Миннияхметова Татьяна Гильнияхметовна
Тубато-тубато шудэ
Татьяна Миннияхметова - философия наукаосъя доктор. Пӧртэм кунъёсын усьтэ удмурт калыклэсь сям-йылолъёссэ. 16 пумо кылын вераське ке но, ялан мӧзме удмуртэзлэсь. Сое шумпотыса пумитало Англиын, Шотландиын, Мальтаын, Венгриын, Финляндиын, Эстониын, Чехиын, Австралиын, Литваын, Китайын но трос мукет кунъёсын. Нош тодосчилэн сюлэмыз кыске пичи удмурт шаере.
Кемалась ӧвӧл Татьяна Гильнияхметовна пусйиз 50 арессэ. Берло дыре со улэ Австриын. Но дано тодосчиен пумиськон понна кыдёкысь кунэ вуылоно ӧз луы. Кенешим Интернет пыр, скайп амалъя. Асьмелэн укное шунды мычиське, соослэн ӝомал кузёяське на, но компьютер азьын зуч-зуч удмурт кылын вераськыку, тодэ уг лыкто дырлэн висъяськемез, уно иськемъёс. Огзэ гинэ валам потэ: кыӵе со - мурт шаерын сяськаясь Такъянаймы?
Тодосчилэн книгаосыз:
- «Удмурты Башкортостана: история, культура, современность» (гожтэмын Л. Христолюбоваен ӵош), Уфа, 1994;
- «Календарные обряды закамских удмуртов», Ижевск, 2000;
- «Традиционные обряды закамских удмуртов: Структура. Семантика. Фольклор», Тарту, 2003;
- «Ми бурай удмуртъёс» (гожтэмын Р. Садиковен ӵош), Уфа, 2005;
- «Az ismeretlen ismerоs… (венг. кылын «Та тодмо тодмотэм»), Печ, 2010.
- Огпол ивор лыдӟисько: Эстониын удмуртъёслы сӥзем ӝытэ вуылӥз Австриысь тодмо тодосчи Татьяна Миннияхметова. Пайми: малы Удмуртиысь яке Башкириысь шуэмын ӧвӧл? Оло, вордӥськем шаерлэсь палэнын улыса, мылкыдъёс но воштӥсько?
- Удмурт сяна, кин луом на мон? Берло аръёссэ Австриын улӥсько но ужасько бере, куд-огез монэ отысь кожа ни, вылды. Нош вордӥськи Башкортостанысь Бурай ёросысь Байшады гуртын, удмурт семьяын. Анай-атае туж визьмоесь вал, одӥг классын дышетскиллям, «витьёс» гинэ басьяллям. Анай ваньзэ туж-туж каллен лэсьтэ вылэм, атай - укыр ӝог. Но семьяоссэс кулаке поттэмен, кыкназылэн но азьланяз дышетскон сюрессы ворсаськиз. Ми куать сузэръёс будӥмы. Мон - ньылетӥез. Туж эшъяськыса улӥм. Бадӟым апайёс пичиосызлы юрттӥськизы. Покчиез сузэре вордӥскем бере мон весь соин выри, ки вылам нуллӥ. Малпасько вал: ноку-ноку одӥг вамыш но пыдыныз лэсьтыны уг лэзь, весь киям нулло! Но сузэре будӥз но бызьыса кошкиз. Кутыса возёд на-а пичи муртэ? Озьы ик улонын но. Адями ас кожаз луыны дыше. Соку кусыпъёс воштӥсько.
Школаын мон «витьёслы» дышетски. Математикая, физикая быгатонлыкъёсы туж золэсь вал. Соин ик куддыръя жалясько, со удысъёсъя ӧй мыны шуыса. Вамыштӥ Ижысь мединститутэ. Нырысетӥ экзаменме «куиньлы» сётӥ но бертӥ. Монэ соку ик аслам школаям ӟуч кылъя дышетӥсе ужаны кутӥзы. Отын ик дэмлазы: Удмурт кун университетысь филология факультетэ мын, собере аслад школаяд ик бертод. Со дырлы мон инмын ӧй ни лопыръя. Туж кылзӥськись вал бере, озьы ик кари.
