Адямиен алангасар

Одӥг мурт нюлэскы тыпы кораны мынэм. Кора, пе, та одӥг нунал, кора, пе, кык нунал. Куиньметӥ нуналаз со азе алангасар потэм.

—- Ӟеч-а али, адями уром! Мон туж жади, куинь нунал пужеез кутыны уг быгатӥськы ни. Тон бон, адями уром, кема кораськод-а ини та тыпыдэ?

— Али гинэ кутски,— шуэм адями.

— Мыным юртты али пужеез кутыны,— курем сое алангасар.

— Яралоз,— шуэм адями.

Пужей изьыны выдэм бере, адями солэн котыраз йылсо майыгъёс пуктылэм. Собере изись пужеез бодыен шуккем. Пужей тэтчем но майыг йылэ бышкалскыса кулэм.

— Айбат кутӥськод,— паймем алангасар.— Ойдо, табере ну ини та пужеез дорам.

— Ачид ну, мон туж жади,— чӧлскем адями.

Алангасар пужеез басьтэм но, кошкизы, пе, таос тыпы доразы. Лыктэм беразы алангасар тыпыез йылтӥз кутэм, нош адямилы тыпы дӥнез сётэм. Пужейзэ но вӧзаз дӧнгем на. Адями пужейзэ понӥз, пе, тыпы вылэ, ачиз но пуксиз, пе.

— Адями уром, кызьы тон уд жадиськы? Мон йылзэ нуисько, озьы но туж жади ини,— шуэ, пе, алангасар.

Алангасарлэн коркаяз та адями одӥг нунал улэм но, кыкетӥ нуналаз алангасар косэм адямиез, со ваем тыпызэс кораса, артана люканы.

— Ӧд ке люка, сиё,— шуэм.

Ӝыт луэм бере адями куректэ, пе, ини: «Кызьы мон тае кораса быдтом?»

Озьы пукыкуз, сое адӟыны туж трос алангасарпиос люкаськиллям: ноку но адямиез адӟемзы ӧвӧл, пе.

— Мар татын учкыса улӥськоды? Медось та тыпыез коралэ,— шуиз адями.— Ӧд ке коралэ, ваньдэс жуго.

Кутскизы, пе, кораны — олокытӥ-мартӥ артана люкаса быдтӥзы.

Ӵукна потэм ини алангасар учкыны.

— Адями уром, корад-а?— юа ини со.

— Пильылӥ,— шуэм адями.

Алангасар корказ пырем но кышноезлы «кызьы быдтом ини та адямиез?»— шуэ, пе.

Ӝыт луэм бере, адямиез мукет корка изьыны выдтӥллям. Адями одӥг чырым гинэ изем но интыяз чаг культо понэм, ачиз гур улэ выдэм. Уйшор вакыт борддор пыртӥ пӧсь кортэн ӵаж-ӵаж, пе, каро. Чаг кыжыр-куажыр вазем.

— Ну, быриз ини,— шуэм алангасар.

Чукна юри мыскылляса юа ини алангасар:

— Адями уром, айбат изид-а?

— Айбат,— шуэ соиз,— пыӵ гинэ туж куртчылӥз.

Алангасар кышноезлы, пе, вера:

— Э-э, со пӧсь кортэз но пыӵ шуэ уга. Ма адями та?

Вуоно уяз адями нош ик ӧжыт гинэ изем но ас интыяз чаг культо понэм, ачиз нош ик гур улэ, пе, выдэм. Уйшор вакыт ӝажыысь топ! усем вуко кӧ. Чаг куаж, пе, вазиз.

— Ну, адями быриз ини,— шумпотэм алангасар.

Ӵукна корка пырем но — адямиез улэп.

— Айбат изид-а, адями уром?

— Айбат,— шуиз адями,— но вылам ӝажыысь маке палэс тусьты усиз. Алангасар кышноезлы вера:

— Э-э, со вуко кӧэз но палэс тусьты шуэ ук! Ма каром ини та адямиен?

Чылкак ма карыны валатэк, адямиез гуртаз улляны вераськиллям.

— Берты ини, адями уром,— шуэм алангасар.

— Пужей куад тыросаз уксё тырид ке, берто,— соглаш луэм адями.

Алангасар тыросаз зарни, азвесь тырем но «ме!», пе, шуэ.

— Ачид нуыса мынод,— чӧлляськем адями.

Кошкизы, пе, таос адями доры. Вуэм беразы адями корказ азьло пырем но верам кышноезлы:

— Мон тонэ шыд пӧзьтыны косо. «Маин пӧзьтом?» шуыса юа. «Вуперилэн мӧляез вань, алангасарлэн йырыз вань»,— шуо мон. Собере потэм но алангасарез корказы ӧтем.

— Пыром ини,— шуыса пыризы, пе.

— Шыд пӧзьты али, пӧрась,— вазем адями кышноезлы.

— Маин бон пӧзьтом?— юам кышноез.

— Вуперилэн мӧляез вань, алангасарлэн йырыз вань, соосты пӧзьты,— шуэм адями кышноезлы.

Алангасар, тае кылыса, кышкаменыз вӧлдэтэз ӝутэм но пегӟем. Адями сьӧраз пуныоссэ узатыса, пе, лэзем. Мырдэм-мырдэм пуныослэсь мозмем алангасар. Бертэм но кышноезлы вера, пе:

— Со адями шуонлэн пичи вынъёсыз вань. Соос ӧжыт гинэ мышкытӥм ӧз кутэ ук!.