Туктарова Надежда Григорьевна
Шеп веттаське, сюлэм шурдэ
Англичанъёс ушъясько быдэс дуннелы тодмо луэм Дарвинэн, ӟучъёс – Мичуринэн. Асьмеос, удмуртъёс, данъяськыны быгатӥськомы кидыс уськытон бордын тыршись тодосчиосын. Кылсярысь, Надежда Григорьевна Туктароваен. Быдэс улонзэ со сӥзиз гурт удысэз азинтонлы – ӟеч выжыё чабей кылдытонлы.
Надежда Туктарова – гурт удыс наукаосъя кандидат, Удмуртиысь гурт удысъя научно-исследовательской институтысь толйись чабеез эскеронъя лабораториен кивалтӥсь, наукая пӧртэм ужъёслэн авторзы.
Удан
- Гурт улонэз адӟымтэ-тодымтэ мурт, малпасько, кидыс уськытон, ӟеч нянь будэтон пумысен йырзэ уз висьыты – ку, кытысен пыӵаз музъем борды кыстӥськон?
- Вордӥськи Татарстанысь Балтаси ёросысь Сэръя гуртын. Мыным куинь арес тырмыса, атае вордӥськем юртысьтыз яна потоно кариськем. Озьы семьямы улыны выжиз бускель Янгурчие. Нимыз туж чебер, шулдыр интые пуксемын, нош ачиз пичи гинэ – 14 юрт но лыдъяськиз-а, ӧз-а. Туннэ нуналлы воксё но 7-ез сяна кылемын ӧвӧл ни.
Школамы «куӵо» вал: дышетскизы ӟучъёс, удмуртъёс, поръёс но бигеръёс. Анай кылмес дышетэм сяна, бигерзэ но ӟеч тодӥмы.
Дядяе 40 арлэсь кема тракторист луыса ужаз, мемее но колхозын тыршиз. Музъем уж бордын кыдам адямиос соос. Анай-атайлэсь ик пыӵаз, луоз, гурт удысэз гажан-дунъян. Но мынам та мылкыды пӧлэстӥськыса кошкиз тодон-валан дуннее кыстӥськонэн.
Пичи дырысеным ик туж тунсыко потыса лыдӟылӥ эволюцилэсь теоризэ кылдытӥсьлэн Ч. Дарвинлэн но тодмо ӟуч селекционерлэн И. Мичуринлэн ужъёссылы сӥзем книгаосты. Классысьтымы нылъёсты сямен, сяська утялтон монэ ас бордаз чик ӧз кыскы. Мон котьку но техника котырын бергась пияшъёс пӧлын вал: школаез быдтыкум, соосын ӵош трактор нуллыны право но басьтӥ. Та быгатонлыке туж юрттӥз быръем ужам.
- Школадэс йылпумъяса, улон сюрес быръён пумысен йырдэс кема-а тӥяды?
- Школаез бен ӟеч быдтӥ ке но, институтэ пырон сярысь малпаны ик ӧй дӥсьты. Ма, мон гуртысь палэнэ потамтэ маке – соин но, лэся, пушкам кышкан кылдӥз. Ӵап соку ёросамы потӥсь газетысь ялонэз синйылтӥ: егитъёсты дышетскыны ӧте Сарапулысь совхоз-техникум. Вот таиз, малпай, мыным тупа. Озьы отчы шонтӥ. Бырйи агрономлэсь удыссэ. Дышетскон капчиен сётӥськиз, шӧдӥськиз, лэся, школаын ӟеч дышетскеме но гуртын будэме.
Сарапулысь техникум бере монэ, дас тямыс аресъем нылашез, ужаны ыстӥзы Шаркан ёросысь «Путь Ильича» колхозэ. Пороз гуртын агрономлэсь удыссэ оскизы. Порозын ортчиз самой шудо егит дыры, шуыны луоз. Отын монэ бырйизы комсомол огазеяськонлы секретаре. Кыӵе гинэ ужрадъёсы ӧм пыриськылэ! Колхоз председательмылэн УАЗ-иказ дас кузя туйнаськиськомы но куасэн бызьылонъя ӵошатсконэ ширтӥськомы. Командаенымы нырысетӥ инты но ӵем дыръя басьяллямы. Нуназезэ бусыысь ум потаське вал, нош ӝытазезэ спортзалэ яке клубын ортчись ужрадэ дыртӥськомы.
Ӝутскон
- Школа бӧрсьы институтэ пырыны кышкады, шуиськоды. Ку бен дӥсьтонлыкты кисьмаз?
- Пороз гуртын ужаны кутскеме бере дӥсьтонэ кылдӥз, лэся: пыри Ижысь гурт хозяйствоя институтлэн (али академия) агрономия факультетэзлэн заочной люкетаз. Отын но тодон-валан басьтон мыным капчиен сётӥськиз, таяз радэ юрттӥз ини техникумын дышетскеме-кыдаме.