УдГУ-ын дышетсконме йылпумъяса, гуртам бертӥ. Ӝоген монэ, 23 аресъем нылашез, школалы директоре юнматӥзы. Куинь ар ортчыса, калыкез дышетонъя отличник ним сётӥзы…
- Ваньмыз сыӵе умой радъяське вылэм. Озьы ке но школаысь, вордӥськем гуртысьтыды шуак кошкиды. Мар ӧз тырмы?
- Огпол гужем Иже вуылӥ. Пумиськылӥ Людмила Христолюбова тодосчиен. Со мынам диплом ужея кивалтӥсе вал. Людмила Степановна шуэ: татын фин-угор конференция луоз. Ойдо, пе, гожты кыӵе ке доклад, мон тонэ вераськисьёс пӧлы пырто.
Гуртысьтымы трос пӧртэм калыкъёслэн кырӟанъёссылы сӥзем доклад гожтӥ. Конференциын мыным туж трос юанъёс сётъязы, Москваысь тодосчиослы но вераськеме тунсыко потэм. Соос ик юазы: тӥ аспирантураын дышетскиськоды-а? Нош мынам соку йырам но, уям но ӧй вал ай кыӵе ке наука. Конференциын лэсьтэм докладме печатлазы научной статья шуыса. Йырам весь мургес пыӵаз: вот мон ӵукна султӥсько, школае мынӥсько, пиналъёсты дышетӥсько, бертӥсько, ӵуказеяз - нош озьы ик. Азьланяз но номыр уз воштӥськы. Со вал кризис. Ас поннам малпай: кошкыны кулэ.
Людмила Степановна ӧтиз Иже. Удмуртиысь шаертодонъя музейын наукая ӧнерчи луыса ужаны кутски. Собере - Историяя, кылъя но литературая Удмурт институтын лаборант луыса. Наукая стажировкаме ортчи Башкортостанысь Историяя, кылъя но литературая институтын. Уфаын мон наукая центрысь археологияя но этнографияя музейын наукая валтӥсь ужась луыса тырши на, аспирантураын дышетски. Кам сьӧр удмуртъёслэсь календарь праздникъёссэс эскери. Диссертациме ути, история наукаосъя кандидат луи. Но али мон со диссертациме мукет сямен гожтысал ни… Наукая стажировкае ортчиз Финляндиын, Хельсинкиысь университетын. Собере докторантураын дышетски Эстониысь Тарту университетын. Доктор уже но сӥземын удмуртъёслы. Эстониын солы туж вылӥ дунъет сётӥзы.
2003-тӥ арысен вуи Австриысь Инсбрук городэ. Татысь университет бордын Европаысь этнологияя но фольклоръя институтын ужай. Удмуртъёслэсь но Тирольын улӥсьёслэсь осконъёссэс ӵошатӥ. Огарлы ӧтчазы Венгриысь Печ университетэ лекциос лыдӟыны. Собере нош ик - Австрия. Людмила Христолюбова ке ӧй луысал, мон ноку наукае ӧй вуысал. Со мыным туж зол юрттӥз. Людмила Степановналы бадӟым-бадӟым тау шуэме потэ.
- Секыт-а удмурт адямилы мурт культураын, палэнысь кунын ассэ шедьтыны, улыны?
