Чӧжы сиён (удмурт кылын)

Кунян вордскиз!

Тулыс куазь тужгес но трос сюлмаськон вае гуртоослы. Тулысэн герӟаськемын гырон-кизён ужъёс. Юнме уг шуо: нянь ке вань, вӧйыд но луоз. Нош вӧй поттон понна асьмеос будэтӥськом пудо-живот, тылобурдо. Вал сяна, гид азбарын тужгес но кулэез – скал. Скал котькуд нунал сётэ асьмелы йӧл. Йӧллэсь поттӥськом йӧлвыл, аръян, варок. Вароклэн вуэз гинэ но пӧраськыны мынэ. Ми палан варок вуэн киренэн сюкась, сюкась лэсьто на. Оглом вераса, скал вордон асьме калыклэн вираз пыӵамын.

Котькудӥз кузе чакла, скалзылэсь бызылэмзэс, со нуналэз нимаз гожто– муры кылемезлэсь кышкало. Шумпотыса вите кунян ваемзэ. Скал кунян вайыны курадӟе ке, солы юрттыны кузёос но пото. Милям асьмелэн но таӵе учыр вал. Пинал ветыл басьтӥмы. Нырысетӥ кунян вайыны скалмы курадӟиз. Таӵе дыръя зэмзэ но юрттыны кулэ. Мынам нэнэе вань улонзэ фермаын ужамын ке но, троссэ уг тоды на вылэм. Скалмылэн кунянэз нокызьы но уг поты. Ми сое пыдтӥз но кыскаськом ни. Соку нэнэе шуиз: – Мын ай, Оля кенактэ ӧть. Сотэк ум быгатэ, дыр. Мон дыртыса Оля кенакез ӧтьыны кошки. Со гидамы пыриз, скалмес маялляз но ым пушказ кыӵе ке кылъёс шыпыртӥз, собере шуиз: «Я, табере поттэ ини». Мон капчияк кыски но кунянмы вордскиз. Озьы нырысьсэ тодӥ: котьмалэн аслаз кылыз вань. Азьло дыръя больницаос ӧй вал. Калыкмы уже кутэ вылэм инкуазен сётэм быгатонлыксэ: пелляськон кыл шуо сое ми палан. Со кылэз ваньмызлы уг верало. Даурысь дауре анай-атай кельтэ сое аслаз нылпиосызлы, нош нылпиосыз – асьсэлэн нылпиоссылы. Озьы со кылъёс пельысь пеле, ымысь ыме вераса кылё но гуртын улӥсьлы юртто.

Гурдэ эсты, кенаке

Кунян вордскемлы шумпотыса милям гуртамы ӵӧжы сиён ортчыто (гуртамы та кылэз «ӵӧжи» шуо). Ӵӧжы сиён – одӥгез вашкала сэбед. Со герӟаськемын пудо вордонэн. Кунян ваем скаллэсь йӧлзэ кыско но нырысь ик скаллы люктало: «Осто, Инмаре! Йӧлыз-вӧйыз аслыз мед луоз». Скаллэн тазалыкез мед луоз шуыса, пичияк вина но сектало. Нош медаз ӵыжаськы шуыса, тазьы лэсьто вал: куинь пол нонокысь йӧлзэ кыско кирос карыса выллем. Собере со кыскем йӧлэз юбо выжые куинь пол пазьго.

Кунян вордӥськем бере куинь нунал ӵоже йӧлзэ кыско но нимаз посудае люкало. Ньылетӥ нуналаз со люкам йӧллэсь аръян шукко, нош витетӥ нуналаз ӵӧжы сиён ортчыто. Та сэбед семьялэн гинэ ӧвӧл, быдэс бӧляклэн кема возьмам шулдыръяськонэзлы пӧрме. Гуртысьтымы пересьёслэн верамзыя, пинал скаллэсь ӵӧжызэ быдэс бӧлякен сиё вылэм. Выль вӧйын шуыса гур эсто, табань пыжо. ӵӧжы сиыны тӧдьы пызен нянь пыжо. Выль пыжем нянез пуртэн уг вандыло, сое тӥяса гинэ сиё. Бырем гуре чугунэ йӧл быректыны пукто.

