Эбга сярысь пересьёслэн верамзы

Эбга, Дондылэн мукет пиосыз яна потэм бере, нырысь-валысь Донды дорын ик улэм, пе. Айымуртэныз кушласькем шуыса вераськемысьтызы, йырыз кур луэм но матысь муртъёссэ картсэ виыны косэм. Донды со сярысь тодэм но кензэ бордысьтыз уллям.

Соку Эбга нимысьтыз каре интыяськем, Эбгакар кылдытэм. Татын улыкуз, солэн пиез вордӥськем. Удмуртъёслэн вашкала сямзыя, вордӥськем пиналлы пересьёс ним сетозы вылэм. Дондыез ӧтиллям. Эбгалэн мирошка пиезлы Донды «Чибинь лу» шуыса сӥзем. Музъем но нимысьтыз висъям.

Бӧрысь Эбгалы Дондылэн пиезлы таче ним понэмез ултӥям кадь потэм. Йырыз курен музьыоссэ Дондыез виыны косэм. Кулон азяз Донды сое каргам. «Кулэм берад каредлэн пеймыт но нюр сюй пушказ дауръёсын мед улод» шуэм. Эбгаез, пе, Дондылэн матысь адямиосыз Чупчие выйтӥллям. Но, Дондылэн каргамезъя, со али ке но Эбгакар пушкын улэ но арлы быдэ адямиос азе адскылэ, шуо. Вашкала кызлэн вай вылаз пуксьыса, аслэсьтыз нюромем дӥсьсэ куасьтыса, пе, пуке.