Петрова Елизавета Владимировна
Асме гурт адямиен шӧдӥсько
Елизавета Владимировна ПЕТРОВА - Трокай Борисов нимо премилэн лауреатэз, Россия Федерациысь дышетон удысысь отличник. Со нырысь-валысь Кизнер ёросысь Безменшур шор ёзо школаын дышетӥз, роноен кивалтӥз, райисполкомын портэм удысъёсын тыршиз. Отӥяз нациосын ужан политикая министрлэн воштӥсез вал. Елизавета Петрова кивалтӥз «Дэмен» огазеяськонэн, Кизнерын удмуртлыкез ӝутонын тырше.
- Елизавета Владимировна, секыт аръёсы, ӵапак война вакытэ, вордскиллямды. Кыӵе гуртын пичи дырды ортчиз?
- Покчи дырез малпано ке, йырсиос ик ӝутйсько. Мае но адямилы чидано уг луы. Вордйськи 1944-тй арын Алнаш ёросысь Улын Сырьезь гуртын. Вазен сое Кечгурт шуо вал. Собере атаен нэнэ Иже интыяськиллям. Война вакытэ атае машзаводын мастер луыса ужам. Собере сое, «враг народа» карыса, тюрьмае пуктӥллям. Горьковской областе келяллям. Мискинь 10 арзэ пытсэт сьӧрын юнме ортчытйз. Нэнэлы огназлы секыт йӧтйз. Кык нылпиен, мынам эшшо агае вал на, дор палъёсаз бертоно луиз, Можга каре интыяськиз. Кыӵе жаль, Ижысь юртмы озьы ик быриз, нокин со понна бызьылйсь ӧз луы ни.
1992-тй арын Удмурт Республикалэн Прокуратураысьтыз ивор вуиз: Владимир Печников, пе, реабилитировать каремын. Солы та дунне вылын кема улыны кылдымтэ. Тюрьмаысь бертыса, кема ик ӧз улы ни, машина улэ сюрыса, бырыны шедиз.
Нэнэ огназ кылиз. Со дырысен весяк ӵошеннамы улӥмы. Агае егитысен дорысь кошкиз, Астраханьын ужаз, со моряк вал. Можгаысь 3 номеро школаын 7-тй классозь дышетскыса, стипендия сёто шуыса, педучилищее пыри. Нэнэ инвалид вал, туж секыт улонэз ми соин улӥмы. Со шоры учкыса, сюлэм шори пилиськыны дась вал. Можгаын со инвалидъёслэн артелязы ужаз. Атай улонысь кошкем бере нэнэ ужаны ӧз ни быгаты, дорын пукиз. Озьы ми 4 манет но 60 копейка пенсиен улыны кылимы. Кураськыса уд ветлы ук, кызьы ке но нэнэез возьыны турттоно. 12¬13 аресысен, исьнер тӥяса, вагонъёсты ӝоктыса, ветлӥ. Мон нэнэме ути-вордӥ, шуыны луоз.
Мон умой дышетски, ноку стипендитэк ӧй кыльылы. Со вакытэ дышетйсьёс ӧз тырмылэ, соин ик милемыз курсысьтымы Тоня Петроваен кыкнамес, училищеез быдтытэк, эшъёсмылэсь одйг арлы вазьгес ужаны келязы. Можга ёросысь Сибы гуртэ шедимы. Милемлы покчиосын ужаны кельшиз, соос соку ик бордамы биниськизы. Асьмеос но егитэсь, 17 арес гинэ вал ай соку милемлы. Урокъёс бере нылпиосын ӵошгурезьын нискылаллямы. Мынам классам дышетскиз Толя Григорьев. Со туж сабырлы вал, умой дышетскиз. Анатолий Леонтьевич тодмо драматург луиз.
- Тодон-валандэс будэтэмды потыса, луоз, Иже кошкиды?
- Иже гинэ ӧй ай, сьӧраз потоно луиз. Педучилищеез йылпумъяме бере, малпасько, Ижысь пединститутэ пыроно. Ми пичиысен дорамы удмурт кылын вераським, городын будыса но анай кыллэсь ӧм куштйське. Таиз понна нэнэлы но атайлы тау карыны кулэ. Со вакытэ Министръёслэн Советсы удмурт пиналъёсты пӧртэм вылй дышетскон интыосы келялляз. Монэ но, Можга педучилищеез ӟеч йылпумъям муртэ, 1963-тй арын Иже ӧтизы но МГУ-э дышетскыны мынод, шуизы. Сыӵе дыръя пумит вазьыны дйсьтоз на-а егит мурт? Озьы мон август толэзе огнам йырам кузь сюрес вылэ потыны дӥсьтӥ.
