Наговицын Сергей Александрович

Тол бабайтэк Выль ар уз вуы!

Тол бабайлэсь дукессэ со берло 6 ар ӵоже дӥсялля ни. Выль ар со понна декабрьлэн шораз ик кутске. 31-тӥ декабре со сур-сур кӧлыны дась. Озьы ке но театре ужаны потоно шуизы ке, вань жадемзэ вунэтыса, яратоно ужаз лобӟыса кошкоз. Сыӵе со егит Тол бабай — Удмурт театрысь пинал артист Сергей Наговицын.

— Тросэз адямиос понна Выль ар — со шулдыръяськон, нош артистъёс понна — уж. Тынад но улонад котьку озьы ӧй вал, дыр, ук?

— Выль ар шуо ке, мынам котьку но тодам лыктэ вордскем гуртэ — Балезино ёросысь Кӧснюк. Отын али улӥсез но ог 30 мурт гинэ на. Котькуд Выль арлы дасяськиськом вал: пичи гинэ вуж клубмес утялтӥськом, эстӥськом, гурт калык ӝӧк выл пуктэ. Ми, пиналъёс, кыӵе ке сценкаос дасяськом, бадӟымъёс шулдыръясько — арганэн шудо, кырӟало. Вот озьы котькуд 31-тӥ декабрез валче ортчытӥськомы вал, ӝыт 11 часозь огазьын пукиськом, нош собере ваньзы доразы берто. Соин сыӵе мылкыды вал: будӥ ке, мон но гуртамы арганэн шудо. Бускельёс кузьмазы вужгес гинэ арган, сое кысканы дыши. Пӧрмыны кутскиз, лэся, Люкысь клубе но ӧтчаны ӧдъязы, собере ачим ик шудэмея кырӟалляй но. Кыӵе ке ужрадъёсты нуыны оскылӥзы. Озьы пичи сцена вылэ потӥ. Мыным та уж туж кельше вал. Дышетӥсе но Ираида Анатольевна Наговицына школаын бурдъялляз. Со монэ удмурт кылын герӟаськем ужрадъёсы котьку пыриськыны косэ вал. Отысен ик йырам пыӵаз: мон герӟало асме удмурт кылэн яке сценаен. Умой луысал та яратоно удысъёсме огазеясал ке. Вот, малпасько, мыно али культурая колледже. Татын кырӟаны но, эктыны но дышетозы. Нош котырысьтым адямиос шуо, малы, пе, отчы мынод? Эктыны-кырӟаны котькытын луоз, ӝытазе уж бере но… Малпасько, ма удмурт кылъя дышетӥсе мыном-а, мар-а. Озьы малпанъям ӵапак удалтӥз — Удмурт театр, пе, Москваын дышетскыны мылкыд карисьёсты люка.

— Нош отчыозь артист луон сярысь тодад но ӧз лыктылы-а?

— Мон актёръёсты нырысьсэ улэпкын адӟи 11 аресам гинэ. Соку Люк черкогуртэ гужем вуылӥз Удмурт театр. Соос возьматӥзы «Ой тӥ, чебер нылъёс» комедиез. Адӟи но адӟи, собере — вунэтӥ. Нош табере конкурс, пе. Мон ӵапак 11-тӥ классын. Мон та учыр пумысен туж шудоен лыдъясько асме. Ас поннам дасяськи но нырысетӥ туре мынӥ. Капчиен ортчи, собере милемыз Москваысь Щепкин нимо театр училищеысь педагогъёс учкизы на. Озьы шеди мукет шудо егитъёс пӧлы.

Семьяеныз — Конкурс бадӟым вал соку. Одӥг интые 6 мурт вожвылъяськиз кадь?

— Валамон, Удмуртия понна со бадӟым лыдпус. Нош театр вузэ пырон понна Москваын уката шимес конкурс. Одӥг интые 600 мурт куриське. Иське, милемлы татын удалтӥз ай.

