Шумилова Людмила Геннадьевна
Нылкышно шуд уж но нылпиос
Людмила Шумилова Пичи Пурга черкогуртысь С. Самсонов нимо ёрос библиотекаен кивалтэ. «Удмурт Кенеш» но «Дэмен» огазеяськонъёслэн ёзчизы луэ, ёросысь Общественной кенеше пыре, ёрос йыр бордын кылдытэм пичи выжыысь калыкъёслэн ужпумъёсынызы вырись кенешлэн секретарез луэ. Ваньмон дыръяз яратэ лыдӟиськыны, выре спортэн, пӧртэм ужрадъёсы пыриськылэ, троссэ ачиз радъя но нуэ.
- Людмила Геннадьевна, ку гинэ вуиськоды сомында ужез быдэсъяны? Ваньмаз вутскон понна дыр кулэ ук.
— Вылаз ик, мон Орлой гуртын улӥсько на. Ӵукна вазь ик султыса, сюрес вылэ потоно, Пичи Пурга черкогуртэ 7 иськемез маин ке но мыноно. Котькыӵе куазь мед луоз — зор-а, лымы-а — сюрес вылын сылоно. Ӝытсэ нош бертон сярысь сюлмаськоно. Куддыръя, общественной ужен вырыку, туж бер бертоно луэ. Школаын дышетскыкум но, озьы ик вал. Ялан общественной ужен вырӥ пионер дружиналэн председателез но вал, комсомольской организациен но кивалтӥ. Кытчы косо, отчы ик мынылӥ. Куд-ог эшъёсы йыркуръясько вал, дыр, угось укыр йырме урдыса ветлӥ. Табере, озьы выремысьтым, возьдаськисько. Эшъёсы уг ярато вал, дыр, монэ.
- Ӵемысь тӥледыз ёросады ортчылӥсь ӵошатсконъёсысь адӟылыны луэ.
— Дыр шедемъя тыршисько спортэн вырыны. Шутэтскон нуналъёсы одно ик нюлэскы, со милям бакча берамы гинэ, потасько, куас вылэ султытэк уг чидаськы. Эше Вера Ерохина покчи классъёсты дышетэ. Со но мыным улыны воля уг сёты, ойдо нюлэскы шуыса, вазь ӵукна ик чортэ. Нылпиос пичи дыръя ноку вал тазьы шутэтскыса ветлыны. Ма собере, милям гуртамы асьмелэн тренермы Василий Трошкинмы вань. Со милемлы тэк пукыны маза уг сёты, чачыратыса ик дорысь поттэ, куас вылэ султытэ. Нылпиосын гинэ уг ай, милемын но, гурт калыкен, тамаша ужа: гужем но гурезетӥ турын вылтӥ нискылатэ. Шонерзэ вераса, ми пичи дырысенымы дышемын бызьылыны, гуртамы школамы покчи классъем гинэ вал, шор ёзояз Баграш-Биграе, 3-4 иськеме, ветлӥмы. Нунал потэм со иськемъёсты ортчы ай, олокыӵе но бызьылӥсь луод, ява.
- Кыӵе гуртын вордскиды, кыӵе анай-атай вӧзын будӥды?
