Клементьев Андрей Александрович
Сюлэмез чупало ке, будэ дышетӥсь
Андрей Клементьев – егит тодосчи, кылосбур наукаосъя кандидат, элькунысьтымы Дышетӥсьёслэсь тодон-валанзэс будэтонъя институтысь удмурт филологияя но анай кылъёсъя кафедраен кивалтӥсь. Сайкыт, лачмыт, нырысь учкыса, огшоры но валамон, но сое ӧжыт тросгес тодыса, шӧдӥськод – вань аслаз «шайтанъёсыз». Со понна тунсыко, ас ужзэ пумтэм яратӥсь. Шаерысьтымы дышетӥсьёс со шоры Андрей Александрович шуыса вазё, нош ми понна со вашкала эшмы – мыло-кыдо лыдӟисьмы но тунсыко автормы.
- Андрей, «Удмурт дуннелэн» тыныд кӧтӝожез вань…
- Тодӥсько. Студент дыръям мон зэмзэ но туж эшъяськи тӥледын, кельшылӥз газетады гожъяськыны. Одӥг аре егит гожъясьёс пӧлысь тужгес устоез но луылӥ, со понна редакция диктофон кузьмаз вал – студент понна туж бадӟым кузьым. Асме пӧртэм жанръёсын утчай: интервью, зарисовка, статья, рецензия. Тодӥсько на, «Дарт» баме нимысьтыз мыным нуон вылысь «Супыльтон сэрег» усьтӥзы. Со вакытэ ӵуж иворъёс туж данын вал. Но, зэмзэ верано ке, та сэрег мон понна утчаськон-эскерон гинэ вал. Аслым та ӧрын иворъёс дасялляны туж ик ӧз кельшылы.
- Соин валче шуге-леке но сюрылэмед вань, озьы-а?
- Бен. Любовь Быкова кырӟась нуны возьма шуыса, ивор гожтӥ вал. Мыным потӥз, отын нокыӵе ултӥянэз ӧвӧл, нош калыклы тунсыко ук тодмо адямиос сярысь лыдӟыны. Анаезлы со кельшымтэ, ӵашетыны ӧдъяз. Газетэн кивалтӥсьёс солы валэктӥзы кадь, калык син азьын улӥсь муртлэн адӟонэз сыӵе шуыса, озьы ке но, дораз ветлыса, буйгатыны малпай. Ас кожам юромо Кияса ёросэ ветлӥ. Озьы мон валай кыллэсь секталазэ, со понна кыл кутонэз.
- Со-а кышкатӥз журналистикае мынонлэсь?
- Ӧз. Мон лыдъясько, сыӵе иворъёс кулэ. Гожъясь-верась ӧвӧл – артистэз вунэто. Куд-огез со понна лачак коньдон тыро, нош асьмелэн дунтэк рекламалы куатасько… Но ужпум со бордын ӧвӧл. Мон дышетски удмурт филологияя факультетын, нош отын дышетӥсьёсты дасяло. Озьы 4-тӥ курсысен мынӥм практикае. Вал быръён: гуртэ я городэ. Но университетын соку ик веразы: городын куронъёс вылынгес, астэ возьматыны луонлыкъёс тросгес. Мон вамыштӥ Ижысь 73 номеро школае. Отын быдэсак выйи школа улонэ, соку ай мон понна тодмотэм визьнодан уже. Мыным удмурт-бигер класс шедиз. Соку нырысьсэ, дыр, шӧдӥ бигер кыллэсь вӧзам улэмзэ-шокамзэ. Практикае ӵоже котьку но классэлэсь таӵе аспӧртэмлыксэ лыдэ басьтылӥ. Тодӥсько на: 8-тӥ Мартлы пиналъёс анайёссылы асьсэ кылынызы гожтэм открыткаос дасяса кузьмазы. Ачим нуылӥ удмурт но ӟуч кылъя но литературая урокъёсты. Котькуд урокме пыр-поч дасялляны тырши, мыло-кыдо ортчытъялляй. Мар но ӧм дауртэ пиналъёсын: нуналлы быдэ спектакль, литературая кружок, городын ортчылӥсь удмурт ужрадъёсы пыриськон… 5-тӥ курсысен ӧй ик малпаськы ни, нош ик вамыштӥ дышем сюрестӥ. Таяз аре мыным чылкак удмурт класс шедиз. Та