Пудова Валентина Тихоновна
Мон шудо – мон кырӟасько[править]
Валентина Пудоваен синмысь синме пумиськеммы дырысен ортчиз сизьым ар. Соку со луиз вал Удмурт Республикаысь калык артистка. «Удмурт кизилие» гожтыны малпатозям кырӟась эшшо но даногес луиз: таяз учыре со – Россия Федерациысь дано артистка.
Пумиськыны вераськыкумы, Валентиналы шуи, дасяське «экзаменлы», оломар сярысь но юаллясько. Шуэ, иське, мон быдэсак сямен усьтӥськыны кулэ? Ярам, тыршо.
Озьыен, кутскиськом экзаменмес.
- Валентина, кырӟаны быгатэмдэс сокем вылӥ дунъямзы бере, мылкыдды лопырскемын, луоз? Малпасько, учкисьёсты понна но со бадӟым шумпотон.
- Тросэз понна, оло, зэмзэ но шумпотон. Но вань вожъяськисьёс. Сое мон шӧдытэк уг улӥськы. Мылкыд суро-пожо соин но, дано ним сётон сярысь мон азьлогес кылӥ ни вал.
- 1993-тӥ арын Удмуртиысь калык артист дано ним сётыкузы но, мылкыдды сыӵе вал-а?
- Ӧй. Соку мон понна со шуак вал. Декабрь толэзьлэн шораз «Ижмаш» культура дворецын нимаз концерт сётыкум, сцена вылэ потӥз культурая министр Аннетта Петровна Сидорова. «Айкай» фольклор театрын сокугес гинэ ужаны кутскеме бере сыӵе дунъет мон понна шӧдтэк шорысь вал, соин – шумпотонэз но бадӟымгес.
- Ӟечкыласа жингыръясьёс но ӧвӧл, шуоды-а?
- Ой, туж трос. Ужысь но, дорысь но телефон уг чалмылы. Гуртэ бертӥсько ке, ӝытбыт телефон вылын пукисько. Дас одӥг час бере гинэ кухняе потыны ваньмисько. Уд шуы ук: дыры ӧвӧл. Бадӟымъяське кожалозы. Котькудӥз малпа ук, со гинэ жингыртэ шуыса.
- Со ик бадӟым дунъет ӧвӧл-а та аръёс ӵоже будэмдылы, творчестводылэн азинсконэзлы?
- Бен, дано ним юнме шорысь уг сёто, дыр. Та аръёс ӵоже трос ужамын. Ас поннам кык-куинь кырӟан быдэстыса хорын кырӟан монэ ӧз буйгаты ни. Татарстанын, Башкортостанын но мукет республикаосын вань солистъёссы, нош малы асьмелэн луыны кулэ ӧвӧл? Озьы «Айкайысь» кошконо кариськи.
- Валентина, со пумысен трос кыл кылоно луиз, дыр?
- «Жугонъёс» шоры учкытэк, мон вань улытозям ӝабырскыса ик выллане ӝутскыны турттӥсько.
- Мар понна «жугылӥзы»?
- Кытын гинэ ӧй ужа, котькытын тыш сюрылӥз, но азинсконъёс мон басьтылӥ аслам уженым, ваменэс сямыным. Дас сизьым арескын ужаны лыктӥ «Италмасэ». Гуртысь потэм мае ке кӧня мактазы, серекъязы, ваньмыз уз чидалэ сое. Туж ӝож ке но вал, возиськыны выри. Нырысь бӧрдылӥ но миндэре котмымон.
«Италмас» бӧрсьы кошки «Ижсталь» заводэ. Туж дӥсьтытэк кутӥзы монэ уже: валаськод-а, пе, коть мар со сыӵе завод? Семьяямы куатетӥез, самой пичиез, нылпи луэмме тодэмзы бере шуо, тон, пе, татын уд ужа. Берытски но кошки. Со вал 27-тӥ цех. Вазиськи 16-тӥ цехе. Кутӥзы. Но татын туж секыт вал ужаны. Сурым, вӧй зын. Ужано куинь сменаен. Куарае ик быриз. «Металлург» культура юртэ самодеятельной хоре но ветлэмысь дугдӥ.
