Загуляева Валентина Александровна

Яратон уг пересьмы

Загуляева В. А.

1961-тӥ арын гужемлэн пумаз драмая Удмурт театре, Ленинградысь театръя институтэз йылпумъяса, 19 егит артистъёс вуо. Соос пӧлын вал Валентина Загуляева но. Али Россия Федерациысь дано артистка но Удмурт Республикаысь калык артистка. Со сярысь лыдӟе туннэ номерысь. Валентина Загуляевалэн театрын ужаны кутскемез дырысен туэ 40 ар тырме ини. Со дыр ӵоже кӧня рольёс шудэмын, ма мында гастрольёсы потамын. Артисткалэн одӥг шудэм ролез но умоен пусйытэк кельтэмын ӧвӧл. Та нуналъёсы Валентина Александровна театреныз ӵош ужа республикамылэн уй пал ёросъёсаз. Гастрольёс азьын ик ми пумиськылӥм калыкмылэн яратоно артисткаеныз.

- Валентина Александровна, тӥледлы Удмурт Республикаысь калык артистка но Россия Федерациысь дано артистка ним юнме шорысь сётэмын ӧвӧл. Кӧня аръёс ӵоже ини тӥ милемыз шумпоттӥськоды асьтэлэн быгатонлыкеныды. Кытысь шедьтӥськоды сыӵе кужым, чидан?

- Воксё шудэмысь дугдӥд ке, улон мӧзмытгес луыны кутскоз, дыр. Озьы потэ мыным. Ведь улонэз, сюлэмез каньыл карон отчы кошке. Ужамысь дугдӥ ке, туж мӧзмыт луоз. Но куке-соку ужамысь дугдоно, арлыд будэ, егитъёслы но инты сётоно.

Ужъёс бен котькыӵеез луо. Кудӥз роль ӟечгес пӧрме, кудӥз огшорыгес но луэ. Вань уж одӥг кадь уг луы, мынам гинэ ӧвӧл, мукетъёсызлэн но. Но учкисьлэсь урод кылзэ кылэме ӧвӧл на.

- Тани тӥ, Алнаш ёросысь пичигес Усогуртысь удмурт нылаш, шедиськоды театръя институтэ. Кызьы лёгиськиз со сюресты?

- Мон артистка луон сярысь пичиысен малпалляй. Со ик вуттӥз, лэся, сцена вылэ.

- Валентина Александровна, тӥ тросгес шудӥськоды мӧйы адямиосты. Со рольёсты асьтэос-а бырйиськоды яке режиссёръёс-а сёто?

- Берло дыре пересьмемея пиналъёсызлэсьгес рольёссэс сётъяны кутскизы. Егит дыръям мон пересьёсты трос шудӥ. Табере тросгес шудӥсько анайёсты. Ведь анайёс пересесь ӧвӧл на, озьы-а? Со ньыльдон-ньыльдон вить аресъем адямиос. Шуом, «Ой, чебер нылъёс» комедиын валтӥсь герой луэ Гирой. Со ведь пересь ӧвӧл на, ог куамын аресъем воргорон. Нош анаезлы витьтон арес луыны кулэ, дыр. Тани «Айна» спектакльысь Пилича кенак. Солы кӧня арес луыны кулэ, уг тодӥськы, но мон сое пиналгес карыны турттӥсько. Айналэн кенакез сыӵе пересь луыны кулэ ӧвӧл кадь, со вынызлэн кышноез. Собере тани «Сельсовет Маняын» мон Сельсовет Маня. Малпасько, солэн егитъёслы бызьыны мылкыдыз вань на бере, озьыен, со пересь ӧвӧл на, озьыен, солэн мылкыдыз но егит. Зэм, арлыдызъя со егит ӧвӧл ни, шоро-куспо арлыдо нылкышно луэ. Мынам аслам но арлыды вань гинэ ини, но мыным сыӵе рольёсты, образъёсты режиссёръёс, учкисьёс оско бере, мынам азьланяз но маке но вылез луоз на…

- Тани институт йылпумъямын, вуиды театре. Нырысь ик улонады кин вал тӥляд дышетӥсьты, ӟуч кылын вераса, наставникты?

