Майков Яков

Яков Максимович Майков - удмурт кылбурчи.

Улон сюресэз

Майков Яков Максимович вордӥськиз 1940-тӥ арын 23-тӥ оштолэзе Алнаш ёросысь Юртошур-Какся гуртын. Яша Майковлэн улонэз югыт дунне вылэ вордскемез бӧрысьгес ик ӧжытак гинэ уриськытэк кыле: 1940-тӥ арын юртъерзы быдэсак сутске, сое, кутэтын вож нуныез, мырдэм кыре поттыса вуо. Озьы вить нылпиен бадӟым семья воксё вылазы гинэ дӥськутэн кыле. Нош 1941-тӥ арын Быдӟым ож гомӟе но, сюдӥсь-вордӥсьсы лек тылӝуын оломар куспетӥ быре – пичи Яши атайтэк кылемзэ валатэк но кыле. Семьязы туж секытэз адӟыса улӥз. Но пияш визьмо, сабыр будӥз, вить арескын лыдӟиськыны дышиз.

Пичи Яша начальной классъёсын дышетске вордскем гуртаз. Со вакытэ школаысьтызы библиотекаысь ваньзэ сямен книгаосты лыдӟыса-сӥсъяса потэ. Пияш школаын умой дышетске. Но Варали ӟуч гуртын солы секыт йӧтӥз… Отчы Ушъян грамотаен вуиз, нош ӟуч сямен чик уг вала. Но Яша сое но вормиз, ӟуч кылэз дышетэмез солы азьланяз зол юрттӥз.

7-тӥ класс бере Можга педучилищее пырыны малпа вал, но ӧз удалты. Со аре отчы 10-тӥ классэз быдтэм пиналъёсты гинэ кутылӥзы. Мыноно луиз Алнашысь шор ёзо школае. Училищее пырысал ке, отын стипендия тырысалзы, нош школае ачиз коньдон тырыса дышетсконо луиз. Но тямысэтӥ класс бере тыриськонзэ куштӥзы. Татын со литературной кружоке яратыса ветлӥз. Соин кивалтӥз математикаен дышетӥсь но писатель Николай Васильев. 1957-тӥ арын Яша Алнаш черкогуртысь школаез зарни медален йылпумъяз. Но одӥг арзэ колхозын ужано луиз. Москваысь Ломоносов нимо университетэ медальчиосты экзаментэк куто вал. Документъёссэ укыр бер келям, уга. Котьма ке но, кенешыны сое ӧтчазы на. Но университетысь журналистика факультетэ со вуись араз гинэ дышетскыны пыриз. Татын но пинал пияшлы секыт йӧтӥз. Гуртысь юрттэт ӧз сюры, стипендия 220 манет. Но со тырмытыны тыршиз, одӥг-кык пол гинэ вагон ӝоктэмез вань. Яков Майков анайзэ туж гажаз но яратӥз. Студент дыръяз дышетскон интызэ, МГУ-эз, Москваез возьматыны мемизэ сьӧраз нуллӥз.

Школаын но университетын немец кылэз дышетэм адями, кыкетӥ курсысен Яша Майков шуак англи кылэз дышетыны кутскиз но, МГУ-эз йылпумъянэз азьын сое военной переводчике интыяськыны ӵектӥзы. Тӥни озьы Яша, удмурт шаераз берытскыны турттӥсь мурт, шӧдтэк шорысь кылысь кылэ берыктӥсь ожгар журналист луиз. Армиын 26 арзэ службаын ортчытозяз кунгож сьӧры но вуылӥз, кылсярысь, Индие, Индонезие, Танзание. Пенсие майор званиен потӥз, улыны Одессае кылиз. Но Яков Максимович дораз уг пукы, азьвыл удысаз ик ужа, табере ини ас кожаз кариськем фирмаын. Я. Майков туж но туж мӧзме дор палъёсызлэсь, арлы быдэ сямен сокемысь но куттэмпыд бызьылэм интыосаз берталля. Вордскем Юртошур-Каксиез али ӧвӧл ни ке но, татысь бадӟымесь выръёс-нюкъёс вань «куашкамъёслы» сямен ик, солы но мусо но дуно пото. Одессаын улыкуз, утчаса шедьтӥз отын улӥсь удмуртъёсты. Армия пыр вуэм одӥг воргоронэз пумитаз. Ачиз Алнашысь, кышноез Бемыжысь. Воргоронлэн удмурт сямен бӧтьыртэмез потэ, нош кузпалэныз ӟучен лабыртэ, пе. Эшъёсыныз кусыпъёссэ Яков Майков уг ышты. Солэн гожтэтъёсыз но, солы гожъямъёсыз но «Вордскем кыл» журналын печатласькизы. Герман Алексеевич Ходыревлы гожъямъёсысьтыз адӟыны луэ, кыӵе солэн сюлмыз шуг, Удмуртиысь иворъёсты тодэмез потэ. «Жалясько, меӵак вераса, дорме-родинаме ыштӥ шуыса. Котькытӥ ветлыса но, удмурт ик кыли. Сюлэмысьтым мӧзмон уг кошкы», – шуэ Яков Максимович Майков.

