Трофимов Сергей Семенович
Крезь - жингыртӥсь мудор
Ӟучъёс солэсь куаразэ ӵошато арфаен, Европаын улӥсьёс лыдъяло туала вакытысь тужгес тунсыко инструментэн. Малпанъёс пӧртэмесь, но ваньзэ огазея одӥгез - кин сое кылэ, пыраклы синмаське куараезлы.
Уно аръёс шып улэмез бере удмуртъёслэн вашкала крезьзы нош ик чузъяське асьме пӧлын. Со тунсыко кылзӥсьлы, паймымон луэ шудӥсьлы. Крезьлы 20 ар ини синмаськемын, соин шудэ но мукетъёссэ дышетэ Воткинскысь крезьгуръя П. Чайковский нимо педколледжысь дышетӥсь, РСФСР-ысь дышетон удысысь отличник, Удмуртиысь культура но дышетон удысъёсысь дано ужась, К. Герд нимо премилэн лауреатэз, «Сайкан» ансамблен кивалтӥсь Сергей Трофимов.
- Сергей Семёнович, тӥ туж усто шудӥськоды баянэн но мукет инструментъёсын, малы одно ик басьтӥськиды крезез улӟытон борды?
- 20 ар талэсь азьло крезез калык доры выльысен вуттӥз Удмуртиысь искусство удысысь дано ужась Сергей Кунгуров. Но усточи берыктӥз туссэ гинэ, быдэсак улӟытыны крезез ӧз быгаты, инструмент ляб пӧрмиз. Ми солэсь вить быдӟым крезьзэ басьтӥм. Нырысьсэ кутӥ, соин умой шудыны уг луы. Пиналъёслэн сиоссэ кысканы киоссы уг сузё, куараез но мултэс жингрес. Мынам кӧты ӝож луиз удмуртъёс понна. Соин ик ачим та уж борды басьтӥськи. Дыр ортче, крезь но мукет луыны кулэ ини. Быдӟым крезез вашкалаосмы куто вал, инмаръёссылы вӧсяськыку, озьыен, сцена вылэ поттон понна сое мукетгес кароно. Амал шедьтӥ кадь. Нырысь ик лэсьтӥ покчиослы крезь, нылпиос садикысен ик соин мед шудозы шуыса. Озьы кылдӥз пичи крезь. Быдӟым вашкала крезез тупатӥ, сое пиналъёслы шудоно кадь кари. Мӧйыослы бадӟым крезь малпай на. Та дырозь инструментлэн нокыӵе этнической но академической инъетэз ӧй вал. Табере со кылдӥз. Учке ай, та куинь крезез артэ пуктыса, пӧрме куинь поколение: нылпи, атай но песятай. Нош крезьгуръя учконо ке, луэ прима, альт, бас.
- Та дырозь удмуртъёслэн бадӟым крезьзы но ӧй вал на.
- Бен, куд-огез шуэ: быдӟым крезез воштыны уг яра. Мон удмурт адями, озьыен, сыӵе правое вань. Малы ке шуоно мон эшшо бадӟымзэ кылдытӥ, быдӟымгес кари. Озьыен - эшшо ӝутӥ. Поръёслэсь кылэме вань: калык инструментэнызы - кершен - егит ныл шудыны уг быгаты ке, бызьыны солы вазь на. Поръёс туж вылӥ дунъяло кершсэс. Асьмелэн, жаляса верано, озьы ӧвӧл на. Кунгожсьӧръёс тросгес тунсыкъясько крезен, шаерамы улӥсьёс сярысь. Киямы крезь кутэм интые, малпаськиськом: дышетсконо-а, ӧвӧл-а, милям-а, ӧвӧл-а? Ваньмыз ӧз валалэ на ай, вашкалазэ тодыса но ӵуказезэ малпаса гинэ, туннэ нуналын улод шуыса.
- Маин ӵошатысалды та инструментэз, мар со сётэ тӥледлы?