Кивалтӥсьмес Рашит Муратович Талиповез пумитай огпол. Мар, пе, карид куараеныд. Заводэ мыныса вераськиз, озьы монэ выжтӥзы 27-тӥ цехе. Тодӥськоды, луоз, больницаосысь дерматин кроватьёсты? Соосты лэсьтонын ик тырши.
- Нош заводын кырӟасьёсты дунъяллязы-а?
- Котькуд цехын художественной самодеятельность вал. Цехлэн азинсконэз, вормисьёс радэ потонэз со бордын но возиськиз. Монэ туж гажазы заводын. Но кема ужаса ӧй вутты.
- Кытчы таяз учыре вуттӥз улон сюресты?
- «Металлург» культура дворецысь эктонъя «Андан» ансамбль дасяське вал Латинской Америкае, Коста-Рикае потыны. Уг тодӥськы, кин монэ дэмлаз соосын ӵош мыныны, но репетициос дыръя монэ синйылтӥзы Николай Александрович Широких но Владимир Павлович Варачёв. Николай Александрович шуэ, «Айкай» фольклор коллектив кылдытыны малпаськом, ойдо, пе, отчы. Коста-Рикае ветлыса, валай, мон кырӟаны кулэ шуыса. Вань кырӟанъёсме отын туж умой пумитазы. Нырысьсэ киям сётӥзы радиомикрофон. Сцена вылын асме туж эрикоен шӧдӥ, бурдъёсы ик кылдӥзы кадь. Бертыса кӧня ке ужай на заводын. Нош 1990-тӥ арын октябрь толэзе кошки «Айкае». Тямысэтӥ арзэ табере ужасько огнам.
- Кырӟаны нимысьтыз ӧд дышетске. Инмарен сётэм быгатонлыкъёс тырмыт-а, яке дышетскыны кулэ ик?
- Дышетскыны ноку мултэс уз луы. Но кырӟанын? «Италмасын» ужакум, Анатолий Васильевич Мамонтов мыным шуиз вал, дышетскыны пырыса, куарадэ эн быдты. Мон понна бадӟым школа вал Анатолий Васильевичен ужан, со туж трос сётӥз быгатонлыкъёсме будэтонын. Мон солы котьку йыбыртто. Кӧня артистъёсты пыд йылаз ӝутӥз Мамонтов. Мон шудо: мон кырӟасько, мынам усто баянистъёсы вань.
- Асьтэос но синмаськымон шудӥськоды.
- Пинал дыръям туж бадӟым мылкыды вал арганэн шудыны. Басьтӥзы но, кык арня куспын шудыны дыши. Мама косэ ик вал, соиз доры мын, таиз доры. Шуи, ачим дышетско.
- Нош кин луэмез потэ вал пинал Валентиналэн?
- Школае мынэме бере туж кельше вал дышетӥсе Клавдия Николаевна Мартюшева. Со кадь ик дышетӥсь луо, шуылӥ. Витетӥ классысен малпанэ воштӥськиз. Туж синмаськисько вал кырӟасьёслы Людмила Зыкиналы, Мария Мордасовалы, Лидия Руслановалы. Мынам но артист луэме потӥз. Нош 9-тӥ—10-тӥ классысен шуисько ни вал, Кварсае мыно трактористэ, шофёре дышетскыны. Туж кельшылӥз угось руль сьӧрын пукыны: братэ мыным оскылӥз тракторен, машинаен ветлыны.
- Укыр шаян вал, дыр, пичи дыръяды?
- Мон эшъяськылӥ пиосын. Аслым ачим лякыттэм уг потӥськы вал, но мамае весь шуылӥз, ой, лякыттэм ке лякыттэм ук тон мынам. Дышетӥсьёс ӧз ӝожтӥськылэ, ярато вал монэ, весяк смотръёсы пыриськылӥ. Туж яратылӥ вал вылын ворттылыны. Бригадиръёсмылэн валъёсты малы ке нокинлы сётэмзы уг поты вал, нош мыным оскылӥзы.
- Мар бен, вань со пинал дыр малпанъёсты быдэсмо ни кадь. Машина руль сьӧрын но пукиськоды ни табере.