Со дырозь нокытчы ветлэме ӧй вал на. Кисыосам тӧл шула, мыныны мынод, нош мае сиыса улод, шуиз вал нэнэе. Дор палъёслэсь мӧзмон сюрес вылысен ик сюлэмез сюпсьыны кутскиз, нэнэ но жаль потэ, висись маке огназ доре кылемын. Вуи ни ай Москвае, экзаменъёсме умой сётъяй. 1-тй сентябре студентъёсты, пе, колхозэ картошка октыны келялом. Валамон ини, мон отчы ӧй мыны. Таӵе ик тодйсько на, факультетмылэн деканэз доры бӧрдыса ветлэмме. Нуналлы быдэ пырасько, вае документъёсе, мон доре берто, шуисько. Таӵе-таӵе шуд шедьыса но, такем дано интыын ӧд ке вала дышетскыны, кызьы мон тонэ кельтом на, чабкиське декан. Документъёсме ӥырыз курен, синъёсам туж лек учкыса, киям мычиз. Нош мон сыӵе шумпотӥ, документъёсме киям кутӥ но, лобыса сямен кабинетысьтыз потй. Озьы берен дор палъёсам вуи. Можгаос медаз адӟе шуыса, кема гинэ пегаса ветлоно луиз. Монэ, МГУ-ын дышетскыны валатэк бертэм муртэ, обезянэз сямен, учкыны ветло вал. Иже мынй, отын но студентъёс шорам озьы ик паймыса учко, Москваысь, пе, татчы бертэм на. Соку ӧжытак дӥсьтӥсьгес луиськем ни, лэся, пединститутлэн ректорез Борис Шульга доры пыри. Дышетскыны лыктй, шуисько. Кин интые мон тонэ кутом, со понна кыӵе ке студентэз улляны кулэ луоз ук, шуэ. Мырдэм но кызьы студентъёс радэ кутйз. Но ӝыны ар пала стипендия уд басьты, шуиз, общежи¬тие но, пе, али ум быгатэ сётыны. Озьы мон интыяськи заводэ. Пумен ужасько, пумен тодон-валан люкасько. Одйг каникулэз но тэк ӧй улы, доре ӧй бертылы, весь нэнэлы уксёен юрттыны тырши. Асме умой дйсян сярысь ӧй малпаськылы, нэ- нэез йӧнатон понна дуноесь эмъюмъёс басьяно вал. Стипендия басьтыны кутскеме бере капчигес луиз ини, общежитие но бӧрысь сётӥзы.
4-тй курс бере практикае Алнаш шор ёзо школае шеди, собере Можгае, аслам дышетскем школаям. Всё, малпасько, татчы ик ужаны берто. Та малпанме тодосчи Иван Тараканов кытысь ке тодэм. Тон школае уд мыны, аспирантурае Тартуэ пырод, шуэ, асьме лы, пе, удмуртъёслы, дышетскем адямиос кулэ. Но монэ чик наука бордаз ӧз кыскы. Тартуэ вуылэме юнме луиз.
- Озьыен, тӥ асьтэлэн дышетскем школаяды ик Можга каре вуиды. Нылпиосын ужаку, оломар но луэ, дыр. Соосын тужгес но тунсыко учыръёс сярысь вераны быгатоды-а?
- Ӧӥ, мон Можгае ӧӥ вуы. Распределение дыръя Кизнер ёросысь Безменшур шор ёзо школае мынод, шуизы. Со гурт тууж кыдёкын потйз мыным. Пумтэмйылэм кузь сюрес лумбытлы тырмиз. Монэ, куинь егит дышетйсьёсын йош, пересь кышномурт доры улыны пыртйзы. Ӟуч кылын но литератураен дышетыны кутски, организаторе юнматйзы. Дышетйсьёсын но, нылпи оосын но кылы тупа, шулдыр ортчиз улонмы. Ужаны быгатэмме шӧдыса, лэся, кӧня ке дыр ортчыса, завуче пуктйзы. Туж зол школае шеди, коллективзы визьмо, йӧно, нылпиос сабырлыесь но кылзӥськнсесь вал. Соку нылпиосын туж зол ужамы. Урокъёсы, рос-прос дасяськыса, ветлылймы. Пинал «2» басьтэ ке, возьыт вал ини, со понна астэ янгышен шӧдйськод. Ляб нылпи¬осын урокъёс бере пукылоно луылӥз.