- Эстониын дышетскон - тужгес шудо вакытэ. 5 ар ӵоже мон туж зол ӝутски улонэз тодонъя, кылъёсты дышетонъя, пӧртэм калык культураосты валанъя. Тодон-валан басьтон вискам ачим но занятиос нуи. Эстон дышетӥсьёсын но кивалтӥсеным ми эшъёс вал. Огкыл капчиен шедьтылӥм. Венгриын одӥг ар ӵоже ужай. Отын мон удмурт этнографиез лыдӟись нырысетӥез тодосчи вал. Мадьяръёсты рос-прос тодӥ шуыны уг быгатӥськы, но ог-огдэ валантэм учыръёс ӧз пумиськылэ. Озьы ик Финляндиын но. Нош Австриысь институтын удмуртъёс сярысь кылылэмзы ик ӧй вал. Аслэсьтым выжыме чиньы вылын валэктоно луылӥз. Кытын, пе, со Удмуртия? Европалэн шундыӝужан палаз. Нош маин со тодмо луэ? Отын Чайковский композитор вордӥськемын. Ой, кыӵе зол паймо! Калашников сярысь ватсасько на ке, эшшо чабкисько. Юало: нош Удмуртия шуонын одӥг ке но городзы вань-а? Ма кызьы уз луы, шуисько, быдэс республика ук со! Собере ини юаллясько удмурт кыл но калык сярысь.
Россиен ӵошатоно ке, Австриын улон воксё мукет. Зэм, отчы лыктэм туристъёс адӟо выжыкылын кадь чебер ульчаосты, коркаосты, но калыклэсь сямзэ шӧдыса уг вуо. Мыным но татын нырысь туж кельшиз, экспедициосы потаса, туж синмаськылӥ шулдыр сям-йылолъёссылы. Но табере со ваньмыз огшоры кадь потэ.
Австриын адямиос ӟеч уло, но соос асьсэ понна, нимаз-нимаз. Улэмзы сярысь нокин номыр медаз юалляськы. Ӵош ужась адямиослэсь мон уг тодӥськы: кышнояськемын-а, ӧвӧл-а, нылпиоссы вань-а, ӧвӧл-а. Аслэсьтым мӧйыгес секретарьлэсь гинэ ке шат. Соин ик Австриын мыным капчи ӧвӧл. Эшъёсы вань, но соос наукаен герӟаськымтэ, сюлмысь вераськыны соос дышемын ӧвӧл.
- Озьы ке но тӥ Австриысь уд кошкиське. Малы?
- Уже монэ та кунэн герӟа. Азьвыл малпасько вал: малы татчы вуи? Маке ӟечез вите-а? Туж зол бертэме потэ вал Удмуртие яке Башкортостанысь Уфа городэ. Но отын но монэ возьмало-а? Нялтас вераса, докторантураме йылпумъяса, Иже но Уфае вуылӥ - инты ӧз шедьы.
Али мон 16 пӧртэм кылэз тодӥсько, 8-эныз эркын вераськисько: ӟуч, удмурт, бигер, башкир, венгер, фин, чуваш, англи, француз, немец, турок, пор... Нош гожъямъёсты берыктылӥ ни 25 кылысь. Озьы ке но 40 арес бере выльзэ кутскыны капчи ӧвӧл. Немец кылэз дышетоно луи 44 аресам, Австрие лыктыса гинэ. Отчыозь пал кыл но вераны ӧй быгатылы. Выль кылэз дышетон понна ваньзэ сюлэм пыртӥ поттоно луиз.
Кылэн ӵош Австриын выль калыкез, выль улонэз тодоно-валано на вал. Палэнысен гинэ ваньмыз капчи кадь адӟиське. Али мон туж зол валасько: макем секыт со лулсэрлы - выль улонлы нырысь ик дышетскон, собере азьлань вамыштон но азьпалтон.
- Аръёс ортчемъя уноез тодосчиос буйгатско: вылӥ ним басьтэмын, докторской уж утемын. Кыӵе ке экспедициосы, калык пӧлы потаны мылкыдзы уг тырмы ни. Нош тӥ сьӧрады егитъёсты но валтӥськоды на.
- Зэмзэ ке, берло дыре экспедициосы шергес потасько - дыр уг тырмы. Ӟечен тодам вайисько удмурт тодосчиосты. Экспедицие нырысьсэ потай, УдГУ-ын дышетскыкум ай, тодмо фольклористэн Даниил Яшинэн. Вуылӥм уйпал удмуртъёс доры, Глазов ёросэ. Вуоно араз Валентин Кельмаков профессор кивалтэмъя Татарстанысь Балтаси ёросэ потамы. Улонам бадӟым пытьы кельтӥз мукетыз но профессор - Владимир Владыкин. Солэн лекциосыз бере озьы ик этнографияя материал бичано вал.
