Ю вӧсь куриськон

Остэ, Инмаре-Кылдысинэ, кизем-пальккем юэз ожо сяин ожматсалыд ке,

бадьпу сяин пушмытсал ке, кызьпу сяин тэлеӟытсал ке.

Коньы бызьымон, сёр бызьымон нюпырчкыса сётсал ке, октон-калтон

дыръя культо вӧзы культо ке пуктысал, чумолё вӧзы чумолё ке

пуктысал; пыртэме ваён дыръя дас кык йыло кабан ке люкаськысал,

обиньысь ваён дыръя коскиен вайса быронтэм тыр дэлеттэ-берекеттэ

Тон ке сётысал.

Сусекъёс улласянь пуньырӟымон, вылласянь тудӟымон, будӟым

эксэйлы выт-кӧрсь тырымон ваньбурдэ Тон сётсал ке, сюмысо урысэзлэсь

утьса вордысалыд ке, жильыё кортэзлэсь утьсал ке.

Бызён-потон дыръя бӧрись уйиськисьлэсь, пумит пыкисьлэсь утьсал

ке; пыдын ӵемтэмлэсь, кылын янгышамлэсь утьсал ке.

Тулыс вапумен, пудодэ-животтэ бусые поттон дыръя, выжылэсь, нюк-гоп

дэрилэсь, сьӧсьлэсь-каблэсь, лул ке – пӧськылэсь, черлэсь-чурлэсь,

лыктэм кыльлэсь-дэйлэсь утьсал ке, гид тыр, луд тыр карысал ке.

Гужем нуналын шуныт-лэськыт нуналъёстэ ке сётсал, небыт зоръёстэ

сётсал ке, сильтӧл-лек зоръёсыдлэсь утьсал ке.

Оло азьло вераноез сюриз, оло берло вераноез сюриз: милесьтым

мулятэмтэмес ачид ӵошкаты.

Сарапул у.