Социальной сетьёс пыр адӟыны луэ вал туспуктэмъёстэс, дышетсконысь отчётъёстэс. Москва туж-туж гочатӥз, дыр? — Милемыз, студентъёсты, туж зол возизы но визьмазы дышетӥсьёсмы. Соос меӵак вераллязы: Москваын тӥледыз нокин уг витьы, тӥ — удмурт культураез азинтӥсьёс, асьтэ шаере ик берытскыны кулэ. Милемыз котьку ӵошатылӥзы азьвыл дышетскем студиен. Глафира Николаевна Никольская удмурт дышетӥсьмы ик шуылӥз: азьлоосыз егитъёс, пе, лябгес вераськизы ӟуч кылын, но сыӵе вольыт — удмурт сямен. Нош тӥ удмурт кылын аламагес вераськиськоды, ӟуч сямен шалтыр поттӥськоды. Соин но туж чакласа возизы-а, мар-а. Али мон туж шумпотӥсько, сыӵе визьмасьёсмы вал шуыса. Малы ке шуоно ми дышетсконмес быдтон аре ик диплом басьтӥзы мукет театральной вузъёсысь уно сю егит артистъёс. Нош Москваысь театръёсы сюро туж ӧжытэз, уката ик национальной студиосты учконо ке. Милям кадь европейской тусын шуг висъяськыны. Тани якутъёслэн, калмыкъёслэн студиязы дышетскисьёслы, оло, капчигес кыльыны Москвае — соослэн азиат туссы кыӵе ке сериалэ сюрес усьтоз.

Москвае келямъёс пӧлын ваньмыз тон кадь патриотъёс ӧй вал кадь. Тани кыкез нылъёсты ӧз берытске, Никита Моисеев но Москваын. Максим Князев но тодон-валан люка кадь.

Максим заочно амалэн дышетскиз, магистратураез йылпумъяз на. Нош Никита ассэ Москваын ик утчаны выре. Москва туж зол кыске бордаз. Милемлы удалтӥз музейёсы но театръёсы дунтэк ветлыны. Студенческой билетын пуктэмын Россиысь Культурая министерстволэн печатез. Со котькуд театре, музее пыраны пропуск луэ. Кызьы сыӵе луонлыклэсь палэнскод? Мон котькуд шутэтскон нуналэ театре ветлылӥ. Музейёсы но пыралляй, но таиз сокем зол монэ ӧз кыскы. Удмуртиын, жаляса верано, студентъёслэн сыӵе луонлыкъёссы ӧвӧл. Милемыз Удмурт шаерын туж умой пумитазы. Учкисьёс но дунъязы кадь. Собере вань сӥзёнъёс быдэсмизы — служебной квартираос сётӥзы. Милемлы, гуртысь потэм егитъёслы, со тужгес сюлмаськытӥсь ужпум вал. Нош липетэд вань ке, мукет номыр кышкыт уг ни поты.

Театрын — Удмурт театрын тынад трос рольёсыд пӧртэм спектакльёсын: постановкаосын но, выжыкылъёсын но шудӥськод. Тырмыт-а со али?

Тросгес шудӥсько классикаын. Дышетскыкумы ик мыным вераллязы педагогъёс: классикаысь рольёслы Наговицын уз ёрмы. Озьы ик кошке ни: вань ӟуч постановкаосын шудӥсько, нош удмуртъёсаз ӧжытгес роль сюре. Аслым сюлэмыя туж тупа «Отцы и дети» драмаысь Аркадийлэн ролез. Нош «Алые паруса» мюзиклын режиссёр Алексей Ложкин монэ дышем кабысьтым поттӥз: тырмоз, пе, ненег рольёсты быдэсъяны, эскертом мукетсэ. Озьы покчи Меннерслэсь рользэ сётӥз. Со мон понна туж бадӟым воштӥськонъёс вайиз. Спектакле учкисьёс 4 пол но, 5 пол но лыкто. Билетъёс, пе, азьлапал басьяса быремын.

— Нош кызьы табере дунъяськод удмурт фильмъёсын шудэмъёстэ?