Гожъямъёсыз сярысь

Куинетӥ классын дышетскыкуз, Яша Майков «Луд кеч» нырысетӥ кылбурзэ гожтӥз. Яков Майковлэн кылбуръёсыз «Дась лу!», «Советской Удмуртия» газетъёсын, «Инвожо», «Кенеш», «Вордскем кыл» журналъёсын печатласькизы. Тросэз ужъёсыз «Пыд улын – музъем» (1977) огъя бичетын печатласькемын но куинь авторъёслэн нимысьтыз книгаосын оглом липет улэ огазеям, Яков Майковлэн ик «Одӥг пол гинэ» (1992) кылбурезъя йыръям сборниказы. Эшлыко пышкылонъёсыз, серемес кылбуръёсыз «Лэчыт кылъёс» (1996) сборнике пыртэмын.

Солэн писыръясь мылкыдыз тужгес но кылбуръёсаз шӧдӥське. Турлы буёлъёсын, нимысьтыз пуктэм кылгур пыр автор ӝог ортчись аръёслэсь одӥгзэ вадессэ суреда – чагыр уйвӧтэ-а кылем, я чагыр бус пӧлы-а сылмем пичи дырзэ, атай юртсэ, озьы ик анаезлэсь курадӟемъёссэ, пиезлэн сое ӟырдыт яратэмзэ, пурӟем-ӵашъем, йӧлпыд кадь тӧдьы льӧмпу сяськаосты, палэзьпуосты, уллапал но выллапал урамъёсты, интыысь улосэз, егит дыръя ог-огедлы синмаськонэз. Я. Майков гожъя на пӧллёнъёс (басняос), серемес кылбуръёс, удмурт писательёслэн, литераторъёслэн чуръёссыя эшлыко пышкылонъёс.

«Чуръёсылэсь кытысь вордӥськемзэс уг валаськы. Кылбурез калык уггес лыдӟы. Мон гуртлэн патриотэз бере, гожъяськыкум калыкез одно сюлэмам возисько. Куд-ог чуръёсы копак ас понназы кылдо кадь», – шуэ кылбурчи. Яков Майковез кырӟась кылбурчи шуо. Берло дыре со удмурт крезьгурчиосын кусып тупатӥз. Солэн кылбуръёсызъя кырӟанъёс гожтӥзы Геннадий Ганьков, Ольга Зорина, Пантелей Кузнецов но мукетъёсыз крезьгурчиос. Калыке тужгес но вӧлмемын «Шур бызе», «Лукерья», «Уллапал ныл», «Вордӥськем гуртэ» но мукетъёсыз. Кылсярысь, «Уллапал ныл» кылбурзэ автор гуртазы ик будэм дано артистлы Анатолий Ушаковлы возьматӥз. Соиз Геннадий Ганьковлы кылбурез сётэм. Таиз гур шедьтэм но кырӟаны ӧдъям. Кылбури лӧптэм: кылбуръёсме, пе, калык уг лыдӟы, нош кырӟанъёсме радио пыр ке но кылзоз. «Ачим пумысен верано ке, данакез чуръёсы аслым уг кельшо. Отын синву, мӧзмон, дор. Асме кылбурчиен уг лыдъяськы», – шуэ Яков Максимович. Со гожъяськисьёслэн огазеяьконазы но пыремын ӧвӧл.

Библиография

Книгаосыз

Одӥг пол гинэ : кылбуръёс / Я. Майков, В. Возняков, П. Захаров. – Ижевск : Удмуртия, 1992. – 144 с.

Статьяосыз

Асьмеос бездытӥськом : о береж. отношении к яз., о необходимости соблюдения норм удмурт. яз. при пер., при создании художеств. произведений // Кенеш. – 2009. – N 11/12. – С. 74-77.

Вуылоды тӥ Иже, вуылоды Париже... : серем пыр мадёс // Инвожо. – 2012. – № 4/5. – С. 106–108. – (Удмурт ПЕН-клуб. Альманах).

Интервью : серемес верос // Кенеш. – 2005. – № 8. – С. 98–100.

Ож тулкымъёс : тодэ ваёнъёс // Кенеш. – 2010. – № 4. – С. 23-31. – (Быдӟым Вормонлы – 65)

"Сайкыт но шундыё..." : кылбур // Инвожо. – 2011. – № 9/10 : Ижевск межкультурный город. – С. 34. – (Специальный выпуск газеты "Известия Удмуртской Республики" и журнала "Инвожо").

