Кондрат батыр

Иж шурлэн меӵ ярдураз, ӝокыт сьӧд нюлэскы, Кондрат батыр

аслыз улон инты лэсьтэм: туж мур гу копам, отчы корос лэзем. Гуэ

пыранзэ секыт чугун плитаен ӵокталоз вылэм — Кондратлэн сяна,

сое нокинлэн но ӝутъямез-лэзьямез луымтэ.

Ас батыр кужымезлы оскыса, Кондрат огназ улыны кариськем.

Улэм-улэм озьы — мӧзмыт потэм ас кожаз улыны. Нюлэскытӥ ветлыны кутскем.

Шур дуре лап кариськоз но учкоз, пе, вал ву шоры.

Map малпалоз вал — кин тодоз на табере! Собере матысь гуртъёсы ветлыны кутскем.

Кондратлэсь батыр кужымзэ тодыса, калык сое аслыз эксэй карыны малпам, пе.

Соку удмуртъёс бигеръёсын ожмаськозы вылэм.

Бигеръёс шӧдтэкак вуо но быдэс гуртъёсты таласа, сутылыса кельто, пе, вал.

— Кондрат, тон кужмо, ми тонэ асьмелы эксэй карыны чакласьком, — шуиллям удмуртъёс.

— Кужым вӧзы визь но кулэ на, тӥ пӧлын сыӵеосыз вань, сыӵезэ быръе, — шуэм удмуртъёслы Кондрат.

— Милемлы тон кулэ,— шуиллям солы.

— Яралоз, иське,— соглаш луэм Кондрат батыр.

Огпол тазьы Кондрат гуртын дыръя татчы Зарни Ордаысь бигеръёс

туж трос вуиллям. Чир-бар кесяськон ӝутскем — отын мамык пурӟе, пе, татын тылпу гома.

— Ойдолэ мон сьӧры! — шуэм куара кылӥськем. Кондрат батыр ас калыксэ озьы тушмонлы

пумит ӝутскыны ӧтем. Кондрат ачиз азьпалан мынэ, пе. Нырысетӥ ньӧлзэ ик бигер атаманлэн

сюлмаз лэзем. Пырак мугор пыртӥз потэм со ньӧл. Кутскиллям ук ожмаськыны!

Вань бигеръёс пӧлысь огез гинэ мозмем — вал вылын ворттыса кошкыны вуэм но асьсэ ханзылы верам:

— Хан, удмурт эксэй туж кужмо. Асьме войскомес одӥгтэм ваньзэ быдтӥз.

— Кытын со улэ? Мон соин кужымме мертало, — шуэм бигер хан.

— Со доры мыныны мон сюрес шедьто, — шуэм бигер.

Ожмаськыса жадем бераз, Кондрат ас юртаз шутэтскыса пуке

вылэм. Педлось вераськем куараез со кылэм ини:

— Со татын луыны кулэ, — шуэ, пе, бигер. Собере кин ке ӧссэ

усьтыны, пе, выре. Нош плитаез ӝутыны уг вормы, лэся.

Кондрат батыр со плитазэ ӵыжем но ханэн валче шуре палгытэм.

Плита улэ пачкаса ик бырем бигер хан.

— Йырме эн быдты, Кондрат, мон тыныд ярало али, — сюлворыны кутскем бигер.

— Мын, ӧсме потты вуысь! — кеськем Кондрат.

Бигер пырем ини шуре, плитаез поттыны вырем но быгатымтэ,

вуэ выем. Берлогес Кондрат ачиз ик поттэм ини.

Ханзы понна йыркурез берыктон вылысь, бигеръёс нош ик удмуртъёсын ожмаськыны кенешиллям.

Выль ханзы Кондрат батырлэсь кышкалоз вылэм.

— Нырысь ик Кондратэз виёно, — шуэм со.

Витьсэ самой кужмо бигеръёсты бырйыса, валъёс вылын Кондрат доры лыктэм хан.

Ас юртаз бертэм бераз, Кондрат батыр вал вылынъёсты адӟем,

соос сикетӥ талэн юртэз пала лыкто, пе. Зӧк пужым сьӧры ватскем

но эскерыны кутскем: кин таос, мар таос? Нош бигеръёс, валъёссэс

думылыса, пырак Кондратлэн юрт дораз, пе, лыкто. Отчы вуиллям но пыриллям.

Кондрат батырлы со ик кулэ вылэм: бызьыса лыктэм но пыранзэ

со зӧк плитаен пытсам. Нош ачиз валъёссэс пертчылэм но, огез вылэ пуксьыса, гуртэ кошкем.

— Дасяське ожмаськыны! — нош ик верам со ас калыкезлы гудырес куараеныз.

— Малы нош юнме ожмаськоно? Бигеръёс асьмеды уг исало ни ук, — шуэм одӥг сэзь удмурт.

Та адямилэн аслаз эксэй луэмез потэ вылэм. Кондрат сое мыжгем но вань лызэ-сьӧмзэ сузмытэм.

Мукетъёсыз шуиллям:

— Ми тыныд оскиськом, тонэныд тылэ но, вуэ но пыром!

Вить-куать матысь гуртъёс ожмаськыны дасяськыны кутскиллям

ини. Нош со куспын Кондрат тӧлпери кадь лобем ханлэн дворецаз,

ханлэсь кышнозэ пленэ басьтыны шуыса. Со кышноез кызь муртъёс

возьмаса уло вылэм. Дас укмыс бигеръёсты Кондрат соку ик быдтэм, кызетӥез пыдес вылаз лэзькем но сюлворе:

— Мон тыныд ваньзэ верало, эн гинэ виы монэ. Бигеръёс али выль хан быръё, тон вылэ войнаен мыныны малпало.

Кондрат батыр бигер ханлэсь кышнозэ ури-бери кутэм но дворецысь потэм. Дворец сьӧры, пе, сюрсэн-сюрсэн

бигеръёс люкаськиллям. Асьсэлы куиньметӥзэ хан бырйиллям ини.

Кондрат батыр одӥг бигерез куктӥз кутэм но ӝужыт забор сьӧры,

трос люкаськем калык пӧлы, сэрпалтэм. Бигеръёс соку гинэ шӧдскиллям, Кондрат татын шуыса.

Соку ик ханлэсь дворецсэ котыртыны кутскиллям. Нош Кондрат, хан кышноез кутыса, пукыӵ ньӧл кадь

лобем сэзь валэз вылын. Бере усиллям бигеръёс — Кондрат мышкын тузон гинэ пурӟыса, пе, кылиз на.

Ас калыкез доры вуыса, Кондрат кышно луонзэ возьманы адями кельтэм, нош калыксэ сике нуэм, ас юртэз пала.

Бигеръёсты кема витёно луымтэ: сьӧд пилем кадь вуиллям соос удмуртъёс пумитэ. Туж кужмо ожмаськыны кутскиллям.

Батыр сямен ик жугиськем Кондрат: кудзэ ӵыжаса но кудзэ мыжгаса сэрпаллям мур шуре. Ярдурын ик со бигер ханэн

пумиськоно луэм. Хан олокытӥ-мартӥ кинжалзэ поттэм но Кондратлэн сюлмаз бышкалтэм. Со куспын ик Кондрат но сое

чыртытӥз кутэм вылэм. Озьы кекатскыса, таос кыкназы ик шуре усиллям но быриллям.

Ож бырем бере, вань бигеръёс, ӵош кутскыса, со чугун плитаез

палэнтӥллям но пленэ шедем азьвыл ханзэс поттӥллям.