Практикаын дыръям, Можгаын дышетыкум ай, туж тунсыко учыре шедьылй Акашка нунал азьын вал со. Вазен вӧсяськонэз-мае тодйсь ӧй вал. 4-тй классэ пырисько. 32 кузя нылпиос шып гинэ пуко, шорам паймыса кадь дол учко. Умойтэм дйсяськиськем ке шат меда шуыса, копак кышкатски. Ӝӧк вылэ вӧлдэм газетэз басьтй но воксё пайми: йуж, горд, вож, льӧль курегпузъёс отын тыремын. Мон, атеист, тае адӟыса, мар вера¬ны ик ӟудӥ. Но нылпиосты обиде уськытэме ӧз поты, тау, тау, пиналъёс, шуисько, урокъёс бере ваньмы йош та курегпузъёслэсь салат лэсьтом, пельнянь кутом. Озьы ик каримы. Нылпиосын сюл- мысьтымы пӧраськимы, ческыт сиськимы.
- Безменшуре ик выжы лэзиды, луоз?
- Слава Петровлы бызи. Туж умой семьяе сюри.
Но вакытэз сыйе вал, кошкемед потэа, уга, юась ӧй вал. Кизнер райкоме, школаосын ужанъя отделэ, инструкторе басьтӥзы. Соку мыным быдэс районэн ужано из. Вань школаосы вуылймы, уен-нуналэн сюрес вылысь ӧй пыралля. Кынмонъёс но шедьылйзы, дыр, но сое пинал дыръя валано ӧвӧл. Кивалтйсьёс тыршемме синйылтйллям, лэся, отйяз роное ӧтизы. Соку мон ёросысь дышетйсьёслэн профсоюзэнызы кивалтй ини. Таня нылы Безменшурын вордскиз вал. Алёшаме ваёно кариськи на. Пиеным ар но пукыны ӧз сётэ, ужаны потыны косйзы - бырйы, пе, роноена кивалтод яке калыклы юрттэт сётонъя отделэна? Кытчы пырод, партия косэ бере, роноен кивалтыны кутски. Уже туж секыт ке но, сюлэмыя вал. Калыкен одйг кыл шедьтыса, ужаны тырши. Дышетон сярысь гинэ сюлмаськоно ӧвӧл, улон инты но кулэ, нылпи садэ но пу¬тёвка куро. Со вакытэ трос пинал вайылӥзы - ёросамы 5 сюрс нылпи вал. Школаос сяна, нылпи садъёс но мон киын на. Но шумпотыса вераны быгатйсько, со аръёсы ёросысьтымы нылпи¬ос республикаысь трос пумо олимпиадаосы но пӧртэм йошатсконъёсы пыриськылйзы, вормисьёс луыса бертылӥзы.
Партия косэмъя нош ужез воштоно луиз - исполкоме секретаре выжтйзы. Отйяз райкомлэн председателезлэн воштйсез лун. Ныпъетэ секытгес луиз. Озьы ке но улонын эшшо мар ке но уг тырмы на кадь. Калык понна мар ке но выльзэ лэсьтэме потыны кутскиз. Соку мон Нациосын ужанъя комитетэн кивалтйсен Светлана Смирноваен тодматски. Со юрттэмъя кылдытй ёросысь пӧртэм калыкъёслэсь культур азэс азинтонъя центр. Ужмы интыысьтыз вырӟиз, калык сое аръёсын возьмам кадь. Ортчытъяны кутскимы фольклор праздникъёс но пӧртэм пумиськон ӝытъёс, бигеръёслы Сабантуй но удмуртъёслы Гырон быдтон радъямы. Огъя кужымен Мултан ужлы 100 ар тырмонэз пусйимы. Отчы Финляндиысь но, Эстониысь но, Венгриысь но куноосты ӧтчамы. Республикаысьтымы синпелетъёсты утёнъя огазеяськонлэн кивалтйсез Зинаида Боткина юрттэмен, Короленко черкогуртэ сюрес но черк лэсьтймы, В. Короленколы памятник усьтыны быгатймы. Со гуртэ ик 50 интыем нылпи сад лэсьтймы.