— Ныл йыры мынам Куреггуртысь. Шулдыр интые пуксемын гуртмы, Ижевск-Можга сюреслэсь кыдёкын ик ӧвӧл. Ужась но шулдыръяськыны быгатӥсь калык отын улэ, юртъёссы жон-жонэсь, чебересь, нылпиоссы визьмоесь. Мынам мамае Зинаида Ильинична Моисеева гуртамы покчи нылпиосты визьнодаз. Нош тятяе Геннадий Николаевич Баграш-Бигра шор ёзо школаын математикаен дышетӥз. Со табере ми вӧзын ӧвӧл ни, кемаласьгес улонысь кошкиз ини. 3 пиналъёс пӧлысь мон кыкетӥез луисько. Галямы Баграш-Биграын улэ, со фельдшер. Коля выны Ижын ужбергатӥсь дорын ужа. Нош мон пичи дыръям ик библиотекарьлэн ужезлы синмаськылӥ. Мамалэн монэ враче дышетэмез потэ вал, тӧдьы халатэн, пе, ветлод, кӧня адямилы ӟеч лэсьтод. Ачиз дышетӥсь бере, соин, лэся, монэ со профессия сярысь малпаськыны ик ӧз лэзьы, тырмоз, пе, дышетӥсьёсмы тонтэк вань ини. Ма, соку мукет профессиос сярысь вераськись ик ӧй вал. Школаез йылпумъяммы бере тросэз эшъёсы училищеосы кошкизы. Алама ӧй дышетскы бере, вылӥ дышетсконние пыреме потӥз. Мамае ӵектэмъя, ма, мон ачим но искусствоез но творчествоез гажась маке, Пермьысь культурая институтэ библиотечной факультетэ пыри. Монэ отчы тятяе келяса ветлӥз. Нылпиосыз пӧлысь оломалы со монэ висъялляз. Адямиос Ижын экзамен сётъяллям, нош ми со сярысь ӧм ик тодылэ, сонякеме Перме ветлӥмы. Студент луыны кельшиз, котькудзэ предметэз мыло-кыдо дышетӥ. Книгаосты яратӥсько вал бере, соосын ужаны эшшо но тунсыко потӥз. Практикае Можга карын ортчиз. Кӧня книга мон отын лыдӟи! Магазинэтӥ но библиотекаетӥ, книга утчаса, ветлонэз ӧвӧл, соос пӧлын мон ачим кузё. Кудзэ кулэ, созэ ик книгаез киям кутӥсько, уйлы сьӧрам басьтӥсько. Мон али ке но книгатэк умме усьыны уг быгатӥськы. Со мынам дышетӥсе, утисе но вордӥсе. Яратӥсько Михаил Булгаковез. «Мастер и Маргаритазэ» олокӧня пол лыдӟи ини. Со мыным чик уг акыльты. Мукет авторъёсты но кушам кадь ик лыдӟыса потӥсько.
Институтэз йылпумъяса, ужаны келяло вал Иже. Но мон чутрак пумит луи, Пичи Пурга черкогуртэ куриськи, монэ отын картэ вите, шуисько. Со вакытэ Орлойысь Петя нимо пиен ар пала эшъяськиськом ни вал. Со армиысь бертӥз но гуртаз ик, «1-й Май» колхозэ, ужаны интыяськиз. Монэ Пичи Пурга ёрос библиотекае соку ик ужаны кутӥзы. Институтэз йылпумъям мурт тамаша аслым визьмо потӥсько ини, всё, малпасько, бызьыны дыр вуиз. Пинал дыръя басьтӥсь уз луы ни-а, мар-а кожано, дыртыса, азез-берез учкытэк бызёно. Нош улонын кӧня визь люканы кулэ на вылэм ай. Юнме уг верало калыкын: кӧня улӥськод, сомында ик дышетскиськод.
- Тӥляд 3 пиналъёсты. Тодэм потэ вылэм, кытын дышетско, ужало соос.
— Бадӟымез Колямы дышетсконзэ ӧз азинты, кинлы ке рабочий но луыса ужаны кулэ, шуэ. Со Иже интыяськиз, нуналлы быдэ гуртэ бертылэ. Туж паймоно кадь та улон: Коля атаезлэн вордскем нуналаз ик вордӥськиз. Оло, соин но кисьтэм-басьтэм атаез кадь. Петя копак уж понна быремын вал. Монэ нылпи ваён юртысь пумитаны гинэ но, ужез кылёз шуыса, лыктэмез уг поты вал, ӵапак туннэ, пе, араны потыны кулэ. Сыӵе-а луод ни, дунне вылэ нырысетӥез нылпиез вордӥське, нош со ужан понна бырыса улэ! Ярам, атаез воштэм, пизэ больницае келям. Петя тыпыр-тапыр гинэ вуиз, милемыз доре вайыса кельтӥз но нош бызьыса сямен бусые кошкиз.