Нош Национальной музейын ужакум, экспедициосын вуылӥ бавлы, косинской, сибирь, пермь, уйпал, лымшор, малмыж, мамадыш, ваткасьӧр, камсьӧр удмуртъёс, бесерманъёс, чукынэм бигеръёс, староверъёс доры. Татын валтӥсьёсы вал Серафима Лебедева но Алексей Петерсон тодосчиос. Уфаысь наукая центрын ужакум но, трос пӧртэм калыкъёс доры ветлыны кылдӥз, туж узыр материал люкамын вал. Ужай Раиль Кузеев академиклэн кивалтэмез улсын. Бӧрысь - Финляндиысь Кастрен огазеяськонлэн кивалтӥсеныз Ильдико Лехтиненэн ӵош экспедициосы потамы удмуртъёс но поръёс доры. Эстониын ужай Юло Валк профессорен.
Уфаын но Тартуын дышетскыкум, эспедициосты аслым но радъяно луиз. Берлоез сыӵе бадӟым потанэ - мадьяр тодосчиосын ӵош. Венгриын удмурт этнографилы сӥзем проектъя ужай, лекциос лыдӟи. Удмурт этнографияя книга мадьяр кылын гожтӥ. Нош собере венгеръёсты Башкортостанысь удмурт гуртъёстӥ нуллӥ.
- Бадӟым люкетэз эскеронъёсты удмуртъёсын, мукет фин-угор калыкъёсын герӟаськемын. Но чаклано ке, тӥ вуылэмын Дубаи выллем кунъёсы но. Мар отчы кыскиз?
- Наукая конференциос пӧртэм кунъёсын луо, отчы пыриськыны ӧтчало, куддыръя ачим мынӥсько интыысь культураез, калыкъёсты тодон понна. Куд-ог кунъёсын ӧтем профессор луыса ужасько. Но Дубаи кунэ вуылӥ 50 аресэлы кузьым лэсьтон вылысь, шутэтскыны. Туж пайми. Дуннеысь вань тужгес-тужгес бадӟымез, пичиез, яркытэз, ӝужытэз, дуноез, чеберез… - ваньмыз отын.
Пусйысал на, кылъёсты тодэме кунгож сьӧрын туж юрттэ. Тодам вайисько Италие ветлэмме. Везувий тылгурезьлэн (вулканлэн) кратерез дорын ик сылӥсько вал. Со вискын музъем зурканы ӧдъяз, изъёс усьылын кутскизы. Кыдёкын ик ӧвӧл киоск сылэ. Солэн кузёезлэсь англи сямен юасько: музъем зурказ-а? Нош со, ачиз куалектэмын ке но, шуэ: ӧз, ӧз, кратере из усиз. Озьы, пе, татын ӵем луылэ. Собере эшез пала берытскиз но итальян кылын ӝог-ӝог шуэ: али мон музъем зэмзэ но зурка шуи ке, туристъёс пӧлын паника кутскоз. Соин ик пӧясько, пе. Мон итальян кылэз валасько бере, туж зол кышкай. Чалякгес васьки уллане, таза гинэ мед бертом ни татысь шуыса. Ас поннам малпасько: та Везувийзы но, Помпеизы но асьсэлы мед луоз, ноку татчы медам вуылы ни! Но огинтыын мон уг чидаськы. Арнялы быдэ кытчы ке палэнэ ветлӥсько. Ньыль ар талэсь азьло машина нуллон право басьтӥ. Таиз мынам берпуметӥ университет-академие.