- Крезьлы мон туж зол синмаськемын, пересьёсмы сое юнме быдӟым шуиллямтэ ук. Сое ӵошатыны луоз мудорен. Черкъёсын вань бӧрдӥсь обросъёс, нош крезь - жингыртӥсь мудор. Со сюлэмез буйгатэ яке бугыртэ. Удмуртъёс сярысь шуо: лябесь, асьсэды быдто. Йыромиды, уд тодӥське азьланяз кызьы улыны? Кутэ кияды крезь. Шудэмды уг луы ке но, бичалэ сиоссэ, вераське, кылзэ куаразэ. Со юрттоз шонер сюрес шедьтыны, инсьӧрез усьтыны. Нош музыкантъёслы та инструмент пыдэстэм дуннеез кузьма, крезьгурез шӧдыны-возьматыны бадӟымесь луонлыкъёс сётэ. Крезен шудыны луэ калык крезьгуръёсты но, классикаез но. Кылзэ ай, кызьы чузъяське П. Чайковскийлэн вальсэз, макем лэйкыт но небыт кылӥське. Солэн куараез сюлме пыре, вирсэръёс кузя кошке.
- Сергей Кунгуровен эшъяськиськоды-а?
- Мынам кык турлы учконэ адями шоры. Со кинлы ке атай, кузпал луэ, таиз ласянь Сергей Кунгуровез гажасько. Нош профессионал сямен ми соин вожвылъяськыны кулэ, дыр, малы ке шуоно мон, удмурт адями, калык инструментэз лэсьтӥсь но шудӥсь, солы сётски ке, шонер уз луы. Ужрадъёсысен пумиськылыкумы, шуисько: Сергей Николаевич, кытын пинал усточиосыд, выль крезьёсыд, возьматы калыклы. Ми уго нылпиосын но студентъёсын пӧртэм ужрадъёсы асьме крезьёсын ветлӥськом.
Мон та крезьгурчилы тау карисько вашкала инструментэз улӟытэмез понна. Ми Воткинскын асьмеос лэсьтыны кутским крезез. Калык али милесьтым крезьёсмес басья, шаерысьтымы крезьгуръя школаосын но пӧртэм коллективъёсын инструментъёсынымы шудо.
- Тӥ асьтэос крезь лэсьтӥськоды-а?
- Крезьёсмес лэсьто Воткинскысь Станислав но Дмитрий Калистратовъёс. Мон соослы верасько, кыӵегес мыным кулэ. Лэсьтон амалзэ кӧня ке пол вошъям. Вашкалаосмы, крезьлэн куараез жингрес мед луоз шуыса, лэсьтоно пуэз лапас улын, кӧс турынэн ӵоктаса, ог 10 ар куасьто вылэм. Али озьы уг выро ни. Туннэ нуналлы милям 100-лэсь уно крезьмы, нырысетӥеныз ӵошатыса, соос трослы умойгес луизы ни, но таосыз но мынам сюлэмъям ӧвӧл на, буёлзэ но воштысал. Усточиосылы та сярысь уг вераськы, малы ке шуоно ваньмыз пыкиське коньдон борды. Собере, али нырысетӥ интыын - инструментлэн лыдыз, крезьёс тросгес мед луозы, соин котькытын мед шудозы. Бӧрысь ини ӟечлыкез борды но пыр-поч басьтӥськыны луоз. Шуом, араз витьсэ, дунозэ но устозэ, лэсьтод но, тырмоз. Мынам кыкетӥ бадӟым малпанэ - Удмуртиын мед усьтысалзы крезь лэсьтонъя мастерской, отчы вань уждунме сётыны но жаль ӧй потысал.
- Нош кыӵе нырысетӥез льӧль малпанды?
- Мон малпасько удмурт национальной оркестр сярысь. Вань ук ӟучъёслэн, грузинъёслэн, армянъёслэн сыӵе оркестръёссы, нош маин асьмеос пӧртэм? Удмурт кун филармониысь «Золотая мелодия» оркестре кык-куинь крезь пыртӥд ке но, со ӟуч ик кылёз. Мон кылдытысал удмуртсэ, отчы пыртысал 5 пыж крезез, сомында ик пичизэ, бадӟымзэ, 10 быдӟым крезез, 5 кубызэз, дымбыраез, чипсонэз, озьы ик флейтаез но контрабасэз, соос удмурт крезьгурлы матын луо. Воткинскын специалистъёс ӧжыт, Ижын та ужез капчигес вырӟытыны луысал. Но мар веранэз оркестр сярысь, асьмелэн быдэсак удмурт национальной коллективмы но ӧвӧл. Тани яратоно «Айкаймы» ӟуч кырӟанъёсты ӟуч инструментъёс шудэм улсын быдэстысал ке, нош удмуртъёссэ - быдэсак удмуртъёсыныз, мон соосты инмозь ӝутысал.