класс школалэн улоназ аспӧртэм инты кельтӥз, угось 11-тӥ классъёс пӧлын татын гинэ азвесь медалист вал, татын гинэ устоез спортсмен дышетскиз. Ӵапак та классэз ик йылпумъяз тодмо егит кырӟась Сергей Галкин. Валамон, нырысетӥ араз ортчем практикаме лыдэ басьтыса, таизлэсь ӟечлыксэ но пайдалыксэ будэтыны тырши. Кылсярысь, 4-тӥ курсын удмурт но ӟуч кылъя дышетӥсьёсы монэ урокъёсам нылпиосын огнаме кельтылӥзы, ас ужъёссыя кошкылӥзы. Практикантъёслы туж шумпотылӥзы, угось соос ужзэс толэзьлы ке но пичи капчиятылӥзы. Нош практикант кытысь валалоз, маиз уроказ ӟеч пӧрмиз, маиз ӧз? Озьы кыкетӥзэ практикае лыктыкум, дышетӥсь урокысьтым пегӟыны ӧдъякуз, мон сое ӧй лэзьы. Дышетӥсьёсыным котькуд урокме пыр-поч эскерылӥмы. Соин ик кыкетӥез практика мыным туж трос сётӥз. Вылаз ик, мон валай: журналистикалэсь зол яра дышетон уж.
- Но университетэз йылпумъяса, нош сьӧлыкад – яратоно ужад – школае – ӧд дырты.
- Мынам вань сыӵе сямы – чаклам вамышме но шуак воштыны быгато. Но ужпум со бордын гинэ ӧвӧл. Мон зэмзэ но дась вал асме нылпиослы сӥзьыны, но куке веразы, кӧня уждун басьто… Мон гуртысь пияш, городын квартирае ӧвӧл, дӥсяськоно, театръёсы ветлоно, кышнояськоно… Азьпалзэ малпаса, вань мылкыд лапкомиз. Солань-талань кыстаськыны кутскисько ни вал, факультетысьтымы дышетӥсе Татьяна Ивановна Зайцева Дышетӥсьёслэсь тодон-валанзэс будэтонъя институтэ мыныны ӵектӥз. Вамыштӥ, та удыслэсь пуштроссэ чик тодытэк-валатэк. Туж ӟеч пумитаз, удмурт кылъя но литературая кафедраен кивалтӥсь Рудольф Фёдорович Березин. Озьы 2002-тӥ арын 4-тӥ сентябре мон преподаватель должносте кутэмын вал. Зэм, уждунэз татын но укыр пӧртэм вылымтэ, но со понна наукаен вырыны, будыны луонлык вань. Кавказын верало: вож нунылэсь пельёссэ чупало ке, со крезьгурчи луэ, киоссэ ке – суредась, сюлэмзэ ке – дышетӥсь.
- Шорад учкыса, востэм, шыпыт адскиськод, нош тӥни кыӵе дӥсьтӥсь, аслыд оскись вылэмед: школаын тыршытэк, бадӟым стажен визьнодасьёсты индылӥськод – чипы курегъёсты мед дышетоз ай!
- Озьы пӧрмиз. Бен, али малпасько ке, укыр дӥсьтӥсь вылӥськем. Нырысетӥ занятиелэсь кызьы ортчемзэ рос-прос уг тодӥськы ни, зубектыса, дыр. Тодӥсько на созэ гинэ: аудиториын пальпотыса пуко ог 40-50 аресъем дышетӥсьёс. Синъёсазы озьы ик гожтэмын кадь: я, дышет-дышет, учком, маке пӧрмытод-а, уд-а. Тодӥсько на, туж секытэн дасяй нырысетӥ курсъёсылэсь программазэ: дышетӥсьёсты син азям пуктыса, нокызьы гожтыны уг быгатӥськы. Тау Рудольф Фёдоровичлы. Со монэ соку ик кафедралэн ужаз зымытӥз. Рецензия гожтон, олимпиада ужъёс дасян, экзамен диктантлы яке изложенилы текст быръён – та но мукет ужъёсты нырысь араз ик лэсьтылоно луиз ини. Зэм, олимпиада ужъёсме ӧз юнматэ: толло студентлы ӧз на оске.
- Али тонэ туж гажало ни кадь: гуртъёсы потаку, анай кылъя дышетӥсьёс ӟеч кылъёс верало.