Автомобиль нуллон куронъёс татын туж чурытэсь. Со понна техникаен герӟаськем немец кылъёсты умой-умой тодоно. Толэзь ӵоже дышетскыны ветлӥ. Берло сётӥзы нимысьтыз диск. Соя дорын тодон-валан люкаськод, астэ эскериськод. Экзаменэз сётон понна 92 процентэзлы юанлы шонер валэктоно. Нош мынам нырысь 88 гинэ луиз. Малпай: эшшо мургес дышетоно. Диск пыр асме ялан эскери. Экзаменэ мынӥ, тестысь 100 процентсэ ик юанъёсты шонер лэсьтӥ. Паймытӥзы: тӥ, пе, 1 сюрс часлэсь трос дышетскиды! Сётэм дискъя тодон-валан люкаку, астэ эскерыку, ваньмыз Интернет пыр чаклаське вылэм полицилэн нимысьтыз центраз. Нош мон со сярысь ӧй но тодылы.
- Дор - кытын со тӥ понна?
- Пӧртэм кунъёсын улӥ ке но, аслам коркае нокытын ӧй вал. Соин ик мон понна дор - со вордӥськем гуртэ. Малпасько, макем кыдёкегес кошке адями, макем тросгес калыкъёсын пумиське, сокем ӵемгес йыраз лыкто вордӥськем интыез сярысь тодэ ваёнъёс. Мынам соос вӧтъёсам но ӵем пыро. Удмурт калыклэсь туж зол мӧзмисько.
Вордӥськем шаерелэн палэназ но удмурт календарь праздникъёсты, тулыс, сӥзьыл кисьтонъёсты одно пусйыны тыршисько. Та нуналъёсы эшъёсылы кыстыбей, перепеч, табань, пельнянь вайисько. Но соос пельнянез сиё… пуртэн вандылыса. Шуисько: ыме быдэскын пононо. Уг валало. Сиытозязы ваньмыз сӥя, вӧйыз кынме.
Серекъянозь но вуэ: тапалан шуэз уг сиё, яд, пе. Нош мон бичасько. Огпол шуэн нап варення пӧзьтӥ, пирожки пыжи. Интернетысь кык час пала утчаськизы, шу сярысь тодыны вырыса - сиыны ӧз дӥсьтэ. Ярам, аслым тросгес кылёз, шуи ни. Нош удмурт сиёнъёсты пӧраны мон туж яратӥсько! Ижын ужакум, анае доры толэзьлы быдэ бертылӥсько вал. Али - арлы одӥг пол, но быдэс толэзьлы. Анайлэн нылпизэ котьку но бордаз воземез потэ, но озьы уг луы. Ог-огмылэсь мӧзмиськом, соин ӵемгес жингыръяны тыршисько. Нош сузэръёсын Интернет пыр вераськиськом.
Анай-атай доры бертӥсько ке, туж шудо луисько. Эшшо ик сузэръёсы но отчы вуэмын ке. Котькуд кошкыкум, самолётэ пуксьыкум, бӧрдӥсько: малы Инмар одно ик монэ палэнын улоно карем? Сомында адямиослэн сыӵе потэ кунгож сьӧры кошкемзы, отын улэмзы, нош мынам ноку сыӵе малпанэ ӧй вал ук!
- Татьяна Миннияхметова - туж кужмо адями, шуиз дышетӥсьты Людмила Христолюбова. Озьы-а?
- Та веранэн тӥ йыре шуккем кадь паймытӥды. Мон асме ту-у-уж ляб адямиен лыдъясько. Но, малпасько, шугъяськонъёс шоры учкытэк, улыны кулэ. Улонэ математикаын кадь зол радъямын. Одӥг минутэ но чаклатэк кылемын ӧвӧл. Со герӟаськемын, дыр, улонэз дас пала интыын выль сямен кутскемен, мур валаны тыршемен. Тодосчиослэн ужзы ялан сьӧразы, быж кадь. Доразы но ӵемысь ужано луо. Малпасько, журналистлэн озьы ик. Туэ январь толэзе нырысьсэ сыӵе югдур кылдӥз: гань-гань дыры луиз. Паймисько: э-э, тазьы но улыны луэ вылэм, номыр сярысь малпаськытэк… Инмар кылӥз: со ӝытэ ик Интернет пыр вить гожтэт вуиз. Китае конференцие ӧтё, доклад куро, Башкортостанысь журналэ - статья, эшшо одӥг республикаысь вазисько, диссертациез учкыны курыса...
