Уваров Иван Анатольевич
Эмъясь эшъяськон
Иван Анатольевич УВАРОВ - медицина наукаосъя доктор, вылӥ квалификациен психиатр-нарколог, Ижысь медициная кун академиысь психиатрияя, наркологияя но медицинаын психологияя кафедраысь доцент. Иван Анатольевич - наукая 90 пала ужъёслэн, монографилэн но 10 пала учебно-методической пособиослэн авторзы. Ижысь медициная академиысь студентъёсты визьнодам сяна, Иван Уваров психотерапия ласянь юрттэт сётэ нимаз усьтэм кабинетаз но: со пыр та дырлы ортчиз ни 3 сюрслэсь ятыр адями.
- Тустыя тӥ кисьтэм-басьтэм атайды - тодмо удмурт писатель Анатолий Уваров кадь. Кыӵеен тодады кылиз атайды?
- Ӟеч, лякыт сямо. Маке вераськод солы - со тонэ туж сак кылзоз, гань-гань кыӵе ке ӵектон сётоз. Зэм, творчество дуннеын улӥсь котькуд мурт сямен ик, куд-ог дыръя со ас югдаз усьылэ вал, соиз я таиз йырысьтыз тӧлӟе. Со пумысен ай еж вакытам туж зол пӧсекъясько вал, со сярысь аслыз но вераме вань: ну, папа, кызьы сое вунэтод ни!
Нимаз вераме потэ папалэн юморез мур шӧдэмез-валамез сярысь. Солы кыӵе ке юан сётӥськод, нош со пумитад серемпыр яке эпиграммаен валэктон сётоз - ӵапак интыяз, мукет валэктон кулэ но ӧвӧл ни кадь. Таӵе быгатонлыкен адямиосты ӵем уд пумита. Али ке но пель сьӧрам чузъяське солэн «озьы-а?» шуыса ваземез - тонэ сак-сак кылзоз но, паймыса кадь, тазьы юалоз. Нош тон, тунсыкен кылзэмзэ адӟыса, сюлэмдэ усьтэмдэ ик уд валаськы.
Тодам лыктэ б арес вакытэ. Папа сюрес вылысь ӧз пыралля, ялан командировкаосын. Мон сое чидатэк витьылӥ: ку вуоз ни, ку вуоз? Бертэ но, коркамы соку ик тыро луэ кадь. Дорысьтымы куноос ӧз бырылэ: я Финляндиысь, я Венгриысь, я Москваысь кыӵе ке тодосчиос, я удмурт писатель-поэтъёс. Папа котькуд пырисез шуныт мылкыдын пумиталляз. Тодам кылиз Москвае вуылэммы. Куинь нунал ӵоже улӥмы писательёслэн санаториязы, тыметэ чорыганы ветлӥмы. Атай вӧзын кыӵе усто вал! Дорамы куное вуылӥз ӟуч кылбурчи Михаил Раскатов, мыным бичетсэ кузьмаз. Ӵапак со папалэсь кылбуръёссэ ӟуче берыктӥз.
Син азям пуксе папалэн книгаоссэ возьматъямез: вот учкы ай, пие, тани таӵе выль книгае потӥз. Нош мон, ай шузи маке, книгаез шоры пал синмыным учкисько но ас ужъёсыя пегӟисько. Табере валасько ни: солэн потэ вал, дыр, та книгаез сярысь тросгес верамез, сюлэмзэ усьтэмез... Егит дыръям, зэмзэ вераса, папалэн утчаськонъёсыз, гожъяськонэн выронэз шоры малы ке чиньы пыртӥгес учкылӥ: со ваньмыз чепуха! Папа, тае шӧдытэк-синйылтытэк, ӧз улы, но ноку но та пумысен керӟегъяськемез, урод кыл верамез ӧвӧл. Табере аръёс ортчемъя мон ваньзэ, мар герӟаськемын папаеным, туж шуныт мылкыдын тодам вайисько ни. Жалясько, солэн удысэныз сокем мур ӧй тунсыкъяськы шуыса. Map карод, егит дыръя троссэ дунъяны уд валаськы на. Али визьмыным учконо ке, папа улэп дыръя ик удмурт кылэз но дышетоно вылэм...
