Кузнецов Геннадий Васильевич

Милям артистмы!

«Мон – шудо адями», - шуэ ачиз сярысь тодмо кырӟась но крезьгурчи, Россиысь дано артист Геннадий Васильевич Кузнецов. Вордскиз со Татарстанысь Балтаси ёросысь Ципья гуртын 1955-тӥ арын 7-тӥ августэ. Ижкарысь культурая училищеез йылпумъяса, дасо арлэсь кема ужаз «Италмас» ансамбльын. Али «Айкай» коллективын тырше.

- Геннадий, нырысь ик тодэм потэ, кызьы тон сцена вылэ вуид?

- Мыным та ласянь удалтӥз, шуыны луэ. Ципья палъёс кемаласен тодмо кырӟаны-вераны, эктыны-шудыны быгатэменызы. Милям семьямы но та ласянь быгатонлыкеныз висъяськылӥз. Атае, Василий Иванович, туж усто шудылӥз кубызэн (скрипкаен). Крезьгуран амалэз но паймымон вал. Мукет шудӥсьёс бам бордазы ӝиптыса смычоксэс кыскало ке, атае кубыззэ пыдес вылаз пуктыса шудылӥз. Кыӵе гинэ гуръёс ӧз пӧрмытъя, ваньмыз сюлэме пыӵало вал: угось атаелэн гурез, дырекъяса сямен, адями куара кадь чузъяськылӥз. Сыӵе гур кылдытон понна со кубыззэ пыдесыныз куалекъятэ вал. Одӥг пол, тодӥсько на: кырын ог кызь градус кезьыт, соос ваньзы казакъёс кадь дӥсяськемын, туж тазаесь, кужмоесь воргоронъёс, атае кубызэн шудэ. Кӧня егитъёс адӟизы-кылӥзы солэсь та амалэн шудэмзэ! Гуртысь одӥг сюан но, мукет шулдыръяськон но сотэк ӧз ортчылы кадь. Атае кемалась кулӥз ни, но солэн скрипкаен шудэм гуръёсыз али ке но пель сьӧрам чузъясько кадь. Анае Мария Семёновна егитгес дыръяз чебер куараеныз висъяськылӥз. Солы сентябре 84 арес тырмиз ни.

Ми будӥм асьмеды асьмеос шулдыртыса. Самодеятельностьын кырӟай, эктӥ, духовой оркестрын шудӥ. Вал дӧдьые пуксьыса, котькыӵе куазен мукет гуртъёстӥ удмурт спектакльёс пуктылыса ветлӥм. Мынам соку ик сценатэк улэме уг луы ни вал. Дас классэз йылпумъяй но Кузонэ шонтӥ. Малпай отысь крезьгуро училищее пырыны. Быгатэмме эскеризы но ... армие ветлы, шуизы. Мар карыны паймыса, кӧня ке толэзь «Сельхозтехникаын» слесарьын ужай. Собере сюлэм нош ик ӧз чида. Культпросветучилищее пыри. Но дышетскыса ик ӧй вуы: колхозэ картошка октыны ветлӥмы но, со сӥзьылэ ик армие басьтӥзы. Со вал 1973-тӥ арын. Сюри Латвие, военно-транспортной авиацие. Белоруссиысь, Украинаысь но мукет интыосысь лыктэм пиосын ӵош отын ми вокально-инструментальной ансамбль кылдытӥм. Трос концертъёс сётылӥм. Мон ударной инструментэн шудӥ, кырӟай. Озьы кык ар лобӟиз. Культпросветучилище бере А. Мамонтов монэ «Италмасэ» басьтӥз. Отын 1990-тӥ арозь ужай. Со дыр куспын Россиысь сӥё-дано артист луи...

- Россиысь дано артист ним басьтэмед тынад туж паймымон кадь.

- Озьы. Азьвыл аръёсы Москваын ансамбльёслэн конкурсъёссы-фестивальёссы ортчылӥзы. Огполаз мыным диплом сёто но, отын Удмуртиысь дано артист гожтэмын. Но со улэ азьвыл Союзысь вань корифейёс гожтӥськылӥзы ук. Сыӵе паймымон учыр берегес ик, элькунысь дано артист луытэк, Россиысьсэ сётӥзы. Та нимез басьтэм асьме артистъёс пӧлысь мон тужгес егитэз вал, дыр.

- Собере «Айкае» кошкиды?