- Тросэз нылкышноос арлыдзэс ватыны тыршо. Тӥ уд.
- Вань бере, малы сое ватонэз? 50 арес - со ӝыны даур. Адями улонэзлы кыӵе ке йылпумъян лэсьтыны кулэ кадь. Мон бӧрсям учкисько но, номыри ӧвӧл: семьяе но, нылпие но, коркае но… Пустыняын огназ сылӥсь будос кадь. Но мукет сямен учконо ке, наукае мон 30 арескысен вуи. 20 ар ӵоже ӧжыт ӧй лэсьты: наукая сюлэсь трос статьяе, вить книгае, трос пол пыриськылӥ калыккуспо конференциосы, быгатӥсько усьтыны, вӧлмытыны удмурт сям-йылолъёсты, культураез. Мынам тыршемелы луыса Европаын удмуртъёсын тунсыкъяськисьёс йыло. Дорам ӵем жингыръяло, вазисько пӧртэм кунъёсысь газетъёс, куро Россия, финy-угор калыкъёс яке удмуртъёс сярысь мадьыны, эксперт луыны.
Али тыршисько выль проект бордын - Европаысь шайтанъёс, периос, ведӥнъёс, тунасьёс сярысь энциклопедия («Энциклопедия по демонологии»). Отчы люкаськом Европаысь вань калыкъёслэсь сьӧд кужымъёс сярысь веранъёссэс. Пыртӥсько удмуртъёслэсь но осконъёссэс. Та уж туж трос дырез басьтэ, соин ик лекциос лыдӟыны уг ваньмиськы.
Улонын, мынам малпамея, кулэ луыны йылпумъянъёс. Котькыӵе ужез, пичи-а, бадӟым-а, быдэстыны кулэ. Но куд-огзэ асьмеос кулытозь но йылпумъяны ум быгатэ. Оло, кулэез но ӧвӧл. Соин но тросэз вамышъёсмы табатэн-тубатэн радъямын. Улонэз мон ӵем дыръя ӵошатӥсько вашкала сям-йылолъёслэн радъяськеменызы. Отын ваньмыз сыӵе гениально чакламын. Котькуд сям-йылоллэн, вӧсез ортчытонлэн вань кутсконэз но йылпумъянэз. Обрядовой философиын котькуд йылпумъян - со мукет ужлэн кутсконэз. Йылпумъянтэк ӧвӧл кутскон. Одӥг тубатысь мукетаз выжон выллем. Оло, озьы малпамысьтым но улонам кыӵе ке секытэз вань. Эстониын но Венгриын мон тодӥсько вал кӧня арлы отчы лыктэмме. Со дыр ӵоже мар кулэ - ваньзэ лэсьтӥ, ужай, йылпумъяй. Австрие мон ӧй лыкты, весяклы шуыса. Но кӧня арлы - тодмо ӧвӧл. Улӥсько сыӵе мылкыдын: тани-тани берто ни, оло, кулэ луо вордӥськем шаерам. Но отын мон ноку кулэ уг луы, сое туж ӟеч валасько. Оло, та югдур шоры мукет сямен учкысал: вордӥськем палъёсысь пыраклы кошкисько, ноку уг ни вуы шуысал ке…
- Верало, тӥ, пе, туж яратӥськоды удмурт кырӟанъёсты. Кырӟалэ маке…
- Туж зол яра «Ой машина, машина». Сое ми Валентин Кельмаков профессорен кык куараен кырӟаськом вал. Та тодосчиез мон туж вылӥ дунъясько. Пичи вакытысь, коркась корка юмшанъёс дыръя сюлме пыӵаса кылемын мукетыз кырӟан:
«Милям но азбармы пичи ке но,
Вож ожо ке потэ, ӟамнанэ (шулдырме).
Милям но коркамы пичи ке но,
Ӟеч туганъёс пыро ке, ӟамнанэ…"
Источник:
За предоставление материала выражаем огромную благодарность редакции газеты "Удмурт дунне"