Кыкетӥез ныл вордӥськиз. Петя ужысь бертӥз но, шуиськӧ 23-тӥ февральлы мон тыныд кузьым лэсьто. Эн ай, эн, али машинае тӥяськемын, маин тонэ больницае нуом, кӧня ке чида на, шуэ. Пиналлэн вордӥськон дырыз вуэмын ке, солэсь-а юаса улоз на, озьы мон пиослэн праздниказы ныл вордӥ. Настяе понна шумпотӥсько. Со туж тыршись нылаш. Дас одӥг класс бере Удмурт кун университетысь удмурт филология факультетэ пыриз. Туж уг поты вал отчы мынэмез. Оломалы пичи дыръяз удмурт кыллы пумит вырылӥз. Кытчы мынэмзэ валатэк ик, дышетскиз ини. Солэн экономист луэмез потэ вал. Но гуртын будэм нылаш кытчы мыноз на кадь, ачим ик университетэ пырыны лӧпкытъяй. Бӧрысь со анай кылзэ сыӵе яратыны кутскиз, эсьмаса, табере сотэк улэмез ик уг луы ни кадь. Вань улонзэ соин герӟалоз, дыр, ини. Али Настямы Эстониын Тарту университетын аспирантураын дышетске. Кӧня ке «Удмурт дунне» газетын корректор луыса ужаны вуттӥз.
Настя бере эшшо пи вайи на. Ваня туэ 11-тӥ классын дышетске. Петяен 12 ар гинэ ӵош улӥмы. Со дыр куспын улонэз но яратонэз шӧдыса-валаса ик ӧм вуттэ кадь. Нылпилы шумпотонэз картэ Ваня вордскем бере гинэ валаз ай. Пиелы 7 толэзь тырмыса, монэ ужаны потыны косӥзы. Соку тӥни Петя пиенымы пукиз ини.
- Тани ульчаын шунды сиос мылкыдэз ӝуто ини, 8-тӥ Март матэктэ. Кыӵе сямо кышномуртъёс тӥледлы кельшо?
Гуртысьтымы Ерохина Дарьяпайлэн тазалыкезлы синмаськисько но паймисько. Солы туэ 102 арес тырмизини. Йӧн-йӧн, губырскытэк вамышъя, чебер ымныро кышномуртлэн пушкыз но сыӵе ик югыт но чылкыт, дыр, малы ке шуоно со али ке но корка вӧзтӥзы кошкись адямиосын рос-прос вераське, сюлмаськыса ик юалляське. Сыӵе сямызлы луыса ик, дыр, Дарьяпай та дунне вылын кема улэ.
Пичиысен мамае кадь визьмо, сабырлы луэме потылӥз. Со юн сямо, ассэ ачиз калык пӧлын возьыны быгатӥсь. Кузпалылэн анаез но лякыт, кужмо нылкышно. Кенэн, мукет семьяын, музон сямъёсын будэм адямиен, улыны быгатыны кулэ ук. Уката ик пиез кемалась милемын ӵош ӧвӧл ни.
Шудтэм учыре шедьыса, Петя бырыны сюриз. Армиысь бертэмез бере колхозын кема гинэ ужаз. Собере уждун умой ӧз тыре ни. Мон куаретыны кутски, 3 нылпиен кызьы уксётэк пукод, мын ай, шуисько, адямиос тӥни дальнобойщикын но ужало. Озьы со кузь сюрес вылэ потаны кутскиз. Сое, 2 ар ужамез бере, кыдёкысь шаерын бырон возьма вылэм. Москва сьӧрысь Солнечногорск город доры шутэтскыны дугдэм. Ленинград шоссе туж бадӟым но паськыт, трос машинаос отӥ ветло. Сюрес вамен потыкуз, мискинь машина улэ сюрем. Мыным соку 32 арес гинэ ай вал. Со дырысен нылпиосыным но Петялэн мемеенымы ӵош улӥськомы. Картэ улонысь кошкыку, Ванямылы 2 арес но 7 толэзь гинэ вал ай.
Петя улонысь кошкем бере мемеезлэн кинлы ке бызё, дыр, шуыса кышкамез шӧдӥське вал, соин ик нылпиосылы синмазы ик вералляӟ мукет тятяен улэмды уз поты. Визьмо кышномурт со. Монэ нылзэ кадь ик каре, кытӥяз мултэс сюлмаське, шорам небытак гинэ вазе: кен, шунытгес дӥсяськы, сютэм эн ветлы, секыт эн кары. Мон но бордаз дышемын ни, аслам анае кадь потэ.
- Тӥ асьтэос но синмаськымон чебер, йӧно нылкышно. Асьтэдыз шудоен лыдъяськоды-а?