- Ой, туж кельше машинаен ворттылыны, уж дуре но «Жигулиеным» ветлӥсько. Яратӥсько кырӟаны, руль сьӧрын пукыса. Куд-огез шуо, магнитофон, пе, сюрес вылын люкетэ. Нош мон аслым ачим магнитофон. Куке пересьмыса дышетскисьёсы но, оло, луозы ай. Пинал дыръям тазьы малпасько вал: дышетӥсь ке луоно – туж умой дышетӥсь: тракторист ке – туж умой тракторист (соку вить аръем ужан план сёто вал, аслым ачим вералляй, мон сое куинь арскын быдэстыны мед быгато). «Айкае» мынэме бере шуи, кырӟано ке, туж умой кырӟано. Быгатӥськод-а, уд-а, но тыршыны кулэ.
- Кызьы валады, кырӟаны быгатонлыкъёсты вань шуыса?
- Коста-Рикае ветлэме бере аслым осконэ кылдӥз. Отын монэ умой пумитазы бере, татын но пӧрмыто, малпай.
- Асьтэ азе кыӵе ке но планка пуктӥськоды, оло?
- Али, Удмуртиетӥ сяна, Башкортостанэ, Татарстанэ концертъёсын потаськом. Матысь дыре со гожез паськытатэм потэ.
- Мордовиысь пичи гуртын вордӥськем Надежда Кадышева быдэс Россиын гинэ ӧвӧл, солэн палэназ но тодмо луиз ни. Нош милям Россиысь телевидение пыр адӟеммы потэ Шаркан районысь Петухи гуртын вордӥськем Валентина Пудоваез. Секыт-а потыны бадӟым сцена вылэ?
- Секыт. Ваньзэ бергатэ коньдон. Кин ке но протеже кулэ. Асьмелэн нокин но со сярысь уг малпаськы. Кинлы бен со кулэ? Улӥськод, бергаськод ас поннад. Котькуд артист озьы малпа, дыр. Ми кулэ учкисьёсмылы гинэ.
Туэ тани мон пыриськи калык кырӟанъя но аслад гожтэм кырӟанъя Уралысь но Западной Сибирьысь улосъёс пӧлын Челябинскын ортчем конкурсэ. Басьтӥ нырысетӥ инты. Куать ар ӵоже ортче ни ке со конкурс, мынам арлыдыя, нырысьсэ, пе, сётӥськом нырысетӥ интыез. Кыкетӥ инты нокин ӧз басьты, нош куинетӥ интыез кыкезлы сётӥзы. Мон туж данъяськи со вормонэным, но йыры ас поннам вылын ӧй вал – Удмуртилэсь, филармонилэсь данзэ ӝутэмелы шумпотӥ. Бертӥ но – мылкыд куашказ.
- Номыр шоры учкытэк, тӥ уд сётскиське?
- Шумпотозы.
- Тодмо, дано артистэз но шуг-секытъёс жуго бере, кызьы ӝутскыны кулэ усточи, быгатӥсь пиналъёс?
- Гуртъёсын ик со талантъёс тросгес уго, но соослы туж секыт потыны, асьсэды шедьтыны. Всё, мылкыды ик быриз вераськыны (йырзэ ӝӧк вылэ лэзе).
- Кыӵе юан сётоно мылкыддэс ӝутон понна?
- (Серекъя.) Зэм ик, туж ӝож гуртоос понна. Суреданы, кырӟаны, крезьгураны быгатӥсь нылпи кытын азинтоз аслэсьтыз быгатонлыкъёссэ? Кытчы соос потозы?
- Нош асьтэлэн пиналъёсты анайзылэсь сюрессэ бырйыны уг малпало-а?
- Сизьым-тямыс арес дыръяз пие шуиз вал, ачим но, пе, артистэ уг мыны, кышно но артистэз уг вайы. «Никогда тебя нет дома, мамочка!». Синвуосы виямон жаль потӥз соку пие. Малпасько, ӧчкарыса сямен озьы ик луоз ай, ӟучъёс юнме уг шуо, дыр: не зарекайся.
Игорелы дас ньыль арес тырмоз ни. Туж яратэ компьютерез, техникаез. Солэсь усто экономист но пӧрмысал. Кырӟа Валерий Яковлевич Митрофановлэн «Ингур» капеллаяз.
Аня нылы дизайнер луыны малпа, дышетске шаерысьтымы усточиослэн школаязы. Со но яратэ кырӟаны. Мар верасал мон соослэн азьланьын улон сюрессы сярысь? Мар ке быръёзы асьсэос – мед. Нылпиосме кужмысь уг кары аслам дэмланъёсыным.