— Нырысетӥ курс бере «Узы-боры» фильме ӧтизы. Куараед, пе, чебер, ушъязы. Нырысетӥ курс бере студент ассэ артист кожаны кутске ни, амбициосмы уртчыса пото вал, лэся. Шудыны соку секыт ӧй вал, нош али со фильмез учкыны секыт. Аслэсьтым но, мукетъёсызлэсь но сомында янгышъёссэс адӟисько. «Пузкарын» ужаммес но табере бадӟым критикаен учкисько. Мукет ласянь, мар кадь витьыны: сценарий арня куспын гожтэмын, съёмкалы 2 арня висъямын. Соин ик ӟечлыкез но чутэ. Нош пинал мылкыд — со юмал йӧлпыд, ваньзэ быгатомы но вормомы кадь потӥз. Али гинэ тодэ лыктэ дышетӥсьёслэн верамзы: артист, пе, ноку но зэмос профессионал уз луы, ассэ «быгатӥсько» ни шуыса лыдъя ке. Нош соку ми дась вал дунтэк ужаны, ваньмыз сыӵе выль но тунсыко потылӥз. Но талэсь «емышсэ» берло адӟим. Милемыз, Москваысь соку гинэ бертэмъёсты, отчы но, татчы но ӧтё. Шуо, секыт-а, мар-а дунтэк кырӟаны, миниатюраос возьматыны? Нырысь мынӥськом вал, собере валан вуиз: ми дышетским, табере та профессия милемыз сюдыны кулэ. Кин станок вӧзын ужа но детальёс лэсьтэ, со понна уждун басьтэ ук. Малы артист дунтэк тыршыны кулэ? Уго ӟеч ужаны секыт. Дышетӥсьёсмы шуо вал: кызьы дунъяно артистлэсь ужзэ? Тани огез артист сцена вылын капчиен ветлэ, серекъя, вераське, эктэ — мултэс ассэ уг пызьырты, но со улонын кадь адскыны кулэ. Артистэз мон айсберген ӵошатысал. Учкись адӟе быдэстэм ужлэсь йылзэ гинэ. Нош кӧня пӧсямын-тыршемын, ваньмыз та ву улын ватӥськыса кылемын.

Артист — Иське, вань-а Удмурт театрын кинлэсь адӟем карыны? Яке Россиысь сцена вылын сыӵе актёръёс вань?

— Удмурт театрысь артистъёслэсь пусйысал ужан мылкыдзэс. Нош адӟем кароно актёръёсы — Россиысь тодмо артистъёс Владимир Машков но Евгений Миронов. Машковез киноысь ужъёсызъя гинэ дунъяны быгатӥсько, нош Евгений Мироновез театр сцена вылысь но адӟылӥ…

— Тон туннэ быдэс Удмурт шаерлэн куараез но. Тыныд вань бадӟым ужрадъёсты нуыны оско. Кызьы таиз пӧрмиз?

— Москваын ик дышетӥсьёсмы чаклаллязы, лэся, кинлы кыӵе уж тупалоз. Монэ огзэ концертэз нуыны косӥзы. Мыным со уж сыӵе яраз. 20 мурт пӧлысь кыкезлы гинэ сыӵе луонлык сётӥзы. Нош Удмуртие бертӥ но, ныр ошиськиз: эшъёсме ӧтчало ужрадъёсты нуыны, нош монэ — уг. Тодам но ӧй вал, монэ татын уг тодо на шуыса. Малпай, иське ас бордам ужано но ужано. Ӝытъёсы, репетициос бере, гримёркае кылисько но «Удмурт дуннеез» шара лыдӟисько — озьы кылме волятыны сюлмаськи. Малы ке шуоно асьмеос нуналлы быдэ огшорыгес кылын вераськиськом, нош литературной кылын ужан — воксё мукет. Тазьы тыршеме юнме ӧз луы, ӧтизы циркын правительственной ужрадэз нуыны. Но татын но аслад янгышъёсыд вылын дышетсконо луэ. Циркын ӟечкылан ужрадъёс 3 нунал ӵоже мынӥзы. Нырысетӥзэ куалекъяса ортчытӥм. Кыкетӥ нуналаз учкиськом — сыӵе ик сценарий. Ми табере лӧптэмын ни, ваньзэ быгатӥськом. Катанчи сьӧрын удмуртъёсты пумитамы, куспамы зульыса вуттӥмы. Нош вань сыӵе правило: ӟуч ужрадэз нуыку, катанчи сьӧрын удмурт кылэз поттаны кулэ ӧвӧл. Уго удмурт но ӟуч куараос воксё мукет сямен пуктӥсько. Потӥ сцена вылэ но верасько: «О, женщины, вощмое чудо света…» Милям уйпал ёросъёсын, «щем, вощем, Щергей» шуыса верасько ук. И кытын ке кулэ ӧвӧл та удмурт куара потӥз. Ой, возьдаськыса бырисько ни вал. Табере бадӟым ужрадъёслы дышемын ни. Президент Владимир Путин но Удмуртие вуылыку, мон ужрадэз нуись вал. Солэсь азьло нимысьтыз конкурс радъязы. Ӟуч театрысь Михаил Солодянкин но мон пыриським. Бырйизы монэ. Сыӵе шумпотӥ. Со бадӟым дан но, озьы ик кыл кутон но.

