Туганаев Виктор Васильевич

«Вож» мурт

В. В. Туганаев

Асьмеос, удмуртъёс, анаймы ласянь ӵыжы-выжыосмес "ӵуж" кылын герӟаса нимаськом: ӵужапай, ӵужатай, ӵужмурт но мукет. Нош табере республикаямы "вож" муртъёсмы но луозы ни. Куинь муртлы сётэмын 2000-тӥ ар понна "Вож адями" ним. Соос пӧлысь одӥгёз - биология наукаосъя доктор, Удмурт кун университетысь профессор, Россия Федерациысь но Удмурт Республикаысь наука удысысь дано ужась В. В. Туганаев.

- Виктор Васильевич, тӥ ялэмын Удмуртилэн 2000-тӥ ар понна "вож адямиеныз". Нош кин малпаз таӵе нимез? Кинэ данъяло та нимын?

- Арлы быдэ республикаысьтымы одӥг муртлы "вож адями" ним сётъян пумысен кичӧлтонэн потӥз вал элькунысьтымы Инкуазез утёнъя комитет - озьы нимаськиз со соку. Таӵе нимын одӥг муртэ пусйыны малпамын вал. Нош баллъёс одӥг мындагес люказ куинь мурт. Соин ик кенешемын вал одӥг учёноез, дышетӥсез но пенсионерез бырйыны. Тӥни озьы мон но куинез пӧлысь одӥгез "вож адями" луи.

Туж шумпотӥ та нимлы, малы ке шуоно, со тупа мынам ужелы, профессиелы. Мон - биолог, эколог, ботаник. Соин ик будосъёсын, инкуазез дышетонэн-утёнэн меӵак герӟаськем муртлы таӵе ним ӵапак тупасез.

- Тӥляд быдэс улонды зэмзэ но сӥземын вож дуннелы. Нош вож буёл улонамы бадӟым инты басьтэ. Со улон сётэ кадь, котькуд тулыс инкуазь улӟе-вожектэ, дунне сайка. Тӥ яратӥськоды-а вож буёлэз?

- Вож буёл кельше. Тани мынам книгаосы вань: "Зелёные спутники человека", "Встреча с зелёными друзьями", дасямын куинетӥез - "Зелёный храм науки". Мынам ужъёсы трос гинэ. Нош нылпиослы научно-популярной книгаосылэн куинезлэн ик нимъёссы герӟаськемын "вож" кылын. Буёлэз гинэ ӧвӧл, кылыз но кельше, удмурт сямен "вож" но, ӟуч сямен "зелёный" но. Мон уг шуиськы, вож - со кисьмамтэ, еж яке быдэ вуымтэ кадь, вож - со зэмос инкуазь буёл, тужгес умоез но кулэез буёл. Малы ке шуоно вож пигментъёсын, хлорофиллъёсын кылдытӥсько органической тырметъёс, кудъёссэ пудо-живот, ваньмыз сямен улэп макеос но адямиос сиё. Асьмеос туж юн герӟаськемын вож буёлэн.

- Виктор Васильевич, тӥляд зэмзэ но трос, кык сюлэсь ятыр, научной ужъёсты печатламын. Нош асьтэос кудзэ тужгес дунъяськоды?

- Дуногес луо берло аръёсы потэмъёсыз. Азьло кыӵе ке нимаз ужпумъёс бордын ужасько вал, шуом, ботаникая, агрофитоценологияя, экологияя. Нош берло 5-6 арзэ философие выжи, шуыны луоз. Утчаськыны кутски, валаме потӥз, кыӵе та улон, кыӵе азинскон сюресъёстӥ мынэ со. Кин со адями, малы кулэ дуннелы? Мар со будосъёс, лулосъёс? Малы ваньмыз со умой-умой радъяса тупатэмын музъем вылын? Музъем улон кызьы герӟаськемын инсьӧрен (космосэн)? Мон со сярысь трос гожъяй ни, та ужпумъёсъя калык куспо кенешон но ортчытӥ. Со берло ужъёсы, пыр-поч малпаськыса, пумозяз вуттэмын ӧвӧл на. Нош озьы ке но соос мыным тужгес но кельшо.

- Виктор Васильевич, нош кыӵегес вал инкуазен сокем эшъяськондылэн кутсконэз?

- Школаын дышетскыкум ик мынам туж потӥз Алнаш палъёсме пыр-поч тодэме. Быдэс ёросэз пыдын ортчи, шуыны луоз, бен ваньмаз ик гуртъёсы вуылыны ӧз кылды. Ветлӥ Можгала но. Туж адӟеме потылӥз городэз. Нош отчы вуи но, чылкак пайми: Алнашлэсь номырин пӧртэм вылымтэ. Нош со понна нырысьсэ адӟи чугун сюресэз.