- Бер ӧвӧл на, малпасько...
- Таиз зэм. Басьтӥськоно вал ни та уж борды: папалэсь книгаоссэ коть ас кылыныз лыдӟыны быгатысал. Удмурт кыллы дышытэк, кыли мон Пензае улыны кошкеменымы йырин. Сергей агае - со мынэсьтым 12 ареслы бадӟымгес - удмурт кылын умой вераське. Ма, солэн пичи дырыз, школае ветлон вакытэз Ижын, папа вӧзын, ортчиз. Нош мон будӥ ни Пензаын, отын ик школаез йылпумъяй. Улонын озьы луиз угось: мама, агайме но монэ кутыса, Ижысь кошконо кариськиз. Малы одно Пензае? Соку ӵапак тупаз: агае дышетскыны пыриз та городысь художественной училищее. Та ик луиз Пензае каръяськеммы. Ма, школаын дышетскон вискам Иже папа доры куное вуылӥ ке но, удмурт кылэз дышетыны та ӧз тырмы ни.
- Но Удмурт шаер тӥледыз бордаз золгес кыскем, лэся: татчы ик, атайдылэн вордскем палъёсаз, берытскиды...
- Юнме уг верало ук: пиос, пе, золгес кыстӥсько атайзы, выжызы борды. Бадӟым классъёсын дышетскыкум, мон тае золгес но золгес шӧдыны кутски. Малпанэ но вал: Пензаысь школаме кушто но, Иже, атай вӧзы, берытско. Чидай, школаез отын ик йылпумъяй. Дыр вуиз улон сюресме бырйыны. Мылкыды пӧртэм вал: военной но луэме потэ, юристэ мыныны но номыр ӧвӧл кадь. Йырме тӥян вискам эмъясьлэн но удысэз тодам лыктӥз. Вылаз ик тунсыко потыса лыдзылӥ вал ни тодмо хирурглэсь Фёдор Угловлэсь, дано эмъясьлэсь Владимир Амосовлэсь гожъямъёссэс. Соослэсь книгаоссэс кытысь ке вуттылӥз мамае: соосты лыдӟыса, эмъясь мед луом кадь потылӥз, лэся, солы.
Озьы мон берытсконо кариськи Иже. Пыри медициная кун академиысь лечебной факультетэ. Улыны интыяськи папае но солэн кыкетӥ кузпалыз Ираида Андреевна борды.
- Капчиен-а сётскиз эмъян дуннее выён?
- Нырысетӥ курсын туж секыт вал. Школаын «витьёслы» гинэ дышетски ке, татын «куинь» но ӵем басьяны кутски. Оценкаосын ӵош улӥе лэзиськиз асме дунъянэ но. Ма, школаын астэ котьмае тодӥсь-валась кариськод ук, йыр урдэмын. Нош медакадемиын - нуналлы быдэ пумтэм-йылтэм анатомия, гистология, физика. Ваньзэ дышетоно, тодоно - йыр пилиськыны дась! Визь-нод люкамъя капчигес но капчигес луиз ни дышетскыны. Лечебной факультетын тодон-валан люкасьёс сюбег удыссэс быръё ньылетӥ курсын. Мон но йырме тӥяны кутски: кыӵе удысъя эмъясь луоно меда? Шеди психиатрияя занятие. Кельшиз профессорлэн визьмо вераськемез, ваньзэ тупен-тупен валэктэмез. Мон ас удысам шеди кадь - ваньмыз тунсыко! Та ик луиз психиатриез быръеме.
