Плотникова Анна Васильевна

Мурӝолын но со шудӥз, «Зарни арганчи» луиз

А. В. Плотникова

«Куддыръя», «Синъёсыд, ой, синъёсыд», «Яратӥ мон тонэ», «Атай, азбарад потӥд ке»… - та кырӟанъёсты калык кемалась аслаз кариз ни. Аслаз кариз ни Котнырысь (Алнаш ёросысь) Анна Плотниковаез но. Сцена вылын кырӟаса, Аня сыӵе востэм шуыса тодысалды ке, паймысалды. Паймиллям солы «Играй, гармонь» конкурсын но, востэмезлы ӧвӧл, шудэмезлы. Ойдолэ матысьгес тодматском баянзэ капчиен кыскась, шудӥсь но кырӟась «Зарни арганчи» нимез нуллӥсь Анна Плотниковаен.

- Аня, тон кемалась-а ини кырӟаськод?

- Кӧня асме тодӥсько, пыр маке нукыртыса ветлӥсько. Алигес апаеным вераськи, со шуэ, чик уг, пе, тодӥськы тынэсьтыд кырӟамдэ. Адямиос нукырто-нукырто, а тынэсьтыд кылэме ӧвӧл. Ас поннам кырӟасько вылэм-а, мар-а, кырӟасько но асэным вераськисько: «Так, кыӵе гур ай та, оло аслам, оло ӧвӧл…» Со вал пичи дыръя.

Али кыӵе ке гур лыктэ ке, асэным ик споръяськисько ини. Аня, тазьы ум каре, озьы умойгес луоз, кылъёссэ но ӧжытак воштом. Озьы вань чуръёсме но гуръёсме кушаса эскерисько.

- Арганэн шудыны мурӝолын дышетскемед, шуо. Зэм-а со?

- Ми семьяямы укмыс нылпи. Шальтра дыръям Витя агаелэн арганэз син шорам йӧтӥз. Солы гочаса улӥ, но корка шоры пуксьыса уд шуды ук. Малпаськи-малпаськи но тужгес шыпыт инты бырйи. Озьы мурӝолэ лушкемак пырисько, картошка вылэ пуксисько но арганме кыскасько. Пӧрмымтэезъя эшшо мылкыды пуроме: мон сёровно быгато. Кылзыса гинэ гур бичаны луэ шуыса, ӧй валалля. Тодмо пиос монэ кыӵе ке кырӟанэз шудыны дышето: Аня, тазэ огпол зӥб, тазэ кык пол, берло нош тазэ, собере куинетӥзэ. Озьы быдэс кырӟанэз дышетытэк выж улысь уг потӥськы.

- Берлогес валай ини, крезьгурез валанэ вань шуыса. Мон соку 5-тӥ классын дышетски. Утчанэ кык валэн толалтэ концерт пуктыны мынӥм. Быдэс зал тыр калык люкаськиз, чабо, нош арганчимы бере кыле. Ми, нылпиос, кырӟам но ини, на-на-на карыса эктӥм но ини, шудӥсьмы таки ӧз суты. Утчанысь бертӥм гинэ, арганме кутӥ: неужто мон со гуръёсты уг быгаты улӟытыны? А шудӥсько вал со дыре тужгес но тодмо кырӟанъёсты: «Отӥ но лыктэ туганэ но», «Аналтӥд тон монэ туганэ». Ӵапак соосты котькуд ӝӧк сьӧрын кырӟаллязы уго. Одӥг гурез кутски но – пӧрмиз! Соку мынэсьтым шудоез нокин ӧй вал. Арня ортчыса, паллян киын но шудӥ ни – мылкыд уката ӝутскиз. Озьы лӧптылыса арган кысканъям, кин ке мурӝол ӧсэз усьтӥз. Мон корка уг кылӥськы шуыса визьтэммыса арганме кыскасько, нош соослэн пелязы пыре. Выж улысь уллямзы бере мунчоын кык-куинь пол шудӥ. Собере вуж корка интыяськи.

