Сюан гур

***

Корказьёсты туж ӝужыт, тубеммы но(й) уг лу(й).

Ӧсъёсты но бон ньыль сэрго(й) ук, пыреммы но(й) уг лу.

Ӧсъёстӥды но пырыса(й) ук, ӝӧк вылады(й) учким но,

Отӥсен ик валамы(й) ук тӥлесьтыд байлыктэс.

Валлёсмы но бон лыктизы(й) ук юргаса, юргаса,

Асьмеос но лыктӥмы(й) ук, весь тӥледыз малпаса.

Гируш гынэ но кудолэн куро липетэн липетэз,

Пилька гынэ кудомылэсь ук манетэн липимы.

Уӵы кадь куараосмес кельтӥмы Ӝаггуртэ,

Чебер веськрес мугоръёсмес вайиськом Азаматэ.

Сарапул но купецъёс ук кен вузало.

Кузон гынэ купецъёс ук кен но басьтыло.

Азамат (Азаматово), Алнаш ёрос

***

Яг выртӥ лыктыса,

Пужымо пӧлтӥ лыктыса,

Сяла чипсонтӥетӥ лыктыса,

Дукъялэн коткантӥетӥз лыктыса,

Ыльыссэ някырак карыса,

Коссэ ырызак карыса,

Сизьымдон но сизьым кенер сурым тӥяса,

Куамын куать пар валэн лыктыса,

Широно-широно дӧдьыен лыктыса,

Азвесё-азвесё биньгозыен лыктыса,

Зарниё-зарниё букоен лыктыса, васькиллям.

Бадӟым варгазэн валлань тубиллям,

Пичи варгазэн сӥньыс нюжа кузя лыктӥллям,

Буртчин нюжа кузя кошкиллям.

Одӥг куӵо валэн нуымон дӥсез ӧвӧл.

Якшур, Якшур-Бодья ёрос

***

Сари валэн лыктӥллям!

Сари валэз гыр-гыр каре,

Сезьызэ вите, гыр-гыр каре!

Сезьыдэ пон сари валэлы, кудое,

Турындэ пон сари валэлы, кудое!

Малы лыктӥм ми?

Ичимень понна лыктӥм ми!

Ялэ-ка, ялэ-ка, сват кариськоме,

Куинь ке тэнкаез, нылэз ик басьтом.

Нылэз басьтыны лыктӥм!

Валъёсмес сюды сезьыен-турынэн,

Аслэмес сюды пыжемен-пӧзьтэмен!

Маид ке вань ке, ӝӧк вылэ вай!

Вай татчы винадэ!

Ми малы лыктӥм?

Юыны-сиыны лыктӥм,

Тонняд куное лыктӥм!

Глазов ёрос

***

Возьмады-а, возьмады-а, возьмамъёсты потӥз-а?

Ми лыктӥмы, ми лыктӥмы, лыктэмъёсмы потыса.

Вай сиём но шуэлэ, вай юом шуэлэ.

Сиыны но юыны лыктэм сюресмы.

Валъёсмы но лыктӥзы юргаса-юргаса.

Асьмеос но лыктӥмы, весь тӥледыз малпаса.

Лыктонъёсмес лыктӥмы кызьпу туйлэн югытъяз,

Пужым гинэ лягетӥ юр тылын ми потӥм.

Писэйгурт но гуртъёсы пырем но бере,

Кудомылэн тыл югытъяз, ой, ми лыктӥмы.

Писэйгурт, Алнаш ёрос

***

Остэ, остэ, Инмаре, лек тушмонлы эн сёты.

Ӟеч малпасез йыр йыламы, урод малпасез — ӧс сьӧрын.

Ӟеч-а, ӟеч-а возьмады, Иван кудо, Катя туклячи?

Тӥ ке ӟеч возьмады, ми но ӟеч лыктӥмы.

Ньыльдон иськем сьӧд волок пыр лыктӥмы.

Кыткылонтэм пар валъёсмес кыткылыса ми лыктӥм.