Сюлэм куре чебер кырӟан : кылбуръёс // Кенеш. – 2005. – № 4. – С. 47–51. – Пуштросэз: Тулыс чуръёс ; "Кыӵе-ке тодмо турын зын-а..." ; Вакытъёс ; "Сёт вал тросгес дырдэ..." : Сергей Кирилловлы ; "Ӟеч адями сектаз кунояса..." : Сергей Есенинъя ; Пинал дыр ; "Шуид: "Мон тон понна вӧсяськисько..." : Ольга Николаевна Мясниковалы.

Та пичи дунне сэрег милемлы мусо : кылбуръёс // Удмурт дунне. – 2005. – 2 авг. – С. 7. – Пуштросэз: "Нунал кузя ини ялан..." ; "Мальдэ шунды тулыс инмын..." ; Пинал дыр ; "Пинал дыръя луэ озьы но..." ; Сям-Какся кырӟан ; Валче кырӟан.

Ужась киос : кылбур // Выль даур : прил. к газ. "Можгин. вести". – 2007. – 13 окт.

Усе ке кизили... : кылбуръёс // Кенеш. – 2010. – № 4. – С. 19–22. – Пуштросэз: "Сайкыт но шундыё..." ; "Ӝогветлонэнызы таргетыса..." ; Ютъер ; "Сюлэм оло мӧзме, оло кынме..." ; "Кизилиос, пумтэм кизилиос..." ; Дискотека ; Лена ; Яратонэ мынам ; Тон кельтӥд но кошкид... ; "Арлыдме вунэтыса кадь...".

Эшлыко чуръёс : сӥзёнъёс, визьсынанъёс, пышкылонъёс // Кенеш. – 2011. – № 1. – С. 103. – Пуштросэз: Владимир Михайловлы ; Пётр Захаровлы ; Александр Лаптевлы.

Кырӟанъёсыз

Волков Ю. Дискотека : "Жингыртэ крезьгур эктон залын..." // Кенеш. – 2011. – № 5/6. – С. 80–81.

Волков Ю. Лена : "Льӧмпу ӝужытэз но вань но..." // Удмурт дунне. – 2012. – 28 авг. – С. 7. – (Шудэлэ тӥ, серектэ).

Волков Ю. Тон кошкид : "Тон кельтӥд но кошкид – ойдо, ӵок ини вал..." // Кенеш. – 2011. – № 5/6. – С. 79.

Ганьков Г. Кырӟало ай : кылбур-кырӟан // Кенеш. – 2005. – № 9. – С. 103 ; Кенеш. – 2008. – № 5/6. – С. 58.

Ганьков Г. Ой, зоре, зоре, зоре но... : "Ой, зоре, зоре, зоре но..." // Кенеш. – 2005. – № 9. – С. 53. – (Жингырты, яратоно кырӟанэ).

Ганьков Г. Синмаськон : кылбур-кырӟан // Удмурт дунне. – 2005. – 8 июля. – С. 14.

Ганьков Г. Уллапал ныл : кылбур-кырӟан // Ашальчи. – 2008. – № 5. – С. 36.

Григорьевых И. Синмаськон : "Тымет вадьсын пиштэ зарни толэзь..." // Кенеш. – 2005. – № 9. – С. 58. – (Жингырты, яратоно кырӟанэ).

Зорина О. Вордӥськем гуртэ : кылбур-кырӟан // Ашальчи. – 2009. – № 1. – С. 22.

Зорина О. Шур бызе : кылбур-кырӟан // Ашальчи. – 2008. – № 4. – С. 27.

Кузнецов П. Кылёд сюлэмам, анае : кылбур-кырӟан // Кенеш. – 2005. – № 9. – С. 34.

Кузнецов П. Палэзьпу : "Сабыр, востэм палэзьпуэ..." // Удмурт дунне. – 2009. – 7 окт. – С. 7.

Кузнецов П. Сюлмын – тулыс : "Мальдэ шунды тулыс инмын..." // Удмурт дунне. – 2009. – 20 мая. – С. 6. – (Шудэлэ тӥ, серектэ).

Постников Н. Атай юрт : "Укно улын тӧдьы кызьпу но..." // Малпасько тонэ : кырӟанъёс = А мне бы увидеть тебя : песни / Н. Постников. – Ижевск, 2010. – С. 96 ; Кенеш. – 2012. – № 1. – С. 103–104. – (Жингырты, удмурт кырӟан).

Татчы 2005-тӥ арысен потэм чеберлыко статьяос гинэ пыртэмын, кылемъёсыныз тодматскыны быгатӥськоды Удмурт Элькунысь йӧскалык библиотекалэн электрон каталогъёсызъя.