Мунчомуртъёсын воштэм ныл

Огпол пинал пиос эчешиллям. Огез мунчоысь кӧльы ваё, пе5 шуэ. Васькем ни ай та шур дуре. Вашкала дыръя ведь мунчооссы шур дурын луозы вылэм. Эшъёсыз гурезь йылэ кошкиллям. Та пиед мунчо доры вуэм но, кизэ мычыса, кӧльы басьтыны кутскем. Кӧльы борды кутскыса вуттэм гинэ — кизэ кутӥсь луэм. Нокызьы но уг лэзь ни, пе.

— Кышно ке ӧд басьты, татчы кыско, басьтӥд ке — лэзисько,— кылэм со ныл куараез. Пи олокызьы но сюлворе ни, нош кизэ, пе, уг лэзё. Вырыса-вырыса кылзэ сётэм ни, тонэ кышно басьто шуыса. Гуртаз бертэм но номыр верамтэ, югдаз усем кадь ветлэ, пе. Шудон-серекъян но кулэ луымтэ ни. Нош дыр ортче, пияш кӧсыт но кӧсыт луыны кутскем, пумен куасьме, пе.

Куинь нунал ортчем но, корказэс кӧлыкузы кин ке корен, пе, мырӟытэ, зуркатэ. Одӥг уй озьы ортчем, кык уй. Куинетӥ нуналаз, мемиез-атаез юалляськемысь, пияш чидамтэ ни, ваньзэ верам. Кенешиллям но, шунды пуксем бере, пи мунчое кошкем, сьӧраз нылмуртлы дӥськут но кутэм. Ныл пи доры дӥсяськыса потэм. Пи ма шуыны ик паймем: ноку сыӵе чебер нылэз адӟылэмез вылымтэ на. Чебереныз, пе, синэз ик палёмытэ. Пи ваем со нылэз мумиз-аиз доры.

Огпол, Вӧйдыре, пияш укно дурысь ӟус вылэ пуксем но малпаськыса, пе, пуке ни. Вот, шуэ, вань эшъёсы кышноосынызы али вармаязы кошко, нош мынам вармае но вань оло ӧвӧл. Озьы пуконъяз, кышноез со доры лыктэм но вармае мынон сярысь малпаськыса пукиськод, пе, шуэ. Давай бен вал кыткы но асьмеос но вармаяд кошком, пе. Картэз кылзӥськем, валзэ кыткем. Нош кышноез, пе, туж визьмо, кибашлы адями.

Я, мыно ни ай таос вармаязы. Туж трос гурт пыр но потӥллям ни, весь, пе, мыноно на шуэ. Шунды но пуксем ни, тыл но, пе, калык ӝуатэ ни. Вуиллям одӥг гуртэ, кышноез дугдыны косэм гурт пумысь корка доры. Йыгаськиллям но кӧлыны куриськиллям. Кузёосыз, пе, шуо: — Пиналмы висе но кӧлэмды уз лу, мукет азе куриське.

Нылмурт одно ик татчы пыром, пе, шуэ. Пиналдэс учко но бурмыто, пе. Мыр-мыр куриськемысьтызы лэзиллям ни. Пыро, пе, но — корка шорын кӧкыын ог 18—19 аресъем пинал, пе, кылле. Аналтэмын ни воксё, котырыз но октымтэ-калтымтэ. Нылмурт ву пӧсятыны косэм. Пылатыны шуыса пиналэз бадӟым тусе понэм но, киысьтыз пиналэз соку ик сьӧд сэрегпум луэм. "Тӥни кинэ тӥ татчыозь вордыса улӥды, учке табере",— шуэ, пе.

Нош со тазьы вылэм. Кышномурт мунчо эстэм, ву дуре васькыкуз, пиналзэ мунчо азе поныса кельтэм. Сое мунчомуртъёс воштӥллям. Соин ик вож пиналэз мунчо азе ноку но кельтылоно ӧвӧл — мунчомуртъёс воштозы.