— Шудтэм шуэме уг поты. Вӧзам 3 пиналъёсы монэ шумпотто, песянаймы вань на. Аслам но мамае милемыз уг вунэты, асьмеос но дораз ӵемысь вуылӥськомы. Солы туэ 7-тӥ мартэ 73 арес тырмоз ини. Одно ик ӟечкыланы дораз мыномы. Кема мед улоз на ай, тазалык сӥзем потэ солы. Шудо соин нӧ сюлэмыя уже вань, вӧзам монэ валась адямиос тыршо.
- Библиотекаяды нылкышноос гинэ ужало, кемалась-а соосын кивалтӥськоды ни?
— Кызьы кивалтӥсе пуктэмзэс валаса ик ӧй вутты. 2004-тӥ арын монэ отчы юнматӥзы. Нырысь-валысь туж кышкай, ужаны быгато-а шуыса, кык толэзь пала уйёсме кӧлатэк потай. Уж дурам мынӥсько но мар карыны уг тодӥськы, толэзь ӵоже телефон трубкаез ик ӧй кутылы, малпаськӧ кивалтӥсьёс жингырто ке, мар мон соосын вераськом. Мынэсьтым азьло та удысэз нуиз визьмо удмурт нылкышно Евгения Лебедева. Солэсь адӟем карыса, тыршисько.
Аръёс ортчо, 10 арлэсь ятыр кивалтӥсько ини, ёрос библиотекаямы 15 ужасез. 2005-тӥ арын библиотекамылы Семён Самсонов удмурт писательлэсь нимзэ сётӥзы. Талэсь азьвыл со нуллӥз библиотекаез кылдӥсьлэсь, ӟуч издательлэсь, югдытӥсьлэсь Флорентий Павленковлэсь нимзэ. Туэ лыдӟиськон юртмылы 110 ар тырме. Соин валче, озьы ик Литературалэн арезлы сӥзьыса, туж трос ужрадъёсмы чакламын.
Мон та библиотекаысь огдыре кошкон калэ но вуылӥ. Адями лыдӟиськемысь дугдӥз. Соку мылкыды куашказ, ужме кулэтэмен лыдъяны шӧтай. Но быръем удыстэ сюлмысьтыд яратӥськод ке, номыр карыны уг луы ни вылэм. Соку пичи уждун шоры уд учкиськы ни, тыбырад ӝутэм ныпъеттэ пумозяз нуиськод. Ёросамы 24 библиотекамы лыдъяське. Ми, библиотекаын ужасьёс, пӧртэм фестивальёс но ужрадъёс ортчытъяськом. Кык арлы одӥг пол «Гуртмы лыдӟиське анай кылын» фестиваль радъяськом. Адямиез библиотекае кыскон понна пӧртэм амалъёс утчано. Табере тросэз Интернет борды кыстӥсько. Аслэсьтыд ужамдэ возьматэмед потэ ке, библиотекарьлы пӧсятозяз тыршоно луэ. Лыдӟисьлэсь номырин бере медад кыльы. Котькуд юанлы валэктон сётыны быгатыны кулэ. Туала арын туж трос гожъясьёс кылдӥзы. Соослэсь вань произведениоссэс лыдӟыса вуттоно ӧвӧл ни, соин ик библиотекарь куддыръя шуге-леке вуыны быгатоз.
Алигес Литературалэсь арзэ усьтӥмы. Туж бадӟым праздник со луиз ёросын улӥсьёсмылы. Вань гуртъёсысь муниципал кылдытэтъёслэн кивалтӥсьёссы, школаосысь дышетӥсьёс но нылпиос отчы пыриськизы. Фестивальмы вераны луонтэм усто ортчиз. Малпам ужмы быдэсме ке, эшшо умойгес, ӟечгес тыршем потыны кутске. Выль уж борды капчи мылкыдын, бурдъяськыса басьтӥськиськод ни. Южтолэзь пумын «Пурга Мунё» фестиваль ортчытомы. Отчы быдэс ёросысь мунё лэсьтӥсьёс пыриськозы. Арлы быдэ ёросысьтымы суредасьёслэн ужъёсынызы библиотекаямы адӟытонъёс ортчытъяськом. Ёросысьтымы «Удмурт Кенешмы» сярысь но вераме потэ. Милемын быгатыса кивалтэ Василий Москвин. Ми соин огкылысь, тупаса ужаськом, конференциос ортчытъяськом.