Ӵӧжыез тазьы пӧзьто. Гурлэн учогаз пуртыез луэ. Со пуртые люкам йӧлэз кисьто, ог 4-5 курегпуз поно, шӧмызъя – сылал. Суретэз кин ке но пуньыен яке дурыен бугыръяса пуке. Ӧд ке бугыръя, ӵӧжыды ӵуштаськоз, сиыны уз яра. Пуртые кисьтэм йӧл комокаськыны кутске ке, сое мискае тырозы но сӥятыны пукто. (Берло аръёсы ӵӧжыез бырем гурын но пӧзьто ини).

Ӝытазе пиналъёс вань бӧлякъёсты ӵӧжы сиыны ӧтё. Номыр но сыӵе-таӵеез ӧвӧл ке но, та сэбедэз, вань пичиос сямен ик, мон но яратӥсько но возьмасько.

Ӵӧжы сиёнэ буш уг лыкто вал. Пӧрало кӧмеч, колды нянь, вина ваё. Корка пырыку шуоно: «Ӟечбуресь! Скалды йӧло-вӧё, таза мед луоз. Вуоно арын нош ик ӵӧжы сиыны мед кылдоз!» Ваем кузьымзэс ӝӧк пуме поно, асьсэос ӟус вылэ пуксё. Вань бӧлякъёс вуэм бере кутске куяськон.

Куяськон

Куяськонэн кивалтэ коркась мӧйы пиосмурт. Ӝӧк пуме дэра ӵушкон вылэ пуктэ ӵӧжы, парем йӧл, тӧдьы пызьлэсь пыжем колды нянез но мукет пӧраськемъёсты: перепеч, шаньги, сяртчылэсь паронка, кӧжыен тоторо, кубистаен, варокен, губиен сиёнъёс, табань, сюкась, пӧзьтэм курегпуз, чай но чашкаен вина. Ӝӧк вылэ пукто куяськон тусь, тусь борды ӝуась сюсьтыл интыяло. Фуфайка дӥсяса но йыраз шляпа поныса, кузё кутске куяськонэз:

– Чеке пересьёс, Салья гуртысь вань родняос, Вахит выжыысь вань пересьёс, ваньды лыктэ огазе. Тӥледыз бурместыса куяськиськом. Тазалыко улон сётэ будӥсь нылпиослы, пудо-животлы, дунне вылысь вань улэп макеослы. Тани тазьы ми сямен ӵош сие-юэ, ог-огдылы юрттыса, ог-огдэс гажаса сабырлы гинэ улэлэ.

Собере нимаз вера на аслэсьтыз тужгес матысь ӵыжы-выжыоссэ но бӧлякысь но гуртысь тодмо нимъёсты. Та кылъёсты веракуз, нимаз тусьтые дасям ӵӧжыез, парем йӧлэз пуньыен тусе сьӧрлань кисьта. Собере сюкасез, чаез куяськон тусе куинь пол пичиен сьӧрлань кисьтэ, пӧраськемъёсты пичиен чигтылэ но куяськон тусе сьӧрлань карыса куя, ачиз но веръя. Нош винаез уг кисьтало, пичияк гинэ веръяло но интыяз пукто. Куяськонзэ со тазьы йылпумъя:

– Я, вождэс эн ваелэ, бурместыса куяськеммес санэ басьтэ.

Собере куясько ӵӧжы сиёно лыктэм мукет пиосмуртъёс. Соос куяськем бере кык кузя мӧйы пиосмуртъёс куяськем тусез кыре потто. Куяськонэн тусез поттӥсьлы кертто айшет. Кыре потыса, куяськем тусез юбо йылэ пуктыса кельто яке куяськемез чылкыт интые пазьго. Сое одно ик тылобурдо мед сиёз шуо.

Оштрак-а, местрак-а?