1990-тй аръёсы секыт луиз ужаны. Уксё ӧвӧл, уждун уг тыро. Со вакытъёсты малпаса, юзыр-кезьыр луоно. Шуген-секытэн ке но, Кизнер каргуртын анай-атайтэк кылем пиналъёслы интернат усьтймы. Секыт сямо нылпиос отын улйзы, ог-огзэс обидё, жальзылы чидан ӧвӧл. Правительстволэн Тӧроезлэн воштйсез Антонина Лисина юрттэмъя, интернатэз типовой карыны быгатӥмы. Механизаторъёсты, йырси йышкисьёсты но пӧраськисьёсты дасянъя 30 номеро училище усьтймы.
- Ёросады «Удмурт Кенеш» огазеяськонлэсь ёз- зэ тй кылдытйды.
- Трос ужано луиз соку Мыло-кыдо удмурт адями- осты утчано-шедьтоно вал. Ёросамы удмурт писательёс, журналистъёс но тодосчиос вуизы. Соосты Вуж Бӧдья гуртэ нуимы. Отын Удмуртъёслэнтй съездазы делегация бырӥимы. Саесъёсмес пужалляса ужамы.
- Иже вуэмдэс ноку Од жалялэа?
- Монэ Светлана Смирнова комитетаз ӧтиз. Мыным, пе, тӥ кадь воштйсь кулэ. Татын но калыкен ужано луиз, трос гинэ ёросъёсы поталлямы. Кам сьӧр удмуртъёс доры ветлэммы али ке но тодам улэ на. Писательёсын но журналистъёсын, Пичи Пурга ёросысь Эдэйгуртысь нылкышноослэн «Арганчи» ансамбленызы Башкортостанысь Татышлы ёросэ удмурт культуралы сйзем нуналъёсы вуылймы. Вунонтэм, нокызьы вераны луонтэм нуналъёс вал со. Ринат Галямшин, удмуртъёслэн азьветлйсьсы, я сояз, я таяз гуртэ пумиськонэ нуэ, школаосы вуттылэ. Тйни озьы калык эшъяське но огазеяське вылэм.
Кузпалы осконтэм адями луысал ке, Кизнерысь ӧй потысал, дыр. Куать но ӝыны ар огпалась мукет пала ветлй. Кизнер ведь Ижлы матын ӧвӧл, 200 иськем пала луоз. Пятница ӝыт лобыса сямен доре бертйсько, арняе Иже кошкон дыр вуэ ини. Семьяеным адӟиськыса ик ум вуттйське кадь. Пие соку 8-тй классын дышетскиз. Со но, атаез но городэ мыныны пумит луизы. Милемлы улон инты но сёто ни вал, огзылэн но Кизнерез городлы воштэмзы ӧз поты.
- Шутэтскыны потыса но, тэк улонэз уд тодылӥське, удмуртлыкез ӝутон понна сюлмаськиськоды.
- Кизнер ёросысь «Удмурт Кенешлэн» ужаз пыриськисько. Отысь эшъёсыным кемагес уг ке адӟиськиськы, мӧзмыны кутскисько. Али ёросысьтымы «Удмурт Кенешен» кивалтэ Антонида Покошева. Солы, вань сюлэммес но тодон-валанмес сётыса, юрттӥськиськом. Кема аръёс йоже ини йош ужась- ком Кизнерысь Надежда Столбоваен, Валентина Рассомахинаен, Безменшурысь Серафима Петроваен. Кылем арын бадӟым ыштонэз адӟи, секыт висемез бере улонысь кошкиз кузпалы.
- Пиналъёсты котырады уло, дыр?
Алёша пие дорам улэ. Монэ нуналлы быдэ солэн Лиза нылыз шумпоттэ. Пырак пичи муртэ сямен, шудыны ёртыса, возе. Таня нылы Москваын улэ. Солэн Илья но Женя пиосыз быдэ вуэмын ини. Мон асме гурт адямиен шӧдйсько. Улытозям пудо вордӥ. Гужемзэ бакча котырын бергасько. Кызьы музъем ужтэк улод, со адямиез бурдъя но, эмъя но.
За предоставление материала выражаем огромную благодарность редакции газеты "Удмурт дунне"