- Тӥляд библиотекады книгаосын узыр шуимы ке, ум янгышалэ, дыр. Кыӵе ке арын Финляндиысь но юрттэт вуиз кадь.
— 2013-тӥ арын фин-угор выжы калыклы сӥзем ужрадъёсты ортчытъяны шуыса, Кастрен нимо обществое, юрттэт курыса, вазиським вал. Ӧм ик малпалэ, отысь сыӵе ӝог юрттэт вуоз шуыса. Милемлы финъёс 40 сюрс манет уксё келяллям. Паймыса быриськом вал. Соку ик выль книгаос басьтӥмы. Кылем арын «Национальная площадка» проектэнымы 100 сюрс манет утӥмы. Со уксёен книга басьтӥм. Али ведь «Удмуртия» издательство но туж чебересь книгаос поттэ. Берло аръёссэ библиотекамы узырмиз. Ёрос бюджетысь араз 200 сюрс манет уксё сёто ке, со ваньмыз подпискалы кошке. Кылем арын федерал бюджет 130 сюрс манет тыр дась книга сётӥз, озьы ик юрттэт вуиз Удмуртиысь Нациосын ужан политикая министерствоысь.
- Калыклы юрттэт сётонъя ужен но выриськоды кадь?
— Озьы. Тани алигес ми, ужрадъёсын чай но табань вузаменымы но калыклэн юрттэменыз, ёросысьтымы Гужношур гуртысь лек пыктосэн висись пичи Артёмлы 11 сюрс 300 манет уксё люканы быгатӥмы. Библиотекаысьтымы суредасьмы Яна Яковлева бадӟым юрттэт сётӥз. Сувениръёссэ но суредъёссэ вузаса поттэм уксёзэ Артёмлы келяз.
- Тӥ ялан Пичи Пурга черкогуртын, уж дурын дырды быре, ӝытсэ общественной уже выйиськоды. Асьтэлы гурт адями кадь потӥськоды-а?
— Со понна ик мемеймылы весь тау карисько. Со милям сиён пӧрасьмы но, пудо утись-вордӥсьмы но. 2011-тӥ арын трос уж кемдӥз, Пугачёво пуштылонъёс тупазы на, дотово куректыса пукисько, кызьы меда туэ гужем пастухе ветлыны быгато шуыса. Сюлмаськонме Инмар, лэся, кылэм. Скалмы со толэзе ик, оло, кулӥз, сюлмаськонэ но быриз. Татчыозь весяк скалэн улӥмы вал. Сое вордон понна кӧня пудо сиён дасяно луылӥз. Но ми со берегес ик кеч басьтӥмы. Мон со шоры Изольда шуыса вазиськисько, кечлэн, пе, нимыз звучной мед луоз, нош мемеймы со кылэз вераны умой уг быгаты, лэся, Белочка шуэ.
Воксё номыр ужаны уг быгатӥськы шуэме уг поты. Мон гуртын будэм адями ук. Бакча котырын но бергасько, пудо бордын но вырисько. Мылкыд вань вылэм киужен вырыны. Солы дыры уг тырмы ни, туэ толбыт ӵоже 3 пӧзь керттӥ. Куиньзэ ик кузьмай.
- Эш утчамды уг поты-а? Вӧзады оскымон воргоронды ке луысал, оло, пельпум вылысьтыды вань секытэз усьысал.
— Со сярысь мынам малпанэ кемалась быремын ни. Улӥсько но улӥсько, ужаны ветлӥсько. Куд-ог нылкышноослэн «сыӵе зол яратӥсько кузпалме» шуэмзылы воксё паймисько. Луэ-а меда сыӵе яратон? Мон валасько, оген улыны уг яра. Соин ик нылпиосме яратӥсько, улонме калыклы сётӥсько. Жаляса верано, ӵош дышетскем пиосмы тросэз улонысь кошкизы ни. Соослэн но кузпалъёссы огназы кылемын ук. Воргоронъёс асьсэды мед утёзы вылэм.
За предоставление материала выражаем огромную благодарность редакции газеты "Удмурт дунне"