Кузпалэныз — Нош вӧзад кинэн ужаны кылдэ? Нылмуртэз аслыд бырйыны сёто-а, мылкыддэ ке но юало-а?

— Азьло одӥгеныз ужаны дышиське вал. Удмурт театрысь ик Наталия Бурановаен, Марина Самсоноваен ужрадъёсты нуылӥмы. Ӟуч драмая театрысь актрисаосын но ужалляй. Куддыръя мылкыдме юало, кинэн ужасалыд шуыса. Табере опыт люкаськемъя котькинэн ужаны быгатӥсько.

— Наталия Бурановаен сцена вылын ӵош луэменыд тӥледыз калыкын кышноязы но. Со сярысь тодӥськод-а вал?

— Уг! Нырысьсэ кылӥсько.

— Тӥляд курсады артистъёс пӧлын огкадь фамилиос вал. Сергей Наговицын но Надя Наговицына.

— О-о, эшшо Вадим Дмитриев но Маша Дмитриева. Москваын милемыз Надяен «тӥ, пе, вын но сузэр-а» шуыса юало вал. Ӧвӧл, шуиськом, кышноен картэн. Мар карод, уйпалан со выллем фамилиос вӧлмемын ке.

— Курсысьтыды тросэз нылъёс-пиос асьсэлы пар палэнысь ӧз утчалэ. Мынам тодэмея гинэ 3 пар кылдэмын. Нош тон кытысь утчад?

— Театрысь ӧй утча. Арганчиос пӧлысь шедьтӥ. Пичи Пурга ёросысь Эдэйгуртысь «Арганчи» коллективысь самой егитэзлы но чеберезлы синмаськи. Озьы тупаз: Альбинаен удмурт дискотекаын нырысьсэ адским. Со монэ синйылтэм. Собере соцсетьын гожтӥз, вераськыны кутским, озьы пумиськылыны ӧдъям. Табере 5-тӥ арзэ ӵош ини.

— Арганэн но ӵош шудӥськоды-а?

— Шудӥськом дорын, кык огкадь арганмы луэ ке. Но Альбиналэн умойгес пӧрмо кырӟан гуръёс, со туж шулдыр шудэ. Мон кызьы кылӥсько, озьы ик шудӥсько, соин эктон гуръёс ӟечгес пӧрмо.

Выль ар шулдыръяськонын — Дунъяло-а эдэйгуртъёс артист эмеспизэс? Оло, перепечен-табанен гинэ сюдыса возё? Яке кыед куяны, пу пильылыны косо-а?

— Мон куддыръя малпасько, малы меда артистэ мынӥ шуыса? Куддыръя киын дотово ужаме потэ. Тани тракторез но, мотоблокез но ачим тупатъясал, вӧйын зыраськыса, сэрттысал-пертчысал. Соин машинаме но, мае быгатӥсько, ачим лэсьтыны тыршисько. Квартираям шкафъёс но, ӝажыос но ачим лэсьтӥсько. Мыным кельше чертёжъёсын вырыны, котькуд сантиметрзэ чотаса лэсьтыны. Кыштыр-кыштыр вырисько, бускельёслы та уженым медам люкеты шуыса сюлмаськисько. Мон асме куддыръя «Плюшкин» шуисько. Дорам олокыӵе но кулэтэм арбериос люкасько. Малпасько, со кытын ке но кулэ луоз. Тани наушник чигиськиз ке, мон выльзэ басьтыны уг мыны, паяльник кутыса, ачим тупато. Сыӵе дыръя мынам йыры шутэтске. Соин гуртэ бертӥсько ке, мон татчы шутэтскыны ӧй лыкты, шуисько. Тол бабаез шудыны ӧтчало бере, мон сюлмаськисько рольме тунсыкогес карыны. Ма, бодые гинэ но кык. Огез пӧртэм тылъёсын ӝуа — ачим ик лэсьтӥ. Нош кыкетӥез бодые кырӟа — нылпиослы со сыӵе кельше.

