Такаева Ольга Юрьевна
Висёнэз ворме яратон
Дуннеысь тазалыкез утёнъя огазеяськонлэн лыдпусъёсыз ӝожомыто. Эмъясьёс верамъя, адямиез тужгес но ӵем погыртэ инфаркт, кыкетӥ интыын мынэ инсульт. Арлы быдэ Россиын гинэ 450 сюрс адями, йырвиымаз вир пальккиськыса, шуге-леке сюре.
Инсульт сярысь трос тодэ Ижысь валтӥсь невролог, нырысетӥ категориен врач Ольга Такаева. Ольга Юрьевна «Ижмаш» медсанчастьысь инсульт бере висисьёсты йӧнатонъя (ОНМК) отделенилэн кивалтӥсез луэ. Инсультэз шараянын но эмъянын выль технологиосты уже кутон но та удысын тодон-валанзэ будэтон понна вуылӥз Москвае, Россиысь медициная кун университетэ.
- Ольга Юрьевна, мар со сыӵе инсульт?
- Адямилэн мугораз но йыраз трос вирсэръёсыз. Йырвиымын вирветлон сураське-тӥяське ке, инсульт луэ. Латин кылысь берыктыса, со шугмон, тэтчан шуэмез возьматэ. Инсульт пӧртэм луэ: сэр чигиське, кесиське ке, виыме вир кисьтӥське, таиз геморрагической инсульт нимаське. Нош йырвиымлэн кыӵе ке люкетаз вир урод мынэ, уг тырмы яке тромб кылдэ ке, соку ишемия (закупорка) луэ, таиз ишемической инсульт шуиське. Тани кимы вандӥське ке, вир орсме, бервылыз зӧкоме, сэръёсын но озьы ик. Сюлэм огкадь уг жугиськы ке, тромб кылдэ. Собере сюлэм тэтчамезъя сое донге, напчем комок вирен ӵош кошке, ӵемысь йырвиыме. Инсульт дыръя адямилы шӧдтэк шорысь шуг луэ, мугорыз зубектэ яке пуме, вераськыны шугъяське.
Милям отделенимы 2009-тӥ арысен ужа ини, 2010-тӥ арын инсультъёсты шараянъя но эмъянъя федерал программа чотын татчы томограф, озьы ик сосудъёсты УЗИ лэсьтон аппарат вуиз. Та тӥрлык ужаны туж юрттэ. Отделениямы вуись висисьёсты ми соку ик учкиськом компьютер томографен, 40 минут куспын эскериськом. Со луонлык сётэ тодыны, кыӵе инсульт адямиез шуккиз, кызьы сое эмъяно, уго геморрагической но ишемической инсультъёсты пӧртэм сяменгес йӧнатоно. Нырысетӥез дыръя висисьлы секытгес, таиз бере инвалид кылисьёс но тросгес. Нырысетӥ минутъёсаз ик ми адӟиськом ини, мар луэ йырвиымен, отын вир кисьтӥськемын-а яке уг тырмы-а. Вир уг тырмы ке, озьыен, отын вань тромбез, сое сылмытыны кулэ. Ишемической инсульт дыръя нимысьтыз терапия ортчытӥськом, со юрттэ тромбез кизертыны, озьы вирлэн ветлонэз ӧраз пыре.
- Черлэн кылдон мугъёсыз кыӵеесь?
- Шуге-леке нырысь ик шедё вирзӥбетэн курадӟисьёс, атеросклерозэн висисьёс. Кинлэн ке сэръёсыз лябесь. Анай-атайёсмы асьмеды кыӵе ке висёнъёсын вордо ни ук, куд-огъёсыз выжыысь выжые кылё, вирсэр висёнъёс озьы ик. Пиосты басьтоно ке, соос жугиськыны ярато. Шуом, егит дыръязы йыразы огпол зол шуккизы, нош солэн «емышез» шараяськоз-шӧдӥськоз, ог дас ар ортчыса. Керӟегъяськон озьы ик тазалыклы пайда уг вайы.