- Ужа но ужа вал. Но... ми яна потыны малпамы. Выль коллектив кылдытонын кичӧлтӥсьёс луизы Короленко нимо Ӟуч театрлэн кивалтӥсез В. Данилов, тодмо кырӟась но крезьгурчи Г. Корепанов-Камский, баянист Николай Широких... Озьы, «Италмасысь» тросэз валтӥсь артистъёс кошкыса, 1990-тӥ арын «Айкай» коллектив кылдӥз. Кутсконэз туж секытэн сётскиз: крезьгуро инструментъёс но ӧвӧл, дӥськут но утчано-малпано. Милям угось коллективмес калык азе быдэсак вашкала удмурт дӥськутэн поттыны мылкыдмы вал. Ваньзэ чидам-вормим. Концертъёсын гуртэ потӥськом ке, нырысь ик коркась корка ветлылӥм, пересьёслэсь сандыкъёсысьтызы вашкала дӥськутсэс дуно дунын но октылӥм.

- «Италмас» ансамбль быдэс дуннелы тодмо. Уг луы вал-а со коллективын ик асьтэды возьматэмды?

- Отын азьло дыре адями аслыз робот кадь потэ вал. Шонерзэ верано ке, мар тонэ лэсьтыны косо, сое ужаськод. Зэм, пӧртэм образъёс асьмеос ик кылдытъяськом но малпаськом вал. Но соин гинэ адямилэн быдэсак луонлыкъёсыз уг усьтӥсько. Малпанъёсмес быдэсъяны милемлы ӧз тырмылы эрик. Мон Анатолий Васильевичез валасько. Кыӵе кивалтӥсьлэн быгатӥсь артистъёссэ палэнэ лэземез потоз?! Выль артистэз дасян – со туж секыт уж. Нош ми, кызьы верай ини, огдыре трос кузя кошким. Оло, соин ик газетъёсын милемыз «предательёс» шуыса гожъязы. Концерт пуктыны азьвыл зал но ӧз сётылэ. Быгатэммес возьматӥм, калыклы кельшиз. Тодмо кылбурчи Герман Ходырев ми сярысь газетын туж умой, шуныт статья поттӥз. Со но юрттӥз сьӧдмамлэсь палэнтыны. Зэм, али но вань уродзэ верасьёс. Туннэ нуналозь милесьтым быреммес возьмало кадь...

- Геннадий, тон пиналысен ик артист луид. Со дан кызьы шӧдӥське улонад?

- Дан адямилэн ас бордысьтыз потэ. Тазьы но луэ улонын. Кинлы ке данъян грамота но, Удмурт Республикаысь дано артист ним но монъяськыны тырме. Соку ик йырзэ вылӥе ӝутэ. Мон но данъяськисько вылӥ дунъяменызы. Но со понна туж ужасько, туж трос. Малпасько, азьланезлы вань ай эшшо бадӟымесь луонлыкъёсы. Соосты улонэ пыӵатоно. Ачим кырӟанъёс но гожъяны кутски. Тани кассета поттӥ. Вань ни выльёсыз но ужъёсы. Кылбур пӧраме уг луы бере, дасьёссэ басьтӥсько. Крезьгур гожъян – со мон понна хобби, шуод-а, мар-а.

- Кызьы крезьгур гожъян борды кутскид?

- Сыӵе учыр тупаз. Концерт вал. Со нимаськиз «Кырӟало ньыль Геняос». Концерт азьын малпаськонэ уси: «Бекманов но, Ганьков но, Корепанов-Камский но – ваньзы отын асьсэ гожтэм кырӟанъёссэс быдэстозы. Нош мон? Шедьтӥ Геннадий Камашевлэсь, таиз витетӥ Геннадий луиз ни, «Льӧмпуэ» кылбурзэ. Собере Михаил Федотовлэн, Алла Кузнецовалэн но мукет кылбурчиослэн чуръёссыя гуръёсы пӧрмизы.

- Кыӵе крезьгуро инструментъёсын тужгес но яратыса шудӥськод?

- Уг быгатӥськы улыны аргантэк, сюлэмлы матын жалейка. Гитараен, ударникен, флейтаен, ымкрезен шудӥсько.

- Нош маин шудэмед потэ, но уд быгатӥськы?

- Мынам туж шудэме потэ крезен. Малпанэ вань со улсын кырӟаны. Со сяна, ымдур гармошка улсын кырӟаме потэ на.

- Аслэсьтыд творчестводэ кызьы дунъяськод?

- Творчествоелэн азинскемез али тубатлэн шораз вуэмын шуысал. Малпанъёс туж бадӟымесь. Но мон соосты уг шараяськы на, лушкем гинэ пушкам возисько. Огинтыын сылэм уг поты. Тани ураметӥ ортчыкум, пересьёс но, егитъёс но дугдыто, тау каро. Кызьы солы уд шумпоты. Соин быгатэмме эшшо но золгес волятэм потэ. Одно ик азьланьто кырӟанъёс гожъянме.

