Иднакар сярысь выжыкыл мадён
Пересь Донды кошкем бере, татчы Идна пиез кузё кылем. Иднакар музъемъёс Чупчилэн паллян палтӥз Селтакарен артэ вылӥллям. Ключёвка волостьысь Чебершур (Вылӥ-Парзи) гуртысь одӥгез вырйыл али ке но Иднакар ӟезьы шуыса нимаське. Уй палан нош музъемез Идна шур дорозь кыстӥськем, пе.
Кузё луыса но, Идна огшоры мурт кадь гинэ улэм, пичи куалаен, одӥг кышноен. Нуналлы быдэ пӧйшураны ветлэм. Созэ гинэ вераны кулэ: толалтэ, пу куас интые, зарни куас вылэ султоз вылэм. Кема озьы улэм Идна. Ӟучъёслэсь тапала вуэмзэс нырысь ик со тодэм-чаклам. Аслэсьтыз нимзэ вуоно ӵыжы-выжыосызлы тодазы вайытон понна, одӥг пол бадӟым пукыӵсэ золтэм но ньыль ньӧлъёссэ шундыӝужан, шундыпуксён, уй пала но лымшор пала лэзем-ыстэм. «Ньӧл усем кеме нимы удмуртъёс пӧлын дауръёсын но медаз вуны, сӥё-дано мед луоз» шуыса, верам.
Ӟучъёс тапала вуэм бере, эксэйлэн Идналэсь музъемъёссэ басьтэмез потэм. Но Идна озьы гинэ сётӥськымтэ. Котькуд ожмаськемез бере, со Иднакараз ватӥськыса улоз вылэм. Мукет каръёсыз но Идналэн вылэм на. Отчы со, сэзь валъёсыз вылэ пуксьыса, туж ӝог вуылэм. Валэз Идналэн куинь вылэм: тӧри, кулой но куӵо. Ог кыткемен со валъёс сиськытэк 200 иськемез но ортчыны быгато вылэм. Соин ик эксэйлэн сое озьы гинэ кутэмез луымтэ.
Одӥг пол тушмонъёс Идналэсь мыноно сюрессэ тодӥллям но шур вамен выжлэсь пыкет юбооссэ азьло ик вандыса дасяллям. Кышкытлыкез шӧдыса, тӧри валэз выж вылэ нокызьы но, пе, уг пыры. Кулоӥ валэз но пырымтэ. Куӵо вал гинэ батырез выж вылэ вуттэм. Шораз вуэм-а, ӧвӧл-а — выжез куашкам. Валэныз валче усем Идна батыр вуэ. Выйиз-а батыр, тушмон кие-а сюриз — соиз тодмо ӧвӧл. Бырыкуз Идна батыр «куӵо вал — валтэмлэсь вал» шуыса, пе, кельтэм[1].
Глазов у., Вятка губ.
Првх., 1889:10—11
Гврлв, 1880:153