- Тӥ лек анай яке пиналъёстылы эш?
- Мынам пиналъёсы шуизы: тон, пе, милемлы мама гинэ ӧвӧл, матысь эш но. Мон понна со туж бадӟым дунъет. Нылпиосы номырзэс уг вато мынэсьтым, ваньмыз сярысь верало.
- Гастрольёсы потакуды, кин пӧраське дорады?
- Пиналъёсы асьсэос тыршо сиён дасяны.
- Нош асьтэос яратӥськоды-а пӧраськыны?
- Дыры ке луэ, созэ но, тазэ но дасяме потэ. Лэсьтӥсько, лэсьтӥсько… Пӧраськеме сокем трос люкаське! Нош семья то пичи, нокинлы сюдыны. Тросэз собере куштӥське. Туж яратӥсько перепеч пыжыны, уката ик – губиен.
- Нош губияны яратӥськоды-а?
- Коркась потыны туж секыт, нош нюлэскы вуисько ке, бертэме уг поты.
- Семья улонын сцена люкетэ-а?
- Мынам артист луэме ваньзэс ик уг буйгаты, оло. Доре бер вуиськод, весь сюрес вылын. Но нылпиосы мыным шуо: ми туж шудоесь, ми тонэ яратӥськом. Ваньмызлэн сыӵе пиналъёссы луысалзы ке, анайёс асьсэды туж шудоен лыдъясалзы.
- Мар со яратон?
- Яратон – со тулыс тудвулэсь но, вуюисьлэсь но, шундылэсь но кужмо, яркыт, ӟырдыт маке. Яратонэз мон котьмалэсь вылэ пуктӥсько.
- Вань-а бен сыӵе яратонды?
- Яратон сюлэмын луыны кулэ. Сое ваньмызлы уд вера, уд шарая.
- Нош супыльтонъёс шоры кызьы учкиськоды? Куд-ог туж тодмо «кизилиос» юри но асьсэ сярысь кыл вӧлдон потто.
- Неужто? Мар ке кылӥсько ке, азьвылгес туж куректӥсько вал. Табере шуисько: ойдо мед супыльтозы. Уродэн ке верало, православилэн дышетэмезъя, мон тросгес бриллиант люкасько. Нош супыльтӥсьёс кыл вӧлдонэнызы асьсэлы гинэ урод лэсьто.
- Удмурт сям – возьдаськон – вань-а сямады?
- Конечно. Но удмуртъёслы гинэ сыӵе сям пыӵамын ӧвӧл ук. Керпотонэ, возьдаськонэ ӧй ке луысал, тросэз малпанъёсы улонын быдэсмысалзы ни.
- Мар понна асьтэды курласалды?
- Куддыръя туж керӟег луисько, но асме киям кутыны быгатӥсько куд-ог учыръёсы.
- Нош мар понна асьтэды ушъясалды на?
- Кызьы меда асме ушъялом ай (малпаське)? Тыршисько адямиосты гажаса, йыркуръяськытэк улыны. Мон вань калыкез яратӥсько, котькудӥз гань-гань, номырлы ёрмытэк мед улысал вал. Тӥни сыӵе мылкыдын улӥсько. Гороскопъя Козерог бере, ас азям пуктэм вань малпанъёсты быдэстыны тыршисько.
- Секыт дыръёсы асьтэлэсь мылкыддэс кин буйгатэ?
- Пиналъёсы. Одӥгез - одӥг палаз, мукетыз – мукет палаз пуксьыса, монэ ӟыгырто но, соку ик капчигес луэ.
- Калык азе артист котьку но чебер, йӧно потыны кулэ. Веськрес луон понна сиськытэк улоно-а?
- Учке ай, кыӵе мон пышечка! Нимысьтыз уг возиськиськы, но куать час бере асме сиёнэн уг эркияськы. Арнялы одӥг пол тросгес куртчыны шедьтӥсько ке, тыршисько ни асме киям кутыны: мултэс медам куайы. Пинал дыръя кадь чебер луэм потэ вылэм но, мар сётэм ни инкуазь.
- Дӥськутъёсты но синэз мальдыто.
