Пелё

Вашкала дыръя одӥг нюлэскьн син сузёнтэм ӝужыт пужым будэм. Со пужымлэн йылаз ик пелё, кар лэсьтыса, пи поттэм. Пиосыз куать вылэм.

Нюлэскытӥ шыраса ветлон сямен, пелёлэсь карзэ ӟичы адӟем. Ымдуръёссэ нюлыса, кар шоры учкыса, ӟичы пужым котыртӥ берга, пе:

— Пелё уром! Пелё уром! Одӥгзэ ке по пидэ сёт али! Ӧд ке сёт, тубыса но сиё...

Пужым ӥылысь пелё кышкаменыз шулӟектэм, дыр-р куалекъяны кутскем. Зар-зар бӧрдыса пуке, пе. Мар карыны ёрмеменыз, одӥг пизэ ӟичылы куштэм. Ӟичы, пелёпиез палэнэ нуыса сием но гурезь бамалэ, шунды шоры выдэм. Кема-а, ӧжыт-а кыллем — тодӥсь ӧвӧл. Кайта нуналаз нош сиемез потыны кутскем. Бадӟым пужым улэ нош ик вуэм. Пелё сое адӟыса тэльмыре, пе:

— Ӟичы юлтоше, пиосме эн си ни вал. Аслам но вить сяна ӧз кыль ни.

Ӟичы пумитаз вазем:

- Пелё уром! Пелё уром! Одӥгзэ ке но пидэ сёт вал! Од ке сёт, тубыса но сиё, пужымдэ но корало. Тубоно ке, киы вань, корано ке, тӥре вань.

Пелё кышкатскем, нош ик одӥгзэ пизэ карысьтыз куштэм. Ӟичы сое куртчем но Туймы дурысь возь вылэ нуыса кесям. Сиськем бераз, ымдуръёссэ нюлыса, шур дуре мисьтӥськыны васькем.

Пелё нош пужым йылаз, пиоссэ жаляса, уен-нуналэн бӧрдыса пуке, пе. Куинетӥ нуналаз ӵукна ик пелё доры, пужым йылэ, пересь дыдык пуксем.

- Малы сыче чигиськыса бӧрдӥськод? — юам со.

- Кызьы уд бӧрды: ӟичы кык пиме нуиз ини. «Ӧд ке сёт, тубыса но сиё, пужымдэ но корало»,- шуэ. Тубиз ке, со огмес но уз кельты: пужыммес погыртӥз ке, коркамес но таркалоз.

Пужымен артэ сылӥсь тыпы улын ӟичы таослэсь вераськемзэс шып гинэ кылзыса пуке, пе.

— Эк, визьтэм, визьтэм!—шуэ дыдык.—Мар кышканэз со ӟичылэсь? Пужым йылэ тубоно ке, солэн киыз ӧвӧл, корано ке тӥрез ӧвӧл. Юнме сётэмед пиостэ. Табере эн сёт ни.

Ӟичылэн сюлэм писыръя. Дыдыклы вожез потэмен ӵыжектэм ни. Синъёсыз ӝуало, пе.

— Сюрод-ай, сюрод, шедьто астэ но,— малпа ӟичы. Дыдык пелёез дышетэм но пужым йылысь гултыртыса лобӟем. Пелё бӧрдэмысь дугдэм.

Ӟичы табере пужым улэ кариськем ни. Небыт быж вылаз пуксем. Йырзэ выллань урдыса, пелё шоры вазем:

— Пелё уром! Пелё уром! Одӥгзэ ке но пидэ сёт вал али. Ӧд ке сёт, тубыса но сиё, пужымдэ но корало.

— Тырмоз ини, уно ӧрекчад. Тубоно ке, тынад киыд ӧвӧл, корано ке, тӥред ӧвӧл,— ӟичы пумит пелё вазем. Ӟичы, ӥырзэ ошыса, гурезь уллань Туймы ӧр пала шунь-шунь кошкиз, пе.

Пелё шумпотыса пиоссэ утялтыны кутскем.

Ӟичы гурезь баме, возь кыре, вуэм но зунь-зунь выдэм, кулэм амал кариськем. Кема-а, ӧжыт-а кыллем — тодмо ӧвӧл. Лобаса ветлись пересь дыдык кулэм ӟичыез адӟем. Гул-тыр-р! гултыр-р! карыса, ӟичылы матэ пуксем. Со сьӧры пиосыз но вуиллям. Зӥчы котыртӥ гултыртыса тэтчало.

— Гултыр-р! гултыр-р! Синзэ меда кокчалтом, быжзэ меда кокчалтом? — Дыдык пумен матэ но матэ лыктэ.

Синзэ кокчалто шуыса, дыдык ӟичылэн йыр палаз тэтчем. Йырзэ вылэ-э-э ӝутыса, ӟичылэсь синзэ кокчалтыны ӧдъя вылэм но, ӟичы зуркак тэтчем, дыдыкез кырмем. Писыз кышкаса лопыр-лопыр лобӟиллям. Анайзэс жаляса, вылӥын кесясько, пе.

- А-а, ачид но сюрид-а? Пелё уромдэ туж дышетӥськод вал, - ӟичы дыдыклэсь кылзэ юа.

- Ӟичы уром, улэпкын эн си вал! – пересь дыдык сюлворыны кутскем. – Сиёд ке но, сиёд ке но, нырысь ик, куинь тылытӥм кутыса, музэ шуккы, собере си. Визьтэм ӟичы солэсь кылзӥськем. Куинь тылытӥз кутэм но, дыдыкез вылэ-э ӝутэм. Вай-вай бералскыса, музъем борды шукке вылэм но, дыдыклэн куинь тылыез ӟичы ыме ишкалскыса кылем. Дыдык лобӟем. Ӟичы йырыз курен олокытчы кошкем.

Дыдык озьы кескич ӟичыез пӧям, пелелэсь пиоссэ улэп кельтэм. Со дырысь пелёен дыдыкъес уромъяськыса уло, огзы доры огзы куное ветло, табань сиё, мусур юо, огзэс огзы куно каро.