- Тау. Со дырысен табере ӵапак дас ар ортчиз ини. Котькуд курсъёс бере ас поннам анализ лэсьтӥсько вал: маиз школаын кутыны тупамон, маиз ӧвӧл, мае занятиосам воштоно, мукет сямен радъяно. Вылаз ик, дышетон ужрадъёслэн пуштроссылы, кылзӥсьёсын ужан кабъёслы куронъёс но зол воштӥськизы.
- Кыӵе али шоро-куспо дышетӥсьлэн социальной тусбуйыз?
- Ог 40-50 аресъем кышномурт, школае институт яке университет бере ик вуэм мурт. Пӧлысьтызы данакез ас ужзэ яратэ, но удысаз воштӥськонъёсты туж ик мыло-кыдо уг пумита, соослы секытэнгес дыше. Шоро-куспо уждунэз ог 15 сюрс манет, но сомында басьтон понна кык ставкаен тырше, кык классэн кивалтэ. Городын улӥсез одно выре репетитор ужен, гуртысез бакча уте, трос пудо вордэ, вуз каре. Куддыръя театре ветлэ. Вылтусыз – чылкыт. Шоголь ӧвӧл, но огшоры, валаса дӥсяське. Берло дыре ӧжытгес ӝожтӥське. Политикаен укыр уг тунсыкъяськы. Семьяезлы дырыз уг тырмы. Котьку но жадем тусо.
- Нош кыӵе тӥляд дышетскисьёсты – анай кылъя дышетӥсьёс?
- Ушъямон: мыло-кыдо пыриське общественной уже, пӧртэм конкурсъёсы, аслэсьтыз амалъёссэ конференциосын возьматэ, ужаз туала технологиосты кутэ, проектъёс дася, кылбур гожъя, кырӟа, эктэ, крезьгуро инструментэн шудэ, киужен выре. Семьязэ сюдэ, котьку пальпотэ. Нылпиосты яратэ.
- Зол!
- Данакез зэмзэ но сыӵеесь. Тани учке ай, куать ар ӵоже удмурт, бигер но пор кылъёсъя 60 пала дышетӥсьёс «Дышетон» йӧскалык проектъя конкурсын вормисе потазы. Нош Светлана Ильина, Лариса Булдакова, Татьяна Юмина, Валентина Широбокова, Елена Агафонова, элькунамы ортчись «Анай кылъя устоез дышетӥсь» вожвылъяськонын вормыса, Россиысь мастер-классын асьсэдыз ӟеч возьматӥзы. Нош Можга ёросысь Пазял школаысь Олег Чувашов туэ тужгес но вылӥ вормон – «Азвесь тылы» – гран-при басьтӥз. Со туж етӥз дышетӥсь. Со сяна, пумтэм синмаськисько Алнаш ёросысь Варзи-Ятчи школаысь Галина Зиновьевалы. Зэмос визь люк, мае но со уг тоды. Солэн пиналъёсызлы но соин артэ ужасьёслы туж удалтӥз, малпасько.
- Тонэ бигер кылъя дышетӥсьёслы укыр бадӟым саклык висъяськод шуисьёс но вань.
- Кафедрамылэн нимызъя учконо ке, ми пӧртэм анай кылъёслы дышетӥсьёсын ужаськомы: удмурт, бигер, пор, чуваш. Бигер кылъя дышетӥсьёслы зэмзэ но бадӟым саклык висъясько. Ужан амалъёссэс возьматыны конференциосы кыскисько, ужъёссэс печатланы юрттӥсько, Казаньысь лектор ӧтчасько, Татарстанэ вуылыкум, министерствоысьтызы дышетон пособиос вайылӥсько. Кафедрамы котькуд кыл сярысь сюлмаське. Нялтас вераса, стандартлэн огез бадӟым малпанэз – пӧртэм кылъёсты утён.
- Малы ке тонэ берло дыре удмурт ужрадъёсысь шер адӟод.