Шуккылонтэм валъёсмес шуккылыса ми лыктӥм.

Сьӧд тэльёстӥ ми потӥм писпу выжылэн выж вылтӥз-ултӥз.

Возь вылъёстӥ ми потӥм италмас сяськалэн югытьяз,

Выж вылъёстӥ ми потӥм уясь чабаклэн шудэмъяз, ӟег бусыетӥ ми потӥм ӟег сюреллэн югытъяз,

Ульчаяды ми лыктӥм электротыл югытья.

Капказяды ми вуим но — капкады дас кык замокен ӵогамын,

Зарни ключмес поттылӥм но — шалтырак ик усьтӥськиз.

Азбарады пырим но — азбарады из вӧлдэмын,

Валмы ӵабыштак кариз но — тылгизьы поттӥз.

Корказяды пырим но — корказьды тыпы выж пуллэсь.

Коркаяды пырим но — коркаосты горинча.

Нош асьтэос, кудое, сарапульской купеч кадь.

Нош асьтэос, туклячие, сарапульской барышня кадь.

Милям Матӥ апаймы милемыз лэзиз, ньыльдон гуртысь бырйыса.

Юри лыктӥм, юри лыктӥм, сины-юны шуыса.

Быттыр-быттыр лыктэммы кортэн кыскем сандык понна,

Быттыр-быттыр лыктэммы дуриськон кебит понна,

Быттыр-быттыр лыктэммы кык пал туриосыз огазеян понна.

Юри лыктӥм, юри лыктӥм кырӟаны но вераны.

Вася быратэ ӧй ке лусал, та ӟеч сюрес но ӧй сюрсал.

Кызь вить ар но, ой, ӵоже возьмаллям сюресмы туннэ вылэм, эшъёсы.

Милям Матӥ апаймы мар но визьмаса ӧз лэзьы:

"Юонъёстэс юэ но — йырвизьёстэс эн ыштэ, Сиёнъёстэс сие но — ӟеч кылъёстэс вералэ".

Ӝӧк вадьсады лампочкады ӵукна ӝужась шунды кадь,

Ӝӧк вылады ӝӧккышетты ӵукна усем пужмер кадь,

Ӝӧк вылады сиён-юонды шаерысь ваем емыш кадь.

Вае, эшъёсы, кырӟаломе, одӥг пул вылэ султыса.

Ой, кикие куалекъя, малы меда куалекъя?

Ой, бубие куалекъя, малы меда куалекъя?

Султылонтэм пол вылэ султыны шедьтӥ-а?

Чипчирган кадь куарае куробыз кадь луиз-а?

Ньыль сэрего чумъёстэс куинь сэрего ми кельтом,

Някырскем но сюрыостэс пезьгытыса ми кельтом,

Выллань ке но тэтчылӥм — потолоктэс ӝутылом,

Уллань ке но тэтчим — выж кӧзонодэс чигтом.

Выж кӧзонодэс чигтом но — ӟег куроен пыкъялом.

Ӟег куро ке ӧз чида, четверть винаен пыкъялом.

Четверть вина ӧз ке чида, эмеспиен пыкъялом.

Милям Вася эмеспимы гур дуре думем мес кунян кадь —

Милям Надя сузэрмы базаре пуктэм мунё кадь.

Дядиедлэн верам кылыз чурыт потӥз-а, сузэре.

Мемиедлэн пыжем нянез кӧш-а потӥз, сузэре?

Мемиедлэн пӧзьтэм шыдэз кӧш-а потӥз, сузэре?

Кызьы ке милемлы ярад, озьы ик кудоослы мед яралод.

ӧл — содэ потты, Иван-а но кудое.

Однако но вылэм ук тӥляд-а но мылкыдды.

Таӵеен ке тодысал, куиньмой азьло лыктысал,

Куиньмой азьло лыктысал но куиньмой берло кошкысал.

Кызьы меда ӵыдыса ми тӥ дорысь кошкомы?

Кошкон дыръёс луытозь, лыктон дыръёс медло вал.