- Кинъёсты ӵемгес погыртэ инсульт?
- Таиз ласянь нимысьтыз эскеронъёс ӧй ортчытъя, но аслам чакламея тросгес висё гуртын улӥсьёс. Татысь калык, вазьгес пересьмем сяна, тросгес но золгес висе. Секыт но кысык уж вӧзы ватсаське на соиз но: гуртоослэн луонлыксы ӧвӧл тазалыксэс тыро-пыдо эскерыны. Зол-зол черлазы ке, машина шедьтӥзы ке, соку гинэ специалист доры вазиськозы. Нош чидамон висизы ке, мынозы гуртысьтызы фельдшер доры яке ас тодэмзыя йӧнатӥськозы. Адямиос, йырзы висе ке, одӥг эмъюмез юо – цитрамонэз. Но соос уг тодо (куд-ог дыръя фельдшеръёс но уг валэкто), бадӟым давление дыръя сое юыны уг яра шуыса.
Висисьёслэн арлыдзы сярысь ке, инсульт уг жаля пересьёсты. Милям отделениямы но соос трос. Но жаляса верано, арысь аре инсульт егитоме. Дорамы вуэм висисьёсты учкыса, пусйысал тани мае: дышетскем муртъёс, вылӥ образованизы вань ке, ӝоггес бурмо кадь. Инсульт бере куд-огез выльысь ветлыны, вераськыны дышетске. Йырвизьмыз чалякгес валаны-ужаны кутске, ваньзэ тодаз вае дышетскем мурт. Валамон ини, котькуд висись пӧртэм, но ар ортчыса, 80 процентэз соос нош ик дорамы вуо.
- Малы: тӥ сыӵе урод эмъяськоды-а яке висён вормонтэм-а?
- Ми йӧнатӥськом 21 нунал, валамон ини, инсультлэсь бервылъёссэ 3 арня куспын быдэсак уд эмъя. Со дыр ӵоже адямиез тужгес секыт вакытысьтыз поттӥськом. Врачъёслэн верамзыя, инсульт бере адямилэн бурмонэз 2 ар кыстӥськыны быгатэ на. Тазалыкез утён удысысь специалистъёс пусъё: инсульт бере нырысетӥ араз 80 процентсэ сыӵе ик «кузьым» вите на, 2 ар ортчыса, ог 60 процентсэ. Ми доры вутто инсульт шуккем адямиосты гинэ. Отделениямы 30 койка, со пӧлысь 6-ез – реанимациын. Но кинэ татчы ваё, ум улляське, 45 муртэ но кутӥськом, коридоре кушеткаосы выдтӥськом.
- Котькуд врачлэн аслаз шайвылэз, шуо.
- Бен, котькуд висисез пыд вылаз султытэм потэ. Тон солы кужымдэ, чидандэ, дырдэ сётӥськод, умойгес мед луоз шуыса, уйёстэ но уд кӧласькы, нош висисьлы уродгес луэ. Адямиез утемед уг луы ке, аслыд но туж секыт, котькуд висись сюлэм пыртӥ потэ. Ӵем дыръя малы ке уродэз тодэ лыктэ. Тани кылем арняе дорамы вуиз 32 аресъем кышномурт… витетӥ! инсультэн. Котькудӥз таӵе шугмон мугорысь кыӵе ке клеткаосты быдтэ, лулсэр системаын дефицит кылдэ, вирсэръёс курадӟо, чигисько. Нырысетӥ инсультэз бере ми солы дэмламы вал нейрохирургъёс доры вазиськыны. Но соос соку ик операция уг лэсьто, инсульт бере огшап дыр ортчыны кулэ, мугор но тазалык ӧраз мед пырозы. Кышномурт юнмаса уг вутты, нейрохирургъёс доры уг вуы, нош ик дорамы шеде. Озьы 5-тӥ инсультэз берпуметӥез луиз. Солэн картэз но пиналыз кылизы. Сыӵе учыръёсы висисьлэн семьяезлы гинэ ӧвӧл, врачлы но туж секыт.