- Кызьы кутскид кырӟан гожъяны?

- Мон нырысь кылбур гожъяны кутски. Кӧня ке кылбурме «Дась луэ!» лэзи. Кылбурдэ ум поттэ шуыса гожтэт ысто но сыӵе шумпотӥсько! Озьыен, гожъямме эскеро, тӧлъя-буръя уг келяло. Нырысь чуръёсме ӟуч кылын гожтӥ. Йӧ вылын выдыса кыллисько но малпасько: вот улон, кыӵе со тунсыко. Уйин кизилиос пишто, нош ӵукна кысо: со нылпи паймонлы сӥземын вал нырысь чуръёсы. Кырӟанъя нимысьтыз дышетӥсьмы ӧй вал, урокын проигрыватель лэзё но быдэс классэн ӟуч кырӟан кырӟаськом вал. «Э, пе, ӟазеге», «Изь, изь, нуные» сяна, удмуртъёсыз пӧлысь али тодам уг лыкты.

- Кызьы артистэ мынӥд?

- Кырӟанъёсы вал ке но ини, артист луо шуыса ӧй малпа. Баянэн шудэме туж зол потӥз. Гуртамы концерт пукто, мон но пӧлазы куриськисько. Нырысь басьтэмзы ӧз потылы. Мугорыд но, пе, пичи, мар карод? Мон шуисько, коть сценкаосады выж ке но ӵужо. Басьтэ, пожалуйста. Озьы каллен-каллен ӧраз пыри. Нырысь, зэмен ик, сценкаосын шудӥ, собере кырӟаны-эктыны кутски. Культурая училищее мыныны мылкыдме ӝутказ Иван Ефремович Замятин. Озьы мон 8-тӥ класс бере Иже вуи.

Группаямы ӝыныез гуртысь, ӝыныез городысь вал. Милям крезьгуръя грамотамы чик ӧвӧл, мукетъёсыз татысь крезьгуръя школаез быдтэмын. Нылъёсмы малы ке ваньмыз домрае гожтӥськизы, а мынам сое кылэме но ӧвӧл. Ваньмыз озьы шуизы бере, мон но домра шуи. Нырысьсэ дышетӥсе доры мынӥ но пайми, кабинетаз кыӵе гинэ инструментъёсыз ӧвӧл. Балалайка одӥг гинэ луэ кожасько вал, отын ке балалайка – альт, секунда, прима, - нимъёссы но, быдӟалазы но, куаразы но пӧртэм. Дышетӥсе шуэ, басьтэ, пе, домраез но маке шудэ. Мон пуклёк кадь паймыса сылӥсько, аслым возьыт, собере шуисько: «Мон уг тодӥськы, кудӥз домра». Дышетӥселэсь паймемзэ тодам ваисько ке., али но сереме потэ. Со мыным все равно ӧз оскы, лэся, инструментэз сётӥз но – шудэ, пе. Мон нош шуисько: «Честное слово, шудэме уг луы, сое адӟеме но та дырозь ӧвӧл. Ваньзы гожтӥськизы но мон домбра шуи. «Нош балалайкаез адӟемед вань-а?» – юа со. «О, мынам гуртам но вань», - лӧптыса ик пумитаз вазисько. Дышетӥсе балалайка сётэ. Мон солы одӥг сиеныз шудӥ (куиненыз кызьы шудыны уг тодӥськы бере). Со киосме кутылӥз но шуэ: «Тынад чиньыосыд балалайкаен шудыны кылдэмын». Дышетӥсе ӧз янгыша. Мон балалайкаен урмыса ик шудӥ, куд-огез уроксэс келляло вал, а мыным сыӵе кельшиз. Вот озьы толэзь куспын ни монэ оркестре басьтӥзы. Нош басьто отчы 3-тӥ курсысен гинэ. Бадӟым вис каремен, мон сое ӧжытак вунэтӥ ни вал, но али концертамы балалайкаен номер дасямы, соин выльысь та борды берытски. Нош училищеын дышетскыкум, ӟеч шудэме понна Москвае но лэзьязы вал.