Отӥяз, институтын дышетскыкум ни, одӥг эшеным малпамы быдэс Удмурт шаермес пыдын ортчыны. Со но мон кадь ик ас дуннеяз усем мурт вал. Пӧртэм интыосы вуылӥм, Воткинске но пыдын ветлӥм.

Собере, Казаньысь аспирантураын дышетскыкум, диссертацие борды басьтӥськи, сӥземын вал со нёжал возьёслы. Соку Кам но Ватка кузя ортчи. Кам дуртӥ Гольяныысен Алабгоозь васьки.

- Озьыен, тӥ дышетскыкуды ик рос-прос малпады ни улондэс наукаен герӟаны...

- Туж тунсыко вал угось. Пичиысен ик инкуазен герӟаськемын вал бере, та удыс ик юнгес кыскиз бордаз. Собере огвакытэ тунсыкъяськылӥ Ленинлэн биографиеныз. Ветлыны тырши солэн вуылэм интыосаз. Нош ик аслым бырйи Волга но Кам шуръёс котырысь интыез. Олокыӵе но учыръёсы сюрылӥськиз. Коньдон ӧй вал, но дунтэк ветлыны амал шедьтылӥм, адямиос юрттылӥзы.

Собере кутски Николай Иванович Вавиловлэсь улэм сюрессэ дышетыны. Пӧртэм интыосысь шедьтылӥ солэсь дышетскем эшъёссэ. Вуылӥ лымшор пал Туркменистанэ. Одӥг эшеным ветлӥм Вавиловлэн ортчем сюрестӥз. Кыӵе ке малпанэд вань ке, улыны но тунсыкогес. Дуннеез адӟеммы, отӥ-татӥ ветлэммы туж уно сётӥз.

Пумиськылӥ Ленинлэн Казаньысь музеяз ужась кышномуртэн. Со ачиз но Ленинэн пумиськылэм. Со ик шуиз соку, тон, пе, пинал эше, Ленин шоры эн учкы, инмар шоры кадь. Озьы учкид ке, янгышалод, со, пе, инмарлы сярысь, сатаналы матынгес. Нырысь-валысь курдай, таӵе кылъёсты кылыса. Берло гинэ валамы ни. Учке ай, кӧня калык быремын революция но граждан ож дыръя! Со кышномуртлэн аслаз учконэз вал. Таӵе пумиськылонъёс ик синмез усьтылӥзы.

Пинал адями понна валтӥсез мед луоз кыӵе ке но бадӟым малпан, ӟуч сямен вераса - цель. Со туж трос сётэ. Юон, кыскон яке мукет кыӵе ке алама малпанъёс йырын ик ӧй вал. Вал улон-вылонмес, котырысь инкуазез, дуннеез валаны тыршон.

Туж потылӥз тодылымтэ-адӟылымтэ будос шедьтэме. Шедьтӥ мон сое Удмурт шаерысьтымы ик - Кам дурысь Соколовка гурт дорысь. Соку ик Наукаосъя академилэн ботаникая журналаз статьяме ыстӥ. Со ик нырысетӥез научной статьяе луиз. "Коломия линейная" нимаське со турын-куар. Табере пӧртэм интыосы вӧлмемын ни. Мон сямен со асьме пала вуэмын 1942-тӥ арын. Соку Америкаысь пӧртэм вузъёс вуттылӥзы. Отысь ик вуиз, луоз, тысез. Тӥни озьы, ветлэм, утчам юнме уг луы.

- Табере Удмурт шаерысьтымы тодымтэ-адӟымтэ будосты ик ӧвӧл ни, дыр...

- Соос ведь туж уно: асьме шаерамы сяськаясь будосъёс 1700-лэсь ятыр. Выльёсыз но пумиськыло на. Троссэ тодӥськом ни бере, соосты шедьтыны но капчигес. Тани, шуом, вероникаос дас кык пӧртэм. Пермь областьын, Башкортостанын вань бере, асьмелэн но соос луыны кулэ. Утчаськод ке, шедьтӥськод. Но со понна будосъёсты ӟеч тодыны кулэ.

- Виктор Васильевич, сӥзиськом тӥледлы выль шедьтосъёс. Оло, кыӵе ке будослы выль удмурт ним но сётыны кылдоз...

- Удмурт мушмы вань ук. Со сярысь наукалы тодмо ни, "пчела удмуртская" нимаське. Асьмелэн специалистъёсмы вань. Соос ог 16 пӧртэм выль будосъёсты шедьтӥзы ни. Но со сярысь гожтыса ӧз вуттэ на. Ма сярысь вераны тодозы Николай Геннадьевич Ильминских, Ольга Геннадьевна Баранова, мукетъёсыз.