Азьло мон уката ваньзэ сюлэм пыртӥм поттӥсько вал, али валасько ини, висисьёсты одно ик жаляно, но эсэпсэ валаса. Сотэк, ар-кык ортчыса, врачез ассэ жаляно луоз.
- Вань висёнъёс нерваослэсь, шуо, тӥ таин соглаш-а?
- Бен. Висёнъёс выжыысь выжые паласькисьёсыз вань. Но тросэз керӟегъяськемлэсь, адямилэн ассэ чакламтэысьтыз кылдо. Улонмес учконо ке, асьмеды котыртэ стресс. Ӵукна адями автобусэ пыре, калык трос, донгасько, керето. Кинлэн ке сюлэмыз сэректыны кутске ини. Вылаз ик, кондуктор ӵашетэ ке, огезлэн кӧберыз но ӧвӧл, мукетыз алекме, керӟегъяське. Кин ке сюлэмшугзэ пушказ ватэ, мукетыз пуштэ, кыре поттэ. Соин ик лул-сюлэмыд гань-ганьгес луиз ке, мугорыд но тазагес луоз. Нош чик висисьтэм мурт но ялан керӟегъяськиз ке, одно ик черлалоз.
- Озьыен, черлалод-а, бурмод-а, тросэз потэ ачид бордысь?
- Мон сое котькуд висисьлы верасько. Адями ачиз дась ӧвӧл ке висёнэн нюръяськыны яке вӧзаз ӧвӧл сое яратӥсь, валась муртъёс, сое эмъяны но туж секыт. Кылсярысь, одӥг висисез ваё пичи гинэ инсультэн, нош со бурмыны уг вормы. Яке вутто арлыдо пересез, кудӥзлэн ӝыны йырвиымез «кулэмын» ни, но со доры ветло ӵыжы-выжыосыз, сюлмаськемзэс, мӧзмемзэс верало, песяйзылэсь доразы бертэмзэ возьмало. Сыӵе мурт пыд вылаз султэ.
Тодам лыктэ одӥг учыр. 80 аресъем песянаез татчы вайизы, со лек пыктосэз вормемын ни вылэм, табере инсульт погыртэм. Котыраз кӧня бергамы, эмъямы, нош солы уродгес луэ, пумен давлениез усьыны кутскиз. Ӵыжы-выжыосыз тазалыкез утён удысын ужало вылэм. Соин ик пырак шуи: адями куке но, марлэсь ке но улонысь кошке, тӥ но дась луэ. Ӵыжы-выжыосыз пересез доразы басьтӥзы, берпуметӥ нуналъёссэ больницаын медаз ортчыты шуыса. Толэзь ортчыса, монэ куное ӧтизы. Со песяе, вераськыны кутскем гинэ ӧвӧл, пуке ни, эшшо толэзь ортчыса, ветлыны но кутскиз. Та учыр возьматэ кышномуртлэсь сямзэ, улыны мылкыдзэ но матысь адямиосызлэсь яратэмзэс. Сыӵе дыръя валаськод, яратон котькыӵе висёнэз бурмытэ, ворме шуыса.
- Адями висемзэ уг ке шӧды, со таза-а?
- Озьы шуыны уг луы. Куддыръя адями висемзэ уг шӧды. Вирзӥбетсэ мертаны кутскиськод но, шуэ: мынам давление уг тэтча. Нош учкиськод но, вирзӥбетэз 200 котыр. Адями дыше сыӵе давлениезлы но уг вала, тазалыкез чутэ шуыса. Соин ик диспансеризация шуон юрттӥз трос адямиослы висёнъёссэс дыраз шараяны.
- Мар кароно, инсульт бордад медаз еры шуыса?
