Бӧрысь гур

Ми кытӥ-о лыктӥмы но, ми кытӥ-о вуимы?

Сяла каръён кар йылтӥ но ӟичы ветлон вырйылтӥ.

Сизьым тэлез пыр потыса, сизьым шурез выжыса,

Сизьым-тямыс гурезьёсы тубыса но васькыса.

"Ӟумья, ӟумья", — шуо вал но. "Мар со Ӟумья?" — шуисько вал.

Синмыным но, ой, адӟытэк пельылы чик ӧй оскы.

Ӟумья гуртэ ми вуим но — урамзы нюкесь-гопесь,

Азбаразы ми пырим но — азбарзы жугесь-жагесь.

Корказязы ми тубим но — корказьзы но ӵужымтэ.

Лаковой но сапегеным ӵужыса но ми пырим.

Нош корказы ми пырим но — корказы но ӵужымтэ.

Лыз пустол но, ой, дӥсеным ӵужыса но ми пырим.

Бардовой сатин дэременым ӵужылыса ми пуксим.

Вӧлдэтазы учкимы но — чонари вотэс кыскемын.

Ӵуж кашимер кышетэным ӵушылоно мон луи.

Гур муръёзэс учкимы но — гур муръёзы но ӵыкмемын.

Пужыятэм айшетэным ӵушылоно мон луи.

Лампа шоразы учкимы но — пузырзы но ӵынамын.

Атласной но лентаеным ӵушылоно мон луи.

Вай шулдыртэ, шулдыртэлэ Кузьма кудолэсь корказэ!

Эшшо ик но шулдыртэлэ Тоня туклячилэсь ӝӧк сьӧрзэ!

Ӧм ке гинэ кырӟалэ ук, ӧм ке гинэ вералэ,

Мар ӟечъёсмес учкозы ук та ӟумья но калыкъёс?

Дыбырак но шатырак но мед-ось каре, эшъёсы!

Асьмелэн но Нина сузэрмы со тыр гинэ сылэ шат?

Одӥг пол вералом, кык пол вералом, куиньметӥяз йыг тетчом,

Куиньметӥяз йыг тетчом но кӧзонодэс тӥялтом.

Кӧзоноды ӧз ке чида, ӟег куроен пыкъялом.

Ӟег куроен ӧз ке чида, сезьы куроен пыкъялом.

Сезьы куроен ӧз ке чида, выль кырсиен пыкьялом.

Выль кырсимы ӧз ке чида, Нина сузэрмес нуиськом.

Милесьтым но, ой, сузэрмес не при чём ке кариды —

Басьтэ вал ук, басьтэ вал ук Назарка Лукерьядэс.

Милям гинэ, ой, сузэрмы сузэр кадь-а, ӧй-а, ма?

Базаре но пуктылэм ук сюй минё но(й), ой, кадь ик.

Милям гинэ выль кырсимы кадь-а, ой-а, ма?

Гур урдсы но думылэм ук сьӧд тэйӟем но(й) кунян кадь.

Милемыз но Дарья кенакмы мар но вераса ӧз лэзьы!

"Юонъёстэс туж юэ но, йырвизьёстэс эн ыштэ!"

Пыдам кутчай луд кеч сапег луд кеч кадь ик тетчаны,

Мылазям дӥсяй чигвесьёсме шильтырак но(й) карыны.

Чипчирган кадь куарае но резина кадь мугоры –

Кудӟытоз-а, погыртоз-а та ӟумья но винады?

Чипчирган кадь куараосме кудоям-туклячиям мон кельто,

Аргамат кадь, ой, мугорме мемиям-дядиям мон нуо.

Ойдолэ но мыноме горд узы бичаны,

Вуэмъёссэ возьмаса азьдор бамын пукоме.

Ойдолэ но мыноме горд намер бичаны,

Вуэмъёссэ возьмаса турын пӧлын пукоме.

Ойдолэ но мыноме ӵыжыт эмезь бичаны,

Вуэмъёссэ возьмаса силё вылын пукоме.

Ойдолэ но мыноме чипей чорыг кутыны,

Зыгатэмзэ возьмаса ярдурын но пукоме.

Ойдолэ но мыноме сьӧд сутэр но бичаны,

Вуэмъёссэ возьмаса вож возь вылын пукоме.

Пужым меда, кыз меда ысватмылэн четлыкез?

Пужым ик но, ой, лэся: жон! шуыса шуккиське.

Вае али поттэлэ пурысьтам но бекчедэс,

Поттӥды ке потгӥды но — маин меда эгесалом?

Вае али поттэлэ ньыльдон пулэн чалмадэс.

Поттӥды ке поттӥды но — кудмы меда керттылом?

Ой, потэ ук, потэ ук коркамес воштэммы.

Неужели тӥляд ӧвӧл иськавынды-бӧлякты?

Милям гинэ сузэрмы лавкае пуктэм мунё кадь,

Нош милям эмеспимы гур сьӧры думем кунян кадь.

Пияла чарка, быглес чарка питраз-кошкиз — адӟид-а?

Та пинал но дауред ортчиз-кошкиз — шӧдӥд-а?

Атасэд но чортоз гурт шорад, кикыед но силёз яг шорад.

Атасэд но чортыкы сайкалод но, кикыед сильыку бӧрдылод.

Тӧдьы Камлэн тулкымез мед шуккиськоз ярдуре —

Милям жингрес куарамы мед кылйськоз кыдёке.

Пуро-Можга, Пичи Пурга ёрос.

Вай-давай поттэлэ пурысьтам бекчедэс!

Бекчедэс ке ӧд поттэ, не за что но ум кошке.

Ой, потэ, туж потэ ӝожон вина юэммы.

Ӝожон пызьды ке ӧвӧл, ӟег пызен но яралоз.

Ӟег пызьды ке, ой, ӧвӧл, сезьпызен но яралоз.

Сезьпызвды ке, ой, ӧвӧл, вал пызен но яралоз.

Ой, потэ, туж потэ горд вина но юэммы.

Горд винады ке ӧвӧл, ӵуж кушманэн но яралоз.

Бадӟым Жужгес, Ува ёрос.

Литература

.