- Глазовысь пединститутлэсь крезьгуро люкетсэ йылпумъяса, тӥ вуиды Воткинске. Соку ик-а удмуртлыкез ӝутон борды басьтӥськиды?
- Ӧй, мон Воткинске вуи 1977-тӥ арын. Удмурт луэмелэсь возьдаськисько вал. Огпол дорам кыӵе ке пиосмурт лыктӥз но юа: тон, пе, удмурт ӧвӧл-а? Ӧвӧл шуи ук. Но аръёс ортчемъя кепыран ыше вылэм, мынэсьтым но возьдаськонме воштӥз-вормиз калыкеным данъяськон мылкыд. Удмуртъёс борды монэ кыскизы Воткинскысь «Тюрагай» ансамбле ветлӥсьёс - Альбина Вахрушева, Тамара Бочкарёва, Валентина Черыгова. Валамон ини, ӟуч городын удмуртлыкез ӝутыны капчи ӧвӧл, но мылкыдыд луиз ке, одно ик маке пӧрмоз. Крезен шудонъя кружок усьтӥмы 1-тӥ школаын, собере крезья класс кылдӥз крезьгуро школаын. Пиналъёсын туж усто ужаз Владимир Иванович Корепанов. Со ик кылдытӥз «Крезьчи» ансамблез. Жаль, та дано адями улонысь вазь кошкиз, табере солэсь ужзэ азьланьтӥсько мон. Азьло аръёсы городын удмурт сямен уг верасько ке вал, табере мон урокъёсме но удмурт сямен нуисько. Нош педколледжысь студентъёслэн «Сайкан» ансамбльзылы 10 ар тырмиз ини, озьы ик милям вань на дышетӥсьёслэн ансамбльзы но.
- «Сайкан» ансамблез умойгес тодо кадь республикалэн палэназ.
- Ёросъёсын милемды тодмало, Ижын уггес. Сое маин герӟаны луоз? Пыд йылэ султонлы, дӥсь вуронлы, крезь лэсьтонлы но репертуар дасянлы трос кужым но дыр кошкиз. Но со понна туннэ нуналлы ми тунсыко программаен зол коллектив. Пӧртэм фестивальёсы пыриськиськом, котькудаз устоос радэ шедиськом. Кылсярысь, Карелиын 2007-тӥ арын ортчем калыккуспо «Кантеле» фестивальысь нырысетӥ интыен вуим, ар ортчыса, Казаньысь «Волга но Урал вискын» конкурсын устоез луим. Москваын ортчем «Садко» фестивальысь кылем арын дипломен бертӥмы. Сьӧрлось калык милемды туж умой пумита: бӧрдыса кылзо, султыса чабо, нош республикаямы оло ми вань, оло ӧвӧл. Сыӵе мылкыд кылдылӥз. Но тани кылем арын Ижын концерт сётӥм. Табере шоркарамы но милемды умой тодо ини. Миым ортчем «Зарни пилем» ужрадын гран-при басьтӥмы. Пусйыны кулэ, калык мыло-кыдо кылзэ крезен шудӥсьёсты, та инструмент ялан паймытъя. Туж трос но пӧртэм учыръёс соин герӟаськемын.
- Кылсярысь…
- Удмурт кун университетэ концертэн мынӥм. Куазь арня ӵоже ини дугдылытэк зоре вал. Кутским кырӟаны: «Шунды но ӝужа но». Шӧдтэк шорысь зор дугдӥз, пилем сьӧрысь шунды потӥз. Кырӟанмы быриз, куазь нош ик ведра дурын кадь кисьтыны ӧдъяз. Яке тани Москваын концерт сётыкумы, паймымон учыр вал. «Э, пе, ӟазеге» калык кырӟанэз быдэстыкумы, кытысь ке ӧвӧл сцена вылэ тылобурдо вуиз. Ӟольгыри кадь бурдо ми азьын тэтчаз-эктӥз но кырӟан бырем бере кытчы ке лобӟиз. Залын пукисьёс но, ми но паймыса ик кылим. Кылем арын Эграла вуылӥм. Азьпал радын пичи дыды мемееныз пуке. Крезен шудэммес кылыса, анаезлэсь, пе, юа: зэмзэ-а соос сыӵе чебер шудо? Нэнэез сое милемлы концерт бере вераз ини. Кӧня оркестрен, баянэн шудӥм, нокинлэн но озьы юамез ӧй вал, нош крезь пичи дыдылэсь но сюлэмзэ вырӟытӥз.
