Туктарева Ольга Николаевна

Элькун Кивалтэтын ортчем огаз кенешын погонъёсын генералъёс кема вераськизы будӥсь пиналъёслы Атыкай музъеммес гажан мылкыд пыӵатон сярысь.

Мар но ӧз малпалэ ни кивалтӥсьёс со понна, но армие мыныны мылкыд карисьёслэн лыдзы уг йылы. Шӧдске, табере сыӵе амал сюриз. Туэ Вормон Нуналлы сӥзем ужрадъёс бере Удмуртиысь валтӥсь федерал инспектор, генерал Александр Кобзев военкоматъёсын шуиз: дышетске Брангуртысь песянайёслэсь!

…Ижын улӥсь егитъёс азьвыл коштанъяськизы – ӧз ветлылэ удмурт концертъёсы. Мар, пе, отын тунсыкоез – ваньмыз вашкала кырӟанъёс. Но «вашкалаослэсь» рокез удмурт сямен кырӟамзэс кылыса, вуоно концертэ билет юаны кутскизы. Табере Пичи Пурга ёросысь Брангуртысь песянайёсты ӧтчало дискотекаосы но (соос егитъёслэсь шукрес позыръясько туала крезьгуръя), сӥё-дано ужрадъёсы но. Кивалтӥсьсы – Удмурт Республикаысь культура удысысь дано ужась Ольга Николаевна Туктарева.

Гуртэ лыктэ… режиссёр!

Школазэ быдтыкуз, Оля Коровина шуак луиз: кытчы мыноно? Филфаке шат – лыдӟиськыны яратэ, чылкыт гожъяське. История но тунсыко, таиз дышетӥсь истфаке пырыса утча, шуэ. Математик но уг ӝожтӥськы, но Олялы логарифмьёс мылкыдызъя ӧвӧл. Мар соосын азьланяз карод? Соку кин ке но ӵектӥз: тынад сюлэмыд кырӟан бордын ук, герӟа астэ культураен. Шонер! Пичи Пурга ёрос администрациысь культура отделэ Оля туж керпотыса пыриз. Клубын ужасал, востэмак шуиз со. Отделэн кивалтӥсь номыр вераса ӧз вутты, телефонэз жингыртӥз. Ой, ма тани азям сылэ, шуиз со трубкае. Кӧня ке вераськемзы бере, Оля пала берытскиз: тон туж шудо, дыр. Пермьысь культурая институтэ республикамы егитъёсты келя, кык инты кылемын на, пе.

Культурая министерствоысь специалист юаз: кытчы мынод: хореографе-а, вокалистэ-а, режиссёре-а? Нылмурт воксё ыштӥськиз. Вокалэз вала ик, нош отӥосыз мар меда сыӵе, кылылэмез но адӟылэмез но ӧвӧл. Бырйиз тужгес тодмотэм кылэз – режиссура. Солэсь пуштроссэ, институтэ вуыса но, кема-кема валаны выриз на.

Удмурт нылашез яратӥзы дышетскисьёс но, дышетӥсьёс но: лякыт, сюлмо, тыршись. Дышетскыны секыт вал: анаез ньыль ар больницаосын кыллиз. Соин адӟиськон вылысь Оля ӵукна Иже лыктэ, нэнэез доры вуылэ но нош дышетсконтӥяз кошке. Кондон понна сёросъёсты но миськиз, кинотеатръёсын уйбытэн сторожен но пукылӥз. Юрттӥзы братъёсыз. Чидась нылаш ваньзэ вормиз, востэмлыксэ гинэ но. Диплом ужез дырья сыӵе спектакль пуктӥз – вань дышетӥсьёс паймизы. Соин распределение дыръя гуртэ куриськемзэ кылыса, тросэз ӧз оске. Нош Олялэн сюлэмыз зэмзэ но кемалась Пуро-Можгалаз вал ни. Вылаз ик сое отын витиз ни Лёшкаез. Ӝоген со Туктарева луиз.

Кызьы генерал синмаськиз, нош Цой удмурт луиз

Пичи Пурга ёросысь Брангуртын ансамбль, отчы ветлӥсьёс верамъя, котьку вал. Но Ольга Николаевна кивалтыны кутскемен, со выль сямен шокчиз, инвисъёс усьтӥськизы. Юрттӥзы Пичи Пурга «Зарни шепъёс» но. Шоркарын ортчоно «Воршуд» празднике соосты ӧтиллям, но яке мылзы потымтэ, яке кытчы ке сьӧрло мыноно луиллям, соин ӵектӥллям брангуртъёсты. Таосыз, палэнэ поталлямтэос, Иже шумпотыса вуизы. Июль, пӧсь, нош соос дэра дэремъёсын. Чидамзы бадӟым данэн берытскиз – со бӧрсьы песянайёсты котькытчы ӧтчаны ӧдъязы.

