Эштэрек
Вашкала дыръя удмуртъёс пӧлын улэм туж кужмо но бадӟым адями - Эштэрек. Ньыльдон аресозяз со музъем ужам, ожмаськыны ветлымтэ. Соку дыръя бигеръёсын но мукет тушмонъёсын ӵем ожмаськоно луылоз вылэм.
Эштэрекез егит дыръяз ик тӧрое пуктоно, пе, шуо вал, но со тӧро кариськымтэ.
- Мон егит на, монэ асме но кортнано на, соин ик мон тӧрое уг тупа,— шуэм со удмурт выжы йыръёс азьын. Соин ик пересь Иднаез бырйиллям, нош со кулэм бере - Ожмегез. Ожмег кулэм бере гинэ, Эштэрек тӧрое пуксем.
Кӧня ке улыса, бигеръёсын ожмаськоно луэм. Нош Эштэреклэн не ӟеч валэз, не пыӵал тӥрлыкез ӧвӧл. Со одӥг веськрес бадярез выжыеныз валче ишкалтэм но, улзэ-вайзэ сузяса, пукыӵ золтэм. Трос лэчытэсь ньӧлъёс дасям. Табере вал гинэ шедьтоно на. Нош кытысь со ачиз кадь ик кужмо валэз шедьтоз? Уллёысь солы одӥг вал но уз тупа шуыса, со тодэ вылэм. Эштэрек Кам дуре пуксем но куректыса, пе, пуке.
Валэз ӧвӧлысь ӝожомыса, Эштэрек бӧрдыны кутскем. Солэн бӧрдэменыз шур тулкымъяськыны ӧдъям, синвуэз шуре усемлы быдэ ярдуре тулкым шуккиськоз, пе, вал.
Ву пыдэсысь вумурт ик кышкатскем. Карысьтыз потэм но ярдурысь Эштэрекез адӟем.
- Ма пумысь сокем куректӥськод? — юам со Эштэреклэсь.
- Ӧрӟи кадь лобась вал шедьтэме уг луы, соин куректӥсько,— шуэм Эштэрек.
- Кылзы визь-кенешме. Туннэ уйин шур дуре камыш пӧлы пуксьы но возьмаськы. Татчы Кереметлэн валъёсыз лыктозы. Ву юыны кутскизы ке, сьӧд бадӟым ужпиез кут. Нош юрттэме понна мынэсьтым но куронме быдэсты — чебер бигер нылэз мыным кузьма.
- Я, иське, валэ луиз ке.
- Эн вунэты: тыныд — вал, мыным — бигер ныл.
Уйшор уйин, пе, ву дуре вал уллё вуиз. Азьпалаз ик бадӟым сьӧд ужпи. Эштэреклэн синъёсыз ик ӝуаны кутскиллям. Тани, пе, со ужпи Кам вуэ пыриз ни, юэ... Со куспын Эштэрек шуак гинэ вал чырты борды кырмиськем но вылаз тэтчем. Ужпи резь поттыса, пе, кошке. Эштэреклэн сюлмыз ик икак луэм шумпотэменыз. Тани со бадяр пукыӵеныз вал вылын тӧлпери кадь поръя, пе. Тушмонэз сюэн-сюрсэн быдтылэ. Сикез тӧл погыръям кадь усьыло, пе, бигеръёс.
- Шумпотэ, удмуртьёс! — кесяське, пе, Эштэрек.
Трос бигеръёсты соку уарлы басьтӥллям. Эштэреклы ортчыт чебер ныл шедем - таӵезэ адӟемез ик вылымтэ на. Шур дуртӥ вал вылын со бигер нылын, пе, кошке ини, «та мыным умой кышно луоз», малпа.
Озьы гинэ малпаса вуттэм но — шур тулкымъяськыны кутскем. Эштэрек азе кускыныз ӵож вуысь вумурт, пе, потэм:
- Вераськеммес вунэтэмед, лэся, Эштэрек уром. Вай мыным бигер нылдэ!
Эштэрек гор-гор серектэм:
- Уг сёты, пересь. Кулэ ке, пиньтэм песянаез ваё.
Чик номыр вератэк, вумурт ышем. Шуак ву тулкым потэм но - Эштэрекез сэзь валэныз но чебер нылыныз валче шуре кыскем [1].
УКВ, 1954:5—7