- Сергей Семёнович, нош секыт-а соин шудыны?
- Вань кык сюрес. Одӥгез - капчиез-огшорыез амал, шуом, кинлэн ке дышетскемез потэ, со кияз крезь кутэ. Крезен вераськыны быгатыны кулэ. Чиньыосты асьсэос быръёзы сиосты, огпол, кык пол озьы киостэ вырытод, куинетӥяз одно ик маке пӧрмоз. Нош шугез сюрес - чиньыос медаз йыроме, гур лэйкыт мед кошкоз. Баянын но фортепьяноын тӧдьы но сьӧд бирдыё клавишаос вань. Нош крезьын вань сиос огкадесь. Кызьы-о 21 си пӧлысь соку ик «до» нотаез шедьтод? Со понна вань нимысьтыз методика. Дышетӥсьлы котьма карыны быгатоно. Мон колледжын калык инструментъёсъя отделениен кивалтӥсько, крезен шудыны дышетӥсько, соин ачим ик методичкаос дасясько, тани матысь дыре нош ик одӥгез пособие потыны кулэ. Мон тунсыкъяськисько наукаен. Соин ик аспирантурае дышетскыны пыри. Диссертация гожтыны ваньмыз дась, но сое радъяны трос дыр кулэ. Учёнойёслэн соиз ласянь капчи, библиотекаын пуко, ужзы мынэ. Нош мон али крезез улӟытон, пиналъёсты дышетон, ансамбльын шудон но кивалтон ужме куштӥ ке, ваньмыз тып дугдоз. Куашкатыны уго капчи, нош выльысь кутскыны секыт. Соин ик аслым шуи: крезьчиосты будэтэме али котькыӵе защиталэсь но дуно. Диссертациме аналтыны уг малпаськы, кутскем ужез одно ик йылпумъяно, оло, азьланяз солы дыры шедёз ик.
- Кин тӥледлы крезьгур дуннее сюрес усьтӥз, анай-атайды дэмлаз яке асьтэлэн мылкыдды вал?
- Мон вордӥськемын Сьӧлта ёросысь Парсьгуртын. Семьяямы 8 нылпи вал. Анае ялан шуылӥз, гуртын немар карыны, тӥледлы дышетсконо. Агайёсыным арганэн шудылӥм, нош крезьлэсь куаразэ кылэммы но ӧй вал. Сьӧлта черкогуртын крезьгуръя школа усьтӥськем бере анае отчы лэзиз, мон соку 6-тӥ классын дышетскисько вал. Отысь дышетӥсьёс сюлмам пыӵатӥзы крезьгурез яратон мылкыд. Школаез йылпумъясьёс пӧлын нырысетӥез вал, 1 номеро удостоверениез мыным сётӥзы. Соин, вылды, ялан нырысетӥ луыны тыршисько, ужано ке - лулысь-сюлмысь.
- Табере трос кивоштӥсьёс будэтӥды ни, дыр?
- Педколледжамы ми дасяськомы нылпи садъёслы, школаослы но культура юртъёслы специалистъёсты. Кытын гинэ соос ужаны уг кутско, одно ик кылдыто яке крезен шудонъя кружок, яке ансамбль. Озьыен, милям мытэм ужмы азинтӥське, таиз ласянь учконо ке, кивоштӥсьёсмы туж уно ини. Аслам нылпиосы но та удысэз уз куштэ шуыса оскисько. Ольга нылы педколледжын ик ужа, «Сайканын» но, дышетӥсьёслэн ансамблязы но шудэ. Миша пие Петрозаводскысь консерваториез горд дипломен йылпумъяз, али отын ик аспирантураын дышетске. Но сюлмы висе мукетыз пумысен: колледжамы студентъёс крезез дышето факультатив амалэн гинэ, со ичи. Учконо ке, мукет калыкъёсты, ӟучъёс балалайказэс, домразэс, карелъёс кантелезэс консерваториын дышетонозь вуттӥзы ини, нош асьмелэн крезьгуръя но культурая училищеосын крезьлы дышетон классъёс но усьтэмын ӧвӧл на.