Cемья кылдытӥмы бере, малпаськоно луиз, кытчы меда каръяськоно. Картэ Казаньын дышетскемын, распределение пыр сое келясалзы бигер шаерысь кудаз ке школае. Мон солы Шаркан пала ик кариськыны ӵектӥ. Со пумит ӧз луы. Удмурт шаерысь Калыкез дышетонъя министерствое куриськонэн вамыштӥмы. Но югдурез воштӥз Венялэн анаез: милесьтым, пе, укыр кыдёке интыяськиськоды ук!
Озьы ми шонтӥмы Татарстанлы матэ интыяськем ёросэ – Кизнер палъёсы. Вазиськимы ёросысь сельхозуправление, кытын, шуиськом, кулэясько агрономлы но дышетӥсьлы. Ыстӥзы Кизнер каргуртлэсь 21 иськемлы палэнэ интыяськем Тыжмыйыл гуртэ, «Звезда» колхозэ. Отын ик Таня нылмы вордӥськиз. Кӧня ке улыса, картме квалификацизэ будэтыны Иже лэзизы. Улэм городлы матэ интыяськем Первомайской каргуртысь общежитиын. Отын юалляськем-тодэм: нылпи садзы вань, школаязы математикая дышетӥсьлы кулэясько, егит специалистъёслы чаклам улон юртлэн инъетэз вань ини. Озьы выжимы Первомайское. Нылмес нылпи садэ нуимы, удмурт кылын вераськемзэ огъёзъёсыз уг валало. Тунсыко ик та пичиос: син куспын дышиз ӟуч сямен лабыртыны. Но али но удмурт кылын вераське. Нош Первомайскойын вордскем Серёжа пимы удмурт кылзэ уг потта.
Кузпалы Вениамин Андреевич кызьы ужаны интыяськиз каргуртысь школае, озьы ик та вакытэ но отын пиналъёсты математикалы дышетэ.
Первомайской каргуртын вал опытной станция. Отчы лаборант луыса ужаны интыяськи, пӧртэм опытъёс бордын тырши. 1988-тӥ арын гурт хозяйствоя институтэз йылпумъяй. Диплом уже сӥземын вал Удмуртиын толйись чабеез будэтон технологиосты эскеронлы.
Толйись юосты эскеронъя опытъёсы трос вал ини ке но, институт бере ик аспирантурае пырыны ӧй дырты. Отчы вамыштӥ 1998-тӥ арын гинэ. Мыным кивалтӥсе юнматӥзы Ильдус Фатыхов профессорез.
Ижысь гурт хозяйствоя академиын кылдытэмын ӧй вал на кандидат диссертациосты эскеронъя комиссия. Мыным мыноно луиз Пермьысь гурт удысъя академие, ужме отын ути. Тодосчиослэн юан сётъямзылэсь чик ӧй кышка, угось быдэс диссертацие уж вылын эскеремын вал. Соин ик мон сое 2002-тӥ арын туж капчиен ути.
Кисьман
- Кыӵе уж оскемын тӥледлы туннэ?
- Первомайской каргуртысь гурт удысъя научно-исследовательской институтын 2001-тӥ арын усьтӥськиз толйись чабеез эскеронъя лаборатория. Малы одно ик чабей быръемын вал? Шуом, йыдылэсь выль сортъёссэ поттон бордын тыршо Татарстанын. Соин ик бырйимы чабеез. Озьы институтамы нимысьтыз лаборатория кылдӥз. Усьтӥськемез бӧрсьы, кӧня ке ар ортчыса, мыным соин кивалтыны оскизы.
Озьы шаерамы мытэмын вал асьме мулы, куазьлы тупась чабей поттон. Та культураез, зэмзэ вераса, республикаысьтымы хозяйствоос уггес ярато. Кылсярысь, 1993-тӥ арын сое ваньзэ-ӧвӧлзэ 3 сюрс гектар вылын кизизы лымшор ёросъёсын гинэ. Нош уйпал ёросъёсысь та культураез соку ӧй пумитасалыд. Малы сокем паськыт ӧз вӧлмы асьме дорын чабей? Та культураез кизёно-а, ӧвӧл-а юанлы котькуд хозяйстволэн аслаз малпанэз: гектарысь 25 центнер басьто ке, мыло-кыдо кизё ини. Мукет араз со уг удалты ке, мылкыдзы пуксе. Озьы арысь аре чабейя суред вошъяське. Нош учконо ке, солэн пайдаез бадӟым: одӥг гектарысь 60 центнер но басьтыны луоно.
- Кылем арын гужем гурт удысэз зол сюлмаськытӥз: ю тысь, емыш сутскизы. Чабейлы кышкыт-а таӵе куазь?