- Нош малы баянлы синмаськид меда? Балалайкаен но шудэмед, гитараед но вылэм.

- Малызэ вераны шугъяськисько, но баян кадь монэ бордаз номыр ӧз кыскылы. Дорамы апаелэн эшез гитаразэ кельтэм. Мон, чуланэ потыса, сое сюлмысьтым ик йыгай! йыгай! йыгай но аслым дотово умой шудӥ кадь потӥз. Кемалась малпанэ быдэсмиз кадь. Балалайка апае басьтӥз. Одӥг аккордэз но тодытэк, Алла Пугачёвалэсь «Балалайку в руки возьму» туж тодмо кырӟанзэ одӥг струнаен дышетӥ. Собере училищеын тӥни дышетски. Баян милям нимысьтыз инструмент вал, со арнялы кык пол луылӥз. Котькуд урокез чидатэк возьмалляй.

- Дышетскондэ йылпумъяса, городэ кылён мылкыдыд ӧй вал-а?

- Йырам ик ӧз лыкты. Мон колхоз стипендиат вал ке, гуртэ ик бертоно кариськи. Собере, али 17 арес трос потэ, дыр. Соку аслым ачим воксё пичи йӧтылӥ ай, анайлэн бурд улысьтыз потэм ӧз поты кадь. Котнырам ми туж мыло-кыдо ужам. Мон школае но, клубе но, нылпи садэ но сузьтӥськыны тырши. Дас ар куспын нылпиослэн «Шундыпиос» но бадӟымъёслэн «Тулкым» ансамбленызы олокытчы но потамы. Соку ик монэ кылӥзы. Отын-татын адӟизы, республикаын нимы чузъяськыны ӧдъяз. Огпол Надя Уткина жингыртӥз но «Шундыкар» лагере фольклорлы сӥзем отрядэн кивалтыны ӵектӥз. Озьы мон ньыль гужем нылпиосын ужай. Озьы ик концертэн «Арганчиос» сьӧры поталляй, кӧня ке «Шулдыр ӝытын» но ужай. Собере ини монэ «катанчиос» ӧтизы.

- Гуртысь кошкемед но со ик луиз?

- Анай-атайлэн лэземзы туж ӧз потылы, ужед вань – ужа, шуизы. Собере радиоысь, телевизорысь кырӟамме кылӥзы-адӟизы но ӧз кутэ ни. Озьы мон Котнырысь кошки. 1996-тӥ арысен ужасько ини «катанчиосын». Али нокытчы но кошкыны уг малпаськы. Мон асме шедьтӥ кадь соос пӧлын. Татын мыным кельше.

- Пиос пӧлын огнадлы мӧзмыт ӧвӧл-а?

- Нокӧня но огнам кадь уг потӥськы, бордазы сыӵе дыши ини. Котькыӵе дыр луэ, олома но куспамы зулиськом, но всё равно кышномурт луэмме пӧлазы шӧдӥсько. Куспамы бен вераськиськом, туж быгатӥсь, милемлы тупась ныл шедьтӥм ке, бордамы басьтом шуыса.

- Зарни арганчи луэмдэ но вера ай.

