таяз, шуом, 20 адямиез лэзёно, сояз – 30-зэ. Кӧня ке улыса, ачиз жингыртэ, эскере ни:
- Ну, Александр Максимович, ыстӥд-а?
- Ма, кызьы сотэк? – шуисько.
Мынам дисциплина зол вал, армиын кадь. Огпол но уже бере кылеме, ымам курытсэ ӟузьыса лыктэме ӧй вал. Кыл кутон улэ кыскылэмзы ӧвӧл. Собере, кытчы гинэ ужаны уг кутскиськы – ар ортче-а, уг-а – парторганизацилы секретаре бырйылӥзы. Пенсие потыса но, сизьым арзэ автозаводлэн 1-тӥ микрорайоназ калыкен ужай, субботникъёсыз но мукетсэ радъянъя партия ласянь кыл кутӥсь луи. 50 ар мон коммунистъёслэн партиязы вал. Дырыз вуиз но, шуи: та радысь монэ поттэ, толыке ӧвӧл ни.
Таза мугор, чылкыт лул
Шутэтскон дыры вуыса, ар-кык со ужын ик бергай на, рабочий лыдъяськи ке но. Эшшо ужасал на вылэм – стенокардия кутӥз. Литератураысь лыдӟи: таӵе висёнэн адями ог 15 ар гинэ улэ на, нош мон кык пол уногес шокасько ни. 1979-тӥ арысен курыт вулэсь воксё куштӥськи. Ма, мынам ноку огнам стопка кымалъяме ӧй вал… Табере врач косэмъя гинэ, бадӟым праздникъёсы люкаськон дыръя 30 грамм коньяк ӟузисько.
Тау Тамара Ивановна Стерховалы, «Ижмаш» поликлиникалэн кивалтӥсезлы, со монэ нодъяз: пыдын ветлыны, кыӵе ке пайдаё ужен вырыны косӥз. Мон кролик вордон борды кутски. Котькуд нунал куать иськемез ӝог вамышен ветлӥ сад-бакчаям: Ворошилов урамысен сельхозвыставкаозь. Ӵукна 6 часысен юзмыт омырез шокчылыса, сайкась инкуазез (лосьёсыз но) адӟылыса, выльысь сэзёми, висёнме вунэтӥ… Тани али тулыс, бадӟымез пие нош бакчаямы нуоз – убоос копаку, мон ӵошатскыса ужасько ай.
Корка пушкын толбыт жадёно ук, мугорез зыран гельёс но уг юртто ни, телевизор но акыльтэ. Яратоно газетъёсме кутӥсько. Кылем арынъёсын гинэ ай, выльысь кутскыса, «Война и мирез», «Анна Каренинаез», «Крейцерова сонатаез» лыдӟи. Азьло огшоры лыдӟемъяськисько вал, нош али – валаса, синкылиос ик пото.
Котькыӵе дыръёс вал, ёрмон трос пол шымыртылӥз, но ми, ог-огмы борды кырмиськыса, шулдыр улӥм. Совето власть – со тужгес сайкытэз, егитъёслы сое адӟыны кылдымтэ ни…
Нылпиослэн азьпал улонзы – кыӵе со луоз? Тани мынам кык внучкаосы – соос шумпотто гинэ, огезлэн тани-тани пичи нуныкаез вордскоз. Внуке но чакланы пыралля. Та Быдӟым Вормон нуналэ со монэ уз вунэты. Данъяськымон пияш, биатлонист. Озьы ке но… Быгатӥ-а мон, матысьёсы шудо мед луозы шуыса, ваньзэ сётыны? Та юан мертче сюлэмам.
* * *
Александр Максимовичлэсь мадемзэ кылзыса, куинь поколение син азе пуксиз: песятай, атай но пиез. Куиньназылэн ик службазы герӟаськемын Германиен. Со сяна – нырысьёсыз Дальний Востокын вылӥллям ке, куинетӥез служить карем на Казахстанын.
Александр Максимовичлэн Алексей пиез дышетскемын Ижысь 72 номеро школаын. Отын Быдӟым ожлы сӥзем музей вань. Пиналъёс огпол экскурсиен вуылӥзы Кавказэ, Орджоникидзеысь военной училищее но пыразы. Солэн начальникез генерал-майор В. Ульянов, Совето Союзлэн Героез, Удмуртиысь комсомол нимо артдивизионэн ӵош кошкем оже.
Алексейлэн мукет малпанэз ӧз кылды ни, школа бере та училищее кошкиз. Собере Германиын гвардейской танковой полкын вал. Вить ар ортчиз – старшой лейтенант званиен Казахстанэ вуиз. Дисбатын взводэн кивалтӥз. Иже бертыса, Юстиция министерствоын ужаз на.
* * *
Ачиз Александр Крестьянинов пусъе:
- Туж дунъясько песятайёсмес – соос Совето властез кылдытӥзы. Мынам ёзъёсы но пиосмы сое утизы. Но али ваньмыз куашка. Тае адӟыса, синкылиосы ас эрказы вияло…
Тӥни сыӵе малпанъёсын улэ кузь сюресэз пырпотэм, визен но вӧсен тырмем адями.
Источник:
За предоставление материала выражаем огромную благодарность редакции газеты
"Удмурт дунне"