- Ӵапак чабеез кӧс гужем чик но уг кышкаты. Сое угось лымы улэ кизиськомы, тол куспын со кужым люка, мур выжы лэзе. Соин ик тулыссэ-гужемзэ со куасьмонлы уг сётскы. Чабейлэсь ӟеч кидыссэ уськытонын санэ басьтоно луэ мукетсэ: толэз-кезьытэз чидасьгес кароно – мед тупалоз асьме куазьлы.
Институтмылэн бурд улаз пыртэмын быдэн 7 гектарен 10 бусы. Соос чакламын пӧртэм опытъёслы. 20 ар ӵоже эскероно бусыосмы но вань – отын киземын трос аръем турынъёс.
Ми зэмос хозяйствоын зэмос ужасьёс кадь. Тулыс вуэ ке, институтысь уд пумита ни – уен-нуналэн бусыын. Чакласькомы, ку кизёно чабеез, озьы ик мукет культураосты, ку талы дась луэ музъем, кызьы уда та культура, кыӵе выжыысь кидыс ӟечгес ӝутске, нош кудӥз борды золгес лякисько пӧртэм висёнъёс, ку утялтоно чабеез но мукет. Вань опытъёслы тупась пичи сеялкамы, молотилкамы.
- Малпасько, пичи дыръяз котькудӥз йӧндыриз, яблокпу борды мукет выжыысь улмопулэсь вайзэ итылыса. Чылкак паймисько: кызьы герӟаны луоно пӧртэм выжыысь чабеез?
- Чабей ассэ ачиз сюрела. Соин ик выль кидыс кылдытэммы потэ ке, шепез «улошо» кароно луэ. Басьтэм сиоссэ (пыльникъёссэ) мукет выжыысь чабейлэн шепез (тазэ анай шеп шуиськомы) борды итӥськомы. Анай шеп толэз-кезьытэз чидась луыны кулэ, нош со борды пуктӥськомы кыӵе ке мукет тодметъёсын сиосты. Шуом, кидысэз бадӟым мед луоз, ӟеч нянь пыжыны мед тупалоз. Чабейлэсь одӥг сортсэ поттон понна дас ар пала ортче. Угось одӥг тысь бордысен кутскиськод, собере со кырымозь йылэ, со пӧлысь самой ӟечсэ но тазазэ бырйиськод, выльысь кизиськод. Озьы арысь аре.
Лабораториямы поттӥмы выль сорт. Солэн нимыз но ӧвӧл ай, лыдпусъёсын гинэ пусйиськомы – 7 H 1/7. Малпасько, оло, солы удмурт ним сётоно. Шуом, Италмас, оло нош мукет ним но йырамы лыктоз.
- Выль выжыысь чабеез тӥ кылдытӥды бере, солы ним сётыны но ас мылкыд каремдыя быгатӥськоды?
- Выль кидыс кылдытэммы пумысен ми одно ик ивортыны кулэ Россиысь селекцияя комиссилы. Ним сётон пумысен но отысь специалистъёсын огкылэ вуоно. 7 H 1/7 кидысмы тужгес но тупалоз странаысьтымы 4 округъёсын будэтыны. Кылсярысь, Волга но Вятка котырын. Туннэ нуналлы та кидысмы одӥг тонна пала люкаськемын. Сое люкылӥмы ни шаерысьтымы сортоиспытательной участокъёсъя – соос 5 интыын усьтэмын. Нимаз хозяйствоосы кидысмы уз вуы на, со понна нырысь ик сертификат лэсьтоно.
- Тулыссэ-гужемзэ бусыысь уд пыраське, шуиськоды, нош толалтэзэ маин выре лабораториды?
- Гужем ужаммылы йылпумъянъёс лэсьтӥськом. Шуом, одӥг шепын кӧня тысез, макем таза, висёнлы сётскисьтэм со. Котькуд выжыысь кидысъя нимысьтыз отчёт дасяськомы. Дасям лыдпусъёсмес, озьы ик кидысъёсмес но келяськомы Санкт-Петербургысь будосъёсъя институтэ. Отын интыяськемын Россилэн будосъёсъя банкез. Мукет интыысь таче ёзэз уд пумита ни. Отын утисько дунне вылын будӥсь вань культураос. Отчы асьсэлэсь кидысъёссэс келяло кунгожсьӧръёс но: Америкаысь, Канадаысь, Китайысь, Франциысь но мукет кунъёсысь селекционеръёс. Соослэсь поттэм чабейзэс куреммыя милемлы но келяло. Ми соос вылын опытъёс лэсьяськомы. Кылсярысь, тани китайёслэн Хуахан нимаськись чабейзы кезьытэз уг чида, но солэсь изэм пызь туж усто пыжиськыны.
Улонме гурт удысэн герӟай шуыса чик уг жаляськы. Веттаськись бусы шоры учкисько ке, сюлэмы ик шурдэ. Со мыным луло, шокась маке кадь потэ. Тӧлъя ветлӥсь котькуд шепен мон улэп адямиен кадь вераськисько.
Источник:
За предоставление материала выражаем огромную благодарность редакции газеты "Удмурт дунне"