- Одӥгез концерт костюме Ольга Листратовалэн, куинез – Ирина Созыкиналэн. Отӥосыз аслам малпамея вуремын.
- Валентина, кырӟам сяна, берло дыре тӥ асьтэос но кырӟанъёс гожъяськоды ни.
- Бен, ӟучез но, удмуртэз но вань. Соос пӧлын: «Шумпотонэ», «Гажанэ», «Русь святая моя», «Разве я виновата», «Удмуртия моя».
- Кырӟан гожъясьёс уг вазисько яке мукет мугез?
- Ӟуч кырӟанъёсты ӵектӥсьёс трос, удмуртъёссэ – ӧжыт. Куддыръя умой мылкыды луэ ке, арганме киям кутӥсько но кыӵе ке гур пӧрме. Со гурез возьматӥсько Алла Кузнецовалы, нош со гожтэ ни кылъёс. Мукет нылкышно кылбурчиосты номырин но курламе уг поты, но Алла Кузнецоваез пӧлысьтызы нимысьтыз висъясал.
- Азьвыл пумиськонамы шуиды вал, удмурт кырӟанъёс пӧлысь ӧд шедьтэ на мылкыддэс вӧл-вӧл ӧръяны быгатӥсьсэ. Али нош сюлэмды буйгаз ни-а? Кыӵе кырӟанэн кӧтты тыре?
- Удмурт калык кырӟанэн, конечно. Али мон кырӟасько созэ, кудӥз сюлэм пыртӥм потэ, кудзэ кырӟаны яратӥсько. Туж кельшо «Васькисько, васькисько», «Кыткы, дядяй, пар валъёстэ», «Жин-жин шуид» калык кырӟанъёс. Сюлэм ик оломабыдӟа луэ. Ачим но уг валаськы, кыӵе кырӟан мед луысал на.
- Возьмаськоды?
- Возьмасько. «Сьӧд мыйык» кырӟан сямен ик шӧдтэк шорысь мед луоз со.
- Ӟучъёссэ, удмуртъёссэ кырӟанъёсты уд висъяське?
- Уг. Концерт программамес дасяськом куремзыя.
- Улонын кыӵе тӥ адями – мӧзмыт-а, шулдыр-а?
- Сыӵе но, таӵе но луисько.
- Яратоно сяськады?
- Вань сяськаосты яратӥсько. Котькудӥзлэн чеберез аспӧртэмлыко, котькудӥз Инмарен сётэмын.
- Нош кыӵе инкуазь вакыт кельше?
- Тулыс. Выль улон вордӥське кадь соку, улэмъя улэм потыны кутске.
- Кырӟасьёс пӧлысь кинлы синмаськиськоды туннэ?
- Паймымон, но сое калык уг тоды. Туж чебер куараез. Со Свердловскысь Татьяна Кошелева.
- Эшъёсты трос-а?
- Матысьёсыз эшъёс трос луыны кулэ ӧвӧл. Мыным вань кинлы сюлэмме усьтыны.
- Урамысен тодмамзы кельше-а?
- Тодмало ке, умой но, дыр. Но куд-ог дыръя ышем потэ. Жадисько. Но адямиослы озьы уд шуы ук.
- Нош тырмыт-а артистлэн ужам уждунэз?
- Ӧвӧл, конечно. Пырак сютэм ум улӥське, но бусьтыр улыны уг тырмы.
- Творческой группадылэн азьланезлы кыӵе малпанъёсыз?
- Трос лэсьтэм потэ, но уксё ӧвӧл. Выль эктонъёс пуктоно вал, выль костюмъёс вуроно. Кылем арын республикаысьтымы Культурая министерство костюмъёслы коньдон висъяз ик вал. Но мылкыдмес ум куашкатӥське, ужаськом, асьмеос коньдон поттыны тыршиськом.
- Берпуметӥ юан: мар тӥ понна филармония, ӵош ужась эшъёсты?
- Со мынам кыкетӥ семьяе. Юрттӥсьёсы но бурдъясьёсы.
- Тау.
Источник:
Пудова В. Т. Мон шудо - мон кырӟасько / В. Т. Пудова ; записала Лия Малых // Удмурт дунне. - 2001. - 26 окт. - С. 6, 11. - (Удмурт кизилиос).
За предоставление материала выражаем огромную благодарность редакции газеты "Удмурт дунне"