- Зӧк куо луыны дышетсконо, дыр, чыры-пырыослы луыса керӟегъяськоно ӧвӧл, астэ кияд кутоно. Одно ик чакласа возёно вирзӥбетэз, вирысь сахарез но холестеринэз. Мугорез кыдатоно, выроно, бызьылоно. Юнме шуиллямтэ, дыр, вырон – улон. Азьло шуиськом вал, инсультэн шуккем адямиез толэзь ӵоже эн выртэ, эн ёртэ. Нош табере, адями реанимациысь потэ ке, 1-2 нунал ортчыса, ишемия дыръя пуксьыны косӥськом ини, эшшо кӧня ке дыр ортчыса, султыны лэзиськом. Нош геморрагической инсульт дыръя висисез, 5 нунал ортчыса, султыны лэзиськом, котькуд кык час бере берыкъяськыны косӥськом.
- Ӵыжы-выжыосты шумпото, дыр, тӥ врач шуыса. Оло, дорады гинэ эмъяськыны ветло?
- Выжыямы мон нырысетӥез врач, али атаелэн бӧлякысьтыз эшшо одӥг мурт медакадемиын дышетске. Дорын, уката ик анай-атай понна мон нырысь ик ныл, дыр. Азьло, анае черла ке, мон верасько-валэктӥсько вал, озьы йӧнатӥськоно, таӵе эмъюмъёс басьтоно. Но со мыным оскытэк-а, эскерыса-а, одно ик мынэ вал мукет врачъёс доры, кылзоз-учкоз, мар соосыз дэмлалозы. Табере оске, лэся, озьы уг ветлы ни.
- Кызьы асьтэос малпаськоды, кыӵе тӥ врач?
- Укыр небыт, дыр, собере востэм сямы потылэ, таиз удмурт сям ини. Куинетӥ арзэ отделениен кивалтӥсь луыса ужаны кутскеме бере чурытгес кариськыны тыршисько. Ӵош ужась эшъёсылы но аслым сямен ик юн куронъёс пуктӥсько.
Висисьёс кабинетам кышкатэк пырало, ӵем вуыло койкаын азьвыл кыллем муртъёс. Тросэз соос пересьёс. Дорам лыкто улон-вылонзэс вераны, куд-огез бӧрдыса но пуко, шумпотонзэс но кисьто. Тросэзлы саклык кулэ, кылзэмез витё. Соосын мукет сямен уг но луы. Арлыдоосын ӧд вераськы ке, озьыен, тон алама врач. Ма, мон ачим но со пересьёсытэк улыны уг быгаты.
- Тӥ Ижысь валтӥсь невролог но луиськоды на.
- Та дырозь Ижысь валтӥсь невролог вал больницаысьтымы ик неврологияя отделениен кивалтӥсь Надежда Соловьёва. Со интые юнматӥзы монэ. Уже йылӥз. Таиз понна уждун уг тыриськы, но отчётъёс туж трос луизы. Мон арнялы быдэ Ижысь тазалыкез утёнъя управление азьын отчёт лэсьтӥсько городысь неврологияя отделениосъя. Лыдпусъёсты эскерисько, кыӵе диагнозэн кӧня висисьёс эмъясько. Али толэзь но ортчем ар понна отчёт дасяны кулэ. Озьы ик Ижысь поликлиникаосысь неврологъёслэсь ар ӵоже ужамзэс чакласько. Собере вань со лыдпусъёсын январь толэзе мыноно луоз ини республикаысьтымы Тазалыкез утёнъя министерствое.
- Пичи дыръяды ик врач луэмды потэ вал-а?
