Тырмостэм купец

Одӥг купецлы, кема иземеныз, нунал вакчи потэ вылэм. Калыкез ужаны медъякуз, солы нунал эшшо но вакчи потылэм. Та купецлэн одӥг нуналскын огпол корка лэсьтыса быдэстэмез потэм. Соин ик нунал кузь карисез утчаса ветлыны кутскем. Нунал ӵоже утчаса ветлэм — шедьтымтэ, кыкетӥ нуналаз ветлэм — шедьтымтэ. Куиньметӥ нуналаз гинэ Лӧпшо Педунез шедьтэм.

— Ма кулэ ай, ваше степенство? Ма муген мон доры лыктоно луиды?— юам Лӧпшо Педунь.

— Мыным нунал туж вакчи потэ. Ужаны медъясько но, ужасьёсы трос ик ужаса уг вутто, нош уксё соослы тыр, со вӧзы ик с.д. Мынам кызьы ке нуналэз кузь кареме потэ но, нокинэ но нуналэз кузь карыны быгатӥсь муртэз уг шедьтӥськы. Тон уд быгатӥськы-а меда шуыса юаны лыктӥ.

— Э-э, хе-хе! Кызьы гинэ, ваше степенство, кузёез доры ик лыктыны шедьтӥды?

Мылкыдыз капчи луыса, «мон тае пунэмзэ тупато ай» шуыса, ас понназ, пе, серекъя Лӧпшо Педунь.

— Мон тодӥсько, тодӥсько, кызьы нуналэз кузь карыны. Дас пуд пызь сётод ке, верало. Мон чик но ӧй курысал но, сотэк эмыз уз луы, соин курисько,— шуэм Лӧпшо Педунь.

— Ма, дас пуд пызьме но уг жаля, ӝоггес вера гинэ.

— Тани кызьы нуналэз кузь кароно,— лад-лад вераны кутскем Лӧпшо Педунь:—Шунытгес дэрем, пенжак дӥся, со вылэ тулуп, пыдад гын сапег пон, йырад изьыдэ изьыя. Саник кут но, ӝужытгес кызьпу йылэ тубыса, шундыез бышкалтыса возь. Валад-а?

— Валай, валай. Туж тау тыныд та визь-кенешед понна. Празднике куное лыкты, ачим тонэ туж куноято.

Купец гуртаз вуэм но шумпотыса кышноезлы, пе, вера, нуналэз кузь карыны дыши, пе, шуэ.

Пӧсь гужем, самой кузь нуналэ, корка лэсьтыны со калыкез ӧтчам. Ӵукна ик шуныт дэрем, пенжак, тулуп дӥсям пыдаз гынп, йыраз секыт изьы понэм. Кияз нош саник кутэм но — самой ӝужыт кызьпуаз тубем. Ужасьёсыз ужало но ужало ини, Купец нош шундыез саникен «бышкал-тыса» возе. Пӧсяменыз вылтыртӥз ву жальыр гинэ, пе, вия. Киосыз пыктэм кадь, пе, луэмын ини.

Ужасьёсыз нош дугдылытэк ужало но ужало. Купец соослы, ужаны ӧтьыкуз, «мон кызъпуысь васькемелэсь азьло ужамысь дугдоно ӧвӧл» шуыса верам вылэм. Кышнозэ но чакланы косыса кельтэм. Кызьпу йылын улыса, та купецлы нунал туж но туж кузь потэм ини. Солэн таӵе кузь нуналэз тодэмез ик вылымтэ. Нуназе ӧжыт гинэ ортчыса вуэм но, мунчое пырем кадь котмем. Суйёсыз, саникен шундыез «бышкалтыса» возённаз, тыпы зырен тышкам кадь жадиллям. Озьы жумыляк луыса, кызьпуысь васькем.[1][2]

— Я, ужасьёсы, туннэ туж кема ужады ини, тырмоз,— шуыса, ужасьёссэ ӝыны нунал гинэ ужатэм, собере туж ӟеч сюдыса-сектаса лэзем. Соосыз, марзэ-созэ валатэк, гуртазы капчи мылкыдын бертӥллям.

Озьы купец нуналзэ кузь карем. Лӧпшо Педуньлы дас пуд пызь сётэм, вылаз ик туж зол куно карыса лэзем.