- Возь чеберлы котьку но паймиськом. Нош берло дыре син шоры ӵем гинэ йӧтыло пашмем интыос...

- Соиз озьы. Чеберзэ утьыны ум быгатӥське на. Тани, кылсярысь, Голюшурма палъёстӥ трос пол гинэ ортчылӥм. Кыӵе возьёс вал татын Кам шурез ӵыпемлэсь азьло. Али та интыос аналтэмын. Кам кузя баржаосын лэсьтӥськон кӧльы, луо вортто, татчы люкало сое. Табере азьвыл туж шулдыр интыын пустыня будосъёс аляло. Лымшор палась вуо соос. Инкуазьмы сӧриське. Мон трос пол вазиськылӥ ни Экологияя но ву хозяйствоя комитетъёсы. Чебер интыосмес саптасьёсты кыл кутытӥсь озьы ик ӧвӧл ай.

- Инкуазьлы, сое утёнлы сӥзем уно книгаосты вӧзы ватсаськиз на туж бадӟым уж - Удмурт Республикалэн энциклопедиез. Со бордын но тӥ трос гинэ ужады. Та пумысен ма верасалды?

- Ми та книга бордын туж кема ужамы. Солэн авторъёсыз ньыль сюлэсь уно. Энциклопедия кылдытон сярысь малпан лыктӥз ог дас ар талэсь азьло. Утчай та уж борды басьтӥськыны мылкыд карисьёсты. Дас кык кузя люкаським. Дасямы ужан план-программа. Ветлӥ Москваысь энциклопедияя издательствое, отын ик ас поннам кыӵе ке но школаез ортчи. Учкылӥ пӧртэм кунъёслэсь энциклопедиоссэс, чаклай, кызьы ужало азьвыл совето республикаосын. Собере кутскимы ужаны. Удмурт Республикаысь Правительство милемлы та ласянь дурбасьтӥз.

- Энциклопедия борды историкъёс басьтӥськыны кулэ вал кадь... Тӥ биолог. Кин ке ӵектӥз-а, асьтэос-а мылкыд кариды та бадӟым ужез мытыны?

- Мынам ӝыныез творческой улонэ библиотекаосын ортчемын. Данак энциклопедиосын тодматскыны кылдӥз. Туж вожъяськылӥ соосты поттӥсьёслы. Тӥни соин но, дыр, малпан кылдӥз асьме элькунмылэсь энциклопедизэ дасяны. Собере та уж бордын историкъёс гинэ ужаны кулэ ӧвӧл. Тани та бадӟым книгаын 26 люкет. Бадӟым гинэ инкуазьлы сӥземез. Мон сямен энциклопедия котькуд адямилы одӥг кадь матын но, одӥг кадь ик кыдёкын. Историклы каньылгес, дыр, историлы сӥзем люкетсэ дасяны, мукетызлы - мукетсэ. Историк трос уг тоды биология сярысь яке биолог мукетыз сярысь. Кулэ ужез радъяны быгатӥсь мурт. Мон басьтӥськи та удыс борды но, огъя кужымен ми сое быдэстӥм.

- Та энциклопедиды бадӟым тӧдьы виштыез быдтӥз, шуыны луоз. Шаермылэн историезъя но мукет удысъёсъя дышетскон книгаосмы но асьмелэн ӧжыт ук ай. Озьыен, со тросэзлы ӟеч кузьым луоз...

- Энциклопедия зэмзэ но шаеренымы тунсыкъяськись туж трос адямиослы юрттоз. Со дуно ке но, уно пӧртэм книгаосты воштэ. Со возьматэ, кызьы асьмеос улон-вылонмес, историмес, инкуазьмес но мукет удысъёсты тодӥськом, нош мае тодыны кулэ на.

- Выль арен, выль даурен тӥледды, вань малпанъёсты мед быдэсмозы. Нош выль дауре выжемен валче, ма сӥзьысалды тӥ удмурт калыкмылы?

- Удмурт калыкмы каньылля валаны кутске ни та улонын интызэ, вала ни, ачиз ке ӧз, пыд йылаз султыны нокин уз юртты шуыса. Юн валан ке вань, адями но, калык но шедьтэ аслэсьтыз сюрессэ. Удмурт калыклы чутрак воштӥськыны кулэ, ляб сямыз мед быроз, медаз курда шуг-секытлэсь. Шуд - уж бордын, уж - тазалык бордын, адямилэн шудэз - нылпи бордын. Нош удмуртъёс али ӧжыт нылпи вордо. Таиз алама ни.

Источник:

Туганаев В. В. «Вож» мурт / В. В. Туганаев ; записал Федор Никитин // Удмурт дунне. - 2001. - 12 янв. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"