- 1997-тӥ арын республикаын ортчем «Шуд, арганэ» конкурсын нырысетӥ интые потӥ. Нош 1998-тӥ арын Иже гожтэт вуэ, Удмуртиысь «Играй, гармонь» конкурсэ кинэ ке лэзьыны курыса. Мон Ижын ворми вал бере, монэ ик лэзизы Ивановое. Со котькуд кык арлы луэ. Отчы 300-лэсь трос адями люкаське. Пӧлазы вал туж кужмоосыз но, мон уго асме сыӵеос пӧлы уг пыртӥськы вал, нош сюри нырысьёсыз пӧлы. 2001-тӥ арын ветлӥ Новосибирске (отын «Играй, гармоньлэн» центрез, отын ик Заволокинлэн семьяез улэ но кылдытэм «Такмакъёс» ансамбльзы), монэ Россиысь дас зарни арганчиос пӧлы пырто. 2002-тӥ арын «Играй, гармонь» передачалы 10 ар но «Такмакъёс» ансамбльлы 15 ар тырмонэз пусйыны ветлӥ. Ӟуч кырӟанме кырӟаны кутски но зал уг лэзьы, малы, пе, удмуртсэ уд кырӟаськы. Туж шумпотӥ, отын удмурт кырӟанлы синмаськытыны быгатӥ шуыса.

- Тросэз шуо, кырӟан гур изьыкум лыктэ, тынад но-а соос уйвӧтъёсад вордӥсько?

- Ой, уйвӧтам кылэм гуръёсме одӥгзэ но тодам вайыны уг быгатӥськы: сыӵе соос чебересь, лэйкытэсь кадь, нош сайкасько но вунэтӥсько. Бадӟым кужымез огшоры кыллэн но. Мылкыд но умой кадь, нош кылбур лыдӟыкуд, кыл сюлэмез сыӵе бугыртэ, ӝож кырӟан кылдэ (берло дыре монэ удмурт Буланова шуо, мӧзмытэсь кырӟанъёсы трос, лэся). Мон гуртын улоно адями-а, мар-а – татын мон гуртын мында кырӟан ӧй гожты на.

- Нылпиосын ужамдэ туж мыло-кыдо вераськод, али соослэсь уд мӧзмиськы-а?

- Нылпиосыз туж яратӥсько, али Италмас посёлоке школае басьтӥзы. Мон отын пичи арганчиосын кружок нуисько. Нылпиосы туж мусоесь, быгатӥсесь (котныръёс медаз вожалэ). Аслам гуртам но дышетэм нылпиосы будо. Тани Рая Яковлева али 8-тӥ классэ потӥз ни (мон сое садикысен дышетӥ, али шатыр поттыса баянэн шудэ). Италмасысь ог 20 пала лыктӥзы вал. Мон шуисько: ӝыны час гинэ арган бордын пукыса, умой шудӥсь уд луы (ачим 5-6 час пукисько вал бере). Озьы тужгес золъёсыз куать кузя кылизы. Пӧлысьтызы куинезлы ачим но синмаськисько.

- Сцена вылын но гуртын Анна Плотникова одӥг кадь меда?

- Пӧртэмгес. Тани кылзӥсьёс но шуо, туннэ, пе, Аня ӝож кырӟа, мукетъёсыз шуо, олокызьы гинэ шудӥз, серекъяса кӧт вӧсь луэ ни (училищеын мынам нимы серем мешок гинэ вал). Катанчи сьӧрын мон нош мукет. Шыпытгес-а, мар-а. Нош сцена вылэ потыкум, пырак кырӟан пӧлы выйисько. Дорын мон сцена вылынлэсь востэмгес.

- Альланезлы малпанъёстэ но вера ни.

- Инмар тазалыксэ сётӥз ке, ужалом ай. Тани кассета поттыны трос кужымме сётӥсько. Кылем арын, аслэсьтым ӝытме ортчытыкум, инты тырмымтэен, вань лыктэмъёс пырыны ӧз быгатэ. Ӝоже кылемзэс али но верасьёс вань. Соин учкисьёслы туэ толалтэ но сыӵе кузьым лэсьтэме потэ на. Туж потэ нылпиослы нотаосын кырӟанъёсме поттэме.

Источник:

Плотникова А. В. Мурӝолын но со шудӥз, "Зарни арганчи" луиз / А. В. Плотникова ; записала Галина Савина // Удмурт дунне. - 2003. - 8 авг. - С. 6, 11. - (Удмурт кизилиос).

За предоставление материала выражаем огромную благодарность редакции газеты "Удмурт дунне"