Артистлэн ужез капчи ӧвӧл. Егитъёслы мар дэмласал? Куд-огез соос, умой-умой сцена вылэ потатэк, фонограмма гожто но асьсэды туж яркыт кизилиен лыдъяны кутско ни. Сцена вылэ потыса, тон котыр ласянь кельшымон мед луод. Калык соку ик учке выросъёстэ но, дӥськуттэ но, кырӟаны-вераны быгатэмдэ но. Учкисез уд алда. Нош со быгатонлык ас кожаз уг лыкты. Ужаны кулэ, туж трос ужаны. Кыӵе ке образ кылдытон понна синучкон азьын астэ чаклано. Туж чаклано кырӟан-веран кылъёсты.

Егит муртлэн котькыӵе удысын кумирез луыны кулэ. Тон но быръем адямиед кадь ик быгатӥсь мед луод, вылӥе ӝутскыны мед тыршод. Мон та ласянь троссэ адӟем карылӥ Муслим Магомаевлэсь но Валерий Ободзинскийлэсь. Удмурт кырӟасьёс пӧлысь тужгес но вылӥе пуктӥсько Григорий Титовез но Кузьма Ложкинэз.

Мон кырӟанэн йырин дышетсконын но ыштонъёс адӟи кадь. Тямысэтӥ классозь «куиньёстэк» дышетски. Мар луэмзэ ачим но уг валаськы. Тросгес кырӟаны кутски-а, мар-а. Тужгес ӝужыт гурезь йылэ султӥсько но бадӟым куараен кесяськисько вал. Магомаев сямен кырӟасько кадь потэ вал. Будэмъя куарае воштӥськиз. Мон сыӵе кышкай, азьланяз кырӟаме уз луы ни шуыса. Кызьы но бадӟым куара поттыны ӧй вырылы. Огпол гуртамы ву кыскон-сётон башня лэсьтыны ӧдъязы. Сое ӝутэмлэсь азьло мон пушказ пырисько но зол куараен кырӟасько. Вот таиз куара ке куара ни! «О-о-о!» - шуыса кеськиськод но – пумитад «У-у-у!» вазиське. Туж паймымон потэ вал со мыным.

Верай ини, гуртамы соку туж зол самодеятельность азинскиз. Отын мон бигер но пор кырӟан-эктонъёслы дыши. Огез жаль – пор кылэз уг тодӥськы.

- Нош кӧня кылъёсты тодӥськод?

- Бигер кылэз тодӥд ке, оло, быдэс дуннеен вераськыны быгатод (серекъя). Куинь кылэз: удмурт, ӟуч, бигер. Бигер кырӟанъёс али но кырӟасько. Базаре мынӥсько ке, монэ «милям адями» гинэ каро, малы ке шуоно Балтаси ёросын бигеръёслэн вераськонзы литературнойлы матын, лэся.

- Нош кызьы Кузнецов артист аслэсьтыз куаразэ уте? Тенор куара тужгес но ненег, ӝог вӧсь луэ, пуксе.

- О-о, мон тенор. Сюэ ке но куасьме, гужем тани кезьыт ву уг юиськы. Мороженой но уг сииськы. Секыт йӧтэ ке, чылкак вераськытэк улӥсько. Сокем жадисько, дорын но шып возиськисько. Мон понна со эмъюм луэ. Тамак уг кыскиськы. Пинал дыръя пичиен выри вал. Атае огпол вераз: «Тамак ноку но эн кыскы (ачиз со кыскеменыз туж зол кызэ вал), юыны пичигес юылы».

- Удмурт калыклэн кыӵе манерыз тыныд тужгес но кельше, нош кыӵе сямызлэсь со мед куштӥськоз кадь?

- Удмурт калык котьку но адямиез умой пумита, ӧвӧлзэ но вань карыса сётыны дась. Туж валась, муртлэсь пуштроссэ шӧдӥсь. Туж уг кельшы адямилэн, кызьы милям шуо, закранэз – сьӧд вожъяськонэз, чагиськонэз, нырзэ вылӥе ӝутонэз, кыл вӧлдонэз...

- Шудо-а тон?

- Таин валче тодам лыктэ таӵе учыр. Культпросветучилищеын дышетскыкум, ми куинь кузя Кезысь лесобазае практикае ветлӥм. Отысь клубез утялтӥсь мынэсьтым кырӟам-эктэмме учке но тазьы шуэ вал: «Кыӵе меда улонэд тынад? Кырӟась мурт, пе, шудтэм ук». Али ке но со кышномуртлэн верамез пель сьӧрам кылӥське кадь. Соку сямен ик, туннэ но шуисько: мон – туж шудо!

Источник:

Кузнецов Г. В. Милям артистмы! / Г. В. Кузнецов; записал А. Ельцов // Удмурт дунне. - 2007. - 7 дек. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"