"Ӟеч лу!" шуон интые, "ӟеч-а!" шуон медло вал.

Утчай-шедьтӥ, мырдэм шедьтӥ та яратон эшъёсмес.

Кабыста калыклэн шорсюлмаз пырем милям сузэрмы.

Вай шулдыртоме, эшъёсы, Иван кудолэсь четлыксэ.

Асьмеос ке ӧм шулдыртэ, кин-о бон но шуддыртоз?

Мармес-о но учкозы юмшась-а но калыкъёс?

Ум сётске но, эшъёсы, юмшась-а но калыклы.

Юэм кадь но кудӟем кадь эн кариське, эшъёсы.

Сэзьырак но пезьырак кариське ай, эшъёсы!

Сӥзьыл куазьлэн сэзь дырыз кадь сэзь кариське, эшъёсы!

Мар ке кырӟанды-веранды вань ке, ваньзэ вералэ, эшъёсы.

Берло кырӟаммы потоз но, ум шедьтэ ни та гурез,

Кык пол, куинь пол кырӟаны уз лэзьы ведь сузэрмы.

Кык пол, куинь пол кырӟанлэсь бадӟым Инмар мед утёз.

Не за што но ум кошке ньыльдон вожо чалматэк.

Ньыльдон вожоез ке ӧвӧл, огшорыез но яралоз.

Огшорыез ке ӧвӧл, дэрем сӧзул но яралоз.

Дэрем сӧзулды ке ӧвӧл, киӵушон но яралоз.

Оломар но сиим но, оломар но юылӥм —

Ӟеч кылъёсмес вераны али ке но ум тодке.

Ӟеч кылэз ке вераны, ӟеч мурт нылпи кулэ, дыр.

Ӟеч мурт ньшпи кулэ ӧвӧл — куарлэсь векчи кьш кулэ.

Куарлэсь векчи кыл кулэ ӧвӧл — кыллы усто мурт кулэ.

Кабыста, Пичи Пурга ёрос

***

Ой, потэ ук, ой, потэ ук чебермес но адӟеммы.

Лёгоно но пыд улад азвесь манет мед луоз.

Пыжоно но нянед булка кадь мед луоз.

Ваем-а но вуэд чылкыт ошмес ву медло.

Суяд понэм поскестэ пурты вуге уськытом.

Кымысад понэм укотугдэ йыркерттэт вылэ уськытом.

Пужым-а меда, кыз-а меда Костя кудолэн четлыкез?

Пужым ик вылэм но — жон! шуыса шуккиське.

Куинь-а меда, ньыль-а меда Костя кудолэн кӧзоноез?

Одӥгзэ но чигтытэк не за што но ум кошке.

Ӝӧк вылазы пуктӥллям тыр шунтэм вӧй тусьтызэс.

Со маин-о даллаше? Ӵукна ӝужась шундыен.

Ӝӧк вылазы пуктӥллям тыр кубиста тусьтызэс.

Со маин-о даллаше? Ӝыт ӝужась но толэзен.

Ӝӧк вылазы пуктӥллям тыр четвертной виназэс.

Со маин-о даллаше? Асьмемын ведь, эшъёсы.

"Юэ, юэ" шуо но — йыр кудӟемез уг тодо,

"Сие, сие" шуо но — кӧт тыремез уг тодо.

Чипчирган кадь куарае пу гырлы кадь луылӥз,

Узьыгумы кадь мугоры парем веник кадь луылӥз.

Одӥг пол вылэ султыса одӥг гумы пыр лэзёме,

Дыбырак! но лёгоме но шалтырак! но вералом.

Ой, кикие куалекъя, малы меда куалекъя?

Кутонтэм румкаез-а, оло, кутны шедьтӥськем?

Ой, бубие куалекъя, малы меда куалекъя?

Лёгиськонтэм пол вылэ-а лёгиськыны шедьтӥськем?

Не за что но ум кошке ньыльдон вожен чалматэк,

Не за что но ум кошке сьӧд кашамер кышеттэк.

Каравай-Норья, Завьял ёрос.