Ижысь медициная кун академиысь психиатрияя, наркологияя но медицинаын психологияя кафедралэн азьвыл кивалтӥсез Станислав Модестович Плотников огпол гинэ ӧз вералля: психиатръёс - со эмъясьёслэн элитазы. Таослы угось, шуом, операция лэсьтэм сяна, копаськоно адямилэн пуш дуннеяз но: пӧртэм кышканъёсаз, мылкыдъёсаз, малпанъёсаз. 1994-тӥ арын медакадемиез йылпумъяй но, Станислав Модестович ӵектӥз ординатурае кыльыны, бӧрысь - интернатурае.
Но Пензаен пыраклы люкиськыны кылдымтэ вылэм ай... Огдырлы ужаны интыяськылӥ Пермь улосысь Чайковский городэ. Но ӝоген выльысь Пензае берытсконо луиз - мамае висьыны кутскиз. Но тазьы городъёс куспын солань-талань ворттылыны кема ӧй чида. Вылаз ик, мыным уж ӵектӥз Ижысь медакадемиысь психиатрияя, наркологияя но медицинаын психологияя кафедралэн сокугес юнматэм выль кивалтӥсез Владислав Лекомцев. Лыкты, пе, ми доры, студентъёсты визьнодалод. Малпасько, кызьы висись мама дорысь кошкод, сое кытчы кельтод? Ма, со но синйылтӥз вал ни солань-талань кыстаськемме. Валаз: пиезлы кытчы ке каръяськоно ни, выжы лэзёно. Капчи сюлэмын монэ нош ик Иже келяз. Татын ужан вискам тӥни армие но ветлыса вуттӥ - Атыкай музъеммес ути Новосибирскын противовоздушной обороная войскоосын.
- Кӧня ар ӵоже визьнодаськоды ни студентъёсты? Вутскиськоды эмъяны но. Сомында пациентъёс тӥ доры пырыны черодзэс витё...
- Туэ декабре дышетӥсьын ужаме 19 ар луоз ни. 2004-тӥ арын ути кандидат диссертациме. Со сӥземын вал Удмуртиысь быдэ вуымтэ пиналъёс пӧлын пумиськылӥсь психикая висёнъёслэсь аспӧртэмлыксэс эскеронлы. Нош 2009-тӥ арын ути доктор диссертациме. Ужам тупен-тупен эскери кудӟытӥсь юонъёсын йырин кылдӥсь психозъёсты. Уже монографиен потӥз: солэсь вылбамзэ чебертӥз Сергей агаелэн «Кышкан» суредэз.
Студентъёсты визьнодам сяна, нимаз усьтэм кабинетам юрттэт сётӥсько депрессиен, алкоголизмен курадӟись, стрессъёсты чидасьтэм адямиослы. Вазиськисьёс лачак. Озьы азинтӥсько, эшшо но муромытӥсько наукаын утчаськонъёсме.
- Атайдылэн удысэзлэсь тӥ кыдёке кошкиллямды. Агайды тани матынгес кадь - со суредась...
- Учконо ке, семьяямы милям пытьыысь пытьые вамыштӥсьёс ӧвӧл кадь - котькудмы пӧртэм удысэ кошкемын. Папа литератураен выриз, мама - хореографиысь, концертмейстер, агае - суредась, мон - психиатр-нарколог. Но мукет ласянь, вань та удысъёсты герӟа кадь потэ пуш дунне - сое усьтон, возьматон, эмъян. Агаеным кусыпмес ум ыштӥське: араз кык пол Иже вуылэ. Татын солэн эшъёсыз трос. Со тодмо суредась луиз. Тани алигес бертылӥз этнофутуризмлы сӥзем фестивале. Агаеным, папалэн кыкетӥ кузпалыныз Ираида Андреевнаен ӵош кариськыса, папалэн улэм юртэз борды шуккимы солы сӥзем мемориал пул. Сое усьтонэ люкаськылӥзы папалэн эшъёсыз, Удмуртиысь Писательёслэн огазеяськоназы пырисьёс но мукет дано куноос.