- Кин луэме гинэ уг поты вал. Пичи классъёсын дышетскыкум, школае вуизы Ижысь адямиос. Соку гинэ усьтӥськем искусствоосъя нылпи школае усточиосты утчало вылэм. Мон кырӟаны-вераны усто вал, фольклор ансамбле но ветлӥ. Конкурс пыр потӥ ке но, анае Иже дышетскыны ӧз лэзьы, оло пичи ай кожаз, оло кыдёкын потӥз. Ми соку Пичи Пурга ёросысь Баграш-Бигра гуртын улӥськом вал (вордӥськи мон Можга ёросысь Пыӵасын). Озьы артист луон сярысь вунэтӥ. Но мынэсьтым та мылкыдме азьланьтӥз, шуыны луоз, Алексей выны. (Алексей Фомин – Удмурт кун филармониен кивалтӥсь - авт.)
9-тӥ классэз йылпумъяй «5»-ын гинэ. Соку ик юан кылдӥз: кытчы мыноно? Анае Валентина Зотовна – математикалы дышетӥсь, атае Юрий Александрович удмурт но ӟуч кылъёсты нуиз. Соос шуизы: дышетӥсьёс семьяямы вань ини, мын эмъян удысэ. Озьы мон пыри Ижысь медколледже, собере – медакадемие. Автозаводлэн больницаяз валтӥсь врачлэн воштӥсез доры лыктӥ но шуисько, кутэ монэ интернатурае, туж потэ нефролог луэме. Нош со пумитам: нефрологмы вань, ёрмиськом неврологлы. Озьы мон та удысэ сюри но со пумысен чик уг жаляськы.
- Висисьёсты эмъяськоды, отделениен кивалтӥськоды, отчётъёс лэсьтӥськоды. Шутэтскыса вуттӥськоды-а? Кызьы ялкариськоды?
- Шонерзэ вераса, шутэтскыны чик дыры ӧвӧл. Мон туж яратӥсько толалтэзэ куасэн нискыланы, гужемзэ волейболэн шудыны, велосипедэн ворттылыны. Ижысь чугун сюрес больницаын ужакум ай, ӝыны городэз великен ортчисько вал. Уж дуре нырысь вуылӥ 40 минут ӵоже, собере 20 минут куспын. Шутэтскисько семьяеным, но туж шер. Милям сяме пыӵамын ини: люкаськиськом быдэс семьяен, шумпотон иворъя-а, шугъяськытӥсь ужпумъя-а – одно ик ваньмы ӵош пукиськом-кенешиськом. Дежурствоос ӧвӧл ке, эркын дырме Максим пиеным ортчытыны тыршисько.
- Пиды вала-а, мамаез врач, адямиосты уте шуыса?
- Вала. Азьвылгес ай пиньзэ эмъяны ветлӥз но, сокем кельшем-а, мар-а, стоматолог, пе, луо. Трос пол озьы вералляз. Алигес мылкыдзэ юасько но, чутрак шуиз: врач луэме уг поты. Мугзэ но валэктӥз, уг, пе, кельшо тынад дежурствоосыд. Уже мыныкум ик юа, тон туннэ дорын изёд-а яке больницаын-а?
Отделениямы неврологъёс уг тырмо, эшшо кык врач кулэ. Али ужаськом ньыль кузя. Валамон ини, нуназе сяна, уйлы но кылёно луэ. Врачъёс уг тырмо бере, ныпъет секытгес луэ. Толэзь ӵоже мынам 12 дежурствое люкаське, 12 уй больницаын кӧлӥсько. Отделениын улӥсько, шуыны луоз. Тау анаелы-атаелы, соос пиме будэтыны зол юртто.
- Мар тӥледлы уг тырмы кадь шудо луон понна?
- 34 арескам асме шудтэм шуэме чик уг поты. Но огез зэмзэ но уг тырмы, со – дыр. Суткаын 24 час интые 48 луысал ке, ваньзэ вуттысал кадь потэ. Соку дыры тырмысал, дыр, аслым но, семьяелы но, ужаны но, шутэтскыны но, яратыны но…
Источник:
За предоставление материала выражаем огромную благодарность редакции газеты
"Удмурт дунне"