- Соиз зэм. Татын кык мугез. Нырысь ик, ноку но дыр уг тырмы. Мукет ласянь, сямы возе – мон уг яратӥськы асме возьматыны, нош сыӵе интыосын котьку но трос тодмоос пумисько. Мон ас поннамгес улыны яратӥсько, бадӟым компаниосын жадисько. Зэмзэ вераса, Герберлэсь но акыльтӥ ини. Сотэк но ужея весь калык пӧлын улӥсько. Удмуртлыкез ӝутон понна одно ик калык син азьын луыны кулэ шат? Нош берло дыре озьыгес пӧрме: ужзэс уг лэсьто на, дан потто ни. Эпатаж, огкылын. Мон ачим Ижкарысь «Удмурт кенешлэн» ужаз пыриськисько, культура ёзын бергасько. А. Поткинаен трос ужрадъёс «Восточный» культура юртын ортчытъяськомы. Та эшшо одӥгез площадка, кытын удмурт кыл кутӥське. Кылсярысь, таяз толэзе милям выль сезонэз усьтон ортчоз. Со сӥземын луоз 1970-тӥ-2000-тӥ аръёсы Ижкарысь удмуртлыклы, удмуртъёслэн шутэтскон сямъёссылы, тодмо адямиослы но учыръёслы.
- Верало, тон сюанъёсты но шулдыртӥськод шуыса… Мар со: ватсаса уксё поттон амал яке тымиськем мылкыдэз веськатон?
- Мон ноку но одӥг ужын гинэ ӧй ужалля. Но одӥг интыысь мукетаз бызьылыны шонер ӧвӧл, малпасько, кудӥз ке но уж одно ик лябӟе. Но адямиез сыӵе каре ачиз кун. Мон, университетэз йылпумъяса, аспирантураын дышетски, кык ужын ужай. Сотэк кызьы улод? Соин ик кандидат диссертациме но дыраз ӧй йылпумъя, но ӟеч валай: адямилэн улонысьтыз сюлэмызлы тужгес но дуноез ноку но капчиен уг сётӥськы. Али но паймисько, кызьы мон – котьку пазяськись мурт – асме кырмыса, защитаозь вуттыны пӧрмытӥ. Нялтас вераса, журналистикалэсь но мон воксё ӧй палэнскы: кылем арысен дышетӥсьёслы чаклам «Вордскем кыл» журналын ужасько на. Сюан нуон пумысен зэм верало. Огласянь, мон озьы ужелэсь шутэтскисько, мукет ласянь, удмурт кылэз но культураез туала улон югдуръёсын вӧлмытыны юрттӥсько. Мон лыдъясько: удмуртъёслэсь сюанзэс удмурт кылэз тодӥсь адями нуыны кулэ. Озьы ужрадын куноос асьсэды доразы кадь шӧдо. Жаль, удмурт кылын сюанъёс но юбилейёс ортчытон пумысен туж шер вазисько. Куддыръя туж жаляса учкиськод: анай-атайёссы удмурт кылын верасько, кырӟало, удмурт эктонъёсты экто, нош нылпиоссылэн пушказы чик но ӧвӧл ни удмуртлыксы. Нунокъёссы сярысь веранэз ик ӧвӧл.
- Доктор уж лэсьтэмед уг поты шат, озьы пазяськыса кемалы уд ӝега-а?
- Котькуд кандидат со сярысь малпаське, дыр. Но мон пумысен али вазь со ласянь вераськыны. Весь диссертациос бордын тыршид ке, ку огшоры адями кадь улыса вуттод?
- Малэсь ке кышкаськод, дыр?
- Мынам одӥг гинэ кышканэ – ужме укыр яратэмысь, улонлэн мукет палъёсызлэсь шӧмзэ, яркыт буёлъёссэ шӧдытэк кылё, нош уже чылкак одӥг гинэ шумпотонлы пӧрмоз. Со туж кышкыт.
- Валантэм: тон тыро семьяысь, вынъёсыд вань, кышноед егит, ньыль аресъем пиед будэ, туэ квартира басьтӥд…
- Озьы. Улонам уж сяна но шумпотон мед луоз шуыса, ваньмон дырме семьяеным ортчытыны тыршисько. Со сяна, эктыны ветлӥсько. Куд-ог шутэтскон нуналъёсы Надежда кузпалэным яке кӧня ке семьяен люкаськыса, кырӟаса пукылӥськом, толалтэ куасэн бызьылӥськом, Эгра ёросэ анай-атайёсмы доры вуылӥськомы (мон Сундурысь, кузпалы Шоргуртысь). Огъя вераса, улон пӧзе, отын, ужлы сяна, мукет сюлмаськонъёслы но шумпотонъёслы инты вань.
Источник:
За предоставление материала выражаем огромную благодарность редакции газеты "Удмурт дунне"