Агаеным ми туж пӧртэмесь. Ма, кусыпмы но бадӟым уга: мыным 10 арес дыръя солэн буй-буй тушез но семьяез вал ни. Солы тросгес лякиськем папалэн сямыз. Со кадь ик туж мур вала юморез. Нош серекъямзэ кылӥд ке! Кӧжы пазьгем кадь, эсьмаса! Уд возиськы, ачид но горыны кутскод! Папа улонысь кошкем бере со мыным атай интыын луиз. Ай егитгес дыръям соин лулысь-сюлмысь кенешыны ӧй пӧрмытылы. Улон шоры учконъёсыныз но соглаш ӧй кариськылы, ченгешыны но выри. Но арлы люкамъя ог-огмес мургес валаськомы ни кадь потэ. Дырлэсь ортчемзэ шӧдытэк, лабыртыны дасесь. Солэн суредъёсыз чеберто мынэсьтым кабинетъёсме, улон интыме. Зэм, искусствоын мон, оло, троссэ уг валаськы, но агаелэн ужъёсыз мон понна дуноесь, шунытэсь. Тани вань солэн перестройкалы сӥзем суредэз: со пурысь-сьӧд-тӧдьы буёлъёсын суредамын - икыр-кукыр рельсаос вылтӥ дыртэ тӧрнам пурысь чорыг, нош со вылын сыло пичи адямиос - шляпаен, пурысь пальтоен. Со сяна, вань удмуртлэн пулэсь вӧлэм йырыз - со зэмос йыр кадь, но пушкыз гырко: ручка, карандаш, кисточка возьыны. Чаклай ни: творчествоен вырись уноез адямиос мылкыдзэс возьмаса пуко, агаелэн та кылэз верамез ик ӧвӧл кадь. Малпан кылдэ - лэсьтэ. Туж шумпотӥсько: книгаосме-пособиосме суредъёсыныз чебертэ. Со милям кык агай-вынъёслэн валче ужмы...
- Студентъёсты дышетыса, практика но наука удысъёсын бергаса, ку вуттӥды семья кылдытыны? Дышетэм студентъёсты пӧлысь ик, луоз, кузпалды?
- Зэм, Анна кузпалы но эмъяськон удысын тырше, со невролог. Кузпалъяськи мон бер - 32 арескам. Но Анна Геннадьевнаен тодматскыны муг сюриз мукет учырын - ачим висьыны уси. Борщевик будос борды йӧтскыны шедьтӥськем, аллергия кутскиз. Быдэс мугоры пӧсьвуаськем кадь пульыяськиз. Map карод, вамыштӥ сутскемъёсты эмъянъя центре. Нош отын эмъясьлэн юрттӥсез луыса практиказэ ортче вылэм Анна. Со мыным соку ик кельшиз: висисьёсты сак эскере, буйгатыны быгатэ. Дышетске вылэм Ижысь медициная кун академиын кыкетӥ курсын. Озьы ми июль толэзе тодматским, нош вуоно араз феврале сюан шудӥмы ни. Будэ Маша нылмы. Солы али 4 арес.
- Иван Анатольевич, тӥ бадӟым саклык висъяськоды вина юыса кылдӥсь психозъёслы. Эмъяны луэ на-а курытсэ дурыныз юись муртэ?
- Та учырын меӵак валэктон сётыны уз пӧрмы. Нырысь ик, валаны кулэ: алкоголизм - со хронической висён. Та ик вера ни: эмъяськыны трос дыр кулэ луоз. Соин ик валтӥсь интые потэ юись муртлэн мылкыдыз: потэ-а солэн сазь улонэ выжемез, курытэзлэсь пыраклы куштӥськемез. Таӵе малпанэ со ӧз вуы на ке, коть туж бадӟым опытэн психиатр мед луоз, котькыӵе солы эмъюмъёс мед сётоз - пайдаез уз луы. Вань ук сыӵе серемпыр веран: нарколог доры юись адями лыктэм но эмъяны косэ, пе. Эмъясь шуэ: та кабинетын асьмеос куинь кузя. Кин бен куинетӥез, отчы-татчы учкыса, юа, пе, пациент. Нарколог вазе: мон, тон но тынад сазь улыны потон мылкыдыд - кин кужмогес луоз, учком.
