Пересь сюан

Быдӟыннал удмуртъёслэн Выль арез пумитан интыын вылэм, солэн котькуд нуналыз кыӵе ке но сэбедэн герӟаськемын. Быдӟыннал арнянуналэ луэ. Со нуналэ гурт калык вӧсяське, собере вӧсьнергее ветлэ. Вордӥськонэ (понедельнике) нуназе котырын ортче Пучи ворттон, ӝытпал нош ортче вӧсьнергее ветло. Пуксёнэ (вторнике) гуртамы Покшур нырйылын ортче Сабантуй. Вирнуналэ (среда) – кукей лушкан нунал. Четвергез ми палан Мушег шуо. Соку Мушег черкогуртэ базаре ветло вылэм, соин ик озьы нимазы. Та нуналэ гуртамы шур сопала куное пото. Бигерарняе (пятницае) шурсопалъёс куное пото ни. Кӧснуналэ (субботае) гуртамы ортче Пересь сюан, арнянуналэ – Урбеч уллян. Выльысяз вордӥськонэ тулыс кисьтон каро, собере Вань сэбедъёс ворсасько, адямиос кизён уж борды гижысь-пиньысь кутско ини.

Инкуазьлэн воштӥськеменыз туала кизён-гырон ужъёс куддыръя вазьгес яке бергес луо. Гурт улонэз радъя вылэм вань гуртэн быръем староста но Гурт Кенеш. Ойдолэ тодматскоме Пересь сюан но Урбеч уллян сэбедъёсын.

Сэбедлэн нимыз ик вера ини, кинъёс та сэбедын кузёос. Пересьёс висъясько визьмынызы но улонэз валаменызы. Аръёс ортчемъя соослэн но пыдъёссы вакчияло. Милям гуртамы та нуналэ пересьёслы луонлык сётӥське асьсэды возьматыны.

Нырысь кенешо кытчы люкаськыны. Нуназе котырын урам кузя трос калык ваське, иське, туннэ ортче Пересь сюан. Егитъёслэн но, пичиослэн но сэбедэз адӟытэк кылемзы уг пот, пересьёс сьӧры ветло. Кылзо, адӟо, ма вераса кырӟало, кинъёс доры пыро. Вераны кулэ, котькуд сэбедын пырыны тыршо вылэм лякыт сямо, ӟеч мурт доры: татын соосты валалозы, шуныт кыл вералозы, куно карозы.

Дӥськутсы сюанчиослэн аспӧртэм: дӥсяло вылэм фуфайка яке дукес, мылазязы – уксётӥрлык, дукес вылазы – чебер пужъятэм айшет. Чыртыязы бинялто кыӵе ке кулэтэм басма, киязы куто боды. Сэбедэз мыто кырӟанэн:

Осто гинэ Инмаре но,

Быдӟым гинэ Инмаре.

Сизьымдон но, ой, дышмонэз

Пыд уламы лёгалом,

Вылӥсь гинэ, ой, Инмармес

Йыр йыламы ӝутомы.

Нош кин ке доры пырыкузы кырӟало ни:

Татчы гинэ уд пырылы,

Кытчы гинэ пырылод.

Тӥ ӧвӧл шат, тӥ ӧвӧл шат,

Чын яратон эшъёсмы.

Озьы кырӟаса, капка дорын сыло. Кузё сюанчиосты возьма ке, капка азяз ик потыса ӧте. Сюанчиос кузёез шумпотыса данъяло, олокыӵе но чебер кылъёс вераса кырӟало. Сюанчиосты одно ик куно кароно. Нимаз дасяськемын ӧвӧл ке, ӝӧк вылэ пукто ма сюроз: кубиста, пӧзьтэм картошка, нянь, аръян, шу кисаль но трос мукет сиён-юон. Пересь сюанчиосты винаен но куно каро. Сюанчиослы одӥг чарка но тырме вылэм. Соос пичиен веръяло но мукетэзлы сёто вылэм, пичиен-пичиен веръяло но мукетызлы сёто.

Нош кыӵе чебер экто вылэм песяйёс! Соос тодо ваче эктонэз, кыкен, куинен, ньылен, куатен, тямысэн эктонъёсты.

Сюанчиослы кузёос чукъёс тыро. Тау карыса сюанчиос коркась пото.

Нош азьвыл ик чаклам муртъёс пырыны уг ке лэзё доразы, сюанчиос капкаязы дэри пазяло но олома но секыт кылъёс вераса кырӟало. Кылсярысь, бызёно нылды кӧто мед луоз но мукет.

Сюанчиос азьлань вамышто. Гуртоос соосты туннэ возьмало, куно карыны дасяськемын. Ма бен, шудо сюрес тӥледлы, пересь сюанчиос .

Урбеч уллян

Мар бен со Урбеч уллян? Туала адямилы «урбеч» кыллэн пуштросэз валантэм, но кызьы валэктӥзы гуртысьтымы песянайёс но песятайёс, со, пе, герӟаськемын вашкала дырысен жобъёсты, висёнъёсты, кырсьёсты уллянэн.

Мар веранэз, туала вакытэ пӧламы нош ик вӧлмыны кутскизы пӧртэм висёнъёс. Со герӟаськемын, мон сямен, асьмелэсь калыкмылэсь сэбедъёссэ, улон шоры аспӧртэмлыко учконзэ, культуразэ палдурес валанэнымы. Экологиен герӟаськем пӧртэм ужпумъёс пото асьме бордысь, асьмелэн инкуазьлы кузё кариськыны турттэмысьтымы. Учке ай, ма дауртӥськом асьмеос ас улон инты котыренымы. Жаг пӧлы выиськом ини, со жагез шур дуръёсы, сюрес урдсы кисьтаськом но ваньзэ шонер лэсьтӥмы кадь потӥськом. Нош вашкалаосмы инкуазен огкылысь уло вылэм. Со сярысь уг вера шат Урбеч уллян сэбед но?