Улон воштӥськиз! Табере таостэ дорысьтыд туж ик уд шедьты ни, ӧтизы ке, коть картош мерттон-копан, коть турнан дыр медло – султозы но кошкозы, кузпалъёссы йырзэс сэзъяса гинэ кылё. Со дырысен кытчы но ӧз вуылэ ни: Москвае, Свердловск улосэ, Эстоние… Нош кин но кунояськыны ӧз вуылы ни Брангуртэ! Ваньзэс пумитаны мылкыд но, перепеч но тырме.

Кылем сӥзьыл Туктаревалы жингыртӥз Ижысь режиссёр Павел Поздеев: рокез удмурт сямен кырӟасьёс кулэ. Ма, удмурт рок вань шат? – паймиз Ольга. Толэзь ӵоже удмурт кылэ берыктод, шуиз Паша. Ольга соку ик мазэ-созэ ӧз вала, но чутрак пумит ӧз кариськы – та выль вамыш луыны кулэ. Бырйиз В. Цойлэсь но Б. Гребенщиковлэсь кырӟанъёссэс. Песянайёсыз сое нырысь ӧз валалэ – гурез дышымтэ, кылъёсыз валантэм, олокыӵе. Но кивалтӥсьсы буйгатӥз: удмурт сямен кырӟалом. Озьы ноку кылбур гожъямтэ мурт уже мынон-ветлон сяменыз ӟуч кырӟанъёсты удмуртэ берыктӥз. Пӧрмиз кадь – куараос улӟизы. Ма, табере валаськом ук ини мар кырӟаммес, – шуизы кенакъёс. Ижын соос ваньзэс паймытӥзы. Вожъяськизы егитъёс но.

Тулыс выль ӵектон вуиз: город пиосты солдатэ келяно. Ачиз генерал Александр Кобзев, пе, возьма. Со вал Вормон нуналлы сӥзем ужрад. Тросэз песянайёс война вакытэз но тодо ай, кӧня муртэ армие келязы, кӧнязэ пумитазы, но тамында солдатъёсты но офицеръёсты ӵош адӟылэмзы ӧй вал. Соос паймыса учкизы ыбылӥськисьёс, нюрьяськисьёс шоры. Нош песянайёсты синйылтыса паймизы генералъёс. Брангуртъёсты возьматыны косӥзы солдат келян йылолэз. Рекрутъёс зэмосэсь – призывной пунктысь егит пиосты вайиллям. Песянайёслэн кыласа-бураса кырӟамзы, пиослэн чыртыязы ӵушкон поныса, чупаса-ӟыгыръяса келямзы ваньмызлэсь сюлэмзэс вырӟытиз, нош пиослэн синкылиоссы пызьыразы. Ужрадэ пыриськизы культурая училищеысь пиос. Ваньзэ сое адӟыса, егитъёс военной азьын шуизы: ми армие мыном! Йылпумъянъёс лэсьтон кенешын Александр Кобзев ансамбльлы Тау карон гожтэт сётӥз, Брангуртысь коллективлы паймемзэ олокӧня пол вераз. От кыӵе песянайёс – генераллэсь йырзэ берыктыны быгато!

Зэм, вань «командировкаос» сыӵе мыло-кыдо уг ортчо. Вал одӥг ортчыт учыр но. Ӧтизы перформансъёсты яратӥсь Макс Верёвкинлэн ужрадаз – сюан йылолэз, пе, возьматоно. Тодысалмы ке, ӧй мынысалмы, шуо песянайёс. Ай эшшо пияно ыжзэс сьӧразы курадӟытыса нуллӥзы. Басьтом, пе, но уксёзэ берло сётом. Ӧз сётэ – возьма собере соослэсь узырмемзэс. Вуттӥзы Ижысь кыӵе ке нюк улэ, кезьыт, кот, кырсь. Авангардистъёслэн яратоно интызы, пе, та… Эмеспизы шайтан кадь: кечтака тушо, гольык пыд, мача… Выль кен но пӧртэм ӧвӧл: дэремез чильпыра, сокем вакчи, берпалыз адӟиське. Оломар дарманьто, шӧтэм кылъёсын верасько. Ольга Николаевна, песянайёсыз понна сюлмаськыса, кытчы пырыны уг тод ни вал. Берытскыса кошкы вал, но… Ӧвӧл – возьматоно, ми соослэсь вылынгес шуыса. Песянайёс сюан йылолэз возьматӥзы, выль кенэз выж ӵужытӥзы, келян гур кырӟазы, но одӥг ӝӧк сьӧрын пукыны, сиыны-юыны мылкыдзы ӧз сузьы.

Шайтанъяськисьёс асьсэос паймизы: кызьы озьы гуртысь пересьёс соосты улыны уг индыло, уг тышкасько? Арлыдо кышномуртьёс кизэс шонтӥзы: ми быдӟа будӥзы ке, визьмаськозы ай…