- Мыным шуд усиз тросгес ужаны Геннадий Веретенниковен. Вал мукетъёсыз но одӥг-ог спектакль пуктӥсьёс. Василий Яковлевич Перевощиковен кылдӥз ужаны. Но уногес юрттӥз Геннадий Васильевич Веретенников. Со ик луэ бадӟым дышетӥсе но юрттӥсе.

- Котькуд артистлэн вань но кыле шудымтэ ролез. Тӥляд кыӵе малпанды быдэсмытэк кылиз?

- Мон егит дыръям яратон сярысь рольёсты шудыны возьдаськылӥ. Медаз адӟе кадь потэ вал яратон кусыпъёсты. Ведь удмуртъёс сое туж ик возьматыны уг тыршо. Зэм, мынам сыӵе рольёсы вал. Ужаны кутскеме берегес ик «Уӵыос кырӟан дыръя» спектакльын шудӥ Соняез. Трос шудылӥ пичи пиосты, нылъёсты. Кыӵе рольёсты шудэм потэ вал? Огвакытэ мон театрысь кошконо луи, дас куинь ар пала ӧй ужа отын. Соку мон кызьы ке дӥсьтӥсьгес луи сцена вылын шудыны. Мур яратон сярысь роль шудэме потэ вал. Выльысь берытскеме бере «Яратон уг пересьмы» спектакльын возьматӥ Окиез.

- Огвакытэ тӥ кыӵе ке муген театрысь кошкиды, улондэс герӟады кырӟанэн, дышетскиды крезьгуръя училищеын, ужады телевиденилэн но радиолэн хоразы.

- Театрысь кошконо луиз семья ласянь. Сое юнматэм потӥз. Гастрольёс но люкетогес вал. Но мукет уже кошкыны ӧй дӥсьты ни, искусствотэк улыны ӧй быгатысал, мон сое валай.

Ӧжытак-ӧжытак куарае вал бере, радиолэн хораз куриськи. Но отын академической куара кулэ, мынэсьтым куараме эскерыкузы, огшоры сопрано шуизы. Туж ик басьтэмзы уг поты вал. Но юрттӥз Геннадий Михайлович Корепанов-Камский. Со мыным фортепианоен шудыны ветлӥз. Хорысь пианистлэн монэн ужаны мылкыдыз ӧй вал, кивалтӥсьсы азьвыл ик со пумысен алэм. Вазиськи Геннадий Михайловичлы. Со вань мылкыдзэ сётыса, ужзэ куштыса, лыктӥз радиое. Мон солы туж бадӟым тау карисько. Жаль, адями вазьгес кошкиз улонысь.

- Но ведь, Валентина Александровна, со лэсьтэм вамышты огласянь ӟечен но берытскиз ук. Кӧня кырӟанъёсты радиолэн зарни фондаз кельтэмын. Со кырӟанъёс чузъясько туннэ но, соос уз вужме азьланяз но…

- Мынам музыкая грамотае ӧй вал. Нош хорын кырӟано бадӟымесь произведениосты но, кырӟано-лыдӟоно нотаосъя. Кытӥяз соку ик фондэ гожтылӥзы. Кырӟанэз сямен ваньзэ йырын уд возьы, со туж секыт уж. Соку шӧдӥ, крезьгурез умой тодытэк ужаны капчи уз луы, малпай крезьгуръя училищее пырыны. Но арлыды соку бадӟым вал ини. Отчы но пырыны Геннадий Михайлович юрттӥз. Огвакытэ ик ужай но, дышетски но. Секыт ке но вал, амалзэ утчано луылӥз.

- Училищеын дышетскемды юнме ӧз ортчы, дыр. Юрттэ, луоз, театрын но ужаны…

- Ну, кызьы уз юртты! Ведь ми театрын ӵем дыръя концертъёс но дасяськом. Репертуар бырйыку, нотаосты но тодыны кулэ. Но ми профессиональной кырӟасьёс ӧвӧл, весь со бордын ум ужаське. Нош куара кытӥяз быре но, пуксе но. Ми ведь спектакльёсын пӧртэм рольёсты шудӥськом, кесяськиськом но, бӧрдӥськом но. Оломаиз но луэ. Куараез утён сярысь малпаськыны уг луы ни.

- Спектакльёсын шудыкуды, юмоке но шедьылэмды вань, дыр. Кызьы потӥськоды сыӵе учыръёсысь?