- Нылкышноез, шуо, юонлэсь эмъяны секытгес?
- Курытсэ ӟамыръянлэн бервылъёсыз - кышномурт-а тон, воргорон-а - огкадь шӧдӥсько, огкадь ортчо. Соизлэн но, таизлэн но, сурымын улыса, быро огкадь ёзвиоссы. Соин ик мон соосты ӧй висъясал.
Но мукет ужпум - социум, юись мурт шоры обществолэн учкемез но со улсын адямилэн ассэ кызьы шӧдэмез. Мон доры тани кенешыны но, эмъяськыны но тросгес вуыло пиосмуртъёс. Соос, ӧсэз паськыт усьтыса, пыро, номырзэс уг вато: мон курытсэ ӟамыръяны яратӥсько, мон - алкоголик. Ма, калык пӧлын но соослы нокыӵе ик уз поты пыгыр-погыр ветлыны, жугиськыны, урод сямзэс возьматыны. Обществолы соос кышкытлык кылдыто. Воргоронъёс ӵемгес ӝимо югдурез утисьёс кие но, наркологъёс дӥне но.
Кышномуртъёс ласянь ужпум секытгес. Соос чарка борды басьтӥсько кыштыр, доразы, адямиос адӟымтэ дыръя. Огпол, кык пол, нуналлы быдэ... Вот юиз, кыӵе ке ужзэ быдэстыны ӧз быгаты, со ассэ «йырйыны» кутске - мон сыӵе-таӵе... Курытсэ юиз, сюлмаськонэз ортчиз кадь. Воргоронэн ӵошатыса, нылкышнолэн ассэ пыкылон сямыз кужмогес. Нош таин валче юыны мугъёс но тросгес луо. Депрессие но нылкышно мургес усе. Вылаз ик, юись нылкышно шер шедьылэ калыклэн син шораз, соин ик туж бер шараяське черламез. Шараяськыкуз висён пыдло пыремын луэ ни. Ӵапак тая ик калык малпаны кутске: нылкышноез эмъяны секытгес...
- Тӥ чакламъя, юисьёслэн лыдзы шаерамы йылэ я кулэсме?
- Россиын но Удмуртиын берло 5 ар ӵоже таӵеослэн лыдзы огкадьгес возиське. Тае возьмато лыдпусъёс. Но зэмос улонын, валамон, соос ятыргес: лыдэ басьтоно частной практикаез - алкоголизмен висисьёслы доразы юрттэт сётонэз, соосты учётэ пусйытэк кельтон учыръёсты. Соин ик та юанлы меӵак валэктон сётыны уз луы. Но мукет ужпум - психозъёслэн кылдэмзы. Мукет сямен вераса, «тӧдьы горячка», галлюцинаос кылдон учыръёс. Таӵе висисьёс матысь адямиоссылы, калыклы кышкытлык кылдыто. Таӵезэ лушкем уд возьы, тужгес но гуртысь калык пӧлын. Соин ик алкоголь психозэн висисьёс ӝог шедё эмъясьёс ки улэ. Соосъя кылдыто ни статистика: макем ӵем пумиськыло та учыръёс, сокем зол калык юэ. Удмурт шаеръя учконо ке, югдур огъя Россиын кадьгес ик.
Юисьёсын, шузимытӥсь суретъёсын кушласькисьёсын, тамак кыскисьёсын ужано луэ шуыса, уг жаляськы. Общество соос шоры кырыж учке. Но соос - висисьёс, соос но юрттэт сётэмез, эмъямез кулэ каро. Хирург, адямиез тодытэк но, операция лэсьтыны пӧрмытоз ке, мыным висисен нырысь ик рос-прос тодматсконо: солэсь улэм-вылэмзэ, кыӵе малпанъёсын улэмзэ, пуш-дуннезэ усьтоно. Макем зол эшъяськом ми соин, сокем шӧдскымон луоз эмъянлэн пайдаез.
Источник:
За предоставление материала выражаем огромную благодарность редакции газеты "Удмурт дунне"
