"улошный" напев
Кырӟан дунэн басьтымтэ
Кырӟан дунэн басьтымтэ но,
Веран дунэн басьтымтэ*.
Асьмен та пинал даурмы
Дунэн басьтэм кадь гинэ.
Италмасэз мон бичай но,
Ву ӧй шедьты пуктыны.
Туганэным пумиськи но,
Кыл ӧй шедьты вераны.
Легезьпу пӧлы пырид ке,
Шедьтод меда потыны?
Туганэныд пумиськид ке,
Кыл шедьтод-а вераны?
Ӧй но нуллы, ӧй но миськы
Курень беро кышетме.
Ӧй но вера, ӧй но бӧрды,
Туганлэсь люкиськыкум.
Гожтэт гожтӥ, куинь чур гожтӥ,
Куинь чур гожтӥ но дугдӥ.
Малпай, малпай, куинь ар малпай,
Куинь ар малпай но дугдӥ.
Гожтэт гожтӥ мон тыныд но,
Гожтэт кулэ, дыр, тыныд.
Мон ведь тон кадь чебер ӧвӧл,
Чебер кулэ, дыр, тыныд.
Чебереныд эн ушъяськы,
Сяська кадь чебер ӧвӧл.
Сяськалы ке уд кельшиськы,
Тон мыным кулэ ӧвӧл.
Чебер - со одӥг, эшъёсы,
Чеберен ул(ы)ны уг лу.
Чебер но кулэ кытӥяз —
Шулдыръяськон вакытэ.
* Котькуд кыкетӥ но ньылетӥ чуръёссэ кырӟало кык пол.
Тӧдьы кызьпу вож-вож куаро но
Тӧдьы кызьпу вож-вож куаро но,
Марлы со но гурыё?
Пинал йыры, вож мугоры
Марлы со но кайгуо?
Пинал йыры, вож мугоры
Марлы со но кайгуо?
Гурыез ке ӧй луысал,
Вениклы но ярасал.
Гурыез ке ӧй луысал,
Кайгуэз ке ӧй луысал,
Калыклы но ярасал.
Кайгуэз ке ӧй луысал,
Калыклы но ярасал.
Васьки, васьки вагон кузя,
Ӧй быгаты пуксьыны.
Васьки, васьки вагон кузя,
Ӧй быгаты пуксьыны.
Ас яратон туганэным
Ӧй тод, кызьы улыны.
Ас яратон туганэным
Ӧй тод, кызьы улыны.
Шудӥ, шудӥ мон тӥледын,
Шудон сяин синмаськи.
Шудӥ, шудӥ мон тӥледын,
Шудон сяин синмаськи.
Шудон сяин синмаськи но
Люкиськонтэм кадь луи.
Шудон сяин синмаськи но
Люкиськонтэм кадь луи.
Со урамтӥ тубид-а но,
Та урамтӥ васькид-а?
Со урамтй тубид-а но,
Та урамтӥ васькид-а?
Оло, ачид мӧзмид-а но,
Мӧзмемъёсме тодӥд-а?
Оло, ачид мӧзмид-а но,
Мӧзмемъёсме тодӥд-а?
Ачим но мӧзми, туганэ,
Мӧзмемъёстэ но тодӥ.
Ачим но мӧзми, туганэ,
Мӧзмемъёстэ но тодӥ.
Вал мийа [меда] пичи дыры но,
Ноку но ӧй вал мийа.
Вал мийа пичи дыры но,
Ноку но ӧй вал мийа.
Вал мынам яратонэ но,
Улэм вал яратыса.
Вал мынам яратонэ но,
Улэм вал яратыса.
Со табере туж кыдёкын,
Кузь сюресын келямын.[1].