- Зэм, сыӵе учыръёс луыло. Но ведь спектакльын мае, кинэ шудӥськод, тодӥськод ук, ӵош шудӥсь эшедлэсь но ма верамзэ кылӥськод. Кытӥяз, оло, кылъёсты суран учыръёс луо, но соосты учкись ӵем дыръя валатэк но кыле. Артист дыраз янгышсэ тупатыны кулэ.

- Артистлэн уждунэз сокем ик бадӟым ӧвӧл. Кытысь ке палэнысь коньдон поттыны быгатӥськоды-а?

- Уг. Азьло тани радиое ӧтчалляло вал. Телевидение воксё вунэтӥз ини. Нош мукет интые кытчы мынод?

- Удмурт драматургиын кылдэм югдур сярысь кемалась вераськон мынэ ни. Кызьы учкиськоды тӥ со шоры?

- Ой, секыт югдур, конечно, секыт. Секытэн сётӥське со уж. Асьме драматургъёсмы котьку но ӧжыт вал. Ваем пьесаоссэс но ӵем дыръя выльысь тупатъяно луэ. Куд-огез, оло, йырзэ но кур каре, кудӥз быгатыса ужа. Но кужмо драматургимы асьмелэн ӧвӧлгес шуысал. Но тани али оскиськом Пётр Захаровлы. Со «Выль кен» пьесазэ вуттӥз. Али гинэ кутским со бордын ужаны. Сӥзьыл азьланьтом.

- Театр дырын-дырын пуктылэ ик классикаез но, мур философиен герӟаськем пьесаосты но. Но малы ке удмурт учкись соосты сокем ик шуныт уг пумита, малы меда?

- Удмурт калыклэн удмурт шӧмзэгес адӟемез потэ-а, мар-а. Тани выль пьесазэ вуттыны кулэ Анатолий Григорьев. Оскиськом, асьме калыклы кельшись пьеса гожтоз шуыса. Со угось одӥгез кужмоез драматург луэ.

- Нош кыӵегес пьесаосты возьмаськоды?

- Улонлэн котькуд сэрегысьтыз ужпумез шедьтыны луоз. Сое драматург мед адӟоз. Улонын шумпотонэз но, маскара учыръёсыз но, куректонэз-бӧрдонэз но – котькыӵе учырез луэ. Но пьеса мур пуштросъем мед луоз. Бӧрдоно ке бӧрдоно, серекъяно ке серекъяно. Сюлэмез бугыртӥсь мед луоз, вылтӥз ортчись гинэ медаз луы. Али ведь учкисьёслэн куронъёссы бадӟымесь. Ми сое туж валаськом. Кытӥяз пыкыло, куд-ог спектакльёсын, тужгес но комедиосын, рольёсты мултэс куасалтӥськом шуыса. Зэм, луыло сыӵе учыръёс но. Но, малпасько, артист серекъятон понна гинэ медаз шуды, со мед луоз зэмос улонын кадь. Удалтӥз «Айна» спектакль ласянь. Со учкисьлэсь сюлэмзэ бугыртэ. Туала улонэз но возьматыны тыршоно.

- Нош тунсыкъяськиськоды-а тӥ политикаен? Угось туала улонамы амалтэк пыриськод солэн кожаз.

- Мон яратӥсько политика сярысь кылзыны, но отчы меӵак пырыны мон дась ӧвӧл. Со понна укыр трос тодыны кулэ. Мон учкыны яратӥсько иворъёсын передачаосты, документальной фильмъёсты. Асме политикалэсь кыдёкын шуысал.

- Нош ма верасько ни театрлы выль юрт пуктон пумысен?

- Номыр но уг верало. Тазэ ик тупатъялом-выльдом, шуо. Малпало Правительстволэн вуж юртаз кӧня ке выль интыос висъяны.

• * *

Тӥни сыӵе со Валентина Загуляева, жадёнэз тодӥсьтэм адями, бадӟым артистка. Театрез яратон мылкыдыз азьланяз но медаз пересьмы.

Источник:

Загуляева В. А. Яратон уг пересьмы / В. А. Загуляева ; записал Н. Байтеряков // Удмурт дунне. - 2001. - 1 июня. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"