- Тӥляд кузпалды но крезьгур удысын тырше-а?
- Уг, кышное Любовь Аркадьевна заводын ужа. Но туж умой монэ вала, тодэ ук: крезьгуртэк улэме уз луы. Любаеным ми тодматским сюанысен. Пинал дыръя арганчи луыса, юмшанъёстӥ ветлоно вал ук. Монэ ӧтизы шулдыртыны, отысен ик тодматски бадӟым но туж умой семьяен: Любалэн 10 сузэр-вынъёсыз. Кузпалы ӟуч, удмуртсэ соку Воткинскысь уд шедьты вал. Но мон бырйи ӟучез пӧлысь самой ӟечсэ. Солэн огпол но тышкаськемез ӧвӧл, котьку юрттылӥз гинэ. Нылпиосын пичиысен конкурсъёстӥ ветлӥм, кузпалы сцена вылэ потон дӥсь вурылӥз. Концертысь бер бертӥськом, милемды со ческыт сиёнэн вите. Мон туж шудо кузпал но атай.
- Крезьгурчи сяна, тӥ - дышетӥсь.
- Та туж секыт но дано уж. Мон педколледжын 34 ар тыршисько ини. Туж умой валай одӥгзэ: визьмо, сюлмо, ужзэ яратӥсь луэм сяна, дышетӥсь котыр ласянь чылкыт луыны кулэ. Мынам малпамея, астэ студентлэсь вылӥе пуктӥд ке, тон дышетӥсь ӧвӧл ни. Студентэд номыр уг тоды, уг быгаты, нош тон йырдэ урдыса ветлӥськод ке, со шонер ӧвӧл. Пиналъёсты кылзыны-валаны быгатоно. Дышетскемзы уг поты яке уг пӧрмы - тышкаськемлэсь азьло тодоно мугзэ, оло солэн семьяяз маке луиз, оло синмаськиз. Уг яра соосты курланы. Тросэз шуозы: ми егит дыръямы мукетэсь вал, бен, соку вакыт но мукетгес вал.
- Озьыен, туала егитъёсты тӥ чик уд курлаське?
- Мыным огез гинэ уг яра - соос азьтэмгес. Но со бордын асьмелэн, бадӟымъёслэн, янгышмы. Малы анай-атайёс пиналъёссэс ужез яратыны уг дышето? Милям мамамы юн сямо вал, папамы туж визьмо, мон али но соослы тау карисько ужаны дышетэмзы понна. Мамамы милемыз 4 часын сайкатэ вал, школае мынон азьын кыед мед поттом шуыса. Ветлӥськом вал фермае скал кыскыны, гужемъёсы колхозын тыршим. Макем зол ужатод нылпиез пичиысен, сокем зол шумпотод будэмъяз. Нош туала егитъёс лябесьгес, бызьыны уг быгато, усё, ӵукна султэмзы уг поты. Бен, соос чупресэсь, олома но карыны быгато, но азьтэмесьгес.
- Гуртэ ке улыны кыльысалды, кин меда луысалды?
- Монэ гурт, инкуазь котьку бордаз кыскиз. Соин ик Шаркан ёросысь Сильво гуртысь корка басьтӥ, вань сузэр-вынъёсы сямен, муш вордӥсько. Гуртэ кыльысал ке, механизатор луысал, дыр. Но мынам мукет сюресэ вылэм. Анаелы тау, нуиз монэ крезьгуръя школае. Мон быгатӥ удалтон кизилиме кутыны, аслэсьтым удысме, интыме, шудме шедьтӥ. Мукетъёсызлэн, оло, сыӵе кизилиоссы вить но, дас но луо, нош кутыса уг вутто яке уг адӟо. Таиз ласянь мыным удалтӥз.
Источник:
За предоставление материала выражаем огромную благодарность редакции газеты "Удмурт дунне"