Ӝӧк сьӧры азьло пукто бӧлякысь вань пиналъёсты. Нырысь ик ӵӧжыез веръя коркась мӧйы воргорон. Собере артэ пукись пиналлэн кымысаз шальк! гинэ шукке пуньыеныз но шуэ: «Оштрак-а, местрак-а?» Та кылъёс бере нылпиос нянь куртчыса, ӵӧжы веръяло. Отын но татын кылӥське пуньылэн «шальк!» ваземез. Озьыен, нош ик кинлэн ке но кымысаз пуньы йӧтӥз. Пуньы йӧтэмлы вожзэс уг ваё. Озьы, пе, вордскем нунян ӵыжаське. Ӝӧк сьӧрын пукисьёс веръяло вань пыжиськемез, ӵӧжыез парем йӧлэн ӟузьыса сиё. Кӧтсы тырем бере, кузё кырӟан мытэ:

Сиыса-юыса ваньёс уз быре,

Нак балялэсь Инмар мед утёз.

Ойдолэ али, бӧлякъёсы, валче уломе.

Ум куштэ одӥгмес но одӥгмы ноку но.

Собере ини кутско кырӟаны пӧртэм гуръёсты.

Ми доры но лыктылӥллям

Ӟеч, дыр, гинэ куноос.

Мар ӟеч кылмес вералляса

Али ке но утялтом.

Тӥ уд лыктэ ми доры но,

Ми ум мынэ тӥ доры.

Ку бон адӟом, ку тодмалом

Одӥгмес но одӥгмы.

Кыӵе потӥз, кыӵе потӥз

Эмезен чай юэме.

Кыӵе потӥз, кыӵе потӥз

Тӥ туганме адӟеме.

Ӝужыт-ӝужыт гурезь йылын

Сюэн-сюрсэн муш лоба.

Сю ар,сюрс ар ум улэлэ

Вае валче уломе.

Валче гинэ улэмъёсмы

Марлы гинэ уз луы?

Одӥг анай-атай нылпи

Асьмеос бон ӧвӧл шат?

Собере пиналъёс но мӧйыос пӧртэм шудонъёсын шудо. Тани одӥгез соос пӧлысь. Вань лыктэм адямиос круге султо. Шуба дӥсяса, шораз пиналэз султыто: со, пе, кунян. Люкаськемъёс шунды бергамъя ваче ки кутскыса бергало но кырӟало:

Кунянлэн имениказ ӵӧжы пӧзьтӥмы.

Таӵе ӝужытэсь, таӵе лапегесь,

Таӵе паськытэсь, таӵе сюбегесь.

Ӵӧжы, ӵӧжы, кинэ яратскод басьтод,

Ваньмыз ик чебересь,

Таиз эшшо чебергес.

Кругысь пияш кинэ ке басьтэ но соос берганы кутско. Бергакузы тазьы кырӟало:

Эх, возь кузя,

Шулдыр возь кузя,

Монэ туганэ келяз,

Гармошкаеныз.

Табере круг шоры султэ мукетыз адями. Мукет пӧртэм шудонъёсын шулдыръясько на. Собере пӧртэм шудонъёсын шулдыръясько на. Ӵӧжы сиёнысь тазьы кошко: «Туж бадӟым тау куно каремдылы. Скалды йӧло-вӧе, таза мед луоз. Вуоно арын нош ик ӵӧжы сиыны мед кылдоз!»

Ӵӧжыез ваньзэ уг быдто сиыса, кин ӧз ветлы та сэбедэ, соослы анай мурт мискае поныса нуоз ӵуказеяз. ӵӧжы ваемез понна кузё кышно буш мискаяз нянь туриж вандыса понэ но сылал пызьна: син медаз усьы, пе. Келя таӵе кылъёсын:

– Скалды йӧло-вӧё, таза мед луоз. Туж бадӟым тау ӵӧжыды понна.

Кылем ӵӧжыез арам уг каро. Гуртамы ярато ӵӧжыен пельнянь пӧраны. Ӵӧжы вӧзы кулэ на таба вылын жарить карыны сугон. Пельнянь пуш дась. Пельнянь кутыны дырды ӧвӧл ке, пирожки пӧралэ. Туж ческыт, утчалэ ай! Скаллэн йӧлыз-ӵӧжыез калык эмъяськонын но кутӥське. Нырысетӥ куинь нуналзэ люкам йӧлэн эмъяло пыдъёсысь тордэм вирсэръёсыз.

.