Урбеч уллянлэн аслаз гинэ аспӧртэмлыко гурез, сое мукетыныз уд сура. Вашкала дыръя милям гуртамы та сэбед Порпалан ортче вылэм. Вань мылкыд карисьёс люкасько Порпал бусы доры, гурт пуме. Урбеч уллянэ мынӥсьлэн дӥськутэз но аспӧртэмлыко: вылазы дӥсяло вылэм фуфайка яке дукес, пиосмуртъёслэсь шароварзэс, бадӟым колоша яке сапег. Нош мылазязы одно ик консерва банкалэсь пӧртэм уксётӥрлык ошо. Дэрем сӧзые вуро пичи гырлыос: вамышлы быдэ дӥськут жин-жин вазьыны кулэ. Туж капчи мылкыдын, ог-огзэс лӧпкытыса, шулдыръяськыса тубо гуртоосмы Пор урам кузя. Ог-огзы доры пырало, ог-огзэс серекъяло, пӧртэм тумошо учыръёс верало.

Сэбедэ пырисько вылэм нылъёс но, пиос но. Но нылъёслы утчано луэм пиосмурт штани. Сэбедэ чылкыт, чебер дӥськут кулэ ӧвӧл, яралоз ма ки улад шедёз.

Лукерья Матвеевна Ивановалэн верамезъя, бусы пуме вуыса, утчало вылэм боды но сусыпу вай. Сусыпу татысь ик нюлэскын будэ вылэм. Ваньзы огазе люкаськыса ини, мӧйыос кырӟан мыто. Со вакытэ ик тыл арато. Кырӟаны кутске тужгес арлыдоез адями, собере бордаз итӥсько мукетъёсыз.

Люкаськемъёс, быдэс урамез басьтыса, бодыосынызы, сусыпу ваен сэзъяса, урам кузя кырӟаса васько. Куд-ог корка кузёосты серем карыса но кырӟало вылэм.

Кин доры пырон сярысь урбеч уллясьёс асьсэос кенешо. Капка доры дугдо но кузёослэсь потэмзэс возьмало. Капкаез вӧл-вӧл усьтӥзы ке, урбеч уллясьёс соку гинэ пырозы. Кинъёс ке кукей лушканы кылё, нош мукетъёсыз кырӟаса корка пыро.

Урам но кузя васькон дыръя

Ваньмаз ум пырелэ.

Ми пыриськомы

Чын яратон туганъёсам.

Пырем потӥз, адӟем потӥз

Тӥ туганъёсме.

Одӥг анай-атай нылпи

Асьмеос бон ӧвӧл шат.

Тӥ уд лыктэ ми доры, ой, туганэ,

Ми ум мынэлэ.

Ку бон адӟомы

Одӥгмес но, ой, одӥгмы.

Вай шулдыртомы, шулдыртомы

Туганлэсь но корказэ.

Вай кырӟаломы

Ваньмы огазьын дыръя.

Жин гинэ каром, ой, туганэ,

Жан гинэ каром.

Вань жобъёсыз ми

Али ке но, ой, уллялом.

Урбеч уллясьёслы ӝӧк вылэ ма но со пукто, куно каро. Нош таосыз, корка пырыса, кин мар дауртэ. Кин ке мурӝол ӧсэз усьтэ, бодыеныз кока, кин сэндрае тубе но сусыпуэн но бодыен корккетэ, кин борддорез кока, дӥськут жин вазе. Тӥни озьы коркась вань кырсьёсты, жобъёсты, висёнъёсты улляло вылэм.

Коркан висись адями вань ке, сыӵе дыръя сусыпу ӝуато, висись адямиез сусыпу ӵынэн ӵынато, висёнъёссэ улляло. Коркась потыса пырало на чуланэ, гидкуазьтӥ котыртӥсько. Озьы вань жобъёсты улляса, ураме потто.

Гуртысьтымы маскарчи Александра Ефимовна Беспалова вера: — Урбеч уллянэз мон пичи дыръям адӟи ай. Ачим но шулдыръяськыны, серекъяны яратӥсько бере, мыным со туж кельшиз. Песяйёсы но сэбедъёсы ярато вылэм ветлыны — соос но шулдыр адямиос вылӥллям. Та сэбедын котьку но шулдыр кырӟан но гурак серекъям кылӥське. Одӥг ласянь шулдыръяськон, нош мукет ласянь — чылкытлык, тазалык сярысь сюлмаськон. Мынам анае шуэ вал: «Ой, туэ асьме доры урбеч уллясьёс ӧз пыралэ, соин-а, мар-а быдэс арзэ висёнъёсын курадӟисько». Нош туала адямиос юон пӧлы выё ини. Урбеч уллясьёс шур быземъя уллань васько. Соос сьӧры шудыса-серекъяса васько пичиос. Тани озьы вашкала дырысен удмуртъёс висёнъёсын нюръясько вылэм. Жобъёс сюрес кузя, кожъёстӥ ветло, пе. Соослэсь сюрессэс пытсано ӧвӧл. Висёнъёсты, жобъёсты шур кошкемъя келяло: ву кузя, пе, соос асьме улонысь кошкозы. Нош корка пушез, пудо возён интыосты сусыпу ӵынэн чылкытатыса оско вылэм солэн йӧнатӥсь кужымезлы.

Вашкала сэбедъёсты выльдыса, песятай-песянаймылэсь адӟем карыса, туала вакытэ но гурт котыръёсты огъя кужымен чылкытатыны луысал .