— Бадӟым-а вожвылъяськон Удмуртиын Тол бабайёс вискын?

— Татчы бертыса, нырысетӥ арзэ ик нылпи садэ Тол бабаез шудыны ӧтизы. Туж ушъязы. Нош ӟечен верало ке, мылкыд ӝутӥське. Собере эшшо ӟечгес шудэм потыны кутске. Вот со дырысен кутскизы ӧтчаны. Кык арня ӵоже нылпи садъёсын но школаосын 30-лэсь трос утренникъёсын шудоно луэ. Ужрадэ ӧтёнъёс августысен вуо ни. Соин шутэтскыны дыр ӧвӧл. Куддыръя нуналаз 4 ужрад тупа, озьыен, 4 пумо сценарийын шудыны дась луоно. Озьы ке но та уж мыным сюлэмыя. Мыным удалтӥз ӟеч профессия басьтыны.

— Но со вакытэ ик тон утчаськиськод. Тани «Удмуртия» ГТРК-ын «Иворъёсты» но нуид.

— Таиз но туж тунсыко уж вылэм. Мыным сыӵе кельшиз камера азьын ужаны. Но телевидениын меӵак эфирез нуоно, со дыре ик театрын репетиция мынэ. Озьы кыклы люкиськыны уг луы. Сыӵе дыръя театрез бырйиськод.

— Туэ тон Удмурт театрын ортчись Выль ар шулдыръяськонлэн режиссёр-постановщикез но вылэмед.

— Валтӥсь режиссёр Алексей Ложкин азьлогес дэмлаз ни вал. Но мон дӥсьтӥсьтэмгес сямыным ӧй дырты. Кылем арын Алексей Арсентьевич шорам возьматӥз — та адями, пе, интермедиез лэсьтоз. Косо бере, быдэстоно. Нош туэ ачим малпай, сценарий гожтӥ, ачим ик пуктӥ но.

Кузпалыныз шутэтскон дыръя — Анаен-атаед вуттӥсько-а театре ветлыны?

— Соос араз огпол ке но вуыло кадь. Но гуртын котьку уж пӧлы выемын ук, уггес ваньмо. Папаен мама — туж огшоры адямиос, гурт предприятиын тыршо. Атае Александр Александрович ужа вукоын, нош анае Инесса Геннадьевна — колхозын рядовой. Милям уйпалан Наговицын фамилия туж вӧлмемын бере, тросэз юало: тӥ солэн-солэн пиез ӧвӧл-а? Весь валэктоно луэ: мон туж пичи гуртысь, анаен-атай огшоры адямиос, дышетӥсьёс но, колхозэн кивалтӥсьёс но ӧвӧл. Но соос сюлмаськизы милемлы тодон-валан сётон сярысь. Костя агае географе дышетскиз, школаын но ужаз. Али, контракт гожтыса, военной удысэ выжиз. Маша сузэре УдГУ-ысь удмурт филологияя, финно-угроведениея но журналистикая институтын тодон-валан люка.

— Выль ар азьын вань-а кыӵе ке ужед, мае одно лэсьтыны кулэ?

— Анай-атай доры вуылоно. Мон Выль арез пумитаны соос доры бертылӥсько вал. Но туэ уз пӧрмы — Выль ар уе но ужано. Тол бабай шутэтскиз ке, праздник уз вуы ук!

Источник:

Наговицын С. А. Тол бабайтэк Выль ар уз вуы! / Сергей Наговицын ; вераськиз Елена Скворцова // Удмурт дунне. - 2018. - 27 дек. - С. 10, 15 : фот. - (Тӧр шорын).

За предоставление материала выражаем огромную благодарность редакции